མངའ་གསོལ་ཐུགས་རྗེའི་ལྕགས་ཀྱུ།
མངའ་གསོལ་ཐུགས་རྗེའི་ལྕགས་ཀྱུ་ཞེས་བྱ་བ་བཞུགས་པའི་དབུ་ཕྱོགས་ལགས་སོ།
བསང་གི་ཞོར་ལ་མངའ་གསོལ་བྱེད་འདོད་ན། །བདག་གི་བདག་མདུན་གཉིས་པོ་ཚར་བའི་རྗེས། །གཞུང་འདོན་པའི་གོང་དེ་རུ་གཏོར་ཆུང་ཡོད་ན་གོང་གི་གཏོར་བསྔོས་བྱ། མེད་ན་ཕྱེ་མར་ལ་སོགས་མཆོད་བྱས་ལ།། ཧཱུྃ་བྷྱོ༔ རི་རབ་རྩེ་མོ་སུམ་རྩེན་ལྷ་ཡི་ཡུལ། །ཡོངས་འདུས་ཤིང་དྲུང་མུ་ལེ་མཐིང་གི་མཚོ། །རིན་ཆེན་ལྔ་ལྡན་ཐོད་པའི་སྐུ་མཁར་ནས། །མ་གཅིག་ལྷ་མོ་དཔོན་གཡོག་འཁོར་དང་བཅས། །འདིར་གཤེགས་མངའ་གསོལ་བསང་དང་མཆོད་པ་བཞེས། །ཕྱི་ལྟར་གང་གཱའི་ལྷ་མོ་དབྱངས་ཅན་མ། །ནང་ལྟར་རྡོ་རྗེ་ཕག་མོ་མཁའ་འགྲོའི་གཙོ། །གསང་བ་དཔལ་ལྡན་ལྷ་མོ་དུད་སོལ་
མ། །ཡང་གསང་ཆོས་སྐུ་སྐྱེ་མེད་འཕགས་བཞིའི་ཡུམ། །ཚེ་རབས་གཏན་གྱི་བསྐྱབ་ཏུ་མངའ་གསོལ་ལོ། །ངན་སོང་འཁོར་བའི་འཇིགས་ལས་སྐྱོབ་པར་མཛོད། །དགྱེས་པ་རྡོ་རྗེའི་རིགས་མཆོག་བདག་མེད་མ། །རྟ་མགྲིན་ཡུམ་ཆེན་པདྨ་གཟི་ལྡན་མ། །གཤིན་རྗེ་གཤེད་པོའི་ཡུམ་ཆེན་རོ་ལངས་མ། །རབ་འབྱམས་དཀྱིལ་འཁོར་ཀུན་གྱི་གཙོ་མོ་སྟེ། །བདག་གི་ཡི་དམ་མཆོག་ཏུ་མངའ་གསོལ་ལོ། །ཁྱོད་ཀྱིས་བིརླ་པ་ལ་དབང་བསྐུར་བས། །ས་དྲུག་ནོན་ནས་ཉི་མ་བརྟོད་ལ་མནན། །དེ་བཞིན་བདག་ལ་དབང་བསྐུར་བྱིན་གྱིས་རློབས། །སྤྱན་
རས་གཟིགས་ཀྱི་ཚེམས་ཀྱི་རྩེ་ནས་སྤྲུལ། །ཕྱག་ན་རྡོ་རྗེའི་སྤྱན་གྱི་དབུས་ནས་སྤྲུལ། །དགྱེས་པ་རྡོ་རྗེའི་ཕྱོགས་བཞིའི་སྒོ་བཞི་སྲུང་། །རང་བྱུང་མཆོད་རྟེན་བརྒྱད་ཀྱིས་སྲུང་མ་མཛད་། །ས་བརྒྱད་ལ་གནས་སེམས་དཔའ་ཐུགས་རྗེ་ཅན། །བདག་གི་ལམ་སྣ་འདྲེན་པར་མངའ་གསོལ་ལོ། །བྱང་ཆུབ་ལམ་ལ་བར་ཆད་མེད་པར་མཛོད། །དབང་ཕྱུག་སྲས་མོ་དཀར་མོ་དུང་སྐྱོང་མ། །ལྷོ་ཕྱོགས་གཤིན་རྗེའི་སྲིང་མོ་འཇིགས་གཟུགས་ཅན། །བདུད་ཀྱི་བུ་མོ་ནག་མོ་རེ་མ་ཏི། །ངོ་བོ་གཅིག་ལ་རྣམ་པ་དཔོན་གཡོག་ཚུལ། །ནམ་ཟླ་དུས་བཞིའི་སྐྱེ་འགྲོ་ཁྲམ་ལ་འདེབས། །བདག་གི་སྐག་ཟློག་ཆེན་མོར་མངའ་གསོལ་ལོ། །ཁྲམ་ཕྱེས་ཤོ་གཏོར་དལ་ཡམས་རྐྱེན་ཁ་ཟློག །རྣམ་བཞིའི་འཁོར་ལོ་སྡེ་སྣོད་གསུམ་གྱི་ཆོས། །འཆད་ཉན་སྒོམ་སྒྲུབ་སུ་ཡིས་བྱེད་པ་རྣམས། །བུ་བཞིན་སྐྱོང་ཞིང་དེ་ཡི་ཕོ་ཉ་བྱ། །དམ་ལས་འགལ་ན་རང་སྲོག་མེ་འབར་ནས། །དམྱལ་བར་སོང་ཞེས་རྒྱལ་བའི་སྤྱན་སྔ་རུ། །དམ་བཅས་ཐ་ཚིག་ཕུལ་བའི་དམ་ཅན་མ། །བདག་གི་བཀའ་སྲུང་མཆོག་ཏུ་མངའ་གསོལ་ལོ། །རྟག་ཏུ་སྲུང་སྐྱོབ་མེལ་ཚེ་མ་གཡེལ་ཅིག །དུས་ངན་མི་རྣམས་
ལོག་པར་སྤྱོད་པའི་ཚེ། །ལྷ་མོ་དཔོན་གཡོག་ཁྲོས་པའི་ཁ་རླངས་ལས། །མི་ནད་ཕྱུགས་ནད་ནད་སྤྲིན་སྔོ་དམར་འཁྲིགས། །དེ་ཕྱིར་ནད་ཀྱི་བདག་མོ་ཞེས་སུ་གྲགས། །བདག་གི་ལས་མཁན་མཆོག་ཏུ་མངའ་གསོལ་ལོ། །ཞིང་བཅུ་ཚངས་བའི་བསྟན་དགྲ་དམ་ཉམས་ལ། །བཞི་བརྒྱ་རྩ་བཞི་ནད་ཀྱི་ས་བོན་ཐོབ། །ལྷ་མོ་ཁྱོད་ལ་མཆོད་བསྟོད་སྔགས་བཟླས་ནས། །ནད་རིགས་བཞི་བརྒྱ་རྩ་བཞི་ཞི་བར་མཛོད། །དེ་ཕྱིར་བདུད་རྩི་སྨན་གྱི་རྒྱལ་མོར་གྲགས། །བདག་གི་སྨན་པ་མཆོག་ཏུ་མངའ་གསོལ་ལོ། །བདག་ཅག་དཔོན་སློབ་ཡོན་མཆོད་མི་ནོར་ལ། །ཞལ་ནས་བདུད་རྩིའི་ཆར་པའི་རྒྱུན་ཕོབ་ལ། །ནད་གདོན་དལ་ཡམས་རིམས་ནད་ཞི་བར་མཛོད། །ལྷ་མོའི་ཕྲིན་ལས་བཞི་ཡི་རྣམ་འཕྲུལ་ལས། །ཕྱི་ལྟར་རྒྱུ་སྐར་ལྷ་མོ་ཉི་ཤུ་བརྒྱད། །ནང་ལྟར་དབང་ཕྱུག་ཉེར་བརྒྱད་དཀྱིལ་འཁོར་སྐྱོང་། །གསང་བ་གནས་ཆེན་ཉེར་བརྒྱད་གནས་བདག་མོ།༔ འདིར་གཤེགས་མངའ་གསོལ་བསང་དང་མཆོད་པ་བཞེས། །ཤར་གྱི་མ་བདུན་མ་ལྟར་བྱམས་མཛོད་ལ། །ནད་གདོན་བར་ཆད་ཚོགས་རྣམས་ཞི་བར་མཛོད། །ལྷོ་ཡི་སྲིང་བདུན་
སྲིང་ལྟར་གདུང་སེམས་ཀྱིས། །ཚེ་དང་བསོད་ནམས་དབང་ཐང་རྒྱས་པར་མཛད། །ནུབ་ཀྱི་མཛའ་བདུན་མཛའ་ལྟར་བརྩེ་སེམས་ཀྱི། །ཡིད་ལ་འདོད་པའི་དངོས་གྲུབ་དབང་བསྡུས་ལ། །བྱང་གི་བྲན་བདུན་བྲན་ལྟར་བཀའ་ཉོན་ཅིག །ཇི་ལྟར་བཅོལ་བའི་ཕྲིན་ལས་མྱུར་འགྲུབ་མཛོད། །རི་རྩེ་བྲག་རོང་ཆུ་མདོ་དུར་ཁྲོད་སོགས། །གནས་ཆེན་གནས་ཕྲན་དུར་ཁྲོད་ཐམས་ཅད་དུ། །སྤྲུལ་པའི་འཇིག་རྟེན་མ་མོ་རླུང་ལྟར་འཚུབ། །འདིར་གཤེགས་མངའ་གསོལ་བསང་དང་མཆོད་པ་བཞེས། །དལ་ཡམས་རྐྱེན་ཁ་ཟློག་པའི་ཕྲིན་ལས་མཛོད། །དཔལ་ལྡན་ལྷ་མོ་དཔོན་གཡོག་རྫུ་འཕྲུལ་ཅན། །ཉིན་གསུམ་རི་རབ་རྩེ་ནས་བྱ་ར་མཛོད། །མཚན་གསུམ་སྟོང་གསུམ་འཛམ་གླིང་ཁྱབ་པར་རྒྱུག །དེ་ཕྱིར་བྱ་ར་མ་དང་རྒྱུག་བྱེད་མ། །རྣལ་འབྱོར་བདག་གི་སྲུང་མར་མངའ་གསོལ་ལོ། །ཉིན་གྱི་བྱ་ར་མཚན་གྱི་མེལ་ཚེ་མཛོད། །ལྷ་མོ་དཔོན་གཡོག་སྐུ་གསུང་ཐུགས་ཡོན་ལས། །ཕྲིན་ལས་ལྔ་ཡི་སྤྲུལ་པའི་ལྷ་མོ་ནི། །དཀར་མོ་དམར་མོ་ནག་མོ་སེར་མོ་དང་། །ལྗང་མོ་ལ་སོགས་བྱེ་བ་འབུམ་ཕྲག་ལྔ། །བདག་གི་མགོན་དང་དཔུང་དུ་མངའ་གསོལ་ལོ། །དུས་
རྣམས་རྟག་ཏུ་བཀྲ་ཤིས་བདེ་ལེགས་སྩོལ། །ལྷ་མོའི་ཡང་སྤྲུལ་འཇིག་རྟེན་ལྷ་མོ་ནི། །རབ་བརྟན་མ་དང་མ་གཅིག་དཔལ་ལྷ་མོ། །ཨ་ཕྱི་མཆེད་ལྔ་ཚེ་རིང་མཆེད་ལྔ་དང་། །ཕག་མོ་མཆེད་ལྔ་གཡུ་སྒྲོན་མཆེད་ལྔ་དང་། །ཀུན་འཁྱིལ་མཆེད་གསུམ་ལ་སོགས་དངོས་གྲུབ་བདག །བདག་གི་ནོར་ལྷའི་མཆོག་ཏུ་མངའ་གསོལ་ལོ། །རྨ་གཡང་དངོས་གྲུབ་ནམ་མཁའི་ཆར་ལྟར་ཕོབ། །ལྷ་མོའི་བཀའ་སྡོད་འཇིག་རྟེན་ལྷ་མོ་ནི། །བརྟན་མ་བཅུ་གཉིས་སྐྱོང་མ་བཅུ་གཉིས་དང་། །ཡ་མ་བཅུ་གཉིས་མཚོ་སྨན་མཆེད་དགུ་སོགས། །རེ་རེའི་འཁོར་ལ་སྨན་བྲན་འབུམ་ཕྲག་རེ། །ལྷབ་ལྷུབ་དར་ཟབ་མང་པོའི་རྒྱན་དང་བཅས། །རིན་ཆེན་རྒྱན་ཆ་རོལ་མོའི་སྒྲ་དང་བཅས། །དྲི་བཟང་སྤོས་སྤྲིན་་ཝཱམང་པོའི་ངད་དང་བཅས། །འདིར་གཤེགས་མངའ་གསོལ་བསང་དང་མཆོད་པ་བཞེས། །བདག་གི་ཡུལ་ལྷའི་མཆོག་ཏུ་མངའ་གསོལ་ལོ། །གཞི་བྱེས་ལམ་གསུམ་ཀུན་ཏུ་བདེ་ལེགས་སྩོལ། །དེ་ལྟར་ལྷ་མོ་དཔོན་གཡོག་འཁོར་བཅས་ལ། །ཡིད་ལས་སྤྲུལ་པའི་མཆོད་སྤྲིན་རྒྱ་མཚོ་དང་། །དངོས་འབྱོར་དཀར་གསུམ་ཟས་ཕུད་ཕྱེ་མར་དང་། །འབྲུ་སྣ་
སྨན་སྣ་རིན་ཆེན་ཕྱེ་མ་དང་། །བཟང་ཤིང་སྣ་ཚོགས་དུད་སྤྲིན་ནམ་མཁའ་བཀང་། །གསོལ་ལོ་མཆོད་དོ་ལྷ་མོ་འཁོར་བཅས་གསོལ། །བསང་ངོ་བསང་ངོ་ཉམས་གྲིབ་དག་གྱུར་ཅིག་བརྔན་ནོ་མཆོད་དོ་ལྷ་མོ་འཁོར་བཅས་བརྔན། །བསང་དང་ཞི་བའི་མཆོད་པ་འདི་བཞེས་ལ། །བར་ཆད་རྐྱེན་ངན་ཐམས་ཅད་ཞི་བ་དང་། །བཀྲ་ཤིས་བདེ་ལེགས་ཐམས་ཅད་འཕེལ་བར་མཛོད། །དྷེ་ཝི་ཀཱ་ལི་ས་པཱ་རི་ཝཱ་ར་སརྦ་པུཙྪ་ཁཱ་ཧི་བཛྲ་དྷུ་པེ་པྲ་ཏིཙྪཡེ་སྭཱ་ཧཱ། ཞེས་པ་འདི་ནི་རི་པ་བླ་མ་བསོད་ནམས་དོན་འགྲུབ་ཀྱིས་བསྐུལ་ངོར་ལ་བརྟེན་ནས། ལུག་ལོ་ཆོ་འཕྲུལ་ཆེན་པོའི་བཅུ་གཅིག་ལྷ་མོ་རྒྱུ་བའི་དུས་ཆེན་ལ། ༧ སྔགས་འཆང་རཱ་ག་ཨ་སྱས་སྨྲས་པ་ལྟར། །དགེ་བཤེས་སྦྱིན་པས་ཡི་གེར་བྲིས་པའོ། ཉེས་འགལ་མཆིས་ན་ལྷ་མོ་འཁོར་དང་བཅས་ལ་བཤགས། །དགེ་བས་གཞན་ཕན་རྒྱ་ཆེན་འབྱུང་གྱུར་ཅིག །སརྦ་མངྒ་ལཾ།། །།