གཏམ་རྒྱལ་མདོ་ཟོའི་གསོལ་མཆོད་བསང་གི་རིམ་པ་ཕན་བདེའི་ཆུ་གཏེར།
གཏམ་རྒྱལ་མདོ་ཟོའི་གསོལ་མཆོད་བསང་གི་རིམ་པ་ཕན་བདེའི་ཆུ་གཏེར་ཞེས་བྱ་བ་བཞུགས་སོ།། སིདྡྷི་སྭཱ་ཧཱ།
ན་མོ་གུ་རུ་པདྨ་སཾ་བྷ་ཡེ། །པད་འབྱུང་སྤྲུལ་པའི་སྐུ་ལ་འདུད། །ཡུལ་ལྷའི་མཆོད་ཆོག་བྲི་བར་བྱ། །གྲ་ཕྱིང་སྟེང་དུ་འདབ་བརྒྱད་བྲི། །བཤོས་བུ་རྩེ་རྒྱལ་ཕྱེ་མར་དང་། །གཡག་ལུག་མདའ་དར་ཕུད་རྣམས་བཤམས། །རང་ཉིད་པད་འབྱུང་ང་རྒྱལ་གྱིས། །ཨོཾ་ཨ་མྲྀ་ཏེ་ཧཱུྃ་ཕཊ། བདུན་བརྗོད་པས་བསང་། ཨོཾ་སྭ་བྷ་ཝས་སྦྱང་། མདུན་དུ་སྤང་ལྗོངས་དང་ནེའུ་སིང་དང་བྲག་རིས་བསྐོར་བའི་དབུས། རིན་པོ་ཆེ་སྣ་ཚོགས་ལས་གྲུབ་པའི་སྐུ་མཁར་གྱི་དབུས་སུ་གཏམ་རྒྱལ་སྐུ་མདོག་དཀར་ལ་ཅུང་ཟད་སྨུག་པའི་མདངས་ཅན། སྐུ་ལ་དར་དཀར་གྱི་རལ་གུ་གསོལ་ཞིང་གཡས་བ་དན་དཀར་པོ་དང་། གཡོན་རིན་པོ་ཆེ་
བསྣམས་པ། སྟག་རལ་དང་གཟིག་ཤུབས་བཏགས་ནས་ཅང་ཤེས་དཀར་པོ་རླུང་གི་ཤུགས་ཅན་ལ་ཆིབས་པའོ། །དེའི་འཁོར་དུ་ལྷ་ཀླུ་བདུད་བཙན་རྨ་དང་སྨན་གྱི་ཚོགས་བསམ་གྱིས་མི་ཁྱབ་པ་དང་བཅས་པ་སྤྱན་དྲངས། ཧཱུྃ། རི་དབང་གཏམ་རྒྱལ་མདོ་ཟོ་ནི། །རྒྱལ་པོ་གདན་ལ་བཞུགས་པ་འདྲ། །རྒྱལ་ཕྲན་འཁོར་གྱིས་བསྐོར་བ་འདྲ། །རིན་ཆེན་བྲག་གི་ཟུར་ཕུད་ཅན། །སྤྲིན་དཀར་ལྡིང་བའི་ཅོད་པན་ཅན། །བསྐལ་པའི་འབྲུག་སྒྲ་ལྡི་རི་རི། །དྲག་པོའི་གློག་དམར་ཚུབས་སེ་ཚུབ། །གསེར་སྤང་སེར་པོ་ལམས་སེ་ལམ། །གཡུ་ཡི་ནེའུ་སིང་ཀྱི་
ལི་ལི། །ཤེལ་གྱི་ཆུ་མིག་ཤ་ར་ར། །ན་བུན་ཀྱི་བུན་ཐུ་ལུ་ལུ། །ལྗོན་ཤིང་ནགས་ཚལ་ཐིབས་སེ་ཐིབ། །རི་དྭགས་རྩེ་ཀྱ་སྤྲིངས་སེ་སྤུང་། །གཅན་གཟན་ངར་སྐད་འུ་རུ་རུ། །བྱ་རིགས་གཤོག་ལྡང་ཁྲིགས་སེ་ཁྲིག །དེ་འདྲ་འཕྲུལ་གྱི་ཕོ་བྲང་ནས། །གཏམ་རྒྱལ་མདོ་ཟོ་གཤེགས་སུ་གསོལ། །ཁྱེད་ཀྱི་བཀའ་ཉན་ཕོ་ཉའི་ཚོགས། །ཐམས་ཅད་མ་ལུས་གཤེགས་སུ་གསོལ། །བཛྲ་ས་མ་ཡ་ཛཿ ཛཿཧཱུྃ་བཾ་ཧོཿ རིན་ཐང་མེད་པ་ནོར་བུའི་འཕྲ་བཀོད་ཅིང་། །འོད་འབར་རིན་ཆེན་བརྩེགས་པའི་མི་དམན་ཁྲི། །ཡ་མཚན་རི་མོ་བཀྲ་བའི་དར་འབོལ་སྟེང་། །གཏམ་རྒྱལ་འཁོར་བཅས་དགྱེས་ཤིང་བཞུགས་སུ་གསོལ། །ས་མ་ཡ་ཏིཥྛ་ལྡན། རྒྱལ་བ་གཉིས་པ་རྡོ་རྗེ་གྲོ་ལོད་དང་། །རྒྱལ་སྲས་རང་བྱུང་རྡོ་རྗེའི་སྤྱན་སྔ་རུ། །ཇི་ལྟར་ཞལ་བཞེས་ཐུགས་དམ་མི་བསྙེལ་བར། །རྒྱལ་བསྟན་སྲུང་ཞིང་བདག་གི་གྲོགས་མཛོད་ཅིག །ཨོཾ་བཛྲ་ས་མ་ཡ་ཧཱུྃ། ཨོཾ་ལས་རིན་ཆེན་སྣོད་དུ་ཧཱུྃ་ཡིག་ལས། །རིན་ཆེན་འབྲུ་སྨན་རྩི་བཅུད་དཀར་དམར་ཕུད། །གཡག་ལུག་ར་གསུམ་གོ་མཚོན་ཇ་ཆང་ཕུད། །ཞིབ་མར་སྤོས་སྤྲིན་ནམ་མཁའ་གང་བར་གྱུར། །ཨོཾ་བཛྲ་སྤ་ར་
ཎ་ཁཾ། ཨོཾ། འོ་ཞོའི་མཆོད་ཡོན་ཡན་ལག་བརྒྱད་ལྡན་ཆབ། །བཟང་ཤིང་མེ་ཏོག་རྒྱས་པའི་དུད་སྤྲིན་འཁྲིགས། །མུན་སེལ་བསང་བའི་རྒྱ་ཇའི་དྲི་ལྡན་ཆབ། །རོ་བརྒྱ་ལྡན་པའི་ཞིབ་མར་སྙན་པའི་དབྱངས། །རབ་མཛེས་གཡག་ལུག་ར་དང་རི་དྭགས་གཟུགས། །དབང་པོའི་གཞུ་འདྲ་དར་ཟབ་བལ་ཚོན་གཏིབས། །རིན་ཐང་ཆེ་བའི་རིན་ཆེན་སྣ་ཚོགས་དབྱིག །མི་དབང་བསོད་ནམས་ལས་གྲུབ་རིན་ཆེན་བདུན། །ལྷ་དབང་དཔལ་ལས་བྱུང་བའི་བཀྲ་ཤིས་བརྒྱད། །རྒྱལ་བས་བྱིན་རླབས་རྫ་ས་མཆོག་ཤེས་བྱེད་བརྒྱད། །རྟ་ལུག་གནག་གིས་ཁྱུར་གྱུར་ཤེལ་ཚིགས་དང། །ཕས་རྒོལ་རླག་བྱེད་ངར་ལྡན་མཚོན་པའི་ཚོགས། །གདུག་པའི་བསམ་སྦྱོར་ཟློག་བྱེད་གོ་ཆ་དང་། །ནད་སེལ་སྨན་མཆོག་སྣ་ཚོགས་ཁྱེད་ལ་འབུལ། །ཁྱེད་ཅག་འཁོར་དང་རབ་དགྱེས་མགུ་ཞིང་ཚིམ། །རྨུགས་འཐིབས་ཉམས་དང་རྒུད་པ་དག་གྱུར་ནས། །ནུས་སྟོབས་གཟི་བརྗིད་ཕུན་སུམ་ཚོགས་གྱུར་ཅིག ། ཨརྒྷཾ༴ ཤལྟ་པྲ་ཏཱིཙྪ་སྭཱ་ཧཱ། འདིར་སྤྲོ་ན་གཡག་ལུག་རྒྱས་པར་འབུལ། བསང་དུད་བཏང་ལ། ཀྱཻ། བསང་གི་རྒྱུད་བྱུང་གང་ནས་བྱུང་། །བསང་བྱུང་སྟོང་
པའི་དབྱིངས་ལས་བྱུང་། །སྟོང་པའི་ངང་ལས་འབྱུང་བ་སྲིད། །འབྱུང་བའི་དྭངས་མ་ཤིང་དུ་སྲིད། །ཙནྡན་ཤུག་པ་གཡུ་ཡི་ཤིང་། །དུང་གི་སུར་དཀར་ལྷ་ཡི་ཤིང་། །བཀྲ་ཤིས་འོམ་འབུ་ཀླུ་ཡི་ཤིང་། །སྟག་པ་གསེར་ལོ་གཉན་གྱི་ཤིང་། །ཉ་བྲིད་བདུད་རྩི་སྨན་གྱི་ཤིང་། །སྤེན་མ་དངོས་གྲུབ་གཡུང་དྲུང་ཤིང་། །དྲི་ལྡན་ས་ཀར་སྤོས་ཀྱི་ཤིང་། །མཁན་དཀར་ཡ་མཚན་འཕྲུལ་གྱི་ཤིང་། །ཐང་ལོ་ཀླུ་གཉན་དགྱེས་པའི་ཤིང་། །ཤིང་སྣ་དགུ་ཡི་དུད་པ་དང་། །ཕྱེ་མར་ཇ་ཆང་ཕུད་རྒོད་ཀྱི། །སྐྱེས་བུ་གཏམ་རྒྱལ་མདོ་ཟོ་བསང། །བཙུན་མོ་བློན་པོ་འབངས་དང་གཡོག །འཁོར་དང་ཡང་འཁོར་ཐམས་ཅད་བསང་། །བསངས་བས་ལྷ་སྲུང་དགྱེས་གྱུར་ཅིག །རྨུགས་དང་འཐིབས་པ་སངས་གྱུར་ཅིག །བསམ་པ་སྒྲུབས་ལ་རེ་བ་སྐོངས། །བཀྲ་ཤིས་བདེ་ལེགས་རྒྱས་གྱུར་ཅིག །གཏོར་མ་ལ་ཆབ་ཀྱིས་བྲན་ལ། ཨོཾ་བདེ་གཤེགས་རིན་ཆེན་མང་དང་གཟུགས་མཛེས་དང་། །འབྱམས་ཀླས་འཇིགས་ཀུན་བྲལ་ལ་ཕྱག་འཚལ་ལོ། །ཧཱུྃ་ལས་རིན་ཆེན་སྣོད་དུ་ཁཾ་ཡིག་ལས། །གཏོར་མ་འདོད་པའི་ཡོན་ཏན་ཕུན་ཚོགས་ཤིང་། །སྦྲང་རྩིའི་རོ་ལྡན་ཤེལ་གྱི་
མདོག་འཆང་བ། །ཟག་མེད་བདེ་སྐྱིད་བདུད་རྩིའི་རྒྱ་མཚོར་གྱུར། །ཨོཾ་ཨཱཿཧཱུྃ། ལན་གསུམ་གྱིས་བྱིན་གྱིས་བརླབས། ཨོཾ་ཨཱཿདེ་ཝ་ཙཀྲ་ས་པཱ་རི་ཝ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། གཏམ་རྒྱལ་འཁོར་བཅས་གཏོར་མ་འདི་བཞེས་ལ། །ཡུལ་ཕྱོགས་འདི་རུ་དུས་རྣམས་ཐམས་ཅད་དུ། །འཁྲུག་རྩོད་དམག་ཇག་རྐུན་པོའི་འཚེ་བ་དང་། །ཡམས་ནད་མུ་གེ་བཙའ་སད་ཞི་བར་མཛོད། །ཚེ་དང་བསོད་ནམས་དབང་ཐང་སྙན་གྲགས་དང་། །ལོངས་སྤྱོད་འབྲུ་ནོར་བཀྲ་ཤིས་རྒྱས་པར་མཛོད། །ཕ་རོལ་དགྲ་དང་རྒྱལ་བློན་ཡུལ་ཁམས་དང་། །མཆོག་དམན་སྐྱེ་འགྲོ་དབང་དུ་འདུ་བར་མཛོད། །སྡང་ཞིང་གནོད་སེམས་འཆང་བའི་དགྲ་དང་བགེགས། །གཟིར་བཅིང་བསྐད་དང་བསད་པའི་ཕྲིན་ལས་མཛོད། །སྔར་བྱས་གཏང་རག་ཕྱིས་བྱེད་ཞུ་སྐྱེམས་དང་། །ད་ལྟའི་གཉེར་བྱས་གཉན་པོ་འདི་བཞེས་ལ། །བསམ་དོན་མཐའ་དག་ཡིད་བཞིན་འགྲུབ་པར་མཛོད། །དེ་ནས་བསྟོད་པ་ནི། ཧཱུྃ། སྐྱེས་བུ་གཏམ་རྒྱལ་མདོ་ཟོ་ནི། །ཆིབས་སུ་འཕྲུལ་གྱི་ཅང་ཤེས་ཆིབས། །ཕྱག་ན་བ་དན་དཀར་པོ་བསྣམས། །གཡོན་ན་ཡིད་བཞིན་ནོར་བུ་འཛིན། །སྐུ་ལ་
དར་དཀར་ན་བཟའ་གསོལ། །དབུ་ལ་དུང་ཞུ་འབར་བ་མནབས། །སྟག་རལ་གཡས་ལ་གཟིག་ཤུབས་གཡོན། །འཁོར་དང་ཡང་འཁོར་ཕོ་ཉར་བཅས། །རྟ་ནི་དཀར་དམར་སྔོ་ནག་ཆིབས། །དར་སྟན་སྒ་སྲབ་གོང་སྨད་ལ། །རིན་ཆེན་གསེར་དངུལ་འཕྲ་ཡིས་མཛེས། །སྐུ་ལ་གསེར་དངུལ་བསེ་ལྕགས་ཁྲབ། །གཡུ་དུང་ཟངས་ཁྲབ་འབར་བ་ལ། །སྟག་གཟིག་དོམ་དྲེད་ཤམ་བུ་ཅན། །དབུ་ཡི་རྨོག་མོ་དཀར་པོ་ལ། །རིན་པོ་ཆེ་ཡི་གཙུག་ཕུད་ཅན། །གཡས་ཀྱི་སྟག་རལ་ཁྲ་བོ་ལ། །ལྷ་མདའ་ལེབ་མ་སྐར་ལྟར་འཁྲུགས། །གཡོན་གྱི་གཟིག་ཤུབས་ཐིག་ལེ་ལ། །སྤྲུལ་པའི་ལྷ་གཞུ་གློག་ལྟར་འཁྱུགས། །སྐེད་ཀྱི་གཟིག་ཤུབས་ཟངས་བཀྲ་ནང་། །ཤང་ལང་རལ་གྲི་མེ་ལྟར་འབར། །སྐུ་ཡི་གོ་ཁྲབ་སྣ་ཚོགས་ལ། །སྤྲུལ་པའི་ཚྭ་ཚྭ་མེ་སྟག་འཕྲོ། །དབུ་ཡི་རྒོད་འཕྲུ་ལྡེམ་པ་ལ། །སྣ་ཚོགས་བ་དན་མེ་ལྟར་འཚུབ། །རེ་རེའི་འཁོར་ལ་གཉན་ཕྲན་སྟོང་། །ཀུན་ཀྱང་མཐུ་ཆེན་རྩལ་དྲག་ཅན། །དྲག་པོའི་བྷྱོ་སྒྲ་དི་རི་རི། །རྣལ་འབྱོར་དམ་ཚིག་ཅན་གྱི་གཉེན། །སྐྱེ་བོ་དགྲ་བླ་ཅན་གྱི་གཉེན། །དབུལ་གྱི་དཀོར་ནོར་སྤེལ་བའི་གཉེན། །རྨོངས་པའི་རྩ་
དཀར་བཀྲོལ་བའི་གཉེན། །འཐབ་མོ་གཡུལ་ལས་རྒྱལ་བའི་གཉེན། །སངས་རྒྱས་ཆོས་ལ་ཕྱོགས་པའི་གཉེན། །ཆ་ལ་དགའ་ཞིང་དར་ལ་འདུ། །ཀུ་ལ་དགའ་ཞིང་བློ་ལ་དགྱེས། །གཏམ་རྒྱལ་མདོ་ཟོ་འཁོར་བཅས་ལ། །རབ་ཏུ་གུས་པས་བདག་གིས་བསྟོད། །ཅེས་བསྟོད། གསོལ་ཁ་ནི་གཏོར་མ་བཏེག་ལ། ཀྱཻ། དགྲ་བོ་འདུལ་བའི་ལྷ། རང་ཕྱོགས་རྒྱལ་བའི་ལྷ།གཞན་ཕྱོགས་ཕམ་པའི་ལྷ། དགྲ་བླ་གཏམ་རྒྱུལ་ལ། གསོལ་ལོ་མཆོད་དོ། །དགྲ་བོ་ཐུལ་ཅིག །རང་ཕྱོགས་སྲུངས་ཤིག །དམག་ཇག་རྐུན་པོ་ཟློག་ཅིག །ཀྱཻ། དཀོར་ནོར་སྤེལ་བའི་ལྷ། དཔའ་འབྱོར་རྒྱས་པའི་ལྷ། ནོར་ལྷ་གཏམ་རྒྱལ་ལ། །གསོལ་ལོ་མཆོད་དོ། །ནོར་ཕྱུགས་སྤེལ་ཅིག །རྟ་དྲེལ་སྤེལ་ཅིག །བསོད་ནམས་མངའ་ཐང་སྤེལ་ཅིག །ཀྱཻ། ཆར་ཆུ་འབེབས་པའི་ལྷ། ལོ་ཕྱུགས་སྤེལ་བའི་ལྷ། ཞིང་ལྷ་གཏམ་རྒྱལ་ལ། །གསོལ་ལོ་མཆོད་དོ། །ཆར་ཆུ་དུས་སུ་ཕོབ་ཅིག །ལོ་ཏོག་སྤེལ་ཅིག །བཙའ་སད་སེར་གསུམ་ཟློག་ཅིག །ཀྱཻ། གདོན་བགེགས་འདུལ་བའི་ལྷ། ཡམས་ནད་གཅོད་པའི་ལྷ། རིམས་ནད་བཟློག་པའི་
ལྷ། ཡུལ་ལྷ་གཏམ་རྒྱལ་ལ། །གསོལ་ལོ་མཆོད་དོ། །བགེགས་དཔུང་ཆོད་ཅིག །གདོན་དཔུང་ཕུད་ཅིག །རིམས་ཡམས་ཟློག་ཅིག །ཀྱཻ། ཆོས་ལ་ཕྱོགས་པའི་ལྷ། །བསྟན་པ་སྲུང་བའི་ལྷ། ཆོས་སྐྱོང་གཏམ་རྒྱལ་ལ། །གསོལ་ལོ་མཆོད་དོ། །བསྟན་པ་སྲུངས་ཤིག །བསྟན་དགྲ་སྒྲོལ་ཞིག །ཆོས་མི་ནུབ་པའི་རྒྱལ་མཚན་ཕྱོར་ཅིག །བདག་གི་བསམ་པ་ཡིད་བཞིན་དུ་སྒྲུབས་ཤིག །ཅེས་གཏོར་མའི་ཕུད་བསང་ནང་དུ་ཕུལ་ལོ། །ཞེས་པ་འདི་ནི་ཨ་རཱ་གས་མཛད་པ་རེད་ཟེར་བའི་ཞལ་རྒྱུན་ལའང་འདུག་གོ། ༈ གཏམ་རྒྱལ་བསང་ནི། ཧཱུྃ། ཕ་མྱེས་རྒྱུད་ཀྱི་སྲུང་མ་མཆོད། །སྐྱེས་བུ་གཏམ་རྒྱལ་མདོ་ཟོ་ནི། །མི་དཀར་གཟི་བརྗིད་འོད་དུ་འབར། །དབུ་ལ་ལ་ཐོད་དཀར་པོ་བཅིང་། །།ལྗང་སྔོན་དེར་བེར་སྐུ་ལ་གསོལ། །ཕྱག་གཡས་རྡོ་རྗེ་སྦ་ལྕག་ཕྱར། །གཡོན་པས་ཕྱག་གི་དྲིལ་བུ་དཀྲོལ། །ཆིབས་སུ་རྟ་ནག་རྔམ་པ་ཆིབས། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་དུད་པས་བསང་། །ཕོག་ཐུག་འགྲམ་འཁྲུག་ཞི་གྱུར་ཅིག །ཨ་རཱ་གས་སོ། །སརྦ་མངྒ་ལཾ།། །།