སྤྱི་འབྱམས་ཀྱི་བསང་མཆོད་དངོས་གྲུབ་ཆར་རྒྱུན་རིན་པོ་ཆེ།
སྤྱི་འབྱམས་ཀྱི་བསང་མཆོད་དངོས་གྲུབ་ཆར་རྒྱུན་རིན་པོ་ཆེ་བཞུགས་སོ།། ན་མོ། དཀོན་མཆོག་གསུམ་དང་རྩ་བ་གསུམ། །སྐྱབས་གནས་རྣམས་ལ་སྐྱབས་སུ་མཆི། །འགྲོ་ཀུན་བདེ་ལ་འགོད་པའི་ཕྱིར། །སྤྱི་འབྱམས་གནས་ལ་བསང་མཆོད་བྱ། །ཆོས་སྐུ་སྟོང་ཉིད་རྫོགས་པ་ཆེ། །དེ་ཡི་རང་མདངས་དྲན་རྫོགས་སུ། །རང་ཉིད་རྡོ་རྗེ་གྲོ་བོ་ལོད། །སྨུག་ནག་སྤུ་གསུམ་ཨོཾ་གཅིག་བསྡམ། །ཐོར་ཚུགས་དར་དམར་ཅོད་པན་འཕུར། །ཕོད་ཁ་ཆོས་གོས་མགོ་ཕྲེང་བརྒྱན། །རྡོ་རྗེ་ཕྱར་ཞིང་ཕུར་པ་གཟིར། །སྟག་མོའི་སྟེང་ལ་འདོར་ཐབས་བསྒྲད། །ཡེ་ནས་དམ་ཡེ་དབྱེར་མེད་པའི། །ཐུགས་སྲོག་ཧཱུྃ་ལས་འོད་འཕྲོས་པས། །བསང་མགྲོན་ཐམས་ཅད་སྤྱན་དྲངས་གྱུར། །སྐུ་གསུམ་དག་པའི་ཞིང་ཁམས་ནས། །འཇིག་རྟེན་འདས་དང་མ་འདས་པའི། །བསང་མགྲོན་ཐམས་ཅད་གཤེགས་སུ་གསོལ། །ནམ་མཁའ་བར་སྣང་ས་གཞི་ལ། །སྤྲིན་ཕུང་གཏིབས་ལྟར་གདན་ལ་བཞུགས། །དངོས་འབྱོར་ཡིད་ལས་སྤྲུལ་པ་ཡིས། །ཀུན་བཟང་མཆོད་སྤྲིན་རྒྱ་མཚོ་འབུལ། །བསྟོད་དབྱངས་ཡན་ལག་དྲུག་ཅུས་བསྟོད། །དྷཾ་ལས་དུད་པའི་ལྷ་མོ་སྔོ། །
མཛེས་སྡུག་དར་དང་རིན་ཆེན་རྒྱན། །ཕྱག་གཡས་ཁྲུས་བུམ་ཉམས་གྲིབ་བཀྲུ། །གཡོན་པས་སྨན་གྱི་གཞོང་པ་ནས། །སྤོས་ཀྱི་དུད་སྤྲིན་སྟོང་གསུམ་ཁྱབ། །སྤོས་སྤྲིན་འཁྲིགས་པའི་དྲ་བ་ཡིས། །སངས་རྒྱས་ཞིང་ཀུན་ཐམས་ཅད་ཁྱབ། །དུ་བའི་ཆ་ཤས་རེ་རེ་ལ། །བཀྲ་ཤིས་རྫས་རྟགས་རིན་ཆེན་བདུན། །འདོད་ཡོན་རྣམ་ལྔ་ཆར་དུ་འབེབས། །བཛྲ་དྷུ་པེས་བྱིན་གྱིས་བརླབས། །འདི་འདྲ་ཡ་མཚན་བསང་མཆོད་འདིས། །སྣང་སྲིད་འཁོར་འདས་སྣོད་བཅུད་ཀུན། །ཀ་དག་གནས་སུ་བྱིན་གྱིས་བརླབས། །དང་པོའི་སངས་རྒྱས་གདོད་མའི་མགོན། །ཆོས་སྐུ་ཀུན་བཟང་ཡབ་ཡུམ་བསང་། །འོག་མིན་ཆེན་པོའི་གནས་མཆོག་ལྔ། །ངེས་པ་ལྔ་ལྡན་རྟག་ཏུ་བཞུགས། །ཞི་ཁྲོ་རབ་འབྱམས་འཁོར་དང་བཅས། །གངས་ཆེན་མཚོ་རྒྱལ་རིགས་ལྔ་བསང་། །སྔོན་ཚེ་རྫོ་གས་ཆེན་ཆོས་འཁོར་བསྐོར། །གྲངས་མེད་འགྲོ་བ་བདེ་ལ་བཀོད། །སྐལ་མགོན་དྲུག་ཅུ་རྩ་གཉིས་དང་། །རྫོགས་ཆེན་སྟོན་པ་བཅུ་གཉིས་བསང་། །དབང་ཕྱུག་ཡབ་ཡུམ་དམ་ལ་བཏགས། །འཛམ་གླིང་གནས་ཀུན་བྱིན་གྱིས་བརླབས། །འཁོར་ལོ་སྡོམ་པ་ཡབ་
དང་ཡུམ། །དྲུག་ཅུ་རྩ་གཉིས་ལྷ་ཚོགས་བསང་། །བདུད་པོ་མ་ཏྲཾ་རུ་ཊ་བཏུལ། །རྒྱ་བོད་གནས་ཀུན་བྱིན་གྱིས་བརླབས། །ཡི་དམ་རྟ་ཕག་ཡབ་ཡུམ་བསང། །སྐུ་ནི་བོད་དུ་མ་ཕེབས་ཀྱང་། །ཞལ་གྱི་འོད་ཟེར་བོད་དུ་སྤྲོས། །བོད་ཡུལ་གནས་རྣམས་བྱིན་གྱིས་བརླབས། །སྟོན་པ་ཤཱཀྱ་ཐུབ་པ་བསང་། །པོ་ཊ་ལ་ཡི་གནས་མཆོག་ནས། །སྐུ་ཡི་འོད་ཟེར་བོད་དུ་སྤྲོས། །བོད་ཡུལ་གནས་རྣམས་བྱིན་གྱིས་བརླབས། །འཕགས་པ་སྤྱན་རས་གཟིགས་དབང་བསང་། །གནས་ཆེན་བརྒྱ་རྩ་གནས་ཕྲན་སྟོང། །ཞབས་ཀྱིས་བཅགས་ཤིང་གཏེར་ཁ་སྦས། །བཀའ་སྲུང་བསྐོས་ཤིང་ལུང་བསྟན་མཛད། །གུ་རུ་པདྨ་འབྱུང་གནས་བསང་། །སྐྱིད་འབྱམས་ཕུག་ཏུ་སྒྲུབ་པ་མཛད། །སེང་གེ་གནམ་མཆོང་གཏེར་ཁ་སྦས། །སྲིན་པོས་ཀླད་པས་ཡི་གེ་བྲིས། །ཨོ་རྒྱན་རྗེ་འབངས་ཉེར་ལྔ་བསང་། །ཕྱི་ལྟར་བྲག་རི་ཡིག་འབྲུའི་བརྒྱན། །ནང་ལྟར་དཀྱིལ་འཁོར་གཞལ་ཡས་ཁང་། །རྩ་གསུམ་ལྷ་ཚོགས་རྟག་ཏུ་བཞུགས། །རྒྱུད་སྡེ་དྲུག་གི་ལྷ་ཚོགས་བསང་། །ཕྱི་ལྟར་རིན་ཆེན་བྲག་གི་སྐྱིབས། །ནང་ལྟར་མཁའ་འགྲོའི་ཚོགས་ཁང་
སྟེ། །གསང་བ་དག་པ་མཁའ་སྤྱོད་གནས། །གནས་གསུམ་དཔའ་བོ་མཁའ་འགྲོ་བསང་། །ཕྱི་ལྟར་ཆུ་ཤིང་གྲམ་པའི་ཁྲོད། །ནང་ལྟར་རབ་འཇིགས་དུར་ཁྲོད་གནས། །མ་མགོན་ཆོས་སྐྱོང་ཁྲོམ་དུ་འཚོགས། །བཀའ་སྲུང་དམ་ཅན་རྒྱ་མཚོ་བསང་། །གནས་སྒོ་གཏེར་སྒོ་ཀུན་གྱི་བདག །མི་སྔོན་སེངྒེའི་མགོ་བོ་ཅན། །གར་སྟབས་འཁྱུག་ཅིང་རྣལ་འབྱོར་སྐྱོང་། །ཞིང་སྐྱོང་མེ་རླུང་སེང་འཁྲུག་བསང་། །ཕྱི་ལྟར་དཀར་སེར་ནག་པོའི་མཚོ། །ནང་ལྟར་རིན་ཆེན་ཕོ་བྲང་གསུམ། །གསང་བ་སྐུ་གསུང་ཐུགས་ཀྱི་གནས། །གནས་བདག་སྦ་ནག་དགེ་བསྙེན་བསང་། །བྱང་ཆུབ་སེམས་དཔའ་ནམ་མཁའི་སྙིང་། །འཇིག་རྟེན་འདས་ཀྱང་དྲེགས་པའི་ཚུལ། །ས་བརྒྱད་སེམས་དཔའི་བསྟན་སྲུང་ཆེ། །གནས་བདག་སྦ་ནག་དགེ་བསྙེན་བསང་། །སྨྱོ་ཁ་ཐང་ལྷ་མཁར་ནག་དང་། །ཀླུ་བདུད་མགོ་དགུ་ཟླ་བའི་གདོང་། །སྐུ་ལྷ་བཀྲག་མེད་ཟུ་ར་སྐྱེས། །སྐུ་གཅིག་མཚན་བརྒྱད་ལྡན་པ་བསང་། །ངོ་བོ་གཅིག་ལ་གནས་གཞི་བརྒྱད། །གནས་གཞི་བརྒྱད་ལ་སྤྲུལ་པ་བརྒྱད། །ལྷ་ཀླུ་བདུད་སོགས་ཅིར་ཡང་བརྫུ། །ཨོ་རྒྱན་བཀའ་ཡི་སྲུང་མ་བསང་། །
བདུད་ཀྱི་སྡེ་དཔོན་མཛད་ཙམ་ན། །མི་ནག་རྟ་ག་དར་ནག་ཕྱིར། །ཆོ་འཕྲུལ་འགྱེད་ཅིང་གཏེར་སྒོ་སྲུང་། །བདུད་པོ་ཟུ་ར་ར་སྐྱེས་བསང་། །སྦ་ནག་མཚོ་ལ་གནས་པའི་ཚེ། །མི་སྔོན་ལུས་ནི་རི་བྲན་ཙམ། །ཉ་ཡི་མགོ་བོ་གནམ་དུ་འཕྱོ། །གནས་བདག་དགེ་བསྙེན་ཆེན་པོ་བསང་། །ཁྱོད་ཀྱི་འཁོར་དུ་གཏོགས་པ་ཡི། །སྤྱི་འདུ་བྲག་དཀར་ཆམ་སྟེ་དང་། །གདོང་ལ་རེ་ཁྱམ་ལ་སོགས་པ། །དཀར་པོ་ལྷ་ཡི་སྡེ་ཚོགས་བསང་། །རི་དམར་དགེ་བསྙེན་གཙོ་ཕུ་བྲག །གནམ་འཕྱོང་གུ་རུ་རི་བཀྲ་དང་། །ཤེལ་ཟོ་དུང་གི་མཆོད་རྟེན་སོགས། །བཙན་དང་གཉན་གྱི་སྡེ་ཚོགས་བསང་། །རྒྱམ་རྒྱལ་སྐྱེར་ཙུ་ཤེ་ཕྲོམ་དང་། །དམྱེ་དམྱག་ལ་སོགས་ཤེལ་ཕྲོམ་གསུམ། །བྲག་སེར་སྙིང་དིལ་རི་བཙུན་སོགས། །ཡུལ་ལྷ་གཞི་བདག་ཐམས་ཅད་བསང་། །དབོམ་ཆུ་ཀླུ་སྨན་དཀར་མོ་དང་། །ཡུལ་ཕྱོགས་འདི་ལ་གནས་པ་ཡི། །ས་བདག་ཀླུ་གཉན་ཐམས་ཅད་དང། །ཡིད་ཀྱི་གཟུགས་ཅན་ཐམས་ཅད་བསང་། །གཞན་ཡང་སྤྱི་འབྱམས་སེང་གེ་བྲག །གནས་སྒོ་གཏེར་སྒོ་བསྲུང་བ་ཡིས། །གཟའ་སོགས་ལྷ་སྲིན་སྡེ་བརྒྱད་ཚོགས། །
བཀའ་སྲུང་གཏེར་སྲུང་ཐམས་ཅད་བསང་། །དཀར་གསུམ་མངར་གསུམ་ཕུད་ཀྱིས་མཆོད། །ཇ་ཆང་འོ་ཞོའི་སྐྱེམས་ཀྱིས་མཆོད། །འབྲུ་སྣ་སྨན་སྣ་རིན་ཆེན་དང་། །དར་ཚོན་བལ་ཚོན་བརྒྱན་ཅན་འབུལ། །བསང་དང་མཆོད་པ་འདི་ཕུལ་བས། །མགྲོན་རྣམས་མཉེས་ཤིང་ཚིམ་གྱུར་ཅིག །ཐུགས་དང་འགལ་བ་ཐམས་ཅད་བཤགས། །ཕོག་ཐུག་འགྲམ་འཁྲུག་ཞི་གྱུར་ཅིག །ལྷ་སྲིན་འཁྲུག་པ་ཞི་གྱུར་ཅིག །མ་མོའི་འཁྲུག་པ་ཞི་གྱུར་ཅིག །ཀླུ་ཡི་ནད་རྣམས་ཞི་གྱུར་ཅིག །གྲིབ་དང་རྨུ་གབ་སངས་གྱུར་ཅིག །ཐམས་ཅད་བཀྲག་མདངས་གཟི་བརྗིད་འབར། །མཐུ་རྩལ་ནུས་པ་ལྡན་གྱུར་ཅིག །བདག་དང་ཡོན་བདག་ཁ་འཛིན་མཛོད།། ༈ ཁུ་ཡེ་ནི། ཀྱཻ། རིག་འཛིན་བརྒྱུད་པའི་བྱིན་རླབས་དེ། །ཁུ་ཡེ་ཕྱུ་དང་གཡང་དུ་ལེན། །ཡི་དམ་ཞི་ཁྲོའི་དངོས་གྲུབ་དེ། ཁུ་ཡེ་ཕྱྭ་དང་གཡང་དུ་ལེན། །གནས་གསུམ་མཁའ་འགྲོའི་རྟེན་འབྲེལ་དེ། །ཁུ་ཡེ་ཕྱུ་དང་གཡང་དུ་ལེན། །ཡེ་ཤེས་འཇིག་རྟེན་སྲུང་མ་ཡི། །འཆི་མེད་ཚེ་ཡི་དངོས་གྲུབ་དེ། །ཁུ་ཡེ་ཕྱྭ་དང་གཡང་དུ་ལེན། །རྐང་བཞི་ཕྱུགས་ཀྱི་དངོས་གྲུབ་དེ། །ཁུ་ཡེ་ཕྱྭ་དང་གཡང་དུ་
ལེན། །བང་མཛོད་འབྲུ་ཡི་ནས་གཡང་དེ། །ཁུ་ཡེ་ཕྱྭ་དང་གཡང་དུ་ལེན། །རྨ་གཡང་ཟས་ཀྱི་དངོས་གྲུབ་དེ། །ཁུ་ཡེ་ཕྱྭ་དང་གཡང་དུ་ལེན། །འབག་བཙོག་ལ་སོགས་ཉེས་པ་བཤགས། །མགྲོན་རྣམས་རང་རང་གནས་སུ་གཤེགས། །ཕུན་སུམ་ཚོགས་པའི་བཀྲ་ཤིས་ཤོག །དགེ་བས་བདག་སོགས་སེམས་ཅན་རྣམས། །པད་འབྱུང་ཉིད་དང་དབྱེར་མེད་ཤོག །རང་ཉིད་གྲོ་ལོད་ཧཱུྃ་ལ་ཐིམ། །གྱེན་རྫོགས་ཡལ་ནས་སྟོང་པ་ཉིད། །རང་ཉིད་ཆོས་སྐུ་རྗེན་པར་བུད། །ཅེས་པ་བསང་གི་ཁུ་ཡེ་གང་བདེར་སྦྱར་བའོ། །འདི་རྐྱང་པ་བཏོན་ཡང་ཆ་ཚང་། རྒྱུན་བསང་གྲུབ་ན་རབ། ཡང་ན་ནམ་བདེར་བྱའོ། །ཞེས་སྔགས་འཆང་རཱ་ག་ཨ་སྱས་གནས་འབྲེལ་མཛད་དུས་བྲིས་པའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།