ཞི་བསང་ཤིན་ཏུ་བསྡུས་པ།
ཞི་བསང་ཤིན་ཏུ་བསྡུས་པ་བཞུགས་སོ། ཀྱཻ། དད་པ་དང་ནི་དམ་ཚིག་གིས། །བླ་མ་ཡི་དམ་དཀོན་མཆོག་གསུམ། །མཁའ་འགྲོ་ཆོས་སྐྱོང་ནོར་ལྷའི་ཚོགས། །གཞི་བདག་ཡུལ་ལྷ་གནས་བདག་རིགས། །སྡེ་བརྒྱད་ལན་ཆགས་བགེགས་རིགས་མགྲོན། །མ་ལུས་འཁོར་བཅས་སྤྱན་འདྲེན་ནོ། །རང་རང་དགྱེས་པའི་གདན་ལ་བཞུགས།དངོས་འབྱོར་ཡིད་སྤྲུལ་མཆོད་རྫས་དང་། །བཟང་ཤིང་ཕྱེ་མར་གསུར་གྱིས་མཆོད། །ཐུགས་དང་འགལ་བའི་ནོངས་པ་བཤགས། །ནད་གདོན་བར་ཆད་ཞི་བར་མཛོད།ཡམས་ནད་རིམས་ནད་ཞི་བར་མཛོད། །གློ་གོར་ཧོན་གསུམ་ཞི་བར་མཛོད། །རླུང་མཁྲིས་བད་ཀན་ཞི་བར་མཛོད། །ཕོ་གདོན་མོ་གདོན་ཞི་བར་མཛོད། །ཀླུ་ནད་གཉན་ནད་ཞི་བར་མཛོད། །གཟའ་ནད་བཙན་ནད་ཞི་བར་མཛོད། །རྒྱལ་ནད་གཤེད་བཞི་ཞི་བར་མཛོད། །ས་བདག་ནད་རྣམས་ཞི་བར་མཛོད། །འཆི་བདག་ནད་རྣམས་ཞི་བར་མཛོད། །མི་ནད་རྟ་ནད་ཞི་བར་མཛོད། །ནོར་ནད་ལུག་ནད་ཞི་བར་མཛོད། །ར་ནད་ཁྱི་ནད་ཞི་བར་མཛོད། །བཙའ་སད་སེར་གསུམ་ཞི་བར་མཛོད། །ཞི་བའི་ལས་
ཀུན་བསྒྲུབ་ཏུ་གསོལ༔ ཨོ་ཨ་ཀ་ནི་ནི་ཀ་ནི་ཨ་བྷི་ལ་མཎྜ་ལ་མ་ཡེ་སྭ་ཧཱཿ ཞེས་གོ་འཇོའི་ཡུལ་དུ་བསང་མཆོད་གཅིག་གི་སྐབས་སུ་བླ་མས་ཞི་བསང་ཅི་མང་དགོས་གསུངས་ཀྱང་ཞི་བསང་གྲངས་མང་པོ་མི་ཐུབ་པའི་རྐྱེན་གྱིས༔ ༧ སྔགས་འཆང་རཱ་ག་ཨ་སྱས་ཐུན་སྐབས་ཤིག་ལ་སངས་རྒྱས་སྨན་བླའི་ཐུགས་དགོངས་བསྐྱེད་ནས་དེ་མ་ཐག་ཏུ་ཚིག་ཉུང་འདི་གསུངས་སོ། །སརྦ་མངྒ་ལཾ།། །།