དགེ་བསྙེན་དབྱི་དོའི་བསང་།
དགེ་བསྙེན་དབྱི་དོའི་བསང་བཞུགས་སོ།། ཀྱཻ། བླ་མཚོ་ཆེན་པོའི་ནང་ཤེད་ནས། །དགེ་བསྙེན་ཆེན་པོ་དབྱི་དོ་ནི། །ཆ་ལུགས་གཅིག་ཏུ་མ་ངེས་ཀྱང་། །ཞི་བའི་ཚུལ་དུ་བཞེངས་ཙམ་ན། །དཀར་མཛེས་བཅུ་དྲུག་ན་ཚོད་ཅན། །དབུ་ལ་དར་དཀར་ལ་ཐོད་གསོལ། །སྦྲུལ་མགོ་གསུམ་གྱི་གདེངས་ཀ་ཅན། །དར་དཀར་རིན་ཆེན་མགུལ་བརྒྱན་ཅན། །ཁེཌཱུརྱ་ཡི་རྣ་རྒྱུན་ཅན། །གསེར་དང་དངུལ་གྱི་དཔུང་རྒྱན་ཅན། །དར་དཀར་མཛེས་པའི་ཕྱག་གདུབ་ལ། །སྐུ་སྨད་སྦྲུལ་གྱི་རང་བཞིན་ལ། །ཆུ་དར་སྔོན་པོའི་ཤམ་ཐབས་ཅན། །ཡིད་བཞིན་ནོར་བུའི་གཙུག་བརྒྱན་བཅིངས། །ཕྱག་གཉིས་ཐུགས་ཀར་ཐལ་མོ་སྦྱར། །མཚོ་ནག་མ་སོགས་མཚོ་སྨན་དང་། །ཀླུ་བདུད་ཀླུ་བཙུན་འཁོར་དང་བཅས། །འདིར་གཤེགས་བསངས་དང་མཆོད་པ་བཞེས། །བཟང་ཤིང་སྣ་ཚོགས་སྤོས་ཀྱིས་བསང་། །དཀར་གསུམ་ཀླུ་སྨན་མཆོད་པ་འབུལ། །འཁོར་བཅས་མཉེས་ཤིང་ཚིམས་གྱུར་ནས། །ཆུ་ཡི་འཇིགས་པ་ཞི་བ་དང་། །གནོད་འཚེ་ཕྲག་དོག་མ་མཛད་པར། །ཀླུ་གཡང་དངོས་གྲུབ་ཆར་ལྟར་ཕོབ། །ཨོཾ་ནཱ་ག་ནཱ་དྷི་སྭཱ་ཧཱ། ཨི་དཾ་བ་ལི་ཏ་ཁ་ཁ་
ཁཱ་ཧི་ཁཱ་ཧི། གཏོར་མ་མེད་ན་སྔགས་སྐྱུར་དགོས། ཞེས་ཨ་རཱ་གས་སོ།།