ཡུལ་ལྷ་སོ་རྒྱལ་དོན་གྲུབ་ཀྱི་བསང་ཡིག་དགོས་འདོད་ཡིད་བཞིན།
ཡུལ་ལྷ་སོ་རྒྱལ་དོན་གྲུབ་ཀྱི་བསང་ཡིག་དགོས་འདོད་ཡིད་བཞིན་བཞུགས། ༈ གུ་རུ་པདྨ་རྒྱལ་པོར་ཕྱག་འཚལ་ལོ། །ཡུལ་ལྷ་སོ་རྒྱལ་དོན་གྲུབ་ནི། །མཆོད་གཏོར་བསང་རྫས་བཤམས་ནས་ནི། །རང་ཉིད་ཨོ་རྒྱན་གུ་རུ་གསལ། །བསང་གཞུང་སྤྱི་ལྟར་སོང་བའི་རྗེས། །འདོན་སྒོམ་སྦྲགས་ལ་འདི་སྐད་དོ།། ཀྱཻ། འཛམ་གླིང་བྱང་ཕྱོགས་གངས་ཅན་ཡུལ། །མདོ་ཁམས་ཤར་ཕྱོགས་གླིང་ཁྲིའི་བར། །ངོམ་དུ་རུང་བའི་ཡུལ་སྟོད་ན། །རི་རྒྱལ་དགུང་དུ་རྩེ་མཐོ་བ། །སོ་རྒྱལ་དོན་གྲུབ་ཅེས་སུ་གྲགས། །རིན་ཆེན་ས་འཛིན་ལྷུན་རེ་ཆགས། །རི་དྭགས་རྩེ་ཀྱཱ་སྤྲིངས་སེ་སྤྲིང་། །བདུད་རྩི་ཆུ་མིག་ཤ་ར་ར། །བྱ་རིགས་གཤོག་གདང་ཁྲིགས་སེ་ཁྲིག །དེ་འདྲའི་གནས་མཆོག་ཕོ་བྲང་ནས། །སོ་རྒྱལ་དོན་གྲུབ་འཁོར་དང་བཅས། །མཆོད་པའི་གནས་འདིར་གཤེགས་སུ་གསོལ། །རང་རང་དགྱེས་པའི་གདན་ལ་བཞུགས། །རིག་འཛིན་བརྒྱུད་པའི་བཀའ་བཞིན་དུ། །དམ་ཚིག་གཉན་ལ་གནས་པར་མཛོད། །བཛྲ་ས་མ་ཡ་ཛ་ཛཿ ཏིཥྛ་ལྷན༔ བཛྲ་ས་མ་ཡ་ཧོཿ ཀྱཻ། ཡུལ་ལྷའི་གཙོ་ཁྱེད་མཆོད་པའི་རྫས། །ཉེར་སྤྱོད་བདུན་དང་འདོད་ཡོན་ལྔ། །བཀྲ་ཤིས་རྫས་རྟགས་རིན་ཆེན་བདུན། །རིན་ཆེན་
འབྲུ་སྣ་གསེར་སྐྱེམས་ཕུད། །ཇ་ཆང་འོ་ཞོ་བཏུང་བའི་ཚོགས། །སྣ་ཚོགས་མཆོད་པ་རྒྱ་མཚོ་འབུལ། །རིན་ཆེན་སྣོད་དུ་ཁཾ་ཡིག་ལས། །གཏོར་མ་ཁ་དོག་དྲི་རོ་ནུས། །ཕུན་ཚོགས་བདུད་རྩིའི་རང་བཞིན་འབུལ། །ཨོཾ་ཨ་ཀཱ་རོ་སོགས། ཨོཾ་སད་དར་ཝ་མག་ཀ་ན་ཤ་ཎ། ཨི་དཾ་བ་ལིཾ་ཏ་ཁ་ཁ་ཁཱ་ཧི། ཨོཾ་བྷུ་མི་པ་ཏི་ས་པཱ་རི་ཝཱ་ར་ཨི་དཾ་བ་ལི་ཏ་སརྦ་པཱུ་ཙ་ཁ་ཁ་ཁཱ་ཧི། ཀྱཻ། ཕྱེ་མར་འབྲུ་སྣ་འོ་ཞོ་ཕུད། །གཡུ་ཤུག་བལ་བུ་མཁན་དཀར་སོགས། །དྲི་བཟང་ཤིང་སྣ་བསྲེགས་པའི་གསུར། །རྨུགས་འཐིབས་ཉམས་རྒུད་བསང་བྱེད་ཅིང། །ལྷ་སྲུང་དགྱེས་སྐྱེད་དྲི་བཟང་འདིས། །སོ་རྒྱལ་དོན་གྲུབ་འཁོར་དང་བཅས། །རྒྱབ་རྟེན་ངོམ་རྒྱལ་མཚོ་བཀྲ་བསང་། །ཡང་འཁོར་སྡེ་རིགས་བཅས་པ་བསང་། །དཔུང་གྲོགས་གཉེན་ཟླ་ཐམས་ཅད་བསང་། །ཐམས་ཅད་མཉེས་ཤིང་ཚིམ་གྱུར་ཅིག །ན་བ་སོས་ཤིང་རྒུད་པ་དར། །རྨུགས་འཐིབས་ཉམས་པ་སངས་གྱུར་ཅིག །འཁོན་འགྲས་འགྲམས་འཁྲུགས་ཞི་གྱུར་ཅིག །ཀྱཻ། མཛོད་འཛིན་སོ་རྒྱལ་དོན་གྲུབ་ནི། །དཀར་སྨུག་བརྗིད་པའི་ངང་ཚུལ་ཅན། །སྣ་ཚོགས་དར་བེར་ལྷབ་ལྷུབ་གསོལ། །ཕྱག་
གཉིས་ལྡེ་མིག་ཆགས་ཤིང་བསྣམས། །ཅང་ཤེས་རླུང་གི་ཤུགས་ཅན་ཆིབས། །སྣ་ཚོགས་ལོངས་སྤྱོད་གཏེར་དང་ལྡན། །འཁོར་དང་སྤྲུལ་པ་དུ་མ་བཅས། །སོ་རྒྱལ་དོན་གྲུབ་ཁྱོད་ལ་བསྟོད། །མཆོད་གསོལ་དམ་པ་འདི་བཞེས་ལ། །བདག་དང་རྒྱུ་སྦྱོར་འཁོར་དང་བཅས། །སྲུང་སྐྱོབ་མེལ་ཚེ་མ་གཡེལ་ཅིག །ནད་གདོན་བར་ཆད་ཐམས་ཅད་ཞི། །ཚེ་བསོད་དཔལ་འབྱོར་རྒྱས་པར་མཛོད། །དགྲ་རྐུན་གཅན་གཟན་གནོད་པ་ཟློག །ཆར་ཆུ་དུས་འཕེལ་ལོ་ཕྱུགས་ལེགས། །གོད་ཁ་ན་ཚ་མེད་པ་དང་། །བླ་རི་གསས་མཁར་ཉིད་ལ་བཞུགས། །ཡུལ་འཁོར་བཀྲ་ཤིས་བདེ་ལེགས་འཕེལ། །བསམ་དོན་ཡིད་བཞིན་འགྲུབ་པར་མཛོད། །གཏོར་མ་གསས་ཁར་ཐོག་ལ་ཕུལ། བསང་ནང་ཕུལ་རུང། །རཱ་གས་སོ།། སརྦ་མངྒ་ལཾ།། །།