ལྷ་མོ་དུད་སོལ་མ་ཡི་བསང་།
ལྷ་མོ་དུད་སོལ་མ་ཡི་བསང་བཞུགས་སོ།། བྷྱོ༔ བྱང་ཤར་ཐོད་པ་འཕྲུལ་གྱི་གཞལ་ཡས་ནས། །མ་གཅིག་དཔལ་ལྡན་ལྷ་མོ་དུད་སོལ་མ། །ཕྲིན་ལས་བཞི་སྒྲུབ་དཀར་སེར་དམར་ལྗང་མདོག །ནག་མོ་འབུམ་སྡེའི་ཚོགས་རྣམས་གཤེགས་སུ་གསོལ། །འདིར་བྱོན་དགྱེས་པའི་གདན་ལ་བཞུགས་སུ་གསོལ། །ལུས་ངག་ཡིད་གསུམ་གུས་པས་ཕྱག་འཚལ་ལོ། །བསང་མཆོད་དམ་པ་འབུལ་གྱིས་བཞེས་སུ་གསོལ། །སྐུ་གསུང་ཐུགས་ལྡན་མཁའ་འགྲོའི་ཚོགས་ལ་བསྟོད། །བྷྱོ༔ མི་མངོན་དབྱིངས་བཞུགས་ལྷ་མོ་དུད་སོལ་མ། །ཁྱོད་ལ་བསང་མཆོད་དམ་པ་འབུལ་བ་ནི། །དཀར་གསུམ་མངར་གསུམ་ཕྱེ་མར་ཟས་ཕུད་དང་། །བདུད་རྩི་ཤིང་མཆོག་རྩི་མར་གསུར་མཆོད་དང་། །འབྲུ་སྣ་དར་ཟབ་རིན་ཆེན་སྣ་བདུན་དང་། །བྱ་ནག་མཁའ་ལྡིང་དབྱི་དཀར་གསེར་མིག་སོགས། །མི་དབང་མི་ཚིམ་ལྕོགས་ཞུན་གཡབ་དར་གྱིས། །མ་གཅིག་དཔལ་ལྡན་ལྷ་མོ་འཁོར་བཅས་བསང་། །བདག་ཅག་དཔོན་སློབ་ཡོན་མཆོད་མི་ནོར་ལ། །ཚེ་བསོད་དཔལ་འབྱོར་རྒྱས་པའི་དངོས་གྲུབ་སྩོལ། །སྐུ་གསུང་ཐུགས་སྤྲུལ་མ་མོ་མཆེད་གསུམ་བསང་། །གཞི་
བྱེས་ལམ་གསུམ་ཀུན་ཏུ་དགེ་ལེགས་སྩོལ། །ཕྱོགས་བཞི་སྐྱོང་མཛད་རིགས་བཞིའི་མཁའ་འགྲོ་བསང་། །ཆོས་མཛད་བུ་བཞིན་སྐྱོང་བའི་ཕྲིན་ལས་མཛོད། །དུར་ཁྲོད་སྐྱོང་བའི་བརྙན་མཆེད་བརྒྱད་བསང་། །གནོད་བྱེད་དགྲ་བགེགས་བསྒྲལ་བའི་ཕྲིན་ལས་མཛོད། །ཕྱོགས་བཞིའི་ལས་སྒྲུབ་ལྷ་མོ་དྲེལ་ཞོན་མ། །སྐུ་སྤྲུལ་དཀར་མོ་འབུམ་སྡེ་འཁོར་བཅས་བསང་། །ཞི་བའི་ཕྲིན་ལས་འགྲུབ་པའི་ལས་མཛོད་ཅིག །རྒྱས་པའི་ལས་སྒྲུབ་སེར་མོ་འབུམ་སྡེ་བསང་། །ཚེ་བསོད་དཔལ་འབྱོར་རྒྱས་པའི་དངོས་གྲུབ་སྩོལ། །དབང་སྨྱོགི་ལས་སྒྲུབ་དམར་མོ་འབུམ་སྡེ་བསང་། །སྣང་སྲིད་ལྷ་འདྲེ་མི་གསུམ་དབང་དུ་བསྡུས། །དྲག་པོའི་ལས་སྒྲུབ་ལྗང་ནག་འབུམ་སྡེ་བསང་། །གནོད་བྱེད་དགྲ་བགེགས་བསྒྲལ་བའི་ཕྲིན་ལས་མཛོད། །འགུགས་འདྲེན་སྡོམས་འཆིང་ཕྱོགས་བཞིའི་སྒོ་མ་བསང་། །རྣལ་འབྱོར་བདག་གི་ཁ་འཛིན་རྒྱབ་རྟེན་མཛོད། །བྷྱོ༔ མ་གཅིག་དཔལ་ལྡན་ལྷ་མོ་དུད་སོལ་མ། །སྲིད་པའི་མ་མོ་བྱེ་བ་འབུམ་སྡེའི་ཚོགས། །ཁྱོད་ལ་གསོལ་མཆོད་ཕྲིན་ལས་བཅོལ་བ་ནི། །སངས་རྒྱས་བསྟན་སྲུང་དཀོན་མཆོག་དབུ་འཕང་བསྟོད། །བཤད་སྒྲུབ་
བསྟན་པ་རྒྱས་པའི་ཕྲིན་ལས་མཛོད། །བདག་ཅག་དཔོན་སློབ་ཡོན་མཆོད་མི་ནོར་ལ། །ཉིན་གསུམ་བྱ་ར་མཛོད་གཅིག་དུད་སོལ་མ། །མཚན་གསུམ་མེལ་ཚེ་མཛོད་གཅིག་དུད་སོལ་མ། །ནད་གདོན་དལ་ཡམས་ཟློག་ཅིག་དུད་སོལ་མ། །ལུས་དང་གྲིབ་བཞིན་འགྲོགས་ཤིག་དུད་སོལ་མ། །རྒྱབ་རྟེན་དཔུང་རོགས་མཛོད་ཅིག་དུད་སོལ་མ། །གནོད་བྱེད་དགྲ་བགེགས་སྒྲོལ་ཅིག་དུད་སོལ་མ། །དགྲ་ཇག་ཆོམ་རྐུན་འཆིང་བའི་ཕྲིན་ལས་མཛོད། །དགྲ་བོའི་བདུན་རྒྱུད་རྩད་ནས་ད་ཆོད་ལ། །བཅོལ་བའི་ཕྲིན་ལས་ཐོགས་མེད་འགྲུབ་པར་མཛོད། །ཅེས་པ་སྒེས་སྣ་བླ་མས་བསྐུལ་ནས་ཨ་རཱ་གས་བྲིས་པའོ།། །།