ཇོ་བོ་གཟེ་རྒྱལ་གྱི་བསང་མཆོད།
ཇོ་བོ་གཟེ་རྒྱལ་གྱི་བསང་མཆོད་བཞུགས་སོ།། ཀྱཻ། ཉི་མ་ལྷོ་ཕྱོགས་ཕ་ཀི་ན། །ཕ་གནམ་ལྷ་འོད་འབར་དེ་རྗེ་དར། །མ་ས་ལྷ་དེ་ནི་ཀླུ་མོ་བཙུན། །དེ་གཉིས་བསྡེབས་པའི་མིང་སྲིང་བཞི། །ཆེ་བ་ཀླུ་རྗེ་འོད་འབར་ཡིན། །གསང་མཚན་རྡོ་རྗེ་དབང་དྲག་ནི། །སྐུ་མདོག་གངས་ལ་ཉི་ཤར་འདྲ། །དབུ་ལ་ལེ་ཕྲན་སྨུག་པོ་བཅིང་། །མཛེས་པའི་མེ་ཏོག་ཟུར་ཕུད་ཅན། །སྐུ་ལ་དུང་བེར་དཀར་པོ་གསོལ། །ཕྱག་གཡས་ཉི་ཟླ་སྒྲོན་མེ་ཐོགས། །ཕྱག་གཡོན་དངུལ་མདུང་དཀར་པོ་ལ། །དར་དཀར་བ་དན་བཏགས་པ་བསྣམས། །རག་དཀར་གཡུ་རྔོག་ཆིབས་སུ་ཆིབས། །དཀར་ཕྱོགས་ལྷ་དམག་འབུམ་གྱིས་བསྐོར། །འབྲིང་བ་གནམ་ལྷ་བྱང་ཆུབ་ནི། །གསང་མཚན་རྡོ་རྗེ་དབང་ཕྱུག་ནི། །ཞལ་མདོག་དཀར་གསལ་མཛེས་པ་ལ། །དབུ་ལ་དར་དཀར་ཅོད་པན་བཅིངས། །མཛེས་པ་མེ་ཏོག་ཟུར་ཕུད་ཅན། །ཕྱག་ན་དངུལ་མདུང་དཀར་པོ་བསྣམས། །ཆིབས་སུ་གྲོ་སྨུག་གདོང་སེ་ཆིབས། །འཁོར་དུ་གཉན་དམག་འབུམ་གྱིས་བསྐོར། །ཆུང་བ་རྡོ་རྗེ་དཔལ་བརྩེགས་ནི། །གསང་མཚན་རྡོ་རྗེ་དཔལ་འབར་ནི། །ཞལ་མདོག་གསེར་འོད་
འབར་བ་ཡིན། །སྐུ་ལ་གསེར་ཁྲབ་སེར་པོ་གསོལ། །དབུ་ལ་མཚལ་ཐོད་དམར་པོ་བཅིངས། །ཕྱག་ན་ཡ་ཚ་དཀར་པོ་བསྣམས། །སྟལ་རལ་གཡས་ལ་གཟིག་ཤུབས་གཡོན། །ཆིབས་སུ་རྐྱང་བུ་ཁ་དཀར་ཆིབས། །བྱ་རྒོད་དཀར་པོ་ཀླད་ན་ལྡིང་། །དུང་གི་སེངྒེ་གཡས་ན་འགྱིང་། །ལྕགས་ཀྱི་བྱ་ཁྲ་གཡོན་ན་འཇུམ། །འཁོར་དུ་ཀླུ་དམག་འབུམ་གྱིས་བསྐོར། །སྲིང་མོ་ལྷ་ལྕམ་གློག་མ་འཕྲུལ། །བུད་མེད་དཀར་མོ་དུང་ཤུ་ཆིབས། །བཙུན་མོ་གཡུ་མཚོ་ཆེ་ཆུང་གཉིས། །གཡུ་དང་བྱི་རུའི་བུད་མེད་གཉིས། །བློན་པོ་ཅི་རྒྱལ་ཀ་རྒྱལ་དང་། །སྤེན་ནེ་རི་བཀྲ་དབྱི་རྒྱལ་བཞི། །སྐུ་རྒྱལ་བཙན་དམག་ལ་སོགས་པའི། །སྨོན་སྐྱེས་གང་ཞུར་མཆེད་ལྕམ་བཞི། །འཁོར་དང་བཅས་པ་མ་ལུས་པ། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་བསང་། །རྣལ་འབྱོར་བདག་ཅག་འཁོར་བཅས་རྣམས། །གཞི་བྱེས་ལམ་གསུམ་གར་འདུག་ཀྱང་། །ཇོ་བོས་མཐུ་རོགས་སྡོང་ཟླ་གྱིས། །སྔོན་ནས་བསུས་ལ་ཕྱི་ནས་སྐྱོལ། །དཔལ་དང་གྲགས་པ་སྒྲུབ་པ་དང་། །འཁོར་དང་བསྟན་པ་སྲུང་བ་དང་། །ཆོས་དང་མཐུན་པའི་སྡོང་
གྲོགས་མཛོད། །ཨོཾ་ཐོག་ཐོག་ཀླུ། ཨོཾ་བྱང་ཆུབ་ཐོག་ཐོག་གཉན་རྒོད། ཨོཾ་གནམ་ཐོག་ཐོག་བཙན་རྒོད། ཛ་ཛ་ས་མ་ཡ་ཛ་ཛཿ རཱ་ག་ཨ་སྱས་མཛད་པའོ།། སརྦ་མངྒ་ལཾ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།