སྐུ་ལྷ་རྔམ་རྩའི་བསང་མཆོད།
སྐུ་ལྷ་རྔམ་རྩའི་བསང་མཆོད་རཱ་གས་མཛད་པ་བཞུགས་སོ།། ན་མོ་པྲ་ཝ་ཀཱ་ར་ཡེ། སྐུ་ལྷ་རྔམ་རྩའི་བསང་མཆོད་ནི། །དཀར་གཏོར་སྟོད་ནི་ཟུར་གསུམ་པ། །འདབ་མ་བཞི་དང་ལྡན་པ་ལ། །གཙང་མའི་ཤ་དང་ཟས་ཀྱིས་བརྒྱན། །ཕུད་ཀྱིས་བྲན་ལ་རང་ཉིད་ནི། །པདྨ་འབྱུང་གནས་གསལ་བ་ཡི། །ཐུགས་ཀའི་ཧྲཱིཿལས་འོད་ཟེར་གྱིས། །སྐུ་ལྷ་མདུན་དུ་སྤྱན་དྲངས་པས། །ཅི་བགྱིས་བཞིན་དུ་སྩོལ་བར་བསམ། །ཧཱུྃ། ཐུབ་པ་ཆེན་པོའི་ལུང་བསྟན་ཅིང་། །འཇིག་རྟེན་དབང་ཕྱུག་བྱིན་རླབས་པའི། །གདོང་དམར་ཁ་བ་ཅན་གྱི་ལྗོངས། །ལྷོ་ཟླ་ངང་མའི་ཤར་གྱི་ལུང་། །རྡོ་རྗེའི་བྲག་རི་མཐིང་ནག་ལ། །གནས་བཅས་དགེ་བསྙེན་ཆེན་པོ་ནི། །སྐུ་ལྷ་རྔམ་རྩ་ཞེས་སུ་གྲགས། །འདིར་བྱོན་དགྱེས་པའི་གདན་ལ་བཞུགས། །སྔོན་ཚེ་པདྨ་འབྱུང་གནས་དང་། །གསལ་སྟོང་སྒོམ་པའི་སྤྱན་སྔ་རུ། །ཁས་བླངས་དམ་ཚིག་རྗེས་དགོངས་ལ། །སངས་རྒྱས་བསྟན་པ་བསྲུང་བ་དང་། །རྣལ་འབྱོར་བདག་གི་ཕྲིན་ལས་སྒྲུབས། །ཁྱེད་ལ་མཆོད་པའི་དམ་རྫས་ནི། །ཧཱུྃ་ལས་རིན་ཆེན་སྣོད་ཡངས་པར། །ཁཾ་ལས་གཏོར་མ་བདུད་རྩི་བཅུད། །ཁ་དོག་དྲི་རོ་ཕུན་སུམ་ཚོགས། །ཨོཾ་ཨཱཿཧཱུྃ་དང་ཧ་ཧོ༔ཧཱུྃ༔ བྱིན་རླབས་ཡིད་མཐུན་འདོད་
ཡོན་དང་། །འབྲུ་སྨན་དར་ཟབ་རིན་ཆེན་སོགས། །ཟད་མེད་ནམ་མཁའ་མཉམ་པར་འབུལ། །འཁོར་བཅས་མཉེས་ཤིང་ཚིམ་གྱུར་ཅིག །ཨོཾ་ཨཱཀཱ་ཡ་དྷེ་ཝ་ཧཱུྃ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨནྡྷཾ་སོགས་ཤཔྟ་པཱུ་ཛཿ ཨཱཿཧཱུྃ། བཀའ་སྲུང་སྐུ་ལྷ་རྔམ་རྩ་ནི། །སྐུ་མདོག་སྔོན་པོ་འོད་ཟེར་འབར། །དབུ་སྐྲ་ཐོར་ཚུགས་དར་དཔྱངས་འཕུལ། །སྐུ་ལ་མཐིང་བེར་བརྗིད་པ་གསོལ། །རིན་ཆེན་སྣ་ཚོགས་རྒྱན་གྱིས་བརྒྱན། །ཕྱག་གཡས་མདའ་ལྔ་གཡོན་པས་གཞུ། །ཆིབས་སུ་འབྲོང་ཆེན་འགྱིང་བ་ཆིབས། །ཡུལ་ལྷ་གཉན་པོ་ཁྱོད་ལ་བསྟོད། །གསོལ་ལོ་མཆོད་དོ་གསུར་གྱི་མཆོད། །འཁོར་བཅས་མཉེས་ཤིང་ཚིམ་གྱུར་ཅིག །བདག་ཅག་ཡོན་མཆོད་མི་ནོར་བཅས། །ནད་གདོན་བར་ཆད་ཞི་བ་དང་། །ཚེ་བསོད་དཔལ་འབྱོར་རྒྱས་པ་དང་། །འདོད་དགུ་དབང་དུ་བསྡུ་བ་དང་། །གནོད་བྱེད་དགྲ་བགེགས་བཟློག་ལ་སོགས། །ཡིད་ལ་བསམ་པ་ཀུན་འགྲུབ་ཅིང་། །བཀྲ་ཤིས་བདེ་ལེགས་འབྱུང་བ་ཡི། །ཁ་འཛིན་སྡོང་གྲོགས་དམ་པ་མཛོད། །བདག་གིས་སྲུང་མར་ཁྱོད་བསྟེན་ན། །ལེ་ལོ་བཏང་སྙོམས་མ་མཛད་པར། །
སྐུ་ཤུགས་ཕྱུང་ལ་ཕྲིན་ལས་མཛོད། །མཐུ་སྟོབས་ཅི་འདུག་ད་ལྟའོ། །རྟགས་དང་མཚན་མ་དངོས་སུ་སྟོན། །བཅོལ་བའི་ཕྲིན་ལས་འགྲུབ་པར་མཛོད། །ཨོཾ་ཨཱཿཀ་ཡ་དྷེ་ཝ་སརྦ་སིདྡྷི་ཧཱུྃ་ཨཱཿ དུས་རྒྱུན་ཐོན་ན་རབ། ནམ་འདོད་ཐུན་གཏོར་དཀར་གཏོར་གྲུབ་ན་ཆོག་གོ །དུས་རྒྱུན་མཆོད་བསྟོད་ལ་བརྩོན་པར་བྱའོ། །རྔམ་རྩའི་བསང་མི་འགྱུར་རྡོ་རྗེའི་ཞལ་གཟིགས་པ་ལ་བསྟུན་ནས། རཱ་ག་ཨ་སྱས་མཛད་པའོ།། །།