རྒྱུན་བསང་བསྡུས་པ་དངོས་གྲུབ་ཆར་འབེབས།
རྒྱུན་བསང་བསྡུས་པ་དངོས་གྲུབ་ཆར་འབེབས་བཞུགས་སོ།
ཨོཾ་ཨཱཿཧཱུྃ། བླ་མ་དཀོན་མཆོག་རྣམ་གསུམ་ལ། །སྒོ་གསུམ་གུས་པས་སྐྱབས་སུ་མཆི། །འགྲོ་བ་སེམས་ཅན་ཀུན་དོན་དུ།བདག་གི་བསང་དང་མཆོད་པ་བྱ། །ཆོས་རྣམས་སྟོང་པའི་ངང་ཉིད་ལས། །རང་ཉིད་རྡོ་རྗེ་གྲོ་ལོད་སྐུ། །སྨུག་ནག་སྤྱན་གསུམ་ཨོཾ་གཅིག་བསྡམས།ཐོར་ཚུགས་ཕོད་ཁ་ཆོས་གོས་གསོལ། །རྡོ་རྗེ་ཕྱར་ཞིང་ཕུར་པ་འདྲིལ། །སྟག་མོའི་སྟེང་ན་འདོར་ཐབས་བཞེངས། །ཡེ་ཤེས་དམ་ཚིག་དབྱེར་མེད་པ། །ཐུགས་སྲོག་ཧཱུྃ་ལས་འོད་འཕྲོས་པས། །བསང་མགྲོན་ཐམས་ཅད་སྤྱན་དྲངས་གྱུར། །ཧཱུྃ། སྐུ་གསུམ་དག་
པའི་ཞིང་ཁམས་ནས། །འཇིག་རྟེན་འདས་དང་མ་འདས་པའི། །ལྷ་དང་སྲུང་མ་ཐམས་ཅད་རྣམས། །གནས་འདིར་སྤྱན་འདྲེན་གཤེགས་སུ་གསོལ། །གཙོ་འཁོར་འཚམས་པའི་གདན་ལ་བཞུགས། །དངོས་འབྱོར་ཡིད་སྤྲུལ་མཆོད་པ་འབུལ། །ཡན་ལག་དྲུག་ཅུའི་དབྱངས་ཀྱིས་བསྟོད། ཀྱཻ། བསང་གི་རྒྱུད་བྱུང་གང་ནས་བྱུང་། །གྲངས་མེད་བསྐལ་པའི་སྔོན་རོལ་དུ། །བཅོམ་ལྡན་ཤཱཀྱ་ཐུབ་པ་ཉིད།རྒྱལ་པོ་ཆོས་ཀྱི་དབང་ཕྱུག་གྱུར། །དེ་ཡིས་སངས་རྒྱས་མཆོད་པའི་ཕྱིར། །སྤོས་ཀྱི་རིལ་བུ་གཅིག་བསྲེགས་ནས། །སིལ་སྙན་དཀྲོལ་ཞིང་
བསང་མཆོད་མཛད། །སྤོས་སྤྲིན་ན་བུན་ཆེན་པོ་ཡིས། །ཞག་བདུན་བར་དུ་འཛམ་གླིང་ཁྱབ། །དེ་ནས་བསང་བྱུང་གང་ནས་བྱུང་། །སློབ་དཔོན་འཕགས་པ་ཀླུ་སྒྲུབ་ཀྱིས།འཛམ་གླིང་སྤྱི་བསང་བསྡུས་པ་བརྩམ། །རྒྱ་གར་ལྷ་འདྲེ་ཐམས་ཅད་མཉེས། །རྡོ་རྗེ་གདན་གྱི་གཙུག་ལག་གྲུབ། །དེ་རྗེས་སློབ་དཔོན་པདྨ་ཡིས། །ཞི་བརྔན་བསང་གསུམ་ཆོ་ག་མཛད། །བོད་ཀྱི་ལྷ་འདྲེ་ཐམས་ཅད་མགུ། །དཔལ་གྱི་བསམ་ཡས་གཙུག་ལག་གྲུབ། །དེ་རྗེས་རང་བྱུང་རྒྱལ་བ་ཡིས། །འཛམ་གླིང་སྤྱི་བསང་རྒྱས་པ་མཛད། །ཁམས་སོགས་ས་བདག་ཀླུ་གཉན་དགའ། །སོག་གི་ཆུ་ལ་ཟམ་པ་བཙུགས། །སྔོན་གྱི་སྲིད་པ་དེ་བཞིན་དུ། །ད་ལྟ་རྣལ་འབྱོར་བདག་ཅག་གི །བཟང་ཤིང་སྣ་ཚོགས་བསྲེགས་པ་ཡི། །འབྲུ་སྣ་ཕྱེ་མར་ཟས་ཕུད་མཆོད། །ཇ་ཆང་འོ་ཞོའི་ཕུད་ཀྱིས་མཆོད། །རཾ་ཡཾ་ཁཾ་གིས་མི་གཙང་སྦྱངས། །ཨོཾ་ཨཱཿཧཱུྃ་གིས་བྱིན་གྱིས་རློབས། །དྷཾ་ལས་ལྷ་མོ་བདུག་སྤོས་མ། མཐིང་གསལ་མཛེས་སྡུག་རྒྱན་རྣམས་རྫོགས། །ཕྱག་གཡས་བུམ་པས་ཉམས་གྲིབ་བཀྲུ། །གཡོན་པས་སྨན་སྤོས་གཞོང་པ་བསྣམས། །སྤོས་སྤྲིན་བསང་དུད་ཁམས་
གསུམ་ཁྱབ། །རབ་འབྱམས་སངས་རྒྱས་ཞིང་ཁམས་ཀུན། །སྤོས་ཀྱི་འཁྲི་ཤིང་དྲ་བ་འཁྲིགས། །དུ་བའི་ཆ་ཤས་རེ་རེ་ལ། །འདོད་ཡོན་ལྔ་དང་རྒྱལ་སྲིད་བདུན། །བཀྲ་ཤིས་རྫས་རྟགས་མཆོད་པའི་ཚོགས། །ཅི་འདོད་ལོངས་སྤྱོད་ཆར་ལྟར་འབེབས། །དེ་འདྲའི་ངོ་མཚར་མཆོད་པ་འདིས། ཀྱཻ། ཆོས་སྐུ་ཀུན་བཟང་ཡབ་ཡུམ་བསང་། །ཡུམ་ཆེན་ཤེས་རབ་ཕར་ཕྱིན་བསང་། །དྲུག་པ་རྡོ་རྗེ་འཆང་ཆེན་བསང་། །ལོངས་སྐུ་རིགས་ལྔ་ཡབ་ཡུམ་བསང་། །སྤྲུལ་སྐུ་སངས་རྒྱས་སྟོང་རྩ་བསང་། །ཐུབ་པའི་གནས་བརྟན་བཅུ་དྲུག་བསང་། །གུ་རུ་སྐུ་ལྔ་མཚན་བརྒྱད་བསང་། །རྒྱ་གར་གྲུབ་ཆེན་བརྒྱད་ཅུ་བསང་། །བོད་ཀྱི་རྗེ་འབངས་ཉེར་ལྔ་བསང་། །ལོ་པཎ་ཆོས་རྒྱལ་ཐམས་ཅད་བསང་། །རྒྱ་བོད་མཁས་གྲུབ་ཐམས་ཅད་བསང་། །རྩ་བར་བརྒྱུད་པའི་བླ་མ་བསང་། །མགོན་པོ་ཚེ་དཔག་མེད་པ་བསང་། །ཡི་དམ་ཐུགས་རྗེ་ཆེན་པོ་བསང་། །རྒྱུད་སྡེ་བཞི་ཡི་ལྷ་ཚོགས་བསང་། །ཐེག་པ་དགུ་ཡི་ལྷ་ཚོགས་བསང་། །དམར་ནག་མེ་ཕྲེང་ལྷ་ཚོགས་བསང་། །འཇམ་དཔལ་གཤིན་རྗེའི་ལྷ་ཚོགས་བསང་། །དབང་ཆེན་རྟ་
མགྲིན་ལྷ་ཚོགས་བསང་། །གསང་བདག་རྡོ་རྗེ་གཏུམ་པོ་བསང་། །བཀའ་དགོངས་ཕུར་གསུམ་ལྷ་ཚོགས་བསང་། །བདེ་གསང་འཇིགས་གསུམ་ལྷ་ཚོགས་བསང་། །སྒྲོལ་མ་ཉི་ཤུ་རྩ་གཅིག་བསང་། །ཕག་ཁྲོས་སེང་གསུམ་ལྷ་ཚོགས་བསང་། །མགོན་ཆེན་སྡེ་བཞི་འཁོར་བཅས་བསང་། །མ་ནིང་མཆེད་གསུམ་རིགས་ལྔ་བསང་། །མགོན་ཆེན་བཞི་བཅུ་ཞེ་ལྔ་བསང་། །དཔལ་ལྡན་ལྷ་མོ་དཔོན་གཡོག་བསང་། །ལྷ་མོ་སྟོང་དང་རྩ་བརྒྱད་བསང་། །དཔལ་མགོན་བདུན་ཅུ་རྩ་གཉིས་བསང་། །ཞིང་སྐྱོང་ཉི་ཤུ་རྩ་གཅིག་བསང་། །མཁའ་འགྲོ་སུམ་ཅུ་སོ་གཉིས་བསང་། །དྲེགས་པའི་སྡེ་དཔོན་སུམ་ཅུ་བསང་། །སྔགས་བདག་དྲེགས་ཆེན་བཅོ་བརྒྱད་བསང་། །དུར་ཁྲོད་བདག་པོ་བདག་མོ་བསང་། །དམ་ཅན་མགར་བ་དམར་ནག་བསང་། །མཆེད་འཁོར་སུམ་བརྒྱ་དྲུག་ཅུ་བསང་། །ནོར་ལྷ་རྣམ་སྲས་རིགས་བརྒྱད་བསང་། །གཏེར་བདག་ཛཾ་ལྷ་རིགས་ལྔ་བསང་། །ནོར་རྒྱུན་ལྷ་མོ་མཆེད་ལྔ་བསང་། །གནོད་སྦྱིན་འབྲོག་གནས་མཆེད་ལྔ་བསང་། །རེ་མན་ལྷ་ལྔ་བརྒྱ་བསང་། །གནོད་སྦྱིན་ནོར་ལྷ་མཆེད་བརྒྱད་བསང་། །མ་
གཅིག་དཔལ་ལྡན་ལྷ་མོ་བསང་། །ཨ་ཕྱི་ཆོས་སྒྲོན་མཆེད་ལྔ་བསང་། །བཀྲ་ཤིས་ཚེ་རིང་མཆེད་ལྔ་བསང་། །རྡོ་རྗེ་གཡུ་ཡི་སྒྲོལ་མ་བསང་། །བོད་ཁམས་བརྟན་མ་བཅུ་གཉིས་བསང་། །རྗེ་ཡི་མགུར་ལྷ་བཅུ་གསུམ་བསང་། །དགེ་བསྙེན་ཉི་ཤུ་རྩ་གཅིག་བསང་། །ཕྱོགས་བཞིའི་གཉན་ཆེན་སྡེ་བཞི་བསང་། །གཉན་ཕྲན་བཞི་བཅུ་རྩ་གཉིས་བསང་། །ཕ་མཚུན་དགྲ་ལྷ་ཐམས་ཅད་བསང་། །ཞིང་ལྷ་ཁྱིམ་ལྷ་ཐམས་ཅད་བསང་། ཀྱཻ། ཡང་གཅིག་བསང་ཞིང་མཆོད་པ་ནི། །ངོམ་རྒྱལ་མཚོ་བཀྲ་ལ་སོགས་པའི། །ངོམ་གྱི་རྒྱལ་ཆེན་བཅོ་བརྒྱད་བསང་། །གཡོ་རྫོང་མཚོ་སྨན་ལ་སོགས་པའི། །ངོམ་གྱི་མཚོ་སྨན་སྤྱན་གསུམ་བསང་། །གོ་རྒྱལ་རྡོ་རྗེ་བདུད་འཇོམས་ལ་སོགས་པའི། །རྫ་ཡི་གཞི་བདག་ཐམས་ཅད་བསང་། །དཀར་པོ་མཛེས་ལ་སོགས་པའི། །དཀར་ཕྱོགས་ཀླུ་རིགས་ཐམས་ཅད་བསང་། །ནག་པོ་སྦལ་མགོ་ལ་སོགས་པའི། །ཀླུ་བདུད་ཀླུ་བཙན་ཐམས་ཅད་བསང་། །སྐུ་རྒྱལ་ཤེ་ནེ་ལ་སོགས་པའི། །མདོ་ཁམས་སྒང་གི་གཞི་བདག་བསང་། །ཚམ་ཕུ་དུང་རྣ་ལ་སོགས་པའི། །ཆམ་གྱི་གཞི་བདག་
ཐམས་ཅད་བསང་། །རྫ་རྒྱལ་ངང་པ་ལ་སོགས་པའི། །རྫ་ཡི་གཞི་བདག་ཐམས་ཅད་བསང་། །སྤྱམ་རྒྱལ་ཕྱག་མཛོད་ལ་སོགས་པའི། །སྤྲམ་གྱི་གཞི་བདག་ཐམས་ཅད་བསང་། །གསང་རྒྱལ་གཏམ་རྒྱལ་སྤ་རྒྱལ་སོགས། །ལྕི་དཔལ་གཏམ་གསུམ་གཞི་བདག་བསང་། །ཁྱད་པར་ཡུལ་ཕྱོགས་འདིར་གནས་པའི། །ལྷ་ཀླུ་གནོད་སྦྱིན་དྲི་ཟ་དང་། །ས་བདག་ཡུལ་བདག་གྲོང་གི་བདག །གནས་འདིའི་གཞི་བདག་གཉན་པོ་ཀུན། །ཡིད་ཀྱི་གཟུགས་ཅན་ཐམས་ཅད་ལ། །ཕྱེ་མར་འབྲུ་སྣ་ཟས་ཕུད་དང་། །ཇ་ཆང་འོ་ཞོའི་ཕུད་ཀྱིས་མཆོད། །ཐམས་ཅད་མཉེས་ཤིང་ཚིམ་གྱུར་ཅིག །བླ་མ་རྣམས་ཀྱིས་བྱིན་གྱིས་རློབས། །ཡི་དམ་རྣམས་ཀྱིས་དངོས་གྲུབ་སྩོལ། །མཁའ་འགྲོ་རྣམས་ཀྱིས་བར་ཆད་སོལ། །ཆོས་སྐྱོང་རྣམས་ཀྱིས་ཕྲིན་ལས་སྒྲུབས། །ནོར་ལྷ་རྣམས་ཀྱིས་ཕྱུ་གཡང་ཕོབ། །གཞི་བདག་རྣམས་ཀྱིས་སྡོང་གྲོགས་མཛོད། །གྲིབ་དང་མི་གཙང་སང་གྱུར་ཅིག་།ཕོག་ཐུག་འགྲམ་འཁྲུག་ཞི་གྱུར་ཅིག །མཐུན་རྐྱེན་བསམ་པ་འགྲུབ་པར་མཛོད། །དེ་ནས་ཁུ་ཡེ་ནི། རྐང་བཞི་ནོར་གྱི་ཕྱུགས་གཡང་དེ། །ཁུ་ཡེ་ཕྱྭ་དང་གཡང་དུ་ལེན། །
བང་མཛོད་འབྲུ་ཡི་ནས་གཡང་དེ། །ཁུ་ཡེ་ཕྱུ་དང་གཡང་དུ་ལེན། །མི་འཕེལ་རྟ་གཡག་དངོས་གྲུབ་དེ། །ཁུ་ཡེ་ཕྱྭ་དང་གཡང་དུ་ལེན། །འཆི་མེད་ཚེ་ཡི་དངོས་གྲུབ་དེ། །ཁུ་ཡེ་ཕྱྭ་དང་གཡང་དུ་ལེན། །ཐུགས་དང་འགལ་བ་ཐམས་ཅད་བཤགས། །མགྲོན་རྣམས་གཤེགས་བཞུགས་ཅི་དགྱེས་མཛོད། །ཕུན་སུམ་ཚོགས་པའི་བཀྲ་ཤིས་ཤོག །དགེ་བས་འགྲོ་ཀུན་བྱང་ཆུབ་ཤོག །ཐམས་ཅད་དམིགས་མེད་སྤྲོས་དང་བྲལ། །སྐྱེ་མེད་ཆོས་སྐུའི་ཀློང་དུ་ཨ་ཨཱཿ །ཞེས་རྒྱུན་བསང་དངོས་གྲུབ་ཆར་འབེབས་༧ ཀརྨ་ཨ་རཱ་གས་སྦྱར་བའོ། །དགེ་ལེགས་འཕེལ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།