ཟླ་རྒྱལ་ག་པའི་བསང་།
ཟླ་རྒྱལ་གྲྭ་པའི་བསང་ནི། ཀ་ཡེ་གསོན་དང་ཟླ་རྒྱལ་གྲྭ་པ་ཁྱོད། །ཁ་བ་ཅན་ལྗོངས་སྨར་ཁམས་ཟླ་ཡི་ས། །ག་ནས་བྱས་ཀྱང་ཁྱོད་ཉིད་དྲག་རྩལ་ཆེ། །ང་ཡིས་ཁྱོད་ལ་ད་ཅིང་བསྟོད་པའི་ཕྱིར། །ཅ་ཅོའི་དབྱངས་དང་རོལ་མོའི་སྤྱན་འདྲེན་ན། །ཆ་ལུགས་སྐྱེས་ཕྲན་ཟུར་སྟོན་རལ་པ་ཅན། །ཇ་ཆང་ཟས་ཕུད་གཏོར་མའི་མཆོད་པ་འབུལ། ཉ་རྒྱས་ཟླ་ལྟར་གཟི་བརྗིད་འབར་བ་ཁྱོད། །ཏ་ཐཱ་ག་ཏའི་བསྟན་པ་བསྲུང་བར་མཛོད། །ཐ་མལ་བྲན་གཡོག་ནོར་ཕྱུགས་ཡན་ཆད་ཀྱི། །ད་ནི་བདག་ཅག་ཡོན་མཆོད་འཁོར་བཅས་ལ། །ན་ཚ་ཤི་ཆད་གོད་ཁ་མ་བཏང་ཞིག །པ་དེ་པུ་དེའི་ཆོ་འཕྲུལ་མ་སྟོན་ཅིག །ཕ་དང་ཁུ་བོ་བཞིན་དུ་མགོན་སྐྱོབ་མཛོད། །བ་མོར་ཉི་ཟེར་ཕོག་ལྟར་བར་ཆད་སོལ། །མ་ལྟར་རྟག་ཏུ་བྱམས་ཤིང་བརྩེ་བ་དང་། །ཙ་ཁ་ལོ་ཏོག་རྟག་ཏུ་ལེགས་པར་མཛོད། །ཚ་གྲང་གདུང་བའི་ནད་རྣམས་ཞི་བར་མཛོད། །ཛ་ཡེ་པདྨ་འབྱུང་གནས་བཀའ་བཞིན་དུ། །ཝ་ལེར་མངོན་ཤེས་ལྡན་པའི་ལྷ་ཁྱོད་ཀྱི། །ཞྭ་ལྟར་བླ་མེད་གསང་སྔགས་སྤྱི་བོར་ཁུར། །ཟ་བྱེད་བཙན་བདུད་དྲག་པོ་འཁོར་དང་བཅས། །འ་འུར་འབྲུག་སྒྲ་གློག་འོད་
དང་བཅས་ཏེ། །ཡ་མཚན་ཆེ་བའི་རྟགས་མཚན་སྣ་ཚོགས་དང་། །ར་ཅན་ཁྲི་ཡི་འཁོར་ཚོགས་དང་བཅས་པའི། །ལ་ཆེན་ཟླ་ཡི་གྲྭ་པ་འཁོར་བཅས་མཆོད། །ཤ་ཚ་སྙིང་རྗེའི་སྤུན་ཟླ་ཤག་ཤེས་ལྟར། །ས་ཆ་གར་འགྲོ་གར་འདུག་ཁ་འཛིན་མཛོད། །ཧ་ཧ་དགྱེས་པའི་གད་མོ་དང་བཅས་ཏེ། །ཨ་ལ་ལ་ཧོ་ངོ་མཚར་དངོས་གྲུབ་སྩོལ། །ཅེས་པ་འདི་ཟླ་རྒྱལ་གྲྭ་པའི་ཞོལ་དུ་ཞག་གཅིག་ཉལ་ནུབ་རྨི་ལམ་དུ། སྐྱེས་ཕྲན་ཆས་བཟང་རལ་པས་སོག་འདབ་ཁེབས་པ་གཅིག་ལངས་ནས་ཁོག་སྨད་བྲག་རི་ནང་དུ་ནུབ་པ་གཅིག་གིས་རང་བོན་པོ་ཡིན་ཟེར་ནས་དད་ཅིང་གུས་པ་དང་དགའ་བའི་ཚུལ་བསྟན། ཐོ་རངས་ནས་སྔོ་ལྷུབས་སེ་བའི་རྩྭ་སྒྲོ་བ་གང་ཕུལ་བའི་ཉམས་སྣང་བྱུང་ཕྱིར་ཨ་རཱ་གས་བྲིས་པ་དགེ་ལེགས་འཕེལ།།