ཆོས་སྐྱོང་རྡོ་རྗེ་ལེགས་པའི་བསང་ཡིག་བཀྲ་ཤིས་འཁྱིལ་པ།
ཆོས་སྐྱོང་རྡོ་རྗེ་ལེགས་པའི་བསང་ཡིག་བཀྲ་ཤིས་འཁྱིལ་པ་བཞུགས་སོ།། ཧཱུྃ། ཆོས་དབྱིངས་ལྷུན་གྲུབ་ཕོ་བྲང་ནས། །ཡེ་ཤེས་ལས་དང་འཇིག་རྟེན་གྱི། །རྡོ་རྗེ་ལེགས་པ་འདིར་གཤེགས་ཤིག །ཡིད་སྤྲུལ་དགྱེས་པའི་གདན་ལ་བཞུགས། །དངོས་འབྱོར་ཡིད་ཀྱིས་སྤྲུལ་པ་ཡི། །མཆོད་པའི་སྤྲིན་ཕུང་རྒྱ་མཚོས་མཆོད། །འོག་མིན་འཐུག་པོ་བཀོད་པ་ན། །བཅོམ་ལྡན་རྣམ་པར་སྣང་མཛད་ཀྱི། །ཐུགས་དགོངས་སྟོང་ཉིད་བཅུ་དྲུག་ལ། །སེམས་དཔའ་བཅུ་དྲུག་སྤྲུལ་པ་ལས། །རྡོ་རྗེ་རིགས་ཀྱི་སེམས་དཔའ་ཞིག །ལྗང་གུ་ཕྱག་གཉིས་སེ་གོལ་གཏོགས། །དེ་ཡི་སྟོབས་དང་རྫུ་འཕྲུལ་ལ། །སངས་རྒྱས་ཀུན་གྱིས་ལེགས་སོ་བརྗོད། །ཡེ་ཤེས་རྡོ་རྗེ་ལེགས་པ་ལ། །སྤྲོས་སྤྲིན་གསུར་གྱིས་བསང་ཞིང་མཆོད། །ངན་སོང་སྐྱེ་སྒོ་ཆོད་པར་ཤོག །སྲིན་ཡུལ་མ་ལ་ཡ་ཡི་རི། །སྲིན་མོ་ཁ་ཡི་བྲག་ཕུག་ནས། །ཕྱག་ན་རྡོ་རྗེའི་བཀའ་ཉན་ཅིང་། །གསང་སྔགས་སྲུང་མ་དམ་ཚིག་ཅན་། །རྡོ་རྗེ་སྲིན་པོ་ཞེས་ཀྱང་བྱ། །གསང་མཚན་བཛྲ་ཐིག་ལེ་རྩལ། །དམ་ཚིག་རྡོ་རྗེ་ལེགས་པ་ལ། །སྤོས་སྤྲིན་གསུར་གྱིས་བསང་ཞིང་མཆོད། །སྔགས་འཆང་བདག་གི་
སྲུང་མ་མཛོད། །རྟ་མཆོག་པདྨ་ཧེ་རུ་ཀའི། །ཐུགས་ལས་འོད་ཟེར་འཕྲོས་པ་ཡིས། །དམུ་བདུད་བཤོས་པའི་བུ་རུ་སྤྲུལ། །ལས་ཀྱི་རྡོ་རྗེ་ལེགས་པ་ལ། །སྤྲོས་སྤྲིན་གསུར་གྱིས་བསང་ཞིང་མཆོད། །སྔགས་འཆང་བདག་གི་ཕྲིན་ལས་སྒྲུབས། །ངོ་བོ་གཅིག་ལ་སྐུ་མཆེད་ཚུལ། །སྤྲུལ་པ་སུམ་བརྒྱ་དྲུག་ཅུ་འགྱེད། །སངས་རྒྱས་ཆོས་ཀྱི་མཚན་གསོལ་བ་། །དམ་ཅན་སུམ་བརྒྱ་དྲུག་ཅུ་བསང་། །གཡུང་དྲུང་བོན་གྱིས་མཚན་གསོལ་བ། །ཝེར་མ་སུམ་བརྒྱ་དྲུག་ཅུ་བསང་། །སྐྱེ་བོ་རྣམས་ཀྱིས་མཚན་གསོལ་བ། །དགྲ་བླ་སུམ་བརྒྱ་དྲུག་ཅུ་བསང་། །བུད་མེད་རྣམས་ཀྱིས་མཚན་གསོལ་བ། །རྫིའུ་སུམ་བརྒྱ་དྲུག་ཅུ་བསང་། །མོ་མ་རྣམས་ཀྱིས་མཚན་གསོལ་བ། །བདུད་ལྷ་སུམ་བརྒྱ་དྲུག་ཅུ་་བསང་། །རྣོ་མཐོང་མཁན་གྱིས་མཚན་གསོལ་བ། །རྣོ་ལྷ་སུམ་བརྒྱ་དྲུག་ཅུ་བསང་། །མུ་སྟེགས་རྣམས་ཀྱིས་མཚན་གསོལ་བ། །ཁས་གྲགས་སུམ་བརྒྱ་དྲུག་ཅུ་བསང་། མདོ་ཁམས་ཕྱོགས་སུ་མཚན་གསོལ་བ། །ཡེ་བརྫུ་སུམ་བརྒྱ་དྲུག་ཅུ་བསང་། །སུམ་བརྒྱ་དྲུག་ཅུའི་ཆེ་བ་སྟེ། །ཨ་ཇོ་རྡོ་རྗེ་ལེགས་པ་བསང་། །བརྒྱ་ནི་རྒྱ་གར་ཡུལ་ན་
བཞུགས། །རྒྱ་གར་ཆོས་ཀྱིས་སྲུང་མ་མཛད། །བརྒྱ་ཡི་ནང་ནས་ཆེ་བ་གཅིག །རྒྱ་གར་ཡུལ་གྱི་ནུབ་ཕྱོགས་ན། །གཤིན་རྗེའི་གྲོང་གདོང་དམར་པོ་ནི།ཕ་ཝཾ་ལོང་བུའི་མཁར་ན་བཞུགས། །ར་ཞོན་ཐོ་བ་སྡུད་པ་བསྣམས། །དམ་ཅན་མགར་བ་ནག་པོ་བསང་། །བརྒྱ་ནི་རྒྱ་ནག་ཡུལ་དུ་བཞུགས། །རྒྱ་ནག་རྩིས་ཀྱི་ཨ་ཇོ་བསང་། བརྒྱ་ཡི་ནང་ནས་ཆེ་བ་ཞིག །གསེར་མཁར་སེར་པོའི་རྩེ་ན་བཞུགས། །རྟ་ཆིབས་ར་ཡི་རྒྱལ་མཚན་ཕྱར། །དམ་ཅན་མགར་བ་སེར་པོ་བསང་། །བརྒྱ་ནི་སྟག་གཟིག་ཡུལ་དུ་བཞུགས། །སྟག་གཟིག་ནོར་གྱི་བདག་པོ་བསང་། །བརྒྱ་ཡི་ནང་ནས་ཆེ་བ་ཞིག །ཤེལ་བྲག་དཀར་པོའི་རྩེ་ན་བཞུགས། །དགྲ་སྟ་ར་ཡི་རྒྱལ་མཚན་འཛིན། །དམ་ཅན་མགར་བ་དཀར་པོ་བསང་། །དྲུག་ཅུ་བོད་ཡུལ་དབུས་ན་བཞུགས། །བོད་ཡུལ་གཙུག་ལག་སྲུང་མ་མཛད། །དྲུག་ཅུའི་ནང་ནས་ཆེ་བ་ཞིག །ཤང་དང་འོ་ཡུག་ས་མཚམས་ན། །ཕ་ཝང་ལོང་བུའི་མཁར་ན་བཞུགས། །གཙང་བཙན་རྡོ་རྗེ་ལེགས་པ་སྐྱོང་། །སེང་ཆིབས་རྡོ་རྗེ་ཙིཏྟ་བསྣམས། །དམ་ཅན་མགར་བ་དམར་པོ་བསང་། །བཅོམ་ལྡན་
ཕྱག་ན་རྡོ་རྗེ་ཡིས། །དམ་ལ་བཏགས་པའི་དམ་ཅན་རྣམས། །དམ་ཚིག་རྡོ་རྗེ་ལེགས་པ་བསང་། །སློབ་དཔོན་པདྨ་འབྱུང་གནས་ཀྱིས། །གཏེར་ཁ་བརྒྱ་རྩའི་སྲུང་མར་བསྐོས་། །གཏེར་སྲུང་རྡོ་རྗེ་ལེགས་པ་བསང་། །སྐྱེ་བོ་ཡོངས་ཀྱི་དགྲ་བླ་བྱེད། །དགྲ་བླ་རྡོ་རྗེ་ལེགས་པ་བསང་། །སྔགས་པ་ཡོངས་ཀྱི་སྲུང་མ་བྱེད། །བཀའ་སྲུང་རྡོ་རྗེ་ལེགས་པ་བསང་། །རྒྱ་བོད་བགྲོད་པའི་སྣ་འདྲེན་མཛད། །ཚོང་དཔོན་རྡོ་རྗེ་ལེགས་པ་བསང་། །དམག་དང་ཇག་གི་དཔུང་རོགས་བྱེད། །དམག་དཔོན་ཇག་དཔོན་ཆེན་པོ་བསང་། །དུད་འཐུལ་ཀུན་གྱི་ཁྱིམ་ལྷ་བྱེད། །ཕུག་ལྷ་རྡོ་རྗེ་ལེགས་པ་བསང་། །དེ་ལྟར་བསང་བའི་ཡོན་ཏན་གྱིས། །ནོར་དང་རིགས་རྒྱུད་སྤེལ་བ་དང་། །ལོངས་སྤྱོད་ཆར་ལྟར་འབེབས་པ་དང་། །ཅི་བསམ་དོན་རྣམས་འགྲུབ་པ་ཡི། །ཁྱོད་ལ་ཡོད་པའི་དངོས་གྲུབ་དེ། །བདག་ལ་རྒྱུན་དུ་སྩོལ་བར་མཛོད། །ཁ་འཛིན་སྡོང་གྲོགས་མ་གཡེལ་ཅིག །རྟག་ཏུ་ལོ་ལེགས་ལོངས་སྤྱོད་འཕེལ། །བཀྲ་ཤིས་བདེ་ལེགས་ཐམས་ཅད་ནི། །ཁུ་ཡེ་ཕྱྭ་དང་གཡང་དུ་ལེན། ༈ །རང་རང་གནས་སུ་གཤེགས་པའམ། །རྟེན་
ལ་བཞུགས་སོགས་གང་དགྱེས་མཛོད། ༈ །བཀྲ་ཤིས་མཐུ་རྩལ་ཆེ་བ་ཡི། །རྡོ་རྗེ་ལེགས་པས་བཀྲ་ཤིས་ཤོག །ཅེས་རིག་སྔགས་འཆང་བ་སྲི་ལུ་དང་དབོན་པོ་ནམ་མཁའ་དཔོན་གཉིས་ཀྱིས་བསྐུལ་བས་བཀའ་རྒྱ་དམ་ཡང་ངོ་མ་ཆོག་ནས། ༧ རཱ་ག་ཨ་སྱས་སྨྲས་པ་ལྟར་སྐུ་སྐྱེ་ཀུན་དགས་ཡི་གེར་བཀོད་པ་དགེ་ལེགས་འཕེལ།།