དམ་ཅན་སྐྱེས་བུ་ཆེན་པོའི་བསང་མཆོད།
དམ་ཅན་སྐྱེས་བུ་ཆེན་པོའི་བསང་མཆོད་བཞུགས་སོ།། ཀྱཻ། འོག་མིན་གནས་དང་མ་ལ་ཡ། །རྒྱ་གར་ཕ་ཝང་ལོང་བུའི་མཁར། །གཙུག་ལག་གནས་ཆེན་ཐམས་ཅད་ནས།སྐྱེས་བུ་ཆེན་པོ་འཁོར་དང་བཅས། །འདིར་བྱོན་བསང་དང་གསུར་མཆོད་བཞེས།། །ས་བཅུའི་སེམས་དཔའ་རྣམ་སྣང་འཁོར། །ཡེ་ཤེས་རྡོ་རྗེ་ལེགས་པ་བསང་། །ཕྱག་རྡོར་བཀའ་ཉན་རྣལ་འབྱོར་སྐྱོངས། །དམ་ཚིག་རྡོ་རྗེ་ལེགས་པ་བསང་། །རྒྱུ་གར་ནུབ་ཕྱོགས་དུར་ཁྲོད་ནས། །གནོད་སྦྱིན་མགར་བ་ནག་པོ་བསང་། །ཟམ་བུ་ལུང་གི་སྒོ་སྲུང་བ། །གཙང་བཙན་རྡོ་རྗེ་ལེགས་པ་བསང་། །མཐའ་དབུས་གཙུག་ལག་བརྒྱ་རྩའི་བདག །དཀོར་སྲུང་རྡོ་རྗེ་ལེགས་པ་བསང་། །བོད་ཡུལ་གཏེར་ཁ་བརྒྱ་རྩའི་བདག །གཏེར་སྲུང་རྡོ་རྗེ་ལེགས་པ་བསང་། །རྟ་མགྲིན་ཐུགས་སྤྲུལ་དྲག་རྩལ་ཅན། །དམ་ཅན་སྐྱེས་བུ་ཆེན་པོ་བསང་། །སེང་ཆིབས་འཁོར་བཅས་ནམ་མཁར་རྒྱུ། །གནམ་ལྷ་སྐྱེས་བུ་ཆེན་པོ་བསང་། །འབྲུག་ཆིབས་འཁོར་བཅས་བར་སྣང་རྒྱུ། །ཝེར་མ་སྐྱེས་བུ་ཆེན་པོ་བསང་། །ར་ཆིབས་འཁོར་བཅས་ས་གཞིར་རྒྱུ། །ཆོས་སྐྱོང་སྐྱེས་བུ་ཆེན་པོ་བསང་། །བན་
བོན་ཡོངས་ཀྱི་སྲུང་མ་སྟེ། །བཀའ་སྲུང་སྐྱེས་བུ་ཆེན་པོ་བསང་། །སྐྱེ་བོ་ཡོངས་ཀྱི་དགྲ་བླ་མཛད། །དགྲ་བླ་སྐྱེས་བུ་ཆེན་པོ་བསང་། །དམག་དང་ཇག་གི་དཔུང་རོགས་མཛད། །དམག་དཔོན་སྐྱེས་བུ་ཆེན་པོ་བསང་། །ཚོང་དང་མགྲོན་གྱི་སྡོང་གྲོགས་མཛོད། །དམག་དཔོན་མགྲོན་དཔོན་ཆེན་པོ་བསང་། །སྐྱེས་བུའི་དགྱེས་སྡེ་ཆེན་པོ་བསང་། །ཀོང་བཙུན་དེ་མོ་འཁོར་བཅས་བསང་། །སྐྱེས་བུའི་སྤུན་ཟླ་འཁོར་གྱི་ཚོགས། །མཆེད་ཟླ་སུམ་བརྒྱ་དྲུག་ཅུ་བསང་། །སྐྱེས་བུའི་སྐྱེ་བ་སྔོན་གྱི་ཡབ། །དམ་ཅན་ཆོས་ཀྱི་རྒྱལ་པོ་བསང་། །སྐྱེས་བུའི་འཁོར་དང་སྡེ་རིགས་ཏེ། །དགྲ་བླ་ཝེར་མ་འཁོར་བཅས་བསང་། །སྐྱེས་བུ་ཤིན་ཏུ་མཉེས་པའི་རྫས། །ར་ཤ་ར་ཚིལ་གསུར་དུད་དང་།མ་ཉམས་ཆང་ཕུད་གཙང་མས་བྲན། །མཆོད་དོ་སྐྱེས་བུ་ཆེན་པོ་མཆོད། །འཁོར་བཅས་མཉེས་ཤིང་ཚིམས་གྱུར་ཅིག །བཀྲ་ཤིས་བདེ་ལེགས་འགྲུབ་པར་མཛོད། །ཁྱད་པར་སྐྱེས་བུ་ཆེན་པོ་དང་། །ཡུལ་འདིའི་གཞི་བདག་ཁྱེད་རྣམས་ཀྱིས། །ཡུལ་དུ་འདུག་ན་རྒྱབ་རྟེན་མཛོད། །བྱེས་སུ་འགྲོ་ན་ཁ་འཛིན་མཛོད། །དགྲ་རྐུན་གཅན་གཟན་མ་བཏང་
ཞིག །ཡམས་ནད་རིམས་ནད་ཞི་བར་མཛོད། །དུས་རྣམས་ཀུན་ཏུ་བསྲུང་བ་དང་། །ཚེ་བསོད་དཔལ་འབྱོར་རྒྱས་པར་མཛོད། །ཅི་བསམ་འགྲུབ་པའི་ཁ།ཀརྨ་རཱ་ག་ཨ་སྱས་སོ། །སརྦ་མངྒ་ལཾ།། །།