དཔའ་རྒྱལ་བསང་མཆོད།
ཀྱཻ། བྲག་དཀར་རི་སྤུང་འདྲ་བའི་གཞལ་ཡས་ནས། །རྨ་རིགས་སྐུ་ལྷ་སྦ་ཁོ་དཔའ་རྒྱལ་ནི། །སློབ་དཔོན་སྤྱན་སྔར་ཁས་བླངས་དམ་བཅས་བཞིན། །མ་གཤེགས་མཆོད་འབུལ་གདན་ལ་བཞུགས། །རང་བཞིན་གནས་བཞུགས་སྐུ་དཀར་ཤེལ་མདོག་གསལ། །བྱ་ཞུ་དཀར་པོ་བྱ་རྒོད་ཐུལ་པ་གསོལ། །མུ་ཏིག་ཕྲེང་རྒྱན་མཆོང་གི་སྐུ་རིགས་བྱས། །ཕྱག་གཉིས་ཡིད་བཞིན་ནོར་བུ་མདུང་དར་བསྣམས། །ཤེལ་ཁྲིའི་སྟེང་བཞུགས་ཁྱོད་ལ་གུས་པས་བསྟོད། །མཆོད་འབུལ་ཡུལ་དུ་སྤྱན་འདྲེན་གཤེགས་པའི་ཚེ། །རྨ་རིགས་སུམ་བརྒྱ་ལྷ་དམག་འབུམ་དབུས་ན། །སྟག་དང་གཟིག་ཤུབས་རལ་གྲི་འཁོར་གསུམ་ལ། །དྲག་པོའི་ཐོག་སེར་བུ་ཡུག་ལྟ་བུ་འཚུབ། །བེར་ཆེན་སྐུ་ལ་གསོལ་ནས་རིག་དཀར་ཆིབས། །སྦ་ལྕག་མདུང་དར་བ་དན་བཏགས་པ་བསྣམས། །འཁོར་དུ་ལྷ་ཡི་དམག་དཔོན་བདུན་དང་ནི། །རང་འདྲ་སྟོང་དང་ཁྲི་ཡིས་བསྐོར་བ་རྣམས། །ཐུགས་དམ་གནད་བསྐུལ་འདིར་གཤེགས་བསང་མཆོད་བཞེས། །བར་ཆད་དགྲ་བགེགས་རྡུལ་དུ་བརླག་པར་མཛོད། །ལས་མཁན་ཕོ་ཉ་བདུད་རྗེ་འཁོར་བཅས་
བསང། །དགེ་བསྙེན་ཀླུ་རྒྱལ་གཏུམ་པོ་འཁོར་བཅས་བསང་། །བཙན་ནི་མི་དམར་རྟ་དམར་འཁོར་བཅས་བསང་། །རྡོ་རྗེ་ཤེལ་གིང་གཉན་དང་ཡུལ་ལྷ་བསང་། །ལྷ་མོ་ཀླུ་མོ་ཀླུ་སྨན་འཁོར་བཅས་བསང་། །དྭངས་པ་ཀླུ་མགོན་བློན་པོ་གཉན་རྗེ་བསང་། །བཙུན་མོ་སྨན་བཙུན་དབྱ་སྨན་བསྐོར་བ་བསང་། །མི་མགོན་དཀར་པོ་ལྷ་དམག་དགྲ་འདུལ་བསང། །སྨན་བདུན་དབྱ་སྨན་སྟོད་རིགས་བུ་མོ་བསང་། །ལོ་ཡག་རྐང་བཞི་མི་ཕྱུགས་འཕེལ་དར་རྒྱས། །དཀར་དགེའི་གྲོགས་དང་བསམ་དོན་མྱུར་འགྲུབ་མཛོད། །ཀྱཻ། །བསང་ངོ་དགེ་བསྙེན་རྡོ་རྗེ་དྲལ་རྩལ་བསང་། །འབམ་ལྷ་གེ་ཁོད་སྐུ་ཤན་མཆེད་གསུམ་བསང་། །བཙན་རྒོད་སྤུན་བདུན་བདུད་ཁྲོམ་འཁོར་བཅས་བསང་། །རག་ཕྲོམ་མཆེད་བརྒྱད་སེང་སེང་སྤུན་བདུན་བསང་། །བཀའ་འཁོར་འདིར་ཕྱོགས་ཡུལ་ལྷ་ཐམས་ཅད་བསང་། །གཡག་ལུག་ར་དང་དཀར་གསུམ་གཏོར་མ་དང་། །མཐུན་རྫས་འདོད་ཡོན་བསང་མཆོད་འདི་བཞེས་ལ། །བདག་ཅག་ཡོན་མཆོད་མི་ནོར་འཁོར་བཅས་ལ། །ནད་གདོན་དགྲ་ཇག་ཆོམ་རྐུན་གཅན་གཟན་སོགས། །བར་ཆད་རྐྱེན་ངན་ཀུན་བཟློག་ཕྲིན་
ལས་མཛོད། །བཙན་ཕྱུག་འཕེན་དར་ལོངས་སྤྱོད་ཚེ་བསོད་ཀུན། །ད་ལྟ་ཉིད་དུ་དར་ཞིང་རྒྱས་པར་མཛོད། །མི་ནད་ཕྱུགས་ནད་ལོ་དགྲ་བཙའ་སད་ཟློག །མཆོད་གཏོར་གཡེལ་དང་ཕུད་ཉམས་ལྷག་ནོར་ཀུན། །ནོངས་པ་གང་མཆིས་མཐོལ་བཤགས་བཟོད་པར་བཞེས། །ཚངས་པར་བསྩལ་ནས་མཆོག་ཐུན་དངོས་གྲུབ་ཀུན། །མྱུར་དུ་ཐོབ་པའི་བཀྲ་ཤིས་བདེ་ལེགས་ཤོག །ཅེས་ཡུལ་ལྷ་སྤ་ཁོ་དཔལ་རྒྱལ་གྱི་བསང་མཆོད་རྒྱས་པ་སློབ་དཔོན་པདྨས་མཛད་པ་ལས་ཁོལ་དུ་ཕྱུངས་ནས་ཉུང་བསྡུས་སུ། རཱ་ག་ཨ་སྱས་སྦྱར་བའོ།།