ཆུ་བདག་དགེ་བསྙེན་གནས་བརྒྱད་མཚན་བརྒྱད་ཀྱི་བསང་མཆོད།
ཆུ་བདག་དགེ་བསྙེན་གནས་བརྒྱད་མཚན་བརྒྱད་ཀྱི་བསང་མཆོད་བཞུགས། ཧཱུྃ། སྔོན་ཚེ་གསང་བའི་བདག་དང་པད་འབྱུང་གིས། །བཀའ་དང་དམ་ལ་བཏགས་པའི་དམ་ཚིག་ཅན། །ས་བརྒྱད་ནོན་པའི་སེམས་དཔའ་ཀླུ་ཡི་གཟུགས། །དུང་སྐྱོང་སྲས་པོ་ལ་ཐོད་དཀར་པོ་བསང་། །ངོ་བོ་གཅིག་ཀྱང་བཞུགས་ཡུལ་སོ་སོའི་མིང་། །དབུ་རུ་བྱང་གི་དགེ་བསྙེན་ཐང་ལྷ་བསང་། །སྐྱི་ཤོད་མཁར་ནག་རྡོ་རྗེ་རྒྱལ་པོ་བསང་། །ཕོ་མོ་རྫོང་རིང་ཀླུ་བདུད་མགོ་དགུ་བསང་། །ལྷོ་སྟོད་དབུ་རིའི་སྐུ་ལྷ་མཁར་ནག་བསང་། །ལྷོ་རྒྱལ་བདུད་པོ་ཟླ་བའི་མདོག་ཅན་བསང་། །མོན་ཁ་རིང་མོའི་བདུད་པོ་བཀྲག་མེད་བསང་། །སེངྒེ་རྫོང་དུ་ཟུ་ར་ར་སྐྱེས་བསང་། །ལྷོ་བྲག་མཁར་ཆུའི་དགེ་བསྙེན་སྨྱོ་ཁ་བསང་། །དྲི་ཟའི་ཡུལ་དུ་ཟུར་ཕུད་ལྔ་པ་བསང་། །ཁམ་གྱི་ཕྱོགས་ནས་ཉ་ཆེན་ནག་མདངས་བསང་། །འཁོར་དང་སྤྲུལ་པས་བོད་ཁམས་ཁྱབ་པ་བསང། །ལྕི་ཡི་ཀླུ་བདུད་དྲག་པོ་བདུད་འདུལ་བསང། །ངོམ་གྱི་དགེ་བསྙེན་རྡོ་རྗེ་བདུད་འཇོམས་བསང་། །ལྕི་ངོམ་མཚམས་ཀྱི་བླ་མཚོ་དམར་ནག་བསང་། །བཞུགས་ཚེ་སྤྲུལ་པ་སྣ་ཚོགས་མ་ངེས་ཀྱང་། །ཞི་བའི་ཚུལ་དུ་
སྤྲུལ་པ་མཛད་པ་ནི། །མི་དཀར་ཆས་བཟང་འཁོར་གསུམ་ཞྭ་དཀར་ཅན། །ཕྲུག་དཀར་གོས་ལ་ཟ་འོག་གོང་ལག་ཅན། །སྟག་རལ་གཟིག་ཤུབས་དཔའ་བོའི་ཆས་དང་ལྡན། །ཆིབས་སུ་འཕྲུལ་གྱི་རྟ་དཀར་གཡུ་རྔོག་ཆིབས། །སྤྲུལ་པ་ཉ་ཆེན་དཀར་པོའི་ཆུ་བོ་གང་། །འཁོར་ནི་རྒྱན་ཆ་རང་འདྲ་རྟ་དཀར་ཅན། །བཅུ་གཉིས་དང་བཅས་ཡང་འཁོར་བསམ་མི་ཁྱབ། །འདིར་གཤེགས་བསང་དང་མཆོད་པ་སྣ་ཚོགས་འབུལ། །གཡུ་ཤུག་ཕྱེ་མར་གསུར་གྱི་དུད་པས་བསང་། །ཕོག་ཐུག་འགྲམ་འཁྲུག་བྱུང་ན་མཐོལ་ཞིང་བཤགས། །རྣལ་འབྱོར་བདག་ཅག་མི་ནོར་འཁོར་བཅས་ལ། །ཀུ་རེ་རྐྱལ་ཁ་གནོད་འཚེ་མ་མཛད་པར། །རྟག་ཏུ་ཁ་འཛིན་སྡོང་གྲོགས་མགོན་སྐྱབས་མཛོད། །མི་དར་ནོར་ཕྱུགས་འབྲུ་རྣམས་འཕེལ་བ་དང་། །ཀླུ་གཡང་དངོས་གྲུབ་སྣ་ཚོགས་ཆར་ལྟར་ཕོབ། །ཁྱོད་ནི་ཡུལ་འདིར་གནས་པ་ཡུལ་གྱི་ལྷ། །ངེད་རྣམས་ཡུལ་འདིར་སྡོད་པའི་ཡུལ་གྱི་མི། །མིས་ཀྱང་ལྷ་ལ་རྒྱུན་དུ་མཆོད་པ་འབུལ། །ལྷས་ཀྱང་མི་ལ་ཁ་འཛིན་མ་གཡེལ་ཅིག །གནས་མགྲོན་གཉིས་ཀྱི་དམ་ཚིག་ཐུབ་པར་བསྲུང་། །སློབ་དཔོན་པདྨའི་བཀའ་ལས་མ་འདའ་བར། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཅེས་པ་འདི་ནི་རཱ་ག་ཨ་སྱས་བྲིས་པའོ། །དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།