འབྲོང་རིགས་ཀུན་གྱི་ཕ་མཚུན་གཉེན་པོ་སྟག་ཞོན་སྤོམ་ར་བན་ཐུང་བཅས་ཀྱི་བསང་མཆོད་འདོད་དོན་ཀུན་འགྲུབ།
འབྲོང་རིགས་ཀུན་གྱི་ཕ་མཚུན་གཉེན་པོ་སྟག་ཞོན་སྤོམ་ར་བན་ཐུང་བཅས་ཀྱི་བསང་མཆོད་འདོད་དོན་ཀུན་འགྲུབ་བཞུགས་སོ།།
རྩ་གསུམ་ལྷ་ལ་ཕྱག་འཚལ་ལོ། །ལྷ་སྲུང་གཉན་པོ་བསང་བའི་ཕྱིར། །བསང་ཁང་ཡིད་འོང་ཟླུམ་པོའི་ནང་། །ཕྱེ་མར་ཇ་ཆང་འབྲུ་སྣ་དང་། །ཕུད་རྒོད་ལ་སོགས་མཆོད་བཤམས་ནས། །བདེ་བའི་སྟན་ལ་འདུག་ནས་ནི། །ཁྲོས་འཁྲུག་ལོག་པའི་སེམས་སྤངས་ནས། །རོལ་མོ་དབྱངས་དང་བཅས་པ་ཡིས། ན་མོ། དཀོན་མཆོག་ཀུན་འདུས་པའི། །གུ་རུ་པདྨ་འབྱུང་གནས་ལ། །བདག་དང་འགྲོ་དྲུག་སྐྱབས་སུ་མཆི། །འགྲོ་ཀུན་བདེ་ལ་འགོད་བྱའི་ཕྱིར། །བྱང་ཆུབ་མཆོག་ཏུ་སེམས་བསྐྱེད་དོ། །ཆོས་ཀུན་མི་དམིགས་རྫོགས་པ་ཆེ། །དེ་ཡི་རང་མདངས་སྐད་ཅིག་ལས། །རང་ཉིད་རྡོ་རྗེ་གྲོ་ལོད་སྐུ། །སྨུག་
ནག་སྤྱན་གསུམ་ཨོཾ་གཙིགས་བསྡམ། །རྡོ་རྗེ་ཕྱར་ཞིང་ཕུར་བུ་གཟིར། །ཕོད་ཁ་ཆོས་གོས་མགོ་ཕྲེང་བརྒྱན། །སྟག་མོའི་སྟེང་ན་འདོར་སྟབས་བཞུགས། །དམ་ཡེ་དབྱེར་མེད་རྫོགས་པར་གསལ། །ཐུགས་སྲོག་ཧཱུྃ་ལས་འོད་འཕྲོས་པས། །བསང་མགྲོན་ཐམས་ཅད་སྤྱན་དྲངས་ནས། །ནམ་མཁའི་བར་སྣང་གང་བར་གྱུར། ཀྱཻ། སྐུ་གསུམ་དག་པའི་ཞིང་ཁམས་ནས། །བླ་མ་ཡི་དམ་མཁའ་འགྲོ་དང་། སངས་རྒྱས་བྱང་ཆུབ་སེམས་དཔའ་རྣམས། །གཤེགས་དང་བཞུགས་པ་མི་དམིགས་ཀྱང་། །བདག་ཅག་བསོད་ནམས་བསགས་པའི་མཐུས།
སྤྱན་དྲངས་མདུན་གྱི་ནམ་མཁར་བཞུགས། །མ་ཧཱ་ཀཱ་ལ་སྟག་ཞོན་པ། །དེ་ཉིད་སྒྲུབ་པའི་བན་ཐུང་མ། །གཉན་པའི་རྨ་གཉན་སྤོམ་ར་དང་། །མགོན་སྐྱབས་སྡོང་གྲོགས་བྱེད། པ་ཡི། །དགྲ་ལྷ་ཡུལ་ལྷ་ཕོ་ལྷ་རྣམས། །མཆོད་པའི་གནས་འདིར་གཤེགས་སུ་གསོལ། །ཡིད་སྤྲུལ་དགྱེས་པའི་གདན་ལ་བཞུགས། །དངོས་འབྱོར་ཡིད་ཀྱིས་སྤྲུལ་པ་ཡིས། ཉེར་སྤྱོད་བདུན་དང་འདོད་ཡོན་ལྔ། །བཀྲ་ཤིས་རྟགས་བརྒྱད་རྒྱལ་སྲིད་བདུན། །དར་ཟབ་འབྲུ་སྣ་རིན་ཆེན་བདུན། །མཆོད་པའི་སྤྲིན་ཕུང་རྒྱ་མཚོས་མཆོད། །སོ་སོར་ཡོན་ཏན་མཐའ་ཡས་པ། །གུས་པའི་ཡིད་ཀྱིས་ཕྱག་འཚལ་བསྟོད། །དྷི་ལས་དུད་པའི་ལྷ་མོ་ནི། །སྔོན་མོ་དར་དང་རིན་ཆེན་བརྒྱན། །གཡས་པས་ཁྲུས་བུམ་གྲིབ་རྣམས་བཀྲུས། །ཕྱག་གཡོན་སྨན་གྱི་གཞོང་པ་བསྣམས། །སྤོས་ཀྱི་དུད་པས་ནམ་མཁའ་གང་། །ནམ་མཁའི་མཐར་ཐུག་ཞིང་ཁམས་ཀུན། །སྤྲོས་ཀྱི་འཁྲི་ཤིང་དུད་པས་འབྲེལ།དུ་བའི་ཟེར་མ་རེ་རེ་ལས། །འདོད་ཡོན་སྣ་ཚོགས་ཆར་དུ་འབེབས། །བཛྲ་དྷུ་པེའི་བྱིན་གྱིས་བརླབས། །འདི་འདྲའི་ཡ་མཚན་དུད་སྤྲིན་འདིས། །ལྷ་དང་སྲུང་མ་ཐམས་ཅད་
བསང་། །ཀུན་བཟང་རིགས་ལྔ་རྡོ་རྗེ་སེམས། །ཕྱོགས་བཅུར་བཞུགས་པའི་སངས་རྒྱས་བསང་། །པདྨ་འབྱུང་གནས་རིགས་གསུམ་མགོན། །རྒྱལ་སྲས་བྱང་སེམས་ཐམས་ཅད་བསང་། །རྗེ་འབངས་ཉི་ཤུ་རྩ་ལྔ་སོགས། །རྒྱུད་སྡེ་དྲུག་ལྡན་བླ་མ་བསང་། །བཀའ་དགོངས་ཕུར་གསུམ་ལ་སོགས་པ། །རྒྱུད་སྡེ་དྲུག་གི་ལྷ་ཚོགས་བསང་། །བེར་ནག་ཅན་དང་མ་ནིང་སོགས། །མགོན་ཆེན་བཞི་བཅུ་ཞེ་ལྔ་བསང་། །རང་བྱུང་རྒྱལ་མོ་རེ་མ་ཏི། །ལྷ་མོ་སྟོང་དང་རྩ་བརྒྱད་བསང་། །གནོད་སྦྱིན་ཕོ་དགུ་མོ་དགུ་སོགས། །ནོར་ལྷ་གཏེར་བདག་ཐམས་ཅད་བསང་། །ཨ་པར་ཙིཏྟ་ཚོགས་བདག་སོགས། །ཕྱུགས་ལྷ་གཡང་གི་བདག་པོ་བསང་། །རེ་མན་ཏ་དང་ཀུ་ཝེ་ར། །རྔོག་ཆགས་བདག་པོ་ཐམས་ཅད་བསང་། །གདོང་ལྷ་སྨུག་པོ་ལ་སོགས་པའི། །དགྲ་ལྷ་ཝེར་མ་ཐམས་ཅད་བསང་། །ཧཱུྃ། སྔོན་གྱི་བསྐལ་པའི་དང་པོ་ལ། །ལྷ་མིན་བདུད་ཀྱི་དཔུང་གཡོས་ནས། །ལྷ་ཡུལ་ཕྱེད་ཙམ་འཕྲོག་པའི་ཚེ། །བརྒྱ་བྱིན་མངོན་ཤེས་ལྡན་པ་དེས། །དབང་ཕྱུག་མ་ཧཱ་དེ་ཝ་ལ། །ལྷ་མོ་ཨུ་མ་བཙུན་མོར་ཕུལ། །ཡབ་ཡུམ་དེ་
གཉིས་ཚོགས་པའི་སྲས། །སྤྱན་རས་གཟིགས་ཀྱི་སྤྲུལ་པ་སྟེ། །མགོན་པོ་མ་ཧཱ་ཀཱ་ལ་འཁྲུངས། །སྐུ་ལ་དར་ནག་བེར་ཆེན་གསོལ། །ཕྱག་གཡས་ཙནྡན་བེང་ཆེན་བསྣམས།ཙནྡན་བེང་གི་བེང་ནང་ནས། །ལྷ་དམག་བྱེ་བ་འབུམ་ཁྲི་འགྱེད། །གཡོན་པས་ལྕགས་ཀྱི་པར་བུ་བསྣམས། །དམ་ཉམས་དགྲ་བོའི་སྙིང་ཁྲག་འཐུང་། །ཆིབས་སུ་དཔའ་རྔམས་སྟག་ལ་ཆིབས། །ནག་པོ་སྟོང་གི་འཁོར་གྱིས་བསྐོར། །ལྷ་སྲིན་སྡེ་བརྒྱད་ཕོ་ཉར་འགྱེད། །ལྷ་མིན་བདུད་ཀྱི་གཡུལ་ངོ་བཟློག །དཀར་པོ་ལྷ་ཡི་རྒྱལ་སྲིད་བཟུང་། །རྡོ་རྗེ་འཚང་གིས་དབང་བསྐུར་ནས། །ཕྱག་ན་རྡོ་རྗེས་དམ་ཚིག་ཕབ། །སངས་རྒྱས་བསྟན་པ་སྲུང་བ་དང་། །རྣལ་འབྱོར་བུ་བཞིན་སྐྱོང་བ་དང་། །ཁས་བླངས་དམ་བཅས་མནའ་ཟབོར་ནས། །སྔོན་གྱི་དམ་ཚིག་དྲན་མཛོད་ལ། །སྟག་ཞོན་མ་ཧཱ་ཀཱ་ལ་ཁྱོད། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་དུད་མཆོད། །སྟག་ཞོན་གྲུབ་པའི་རིག་འཛིན་གྱི། །རིགས་སུ་སྐྱེས་པའི་བག་ཆགས་རྣམས། །སུ་ལ་མི་རེ་ཁྱོད་ལ་རེ། །སུ་ལ་མི་ལྟོས་ཁྱོད་ལ་ལྟོས། །རིགས་ཀྱི་བུ་ལ་རྒྱུད་ཀྱི་ལྷ། །འཁོར་བ་
སྲིད་པའི་ལུགས་ཡིན་ཕྱིར། །མིས་ཀྱང་ལྷ་ལ་མཆོད་པ་འབུལ། །ལྷས་ཀྱང་མི་ལ་ཁ་འཛིན་མཛོད། །ནད་གདོན་བར་ཆད་ཐམས་ཅད་སོལ། །ཚེ་དང་དབང་ཐང་ལོངས་སྤྱོད་སྤེལ། །བྱད་ཁ་དགྲ་འདྲེའི་གནོད་པ་ཟློག །ཨོཾ་མ་ཧཱ་ཀཱ་ལ་རཱུ་པ་ཏྲི་ཡཾ་ཛ་ཛསརྦ་པཱུ་ཛ་པྲ་ཏིཙྪ་སྭཱ་ཧཱ། ཞེས་དང་། དེ་ནས་རིག་འཛིན་འབྲོང་པ་བན་ཐུང་གི་གསོལ་མཆོད་ནི། ཀྱཻ། འབྲོང་པའི་རིགས་འཁྲུངས་བན་ཐུང་མ། །སྟག་ཞོན་མ་ཧཱ་ཀཱ་ལ་བསྒྲུབ། །མགོན་པོ་ནག་པོས་ཞལ་བསྟན་ནས། །རིགས་རྒྱུད་བཙན་དར་དངོས་གྲུབ་གནང་། །གྲུབ་རྟགས་ནམ་མཁར་གཤེགས་བཞུགས་མཛད། །དངོས་ཉིད་མཁའ་སྤྱོད་གནས་ན་བཞུགས། །སྤྲུལ་པ་དགྲ་བླའི་ཚུལ་བཟུང་ནས། །འབྲོང་རིགས་ཀུན་གྱི་དགྲ་བླ་མཛད། །རྫུ་འཕྲུལ་ཐོགས་པ་མེད་པའི་ཕྱིར། །བཙུན་པ་ཆོས་བཟང་གཅིག་གི་ཆས། །ཕྱག་གཡས་སྤུ་གྲིས་དགྲ་སྲོག་གཅོད། །གཡོན་པས་རྒྱ་མས་ཕྱུགས་གཡང་སྡུད། །དར་ཕྲུག་དམར་པོའི་ན་བཟའ་ལ། །སྟག་གཟིག་ལྤགས་པའི་གོང་ལག་ཅན། །འཇའ་ཚོན་སྣ་ལྔའི་ཆ་ལག་ལ། །དབྱི་སྤྱང་ལྤགས་པའི་མུ་རན་བཀྲ། །རི་བྲག་ཐོགས་པ་མེད་པའི་ཕྱིར། །
ཞབས་གཡས་སག་ཏའི་ལྷམ་ཆེན་གསོལ། །ཆུ་དང་རབ་ལ་ཐོགས་མེད་ཕྱིར། །ཞབས་གཡོན་ས་ནི་རྗེན་པར་བཞུགས། །སྤྱན་མིག་སྐར་ཆེན་ཤར་བ་འདྲ། །དྲག་གཏུམ་དཔའ་བརྗིད་མེ་ལྟར་འབར། །དགྲ་བླ་ཆེན་པོ་བན་ཐུང་མ། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱིས་མཆོད། །བདག་ཅག་བུ་དང་ཚ་བོ་ལ།ཕ་རྒན་ཁྱོད་ཀྱིས་སྡོང་གྲོགས་མཛོད། །བུ་སྲིང་ཤག་རོགས་ཕ་སྤྱན་གྱི། །ཡུལ་དུ་ཕ་མཚུན་མ་འཁྱམས་པར། །དགྲ་བླ་མི་དང་མ་འབྲལ་ཅིག །གོ་མཚོན་རྣམས་ལ་བརྟན་པར་བཞུགས། །མཉམ་གཉིས་མི་དང་རྩལ་འདྲེན་ན། །དཔའ་གཡང་གཞན་ལ་མ་ཤོར་ཅིག །མཉམ་གཉིས་མི་དང་ཕྱུགས་འདྲེན་ན། །ཕྱུགས་གཡང་གཞན་ལ་མ་ཤོར་ཅིག །དགྲ་ཇག་རྐུན་སྣ་བྱུང་བའི་ཚེ། །ར་མདའ་རྗེས་གཅོད་མ་གཡེལ་ཅིག །དམག་དང་ཇག་ལ་འགྲོ་བའི་ཚེ། །དམག་དཔོན་ཇག་དཔོན་དགྲ་བླ་རེམ། །བུ་རྟ་འཚོས་ལ་དགྲ་དཔུང་ཆོག །ལེགས་ཁ་རྒྱལ་ཁ་བདག་ལ་བྱིན། །རྒྱུན་དུ་ལུས་དང་གྲིབ་བཞིན་འགྲོགས། །ཅི་བསམ་འགྲུབ་པའི་ཕྲིན་ལས་མཛོད། །བསྲོ་བསྲོ་ཏ་ལི་ཀུ་ལི་མི་སརྦ་པཱུ་ཛ་པྲ་ཏཱིཙྪ་སྭཱ་
ཧཱ། ཞེས་ལན་གསུམ་བརྗོད། ཨ་མྱེ་སྤོམ་རའི་བསང་མཆོད་བྱ་བ་ནི། ཀྱཻ། ཤར་ཕྱོགས་གངས་རི་ཤེལ་བྲག་ནས། །མགུར་ལྷ་རྣམ་རྒྱལ་སྤོམ་ར་ནི། །མི་དཀར་དུང་རྨོག་དུང་ཁྲབ་ཅན། །དར་འཕྲུ་ཉི་མ་ཕོད་ཁས་བརྒྱན། །ཕྱག་གཡས་སྦ་ལྕག་མདུང་དར་ཕྱར། །སྟག་རལ་གཟིག་ཤུབས་སྐེད་ལ་བསྐོར། །དུང་རྟ་གཡུ་རྔོག་འཕུར་ཤེས་ཆིབས་། །རྨ་སྲས་དུང་གི་སྐྱ་མི་དགུ། །རྨ་ཆེས་ལྡན་ཞིང་མདུང་དར་ཕྱར། །སྲིང་མོ་ལྕམ་དགུ་ཡུམ་དང་བཅས། །དར་ཟབ་རིན་ཆེན་སྣ་ལྔས་བརྒྱན། །སྦ་གླིང་བསྒྱུར་ཞིང་མེ་ལོང་བལྟ། །སྲིང་ལྕམ་བཞི་བཅུ་ཞེ་ལྔ་དང་། །རྨ་རིགས་སུམ་བརྒྱ་དྲུག་ཅུ་དང་། །རྨ་སྨན་འབུམ་དང་བཅས་པ་དང་། །རྨ་རྒྱལ་སྤོམ་ར་འཁོར་བཅས་རྣམས། །འདིར།གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱིས་མཆོད། །སྔོན་གྱི་བསྐལ་པའི་དང་པོ་ལ། །སྤོམ་ར་ཁྱོད་ཀྱི་རྫུས་བུ་ནི། །འབྲོང་རྗེ་འབྲོང་བདག་ཟིལ་དཀར་འཁྲུངས། །བདག་ཅག་དེ་ཡི་རིགས་རྒྱུད་ཡིན། །དུས་ངན་བསྐལ་པའི་སྙིགས་མ་ལ། །ཚ་བོ་ངེད་རྣམས་མགོན་སྐྱབས་ནི། །མེས་པོ་ཁྱོད་ཀྱིས་མ་སྐྱོབས་ན། །ལྷ་མི་
ཀུན་གྱི་སྤྱན་ལམ་དུ། །ཁྱོད་ལ་སྨ་ཕབ་མི་ཆེའམ། །མཆོད་དོ་ཨ་མྱེ་སྤོམ་ར་མཆོད། །བསང་ངོ་ཨ་མྱེ་སྤོམ་ར་བསང་། །ཚ་བོ་ང་ལ་དངོས་གྲུབ་སྩོལ། །མི་འཕེན་རྟ་ཧྲག་བཙན་དང་ལྡན། །ཟས་དང་ནོར་ལ་གཡང་ཆགས་པའི། །ཨ་མྱེ་སྤོམ་རའི་དངོས་གྲུབ་དེ། །ཚ་བོ་ང་ལ་མྱུར་དུ་བྱིན། །ཨོ་བཛྲ་ཀུ་ལི་མུ་ཡེ་ཡེ་སརྦ་པཱུ་ཛ་པྲ་ཏཱིཙྪ་སྭཱ་ཧཱ། ཀྱཻ། གཞན་ཡང་ཡུལ་ཕྱོགས་འདིར་གནས་པའི། །ཕ་རི་གཡས་དང་ཚུར་རི་གཡོན། །མདུན་རི་རྒྱབ་རི་མཚེར་ས་དང་། །གནས་པའི་ཡུལ་ལྷ་གཞི་བདག་དང་། །ས་བདག་ཀླུ་གཉན་ཐམས་ཅད་ལ། །བསང་དང་མཆོད་པ་འདི་འབུལ་བས། །ཐམས་ཅད་མཉེས་ཤིང་ཚིམ་གྱུར་ཅིག །ཐུགས་དང་འགལ་བར་བཟོད་པར་གསོལ། །ཕོག་ཐུག་འགྲམ་འཁྲུག་ཞི་གྱུར་ཅིག །ཁ་འཛིན་སྡོང་གྲོགས་རྒྱབ་རྟེན་མཛོད། །དེ་ནས་ཁུ་ཡེ་སོགས་རྗེས་ཀྱི་བྱ་བ་ནི། ཀྱཻ། རྨ་དང་གཡང་གི་བདག་པོ་ཡི། །རྨ་རྒྱལ་སྤོམ་ར་འཁོར་བཅས་རྣམས།་རྨ་གཡང་གནམ་གྱི་ཆར་ལྟར་ཕོབ། །རྨ་ཡི་ཡོ་མ་བརྒྱ་སྟོང་ཡང་། །རྟེའུ་གཅིག་ཀྱང་ཤི་བ་མེད། །ཁུ་ཡེ་ཕྱྭ་གཡང་རྟ་ལ་ཕོབ། །རྨ་ཡི་ལུག་ཁྱུ་བརྒྱ་སྟོང་ཡང་། །ལུག་གུ་
གཅིག་ཀྱང་ཤི་བ་མེད། །ཁུ་ཡེ་ལུག་གཡང་ལུག་ལ་ཕོབ། །རྨ་ཡི་ནོར་ཁྱུ་བརྒྱ་སྟོང་ཡང་། །བེའུ་གཅིག་ཀྱང་ཤི་བ་མེད། །ཁུ་ཡེ་ནོར་གཡང་ནོར་ལ་ཕོབ། ཨོཾ། ཁུ་ཡེ་ཁུ་ཡེ་གཡང་ཕོབ་ཅིག །མུ་ཡེ་མུ་ཡེ་གཡང་ཕོབ་ཅིག །ཏིང་ལམ་ཏིང་ལམ་གཡང་ཕོབ་ཅིག །སུ་ཡུ་སུ་ཡུ་གཡང་ཕོབ་ཅིག །ཧུ་ཡ་ཧུ་ཡ་གཡང་ཕོབ་ཅིག །ཕྱྭཉི་མ་ཙམ་ཞིག་ཀྱི་ལི་ལི། །ཕྲུ་ཁུག་ནང་དུ་ཀྱི་ལི་ལི། །གཡང་ཟླ་བ་ཙམ་ཞིག་སྒ་ར་ར། །གཡང་ཁུག་ནང་དུ་སྒ་ར་ར། །གཡང་བདག་ང་ཡི་གཡང་དུ་ལེན། །ཕྱུ་འདི་རི་ལ་མ་བྲོས་ཤིག །གཡང་འདི་ཁྱིམ་དུ་མ་ཉམས་ཤིག །ཕྱུ་ཧཱུྃ་གཡང་ཧཱུྃ་བདེ་ལེགས་སྐྱིད་པ་ཧཱུྃ། །ལྷ་རྣམས་མཆོད་ཅིང་བསྟོད་དོ་ཨེ་མ་ཧོ། །འབག་བཙོག་མཆོད་པ་ཆུང་སོགས་མཐོལ་ལོ་བཤགས། །གཡང་ལྷ་སྦྲ་ཁྱིམ་ནོར་ལ་བཞུགས། །འཇིག་རྟེན་བསང་མགྲོན་རང་གནས་གཤེགས། །ཡེ་ཤེས་པ་རྣམས་བདག་ལ་ཐིམ། །བདག་ཉིད་ཐུགས་ཀའི་ཧཱུྃ་ལ་ཐིམ། །ཧཱུྃ་ཡང་མི་དམིགས་སྟོང་པ་ཉིད། །རྫོགས་པ་ཆེན་པོར་ལྷུན་གྱིས་གྲུབ། །བཀྲ་ཤིས་ཀུན་གྱི་བཀྲ་ཤིས་ཤོག །ཕུན་སུམ་ཚོགས་པའི་བཀྲ་ཤིས་ཤོག །བསང་མཆོད་
ཕུལ་བའི་དགེ་བ་ཡིས། །ཚེ་འདིར་བདེ་སྐྱིད་ཕུན་སུམ་ཚོགས། །ཕྱི་མ་བདེ་ཆེན་ཞིང་ཁམས་སུ། །ཚེ་དཔག་མེད་དང་དབྱེར་མེད་ཤོག །ཅེས་པ་འདི་ནི་བསྟན་པ་སྤྱི་ཁྱབ་ཀྱི་དགེ་བས་རགས་པ་ཙམ། ཁྱད་པར་འབྲོང་པའི་དགྲ་བླའི་བསང་མཆོད་ཅུང་ཞིག་རྒྱས་པར་སྨོས་པ་ཚང་མ་འདི་ནི་འབྲོང་པ་རྡོར་ཤུལ་དཔོན་གྱིས་བསྐུལ་ངོར། དགེ་སློང་རཱ་ག་ཨ་སྱས་བཀོད་པའོ། །དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།