ཟོ་དོར་གཉན་པོ་མོ་ཁད་ལྷ་རྩེའི་བསང་མཆོད།
ཟོ་དོར་གཉན་པོ་མོ་ཁད་ལྷ་རྩེའི་བསང་མཆོད་བཞུགས་པའི་དབུ་ཕྱོགས་ལགས་སོ།།
ན་མོ་པྲ་ཝཱ་ཀ་ར་ཡེ། རྡོ་རྗེ་གྲོ་ལོད་སྐུ་ལ་འདུད། །དགེ་བསྙེན་ཡེ་བརྫུའི་མཆོད་བསྟོད་ལ། །བཤོས་བུ་མཁར་ཐབས་སྟེང་དུ་ནི། །ཟུར་གསུམ་རྩེ་མོ་རྣོ་བ་བཞག །ཐ་མིར་མཐེབ་སྐྱུ་བཅོ་བརྒྱད་བསྐོར། །བསྡུ་ན་ཟུར་གསུམ་གཅིག་བྱས་ལ། །མ་འཛོམས་པ་རྣམས་མར་ཐུད་བཞག །ཇ་ཕུད་ཆང་ཕུད་འོ་ཞོ་སོགས། །གསེར་སྐྱེམས་ཚུལ་དུ་གཏོར་བར་བྱ། །རང་ཉིད་ཡི་དམ་གང་རུང་བསྒོམ། །མཆོད་རྫས་ཨ་ཀཱ་རོས་བྱིན་རླབས། །འདོད་ཡོན་སྟོང་གསུམ་ཁྱབ་པར་དམིགས་ལ་འདི་སྐད་དོ།། ཧཱུྃ། སྔོན་གྱི་བསྐལ་པའི་དང་པོ་ལ། །རྟ་མཆོག་རྒྱལ་པོ་ཧེ་རུ་ཀ །སངས་རྒྱས་བསྟན་པ་བསྲུང་བའི་ཕྱིར། །བསྟན་སྲུང་བཛྲ་སཱ་དྷུར་སྤྲུལ། །སྐྱེས་མཆོག་རྡོ་རྗེ་
ལེགས་པ་སྟེ། །འཛམ་གླིང་ཀུན་ལ་དབང་བསྒྱུར་ཕྱིར། །མཆེད་ཟླ་སུམ་བརྒྱ་དྲུག་ཅུར་སྤྲུལ། །སངས་རྒྱས་ཆོས་ཀྱིས་མཚན་བཏགས་པ། །བསྟན་སྲུང་སུམ་བརྒྱ་དྲུག་ཅུ་ཟེར། །གཡུང་དྲུང་བོན་གྱིས་མཚན་བཏགས་པ། །ཝེར་མ་སུམ་བརྒྱ་དྲུག་ཅུ་ཟེར། །སྐྱེ་བོ་རྣམས་ཀྱིས་མཚན་བཏགས་པ། །དགྲ་བླ་སུམ་བརྒྱ་དྲུག་ཅུ་ཟེར། །བྱང་ཁམས་རྣམས་ཀྱིས་མཚན་བཏགས་པ། །ཡེ་བརྫུ་སུམ་བརྒྱ་དྲུག་ཅུ་ཟེར། །ཐུགས་རྒྱུད་ངོ་བོ་གཅིག་ལགས་ཀྱང་། །རྣམ་པ་སྐུ་མཆེད་ཚུལ་དུ་སྟོན། །མིང་ཡང་མི་གཅིག་སོ་སོར་བཏགས། །གནས་ཀྱང་མི་
གཅིག་སོ་སོར་བཞུགས། །བརྒྱ་ནི་རྒྱ་གར་ཡུལ་དུ་བཞུགས། །རྒྱ་གར་ཆོས་ཀྱི་སྲུང་མ་མཛད། །བརྒྱ་ནི་རྒྱ་ནག་ཡུལ་དུ་བཞུགས། །རྒྱ་ནག་རྩིས་ཀྱི་ཨ་ཇོ་མཛད། །བརྒྱ་ནི་ལ་སྟོད་འབྲོག་ཡུལ་བཞུགས། །གཡུང་དྲུང་བོན་གྱི་སྲུང་མ་མཛད། །དྲུག་ཅུ་བོད་ཀྱི་ཡུལ་དུ་བཞུགས། །སྔགས་པ་རྣམས་ཀྱི་སྲུང་མ་མཛད། །དྲུག་ཅུ་ནང་གི་མཆེད་གསུམ་པོ། །གཏན་དུ་བཞུགས་པའི་ཡུལ་དག་ནས། །བོད་ཡུལ་མདོ་ཁམས་ཤར་གྱི་ཕྱོགས། །ཤར་ཟླ་ངང་མའི་སྟེང་ཤོད་ན། །ཤེལ་བྲག་གངས་དཀར་རྩེ་རེ་རེ། །རྩེ་ལ་ན་བུན་ཐུ་ལུ་ལུ། །ལོགས་ན་བྱ་རྒྱལ་ཀྱི་ལི་ལི། །འདབ་ན་ཤ་རྐྱང་ཁྲོ་ལོ་ལོ། །བསྐལ་པའི་འབྲུག་སྒྲ་དི་རི་རི། །དྲག་པོའི་གློག་དམར་འཁྱུགས་སེ་འཁྱུག །ཐོག་དང་སེར་བ་ཤ་ར་ར། །རླུང་ནག་འཚུབ་མ་ཀྱི་ལི་ལི། །ནང་ལྟར་ཤེལ་གྱི་སྐུ་མཁར་ན། །བཅོ་བརྒྱད་རྫོང་གི་དབུས་མ་ན། །གནམ་ལྕགས་ཡ་ཚ་དཀར་པོའི་མཁར། །མོ་ཁད་ལྷ་རྩེ་འདོད་ཡོན་ལོངས་སྤྱོད་བསམ་མི་ཁྱབ། །དེ་འདྲའི་གནས་ཀྱི་མངའ་བདག་ནི། །དགྲ་བླ་ཡེ་བརྫུ་མཆེད་གསུམ་བཞུགས། །མཆེད་གསུམ་ནང་གི་གཙོ་བོ་ནི། །སྐུ་མདོག་དམར་
ལ་འོད་ཟེར་འཕྲོ། །ཁྲོ་གཏུམ་དཔའ་བརྗིད་ཕུན་སུམ་ཚོགས། །སྐུ་ལ་དར་ནག་བེར་ཆེན་གསོལ། །དབུ་ལ་རྒོད་ཀྱི་བྱ་ཕོད་གསོལ། །ཆིབས་སུ་ར་སྐྱེས་ཁམ་%པ་ཆིབས། །ཕྱག་གཡས་རལ་གྲི་མདུང་རྣོན་འཛིན། །གཡོན་པས་དགྲ་མགོ་རློན་པ་འཛིན། །སྤྲུལ་པ་ར་སྐྱེས་ཁམ་པ་འགྱེད། །ཤར་གྱི་ཕྱོགས་ཀྱི་ཕོ་ཉ་བདུན། །མི་ལྗང་རྟ་ཡང་ལྡང་བ་སྟེ། །ཕྱག་གཡས་རྐྱལ་པ་གཡོན་པས་གྲི། །ལྷོ་ཡི་ཕྱོགས་ཀྱི་ཕོ་ཉ་བདུན། །མི་དམར་རྟ་ཡང་དམར་པོ་སྟེ། །ཕྱག་ན་ཤིང་ལོ་ལྟ་མོ་འཛིན། །ནུབ་ཀྱི་བཀའ་སྡོད་དྲུག་པོ་ནི། །མི་དཀར་རྟ་ཡང་དཀར་པོ་སྟེ། །ཕྱག་ན་གྲི་དང་རྡོ་རྗེ་འཛིན། །བྱང་གི་བཀའ་སྡོད་དགུ་པོ་ནི། །མི་སྔོན་རྟ་ཡང་སྔོན་པོ་སྟེ། །ཕྱག་ན་སྐྱོགས་དང་བུམ་པ་འཛིན། །ཡེ་བརྫུ་གཙོ་བོ་འཁོར་དང་བཅས། །འདིར་གཤེགས་བསང་དང་མཆོད་པ་བཞེས། །ཕོ་ལྷོག་ལ་སོགས་ནད་རིམས་སོལ། །མི་འཕེལ་རྟ་རགས་དངོས་གྲུབ་སྩོལ། །ཡེ་བརྫུ་མཆེད་གསུམ་ཆེ་བ་ནི། །སྐུ་མདོག་མཐིང་ནག་འབར་བ་ལ། །སྐུ་ལ་དར་ནག་བེར་ཆེན་གསོལ། །ཕྱག་གཡས་ཁྲོ་ཆུའི་ཐོ་བ་ཐོགས། །གཡོན་པས་ཆུ་གྲི་འབར་བ་
འཛིན། །ཆིབས་སུ་ཝ་མོ་དམར་མོ་ཆིབས། །སྤྲུལ་པ་བུ་ཆུང་མཛེས་པར་སྤྲུལ། །དེ་ཡི་གཡས་ཀྱི་ཕོ་ཉ་བཅུ། །མི་ནག་བྱ་ཡི་གཤོག་པ་ཅན། །ཕྱག་ན་གླང་ར་རྣོན་མོ་འཛིན། །གཡོན་གྱི་ཕོ་ཉ་མི་དམར་དགུ། །ཏ་ལའི་ལོ་མའི་སྒོ་བ་ནི། །ཏ་ལའི་ཐོག་བུས་བཀང་ནས་འཛིན། །ཡེ་བརྫུ་ཆེན་པོ་འཁོར་དང་བཅས། །འདིར་གཤེགས་བསང་དང་མཆོད་པ་བཞེས། །རྟ་ནོར་ལུག་གསུམ་དངོས་གྲུབ་སྩོལ། །རྨ་གཡང་དངོས་གྲུབ་ཆར་ལྟར་ཕོབ། །ཡེ་བརྫུ་མཆེད་གསུམ་ཆུང་བ་ནི། །སྐུ་མདོག་སེར་ལ་འོད་ཟེར་འབར། །སྐུ་ལ་བེར་ལྗང་བརྗིད་པ་གསོལ། །ཕྱག་གཡས་བེང་གྲི་རྣོན་མོ་བསྣམས། །གཡོན་པས་འཕེན་གྲི་རྣོན་མོ་བསྣམས། །ཆིབས་སུ་སྟག་མོ་རི་བཀྲ་ཆིབས། །བཀའ་སྡོད་བློན་པོ་བཅུ་གཉིས་ནི། །མི་དམར་ལག་ན་པར་བུ་ཐོགས། །སྤྲུལ་པ་གླང་བུ་སྟག་བྲེ་འགྱེད། །འདིར་གཤེགས་བསང་དང་མཆོད་པ་བཞེས། །ཚོང་ལ་འགྲོ་བའི་ལམ་ལྷ་མཛོད། །ཟས་ནོར་ལོངས་སྤྱོད་དངོས་གྲུབ་སྩོལ། །ཧཱུྃ། ཁྲོ་རྒྱལ་རྟ་མགྲིན་ཐུགས་སྤྲུལ་མཆོག །རྡོ་རྗེ་ལེགས་པའི་སྤྲུལ་པ་མཆེད། །མོ་ཁད་ལྷ་རྩེ་གནས་ཀྱི་བདག །ཟླ་སྟོད་ལུང་པའི་
ཡུལ་འདིའི་ལྷ། །དགྲ་བླ་གཉན་པོ་རྫུ་འཕྲུལ་ཅན། །མི་བརྫུ་དགུ་བརྫུ་ཅི་ཡང་བརྫུ། །ཡེ་བརྫུ་གཉན་པོ་ཞེས་སུ་གྲགས། །ཐོག་དང་སེར་བ་ཁ་ཆར་བདག །མཆེད་ཟླ་སུམ་བརྒྱ་དྲུག་ཅུ་ལ། །དངོས་སུ་འབྱོར་དང་ཡིད་ཀྱིས་སྤྲུལ། །མེ་ཏོག་བདུག་སྤོས་མར་མེ་དྲི། །ཞལ་ཟས་རོལ་མོའི་མཆོད་པ་འབུལ། །མཛེས་པའི་གཟུགས་དང་སྙན་པའི་སྒྲ། །ཞིམ་པའི་དྲི་དང་མངར་བའི་རོ། །འཇམ་པའི་རེག་བྱ་སྣ་ཚོགས་འབུལ། །དམ་རྫ་ས་བརྒྱན་པའི་གཏོར་མ་འབུལ། །བདུད་རྩི་ཇ་ཆང་གསེར་སྐྱེམས་འབུལ། །དཀར་གསུམ་མངར་གསུམ་ཟས་ཀྱི་ཕུད། །བཟང་ཤིང་ཕྱེ་མར་ར་ཡི་གསུར། །མདའ་དར་ཁྲབ་བྱང་རྔ་ཁྲབ་སོགས། །མཐུན་རྫས་དུ་མས་ཐུགས་དམ་བསྐང་། །འཁོར་བཅས་མཉེས་ཤིང་ཚིམ་གྱུར་ཅིག །སྔར་བྱས་ལས་ཀྱི་བཏང་རག་འབུལ། །ཕྱི་བྱེད་ལས་ཀྱི་ཞུ་སྐྱེམས་འབུལ། །ད་ལྟ་ལས་ཀྱི་གཉེར་ཟས་བཞེས། །ཁྱེད་ནི་ཡུལ་འདིར་གནས་པའི་ལྷ། །བདག་ཅག་ཡུལ་འདིར་གནས་པའི་མི། །མིས་ཀྱང་ལྷ་ལ་མཆོད་པ་འབུལ། །ལྷས་ཀྱང་མི་ལ་ཁ་འཛིན་མཛོད། །གནས་མགྲོན་གཉིས་ཀྱི་དམ་ཚིག་སྲུངས། །ཁྱེད་
ཅག་མཆེད་འཁོར་བཅས་པ་ཡིས། །རང་གི་དམ་བཅས་ཞལ་བཞེས་པའི། །སྐྱེ་བོ་ཡོངས་ཀྱི་དགྲ་བླ་བྱེད། །དམག་དང་ཇག་གི་དཔུང་རོགས་བྱེད། །ཚོང་ལ་འགྲོ་བའི་ལམ་ལྷ་བྱེད་།འཛམ་གླིང་ཕུད་ཀྱི་བདག་པོ་བྱེད། །ཉིད་ཀྱི་དམ་བཅས་མི་བརྗིད་པར། །སློབ་དཔོན་པདྨའི་སྤྱན་སྔ་རུ། །ཁས་བླངས་དམ་དུ་བཅས་པ་བཞིན། །གསང་སྔགས་བཀའ་ཡི་སྲུང་མ་མཛད། །གཏེར་དང་གཙུག་ལག་ཁང་རྣམས་སྲུངས། །སྔགས་པ་རྣམས་ཀྱི་ཕོ་ཉ་བྱེད། །སངས་རྒྱས་བསྟན་པའི་བྱ་ར་བྱེད། །སྔོན་གྱི་དམ་ཚིག་དྲན་མཛོད་ལ། །བདག་ཅག་ཡོན་མཆོད་བསྲུང་བྱ་རྣམས། །མཉམ་གཉིས་མི་དང་ཕྱུགས་འདྲེན་ན། །བེའུ་ལུག་འཕེལ་ཁ་ཁྱེད་ལ་རེ། །ཕྱུགས་གཡང་གཞན་ལ་མ་ཤོར་ཅིག །མཉམ་གཉིས་མི་དང་བུ་འདྲེན་ན། །མི་འཕེལ་རྟ་ཧྲག་ཁྱེད་ལ་རེ། །མི་གཡང་གཞན་ལ་མ་ཤོར་ཅིག །མཉམ་གཉིས་མི་དང་ཤག་འདྲེན་ན། །ཤག་གི་ལྕེ་བདེ་ཁྱེད་ལ་རེ། །རྒྱལ་ཁ་གཞན་ལ་མ་ཤོར་ཅིག །མཉམ་གཉིས་མི་དང་དཔའ་འདྲེན་ན། །དཔའ་བའི་རུ་དར་ཁྱེད་ལ་རེ། །དཔའ་ཁ་གཞན་ལ་མ་ཤོར་ཅིག །མཉམ་གཉིས་མི་དང་གཡུལ་འདྲེན་
ན། །དམག་གི་དམག་དཔོན་ཁྱེད་ལ་རེ། །རྒྱལ་ཁ་གཞན་ལ་མ་ཤོར་ཅིག །སྡང་བའི་དགྲ་ལ་ཇག་རྒྱུག་ན། །ཇག་གི་ཇག་དཔོན་ཁྱེད་ལ་རེ། །དར་ཁ་གཞན་ལ་མ་ཤོར་ཅིག །དལ་བའི་དུས་སུ་ཁྱེད་མཆོད་ན། །བྲེལ་བའི་དུས་སུ་ཐུགས་མ་གཡེལ། །ཉིན་གྱི་དུས་སུ་བྱ་ར་གྱིས། །མཚན་གྱི་དུས་སུ་མེལ་ཚེ་གྱིས། །དགྲ་རྣམས་བྱུང་ན་བྱ་ཐོང་ཞིག །དུག་རྣམས་བྱུང་ན་རྩི་ཐོང་ཞིག །མཆོད་དོ་ཡེ་བརྫུ་རྫུ་འཕྲུལ་ཅན། །མཐུ་དང་ནུས་པ་ཅི་འདུག་བསྐྱེད། །བཅོལ་བའི་ཕྲིན་ལས་འགྲུབ་པར་མཛོད། །ཡ་ཡ་ཁུ་ཡ་ཁུ་ཡེ་སརྦ་པཱུ་ཙ་ཁཱ་ཧི་ཁཱ་ཧི། ཅེས་ཇ་ཕུད་ཆང་ཕུད་རི་ཡི་ཕྱོགས་སུ་མཆོད་པ་འབུལ། གཏོར་མ་བསང་ཁང་དུ་མཆོད། ཅེས་པ་འདི་ནི་༧ རཱ་ག་ཨ་སྱས་དམ་ཅན་ཆེན་པོའི་གསོལ་ཁའི་རྒྱུད་གཞུང་ནས་བསྡུས་ཏེ་གསུངས་སོ། །ཁྱད་པར་ཡེ་བརྫུ་མོ་ཁད་ལྷ་རྩེའི་བསང་མཆོད་འདི་ལ་ཉེས་འགལ་ཅི་མཆིས། ཡུལ་ལྷ་ཟོ་དོར་རྣམས་ལ་བཤགས། དགེ་བས་འགྲོ་ཀུན་བྱང་ཆུབ་ཐོབ་ཕྱིར་བསྔོ། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།