བརྔན་ཆུང་རིན་ཆེན་ཕྲེང་བ།
བརྔན་ཆུང་རིན་ཆེན་ཕྲེང་བ་ནི། ན་མོ་གུ་རུ་ཡ། བརྔན་གྱི་བཅའ་ཐབས་ནི། རི་རབ་སྟེང་དུ་དཀར་གཏོར་འདབ་བརྒྱད་ལ་འཁོར་བཤོས་བུ་ལྔ་ཡིས་བསྐོར། འབྱོར་ན་གཟུགས་འགྲོས་དགོས། མ་འབྱོར་ན་ཤེལ་ཚིགས་མཆོད་ལ། བསྐྱེད་ཆོག་བྱིན་རླབས་སྔོན་ལ་སོང་བས་མཐུས། ཨོཾ་ཨཱཿཧཱུྃ་གིས་བྱིན་བརླབས་པའི་བརྔན་གཏོར་ལོངས་སྤྱོད་ཆར་འབེབས་གྱུར༔ ཤེལ་ཚིགས་ཁྲི་དཀར་སྟོང་ནག་འདི༔ རྟ་བརྒྱ་ནོར་སྟོང་ལུག་ར་ཁྱི༔ མཛོ་དྲེལ་འབྲུ་སྨན་དར་ཟབ་རྩི་ཤིང་དང་༔ གཏོར་མ་འདོད་ཡོན་ལྔ་ལྡན་ཆར་འབེབས་གྱུར༔ ཧཱུྃ༔ འདས་དང་མ་བྱོན་ད་ལྟ་དུས་གསུམ་གྱི༔ སངས་རྒྱས་ཆོས་དང་དགེ་འདུན་དཔག་མེད་ལ༔ ཕྱག་འཚལ་བརྔན་གྱི་མཆོད་པ་སྣ་ཚོགས་འབུལ༔ སྣང་མཐའ་སྤྱན་གཟིགས་པདྨ་འབྱུང་གནས་དང་༔ གྲུབ་ཆེན་བརྒྱད་ཅུ་ཉེར་ལྔ་གཏེར་སྟོན་ལ༔ ཕྱག་འཚལ་བརྔན་གྱི་མཆོད་པ་སྣ་ཚོགས་འབུལ༔ བླ་མ་ཡི་དམ་མཁའ་འགྲོ་ཆོས་སྐྱོང་དང་༔ ནོར་ལྷ་གཏེར་བདག་སྲུང་མ་རྒྱ་མཚོ་ལ༔ ཕྱག་འཚལ་བརྔན་གྱི་མཆོད་པ་སྣ་ཚོགས་འབུལ༔ མགོན་པོ་ཕོ་རྒྱུད་ཆོས་སྐྱོང་རྒྱ་མཚོ་དང་༔ ལྷ་མོ་མོ་རྒྱུད་ཆོས་སྐྱོང་རྒྱ་མཚོ་ལ༔ ཕྱག་འཚལ་བརྔན་གྱི་མཆོད་པ་
སྣ་ཚོགས་འབུལ༔ བརྟན་མ་བཅུ་གཉིས་ཡ་མ་སྐྱོང་མ་དང་༔ དཔལ་མགོན་བདུན་ཅུ་དྲེགས་པ་ཐམས་ཅད་ལ༔ ཞི་དང་བརྔན་གྱི་མཆོད་པ་སྣ་ཚོགས་འབུལ༔ ཕྲིན་ལས་རྣམ་བཞི་མྱུར་དུ་བསྒྲུབ་ཏུ་གསོལ༔ ཀྱཻ༔ རི་རབ་རི་བདུན་རོལ་པའི་མཚོ་བདུན་དང་༔ གླིང་བཞི་གླིང་ཕྲན་དག་ལ་གནས་པ་དང་༔ ས་བདག་ཀླུ་གཉན་གཞི་བདག་ཟོ་དོར་བརྔན༔ རྒྱ་གར་རྒྱ་ནག་ལི་ཡུལ་བོད་ཡུལ་དང་༔ མདོ་ཁམས་སྒང་དྲུག་དབུས་གཙང་རུ་བཞིའི་བདག༔ ས་བདག་ཀླུ་གཉན་གཞི་བདག་ཐམས་ཅད་བརྔན༔ མངའ་རིས་སྐོར་གསུམ་ཏི་སེ་ཙ་རི་དང་༔ སྦས་གནས་བཞི་དང་གཏེར་གནས་ཐམས་ཅད་ལ༔ ས་བདག་ཀླུ་གཉན་གཞི་བདག་ཐམས་ཅད་བརྔན༔ ལྷ་ས་བསམ་ཡས་ཁྲ་འབྲུག་ཟངས་རི་དང་༔ གནས་ཆེན་བརྒྱ་དང་གནས་ཕྲན་ཐམས་ཅད་ཀྱི༔ ས་བདག་ཀླུ་གཉན་གཞི་བདག་ཐམས་ཅད་བརྔན༔ ཐང་ལྷ་འོད་དེ་ཡར་ལྷ་སྐུ་ལྷ་དང་༔ མཁའ་རི་ལ་ཕྱི་དྭགས་ལ་སྒམ་པོ་ཡི༔ ས་བདག་ཀླུ་གཉན་གཞི་བདག་ཐམས་ཅད་བརྔན༔ རྨ་རྒྱལ་གཟེ་རྒྱལ་གཏམ་རྒྱལ་ཛོ་རྒྱལ་དང་༔ རྒྱལ་ཆེན་བརྒྱ་དང་རྩ་བརྒྱད་ལ་གནས་པའི༔ ས་བདག་ཀླུ་གཉན་
གཞི་བདག་ཐམས་ཅད་བརྔན༔ རྩི་རྒྱལ་དཀར་རྒྱལ་རྣམ་རྒྱལ་རྫིག་རྒྱལ་དང་༔ ནོར་བུ་ལྷ་རྩེ་མེ་འབར་མཚོ་ལ་སོགས༔ ས་བདག་ཀླུ་གཉན་གཞི་བདག་ཐམས་ཅད་བརྔན༔ ལྷ་ཀླུ་བདུད་བཙན་མ་མོ་གཤིན་རྗེ་དང་༔ གནས་དཔོན་རྒྱལ་པོ་ཤ་ཟ་སྲིན་པོའི་རིགས༔ ས་བདག་ཀླུ་གཉན་གཞི་བདག་ཐམས་ཅད་བརྔན༔ གཟའ་ཀླུ་ཐེའུ་རང་འབྱུང་པོ་བརྟན་མ་དང་༔ དམ་སྲི་ཡུལ་འདྲེ་བགེགས་ཀྱི་རིགས་གྱུར་པའི༔ ས་བདག་ཀླུ་གཉན་གཞི་བདག་ཐམས་ཅད་བརྔན༔ ཕ་རི་ཚུར་རི་གཡས་རི་གཡོན་རི་དང་༔ མདུན་རི་རྒྱབ་རི་མཚེར་ས་སྨྲ་ཁང་གི༔ ས་བདག་ཀླུ་གཉན་གཞི་བདག་ཐམས་ཅད་བརྔན༔ ཆུ་ཆེན་བརྒྱ་དང་ཆུ་ཕྲན་སྟོང་རྩ་དང་རྒྱ་མཚོའི་ཆུ་མིག་རྫིང་དུ་གནས་པ་ཡི༔ ས་བདག་ཀླུ་གཉན་གཞི་བདག་ཐམས་ཅད་བརྔན༔ གཟའ་དང་སྐར་མ་ལོ་ཟླ་ཞག་དུས་དང་༔ འབྱུང་བ་ལྔ་ལ་རྒྱུ་བའི་ལྷ་ཚོགས་དང་༔ ས་བདག་ཀླུ་གཉན་གཞི་བདག་ཐམས་ཅད་ཨཱཿ བརྔན༔ ཁྱེད་རྣམས་བརྔན་གཏོར་འདོད་ཡོན་འདི་བཞེས་ལ༔ བདག་ཅག་ཡོན་མཆོད་མི་ནོར་འཁོར་བཅས་ཀྱི༔ མི་ནད་ཕྱུགས་ནད་ཡམས་ནད་ཞི་བ་དང་༔ ཕྲིན་ལས་རྣམ་
བཞི་མྱུར་དུ་འགྲུབ་པར་མཛོད༔ ཅེས་ཚར་གྲངས་སོང་ནས་ཕུལ་ལོ། །སྔགས་འཆང་རཱག་སྱས་མཛད་པའོ། །སརྦ་མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།