དགྲ་བླ་ཆེན་པོ་ཇོ་བོ་སྐེད་རྒྱལ་གྱི་བསང་གསོལ་དྲག་བསྐུལ་དགྲ་བོ་ཀླད་འགེམ།
དགྲ་བླ་ཆེན་པོ་ཇོ་བོ་སྐེད་རྒྱལ་གྱི་བསང་གསོལ་དྲག་བསྐུལ་དགྲ་བོ་ཀླད་འགེམ་ཞེས་བྱ་བ་བཞུགས་སོ།།
ན་མོ་གུ་རུ་དྷེ་ཝ་དྷཱ་ཀི་ནི་ཧཱུྃ། པད་འབྱུང་གནས་སྤྲུལ་པའི་སྐུ་ལ་ཕྱག་འཚལ་ལོ། །དེ་ཡི་བཀའ་ཉན་ཡུལ་ལྷ་མཆོད་ཐབས་བྲི། །སྣོད་གཙང་ནང་དུ་བཤོས་བུ་སྟོད་ཟླུམ་པོ། །སྐེད་པའི་སྨད་དུ་འདབ་མ་བརྒྱད་བཏགས་ལ། །སྨད་ནི་ཟུར་གསུམ་ཕུར་པའི་དབལ་དབྱིབས་བྱ། །གྲི་གུག་ཐོད་ཁྲག་སྟག་གཟིག་གཟུགས། །ཟན་ལ་པར་བཏབ་བཤོས་བུའི་མཐའ་ལ་བཞག །ཁ་དོག་ལྔ་ལྡན་མདའ་དར་གཡུ་བཏགས་པའི། །མགུལ་དུ་མཐིང་ཤོག་དག་ལ་གསེར་དངུལ་གྱི། །རྩ་སྔགས་དང་ནི་རྩ་སྔགས་ཤམ་བུ་རུ། །ལས་ཚོགས་འདོད་གསོལ་སྔགས་བྲིས་ཤོལ་དྲིལ་བཏགས། །དེ་ནས་ཕོ་ཉ་སྒྲུབ་པའི་རྟེན་རྫས་ཏེ། །དེ་ཉིད་རྒྱུན་དུ་གཅར་བྱ་སྟེ། །བཏགས་ཐབས་ལ་སོགས་ནང་དུ་བཞག་ཀྱང་རུང་། །བསང་
རྫས་སྤྱི་དང་མཐུན་པར་བཤམས་བྱས་ལ། །མཆོད་བསྟོད་རྐྱང་པར་བསང་རྫས་མི་དགོས་སོ། །རྟག་ཏུ་འགོ་བའི་ལྷ་རུ་བསྟེན་པ་ན། །མདའ་དར་རྟེན་རྫས་མེད་ཀྱང་ཆོག་པ་ཡིན། །དེ་ནས་བསང་ལ་ཁུ་ཡེའི་གོང་དུ་སྦྱར། །མཆོད་བསྟོད་རྐྱང་པར་བཀའ་སྲུང་རྣམས་ཀྱི་མཇུག །ཆོས་སྐྱོང་རྣམས་ཀྱི་གྲལ་དུ་བཙུད་པ་སྟེ། །དེ་ལྟར་བྱེད་ཚེ་བསང་གི་ལེའུར་སྒྱུར། །དེ་ཡིན་འདོན་ལུགས་བཀའ་སྲུང་གཞན་དང་མཚུངས། །དེ་ཉིད་ཡི་དམ་གང་བསྒོམས་ཀྱང་། །སྐད་ཅིག་པད་འབྱུང་སྐུ་རུ་གནས་གྱུར་བསམ།། ཨ༔ ཆོས་རྣམས་མི་དམིགས་ཡེ་ནས་སྟོང་པ་ཉིད། །དེ་ཡི་ངང་ལས་མདུན་གྱི་ས་གཞི་འདི། །མཐིང་ནག་གུར་ཆེན་དར་ནག་འཕུར་མ་ཅན། །གུར་ཤིང་དུང་ལ་ཚུགས་ཤིང་
མཆོང་ལ་བྱས། །མུ་ཏིག་བྱ་ལག་གསེར་གྱི་ཆོན་ཐག་ལ། །དངུལ་གྱི་ཆོན་ཕུར་ལྡན་ཞིང་རབ་ཏུ་བརྗིད། །གསེར་དངུལ་ཟངས་ལྕགས་གཟི་མཆོང་གཡུ་ལ་སོགས། །རིན་ཆེན་གཏེར་ཁ་བཅུ་གསུམ་དག་གིས་ཕྱུགས། །དེ་དབུས་ཨེ་ཡིག་ཡོངས་སུ་གྱུར་པ་ལས། །བཙན་གྱི་རྒྱལ་པོ་ཇོ་བོ་དྲག་རྩལ་ཅན། །སྟོན་ཟླའི་མདོག་ཅན་ཞི་འཛུམ་བརྗིད་བག་ལྡན། ཁྲབ་ལྡན་མཆོང་མདོག་བཻཌཱུའི་རི་མོ་ཅན། །དེ་སྟེང་ཤེལ་ཁྲབ་འོད་འབར་ཞུ་ལུབ་གསོལ། །རྨོག་ལྡན་ནག་པོའི་སྟེང་ན་དཀར་པོ་ཡི། །བྱ་རིགས་གཅན་གཟན་སྣ་ཚོགས་རི་མོ་ཅན། །དེ་སྟེང་ཤེལ་རྨོག་གངས་རི་སྤུངས་འདྲ་གསོལ། །སྟག་རལ་གཟིག་ཤུབས་འཁོར་གསུམ་སྐེད་ལ་བསྐོར། །ཕྱག་གཡས་གནམ་ལྕགས་རལ་གྲི་ནམ་མཁར་ཕྱར། །ཕྱག་ཡེ་གཡོན་དར་མདུང་དཀར་པོ་ཕྲག་ལ་བཀལ། །ཆིབས་སུ་འཕྲུལ་གྱི་རྟ་དཀར་འཕུར་ཤེས་ལ། །རྔོག་མ་གཡུ་རྔོག་རྔ་མ་གསེར་གྱི་མདོག །སྒྲ་སྙན་ཞུ་ལུབ་འདྲ་བའི་ཁྲ་བོ་ལ། །ཁ་དོག་སྣ་ཚོགས་ཐིག་ལེ་གྲུ་བཞི་ཅན། །དེ་སྟེང་ཤེལ་སྒ་གཡུ་སྨད་གཡུ་སྲབ་མཐུར། །རྔམ་བརྗིད་དཔའ་གཏུམ་ལྡན་པ་ལམ་མེར་གསལ། །ཐུགས་ཀའི་ས་བོན་འོད་ཀྱིས་སྤྱན་
དྲངས་གྱུར། །ཧཱུྃ། རྒྱལ་བས་ལུང་བསྟན་གདོང་དམར་བོད་ཀྱི་ཡུལ། །ཐུགས་རྗེ་ཆེན་པོའི་ཞིང་ཁམས་གངས་རིའི་ལྗོངས། །ཤར་ཕྱོགས་མདོ་ཁམས་གླིང་ཁྲི་བར་མ་ཡི། །རྨ་གཡང་འཚོགས་པ་གསང་གི་ལུང་པའི་སྟོད། །རིན་ཆེན་ས་སྟེང་དགུང་དུ་རྩེ་མཐོ་བ། །འཁོར་ལོས་སྒྱུར་རྒྱལ་གདན་དུ་བཞུགས་པ་ལ། །རྒྱལ་ཕྲན་མང་པོའི་འཁོར་གྱིས་བསྐོར་འདྲའི་རི། །སྟེང་ན་ཆུ་འཛིན་བླ་རེ་གློག་འོད་འཁྱུག །དབྱར་རྔའི་སྒྲ་འབྱིན་བདུད་རྩིའི་ཆར་རྒྱུན་འབེབས། །འདབ་ཆགས་འཕུར་ལྡིང་བར་སྣང་རྒྱན་དུ་མཛེས། །གཡུ་ཡི་ནེའུ་སིང་ཤེལ་གྱི་ཆུ་མིག་བཀྲ། །གསེར་གྱི་སྤང་ལྗོངས་མེ་ཏོག་ཚོམ་བུར་བཀོད། །རི་དྭགས་སྣ་ཚོགས་གཅན་གཟན་བག་ཡང་དྲོ། །དེ་དབུས་ཡིད་ལས་སྤྲུལ་པའི་མཐིང་གུར་ནས། །རིན་ཆེན་གཏེར་ཁ་བཅུ་གསུམ་བདག་པོ་སྟེ། །ཇོ་བོ་སྐེད་རྒྱལ་ཞེས་གྲགས་བཙན་གྱི་རྗེ། །དྲེགས་པ་བཙན་ལ་འོད་འབར་དྲག་རྩལ་ཅན། །རྩེ་གཅིག་གདུང་བའི་ཡིད་ཀྱིས་ཁྱོད་འབོད་ན། །མ་ཐོག་མྱུར་དུ་གནས་འདིར་གཤེགས་སུ་གསོལ། །ཨོཾ་ན་ཤ་ད་ན་བཛྲ་ས་མཱ་ཛཿ ཧཱུྃ། ཡིད་འོང་རྔམ་བརྗིད་མཐིང་གུར་
དབུས། །རྫུ་འཕྲུལ་ཤུགས་ལྡན་ཅང་ཤེས་དཀར་པོའི་སྟེང་། །དགྱེས་ཤིང་བརྟན་པའི་ཚུལ་གྱི་བཞུགས་ནས་ཀྱང་། །སྔོན་ཚེ་སློབ་དཔོན་པདྨའི་སྤྱན་སྔ་རུ། །ཇི་ལྟར་ཐུགས་དམ་ཞལ་བཞེས་རྗེས་དགོངས་ལ། །གང་བཅོལ་ཕྲིན་ལས་མྱུར་དུ་འགྲུབ་པར་མཛོད། །ཨོཾ་ན་ཤ་ད་ན་ཛཿཧཱུྃཔཾ་ཧོཿ ས་མ་ཡ་སྟེ། ས་མ་ཡ་ཧོཿ ཧཱུྃ། དགེ་བསྙེན་བཙན་ལ་འོད་འབར་མཆོད་པའི་རྫས། །ཧཱུྃ་ལས་རིན་ཆེན་སྣོད་མཆོག་རྒྱ་ཆེ་བ། །ༀ་ལས་ལྷ་རྫས་གཏོར་མ་བདུད་རྩིའི་མཚོ། །ཨོཾ་ཨཱཿཧཱུྃ་གིས་ཟག་མེད་བདུད་རྩིར་བསྒྱུར། །ཁ་དོག་དྲི་རོ་ནུས་པ་ཕུན་སུམ་ཚོགས། །མེ་ཏོག་བདུག་སྤོས་མར་མེ་དྲི་ཆབ་བཅས། །མཛེས་པའི་གཟུགས་དང་རབ་ཏུ་སྙན་པའི་སྒྲ། །རེག་ན་བདེ་བ་སྐྱིད་ཕྱིར་དར་དང་ཟབ། །ལྷ་མདའ་ལེབ་མ་དར་སྣའི་ཅོད་པན་འཕུར། །དྲུག་དམར་གཡུ་དང་སྟག་དང་གཟིག་གི་གཟུགས། །མཐིང་ཤོག་ངོས་ལ་སྲོག་སྔགས་འབྲུ་ཡིས་སྤྲས། །དངོས་འབྱོར་ཡིད་སྤྲུལ་མཆོད་སྤྲིན་རྒྱ་མཚོ་འབུལ། །ཁྱེད་ཀྱི་སྐུ་གསུང་ཐུགས་རྒྱུད་ཚིམ་གྱུར་ཅིག །ཨོཾ་ན་ཤ་ད་ན་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། །ལན་གསུམ། ཨོཾ་ན་ཤོ་ད་ན་ཨརྒྷཾ་པཱཏྱཾ༔ ཤརྡ་གནྡྷེ་རྭ་
ས་སྤངྒེ་པྲ་ཏཱིཙྪ་སྭཱ་ཧཱ། དེ་ནས་བསང་དང་འབྲེལ་ན་ཕྱེ་མར་སོགས་འབྲུ་སྣ་ཕུད་རྫས་རྣམས་མཆོད་ལ། འདི་སྐད་དོ།། ཀྱཻ། བསང་གི་རྒྱུད་བྱུང་གང་ནས་བྱུང་། །བསང་བྱུང་སྟོང་པའི་ངངལས་བྱུང་། །ཀུན་བཟང་ཡུམ་གྱི་མཁའ་ཀློང་ནས། །རྒྱལ་བ་ཡུམ་ལྔའི་རྫུ་འཕྲུལ་ལས། །འབྱུང་བ་ཆེན་པོ་ལྔ་རུ་ཤར། །འབྱུང་བའི་དྭངས་མ་ཤིང་དུ་སྲིད། །བལ་བུ་དུང་ལོ་ལྷ་ཡི་ཤིང་། །བདུད་རྩི་འོམ་བུ་ཀླུ་ཡི་ཤིང་། །སྟག་པ་གསེར་ལོ་གཉན་གྱི་ཤིང་། །སྤེན་མ་དངོས་གྲུབ་འབྱུང་བའི་ཤིང་། །ཉ་བྲིད་ཀླུ་གཉན་དགའ་བའི་ཤིང་། །ཤུག་པ་གཡུ་ལོ་བསང་གི་ཤིང་། །དྲི་ལྡན་ཨ་གར་སྤོས་ཀྱི་ཤིང་། །བཟང་ཤིང་སྣ་ཚོགས་དུད་པ་དང་། །ཕྱེ་མར་ཟས་ཕུད་འོ་ཞོ་དང་། །ཇ་ཆང་ཕུད་རྒོད་མཆོད་པ་འདིས། །ཡུལ་ཕྱོགས་འདི་ལ་མངའ་མཛད་པའི། །ཡུལ་ལྷ་ཇོ་བོ་སྐེད་རྒྱལ་བསང་། །རིག་པའི་རྒྱལ་པོ་བཙན་གྱི་རིགས། །བཙན་རྗེ་བཙན་ལ་འོད་འབར་བསངས། །སྡང་དགྲ་ཆམ་ལ་འབེབས་མཛད་པས། །དགྲ་བླ་བཙན་ལ་འོད་འབར་བསང་། །ནད་རིགས་ཐམས་ཅད་ཞི་མཛད་པའི། །ཞི་མཛད་ཇོ་བོ་ཆེན་པོ་བསང་། །ཚེ་དང་བསོད་ནམས་རྒྱས་མཛད་
པའི། །རྒྱས་མཛད་གཏེར་བདག་ཇོ་བོ་བསང་། །སྣང་སྲིད་དབང་དུ་བསྡུས་མཛད་པའི། །དབང་མཛད་བཙན་ལ་འོད་འབར་བསང་། །དགྲ་བོ་རྩད་ནས་གཅོད་མཛད་པའི། །རྣོ་མྱུར་བཙན་རྒོད་འབར་བ་བསང་། །རིན་ཆེན་གཏེར་ཁ་བཅུ་གསུམ་བདག །གཏེར་བདག་ཇོ་བོ་སྐེད་རྒྱལ་བསང་། །པད་འབྱུང་བཀའ་དང་དམ་ལ་གནས། །དམ་ལྡན་བཙན་ལ་འོད་འབར་བསང་། །དཀར་པོའི་ཕྱོགས་སྐྱོང་བསྟན་པ་བསྲུང་། །བསྟན་སྲུང་བཙན་ལ་འོད་འབར་བསང་། །སྤྲུལ་པའི་རྫུ་འཕྲུལ་བསམ་མི་ཁྱབ། །འཕྲུལ་ལྡན་རྡོ་བོ་སྐེད་རྒྱལ་བསང་། །དཔལ་དང་འབྱོར་པ་ནོར་གྱི་བདག །ནོར་བདག་ཇོ་བོ་ཆེན་པོ་བསང་། །བསང་དང་མཆོད་པ་འདི་ཕུལ་བས། །རྨུགས་པ་འཐིབས་པ་སངས་གྱུར་ཅིག །ཉམས་དང་རྒུད་པ་སོས་གྱུར་ཅིག །མཐུ་སྟོབས་གཟི་བརྗིད་འཕེལ་གྱུར་ནས། །བཀྲག་མདངས་གཟི་བརྗིད་ལྡན་གྱུར་ཅིག །ཕོག་ཐུག་འགྲམས་འཁྲུགས་ཅིག །ཁྱོད་ནི་ཡུལ་འདིར་གནས་པའི་ལྷ། །བདག་ཅག་ཡུལ་འདིར་གནས་པའི་མི། །མིས་ཀྱང་ལྷ་ལ་དུས་སུ་མཆོད། །ལྷས་ཀྱང་མི་ལ་ཁ་འཛིན་མཛོད། །མི་ལ་ན་ཚ་མ་
བཏང་ཞིག །ཞིང་ལ་སད་སེར་མ་བཏང་ཞིག །ཕྱི་དགྲ་ནང་དུ་མ་བཏང་ཞིག །ནང་མི་ཕྱི་རུ་མ་བཏང་ཞིག །བཙན་པོ་གོང་དུ་མ་བཏང་ཞིག །མགྱོགས་་སྔོན་དུ་མ་བཏང་ཞིག །ཕྱི་ནང་འཁྲུག་རྩོད་ཞི་གྱུར་ཅིག །ཚེ་རིང་ཆོས་སྲིད་འཕེལ་བར་ཤོག །དཔལ་དང་འབྱོར་པ་རྒྱས་པ་དང་། །ཁམས་གསུམ་དབང་དུ་འདུ་བ་དང། །བཀྲ་ཤིས་བདེ་ལེགས་རྒྱས་པར་མཛོད། །ལྷ་རྒྱལ་ལོ། །དེ་ནས་གསོལ་ཁ་ནི། ཨ་ཀཱ་རོས་བྱིན་གྱིས་བརླབས།ཧཱུྃ། ཉི་མ་ཤར་ཕྱོགས་མདོ་ཁམས་ཡུལ། །རྩི་ཞེས་བྱ་བའི་ཡུལ་གྱི་སྟོད། །གསང་ཞེས་བྱ་བའི་ལུང་པའི་སྟོད། །སྐྱེད་རྒྱལ་ཞེས་བྱའི་རི་བོ་ནས། །བཙན་ལ་འོད་འབར་གཤེགས་སུ་གསོལ། །དགྱེས་པའི་གདན་བཞུགས་གསོལ་མཆོད་བཞེས། །དམ་རྫ་ས་བརྒྱན་པའི་གཏོར་མ་བཞེས། །དངོས་འབྱོར་ཡིད་སྤྲུལ་མཆོད་པ་བཞེས། །མཐུན་པའི་རྫས་ཀྱི་ཐུགས་དམ་བསྐང་། །གསོལ་ལོ་མཆོད་དོ་དགྱེས་པར་མཛོད། །སྐུ་གསུང་ཐུགས་རྣམས་མཉེས་གྱུར་ནས། །ཁ་འཛིན་སྡོང་གྲོགས་མ་གཡེལ་ཅིག །མཉམ་གཉིས་མི་དང་དཔུང་འགྲན་ན། །དཔའ་བའི་དཔུང་རོགས་ཁྱེད་ལ་
རེ། །དཔའ་གཡེལ་གཞན་ལ་མ་ཤོར་ཅིག །མཉམ་གཉིས་མི་དང་ཤག་འགྲན་ན། །ཤག་གི་ལྕེ་བདེ་ཁྱེད་ལ་རེ། །རྒྱལ་ཁ་གཞན་ལ་མ་ཤོར་ཅིག །མཉམ་གཉིས་མི་དང་རྟ་རྒྱུག་ན། །མགྱོགས་ཀྱི་དར་ལྕེ་ཁྱེད་ལ་རེ། །མགྱོགས་དར་གཞན་ལ་མ་ཤོར་ཅིག །ལྡེབ་༧་པ་དང་ར་གཉིས་ཆད་སོང་། གྱི་མི་ཆེན་དང་བན་དེ་བོན་པོ་དང་ཚོང་དཔོན་ལ་སོགས་པས་རང་ལ་གུས་འདུད་དང་དངོས་གྲུབ་ཀྱི་རྫ་ས་སྟེར་བ་སོགས་ཀྱི་རྨི་ལམ་འབྱུང་ངོ་། །དེ་ནས་དེ་ཡི་ལས་ཚོགས་ནི་ཆ་ལུགས་མངོན་རྟོགས་ལྟར་སྐུ་མདོག་དཀར་པོ་ཞི་བའི་ཉམས་ཅན་སྤྱན་གསུམ་ཡོད་པར་བསྒོམས་ལ་ཐུགས་ཀ་ནས་འོད་ཟེར་དཀར་པོ་འཕྲོས་པས་ནད་ཐམས་ཅད་ཞི་བར་བསམས་ལ། ཨོཾ་ན་ཤ་ད་ན་ནད་ཐམས་ཅད་ཤཱནྟིཾ་ཀུ་རུ་སྭཱ་ཧཱ། ཞེས་བཟླས་པས་ནད་ཐམས་ཅད་ཆད་ཅིང་ཞི། མངོན་རྟོགས་གོང་ལྟར་བསྒོམས་ལ། ཐུགས་ཀའི་འོད་ཟེར་བརྟེན་ནས་ཚེ་དང་དངོས་གྲུབ་ཐམས་ཅད་བསྡུས་ཏེ་རང་ལ་ཐིམ་པར་བསྒོམ། ཨོཾ་ན་ཤ་ད་ན་མ་མ་ཨཱ་ཡུཔུཏྟིཾ་ཀུ་རུ་སྭཱ་ཧཱ། ཞེས་བཟླས་པས་ཚེ་རྒྱས་སོ། །ཡང་ཐུགས་ཀའི་འོད་ཟེར་དམར་པོས་སྣང་སྲིད་ཐམས་ཅད་དབང་དུ་བསྡུས་པར་བསྒོམ། ཨོཾ་ན་ཤ་ད་ན་ལོ་ཀ་པ་ཤཾ་ཀུ་རུ་སྭཱ་ཧཱ། ཞེས་བཟླས་པས་འཇིག་རྟེན་དབང་དུ་འགྱུར་རོ། །ཡང་སྐུ་མདོག་ནག་པོ་ཆ་ལུགས་ཁྲོས་པ་ལྟར་བསམས་ལ། ཨོཾ་ན་ཤ་ད་ན་སྒེ་མོ་མཱ་ར་ཡ་ཕཊ། ཅེས་བཟླའོ། །དམར་གཏོར་ལ་
འགུགས་གཞུག་བྱས་ལ་བསྐུལ་པ་དང་མཐུན་པའི་དམིགས་པ་དང་བཅས་ཏེ་དམིགས་བྱའི་ཕྱོགས་སུ་སྐྱ་ཐིག་བདག་གིས་ལ་ཡང་ཡང་ཟོར་བ་ཐུན་དུ་བྲིས་པས་མཱ་ར་ཡ་ཡའི་ལས་འགྲུབ་བོ། །དེ་ལ་འཁོར་ནི་མང་དུ་འདུག་ཀྱང་། དེ་རྣམས་སྦྱར་དགོས་ཤིང་། བསྐུལ་ནི་མི་རུང་པར་འདུག་པས་འཁོར་ཐམས་ཅད་སྦྱར་ན་སྒབ་འདྲེ་བྱེད་མཁན་གཉིས་འདུག་པས་བཀྲ་མི་ཤིས་པས་འཁོར་སོ་སོར་མི་སྨོན་པ་དང་། །འཁོར་ལ་མཆོད་བསྟོད་མ་བྱས་ཀྱང་ཆོག་གོ །གཙོ་བོ་འདི་ལེགས་པར་འདུག །དེ་ནས་དྲག་བསྐུལ་ནི།། ཧཱུྃ། བཙན་ལུང་གསང་ལུང་སྐེད་པ་ན། །སྐྱེད་རྒྱལ་རི་ཡི་གནས་མཆོག་ནས། །བཙན་རྒོད་འབར་བ་དགྲ་ལ་ཆོས། །སྐུ་མདོག་ནག་པོ་མུན་པའི་མདོག །བལྟ་བའི་མིག་དམར་གློག་ལྟར་འཁྱུག །ཁྲོ་གཏུམ་ཡ་སོའི་མ་སོ་མནན། །དབུ་ལ་བསེ་རྨོག་སྨུག་པོ་གསོལ། །དར་འཕྲུ་རྒོད་འཕྲུ་རླུང་ལྟར་འཚུབ། །སྐུ་ལ་བསེ་ཁྲབ་འོད་འབར་གསོལ། །ཕྱག་གཡས་མདུང་དར་བཙན་དམག་སྡུད། །ཕྱག་གཡས་རལ་གྲིས་དགྲ་སྲོག་གཅོད། །སྟག་རལ་གཡས་ལ་གཟིག་ཤུབས་གཡོན། །རྟ་དཀར་གཡུ་རྔོག་འཕུར་ཤེས་ཆིབས། །སྲིད་པའི་རླུང་བཞིན་ཡུད་ཡུད་རྒྱུག །དམག་ཚོགས་འབུམ་གྱི་འཁོར་དང་བཅས། །འབྲུག་སྒྲ་ལྡིར་ཞིང་གློག་དམར་འཁྱུག །ཐོག་དང་
སེར་བ་ཤ་ར་ར། །དམིགས་པའི་དགྲ་ལ་ད་རྒྱུག་ཅིག །གཡས་ནས་སྤྲུལ་པའི་ཁྱི་དམར་བརྒྱད། །ཟུག་སྐད་ཀཾ་ཀས་བླ་འཁྱམས་འདེད། །ཁྱོ་ཁྱོ་དགྲ་བོའི་བླ་ལ་ཁྱོ། །རྒྱུག་རྒྱུག་དགྲ་བོའི་སྲོག་ལ་རྒྱུག །རང་དབང་མེད་པར་ཁྱེར་ལ་ཤོག །གཡོན་ནས་སྤྲུལ་པའི་ཕོ་ཉ་ནི། །བདུད་ཀྱི་ནག་པོ་དོམ་བུ་བརྒྱད། །མཆེ་བ་ཙར་ཙར་དགྲ་ལ་ཟོ། །ཟོ་ཟོ་དགྲ་བོའི་ཤ་ལ་ཟོ། །འཐུང་འཐུང་དགྲ་བོའི་ཁྲག་ལ་འཐུང་། །རྒྱབ་ནས་སྤྲུལ་པའི་ཕོ་ཉ་ནི། །རྒྱ་སྟག་དམར་པོ་འགྱིང་ཤིང་རྔམས། །གཟིག་ཆེན་ཐིག་ལེའི་ངར་སྒྲ་སྒྲོག་སྟག་ངར་གཟིག་ངར་དི་རི་རི། །ཕྲོལ་ཕྲོལ་དགྲ་བོའི་བླ་དང་ཕྲོལ། །མདུན་ནས་སྤྲུལ་པའི་ཕོ་ཉ་ནི། །བཙན་ཁྱི་དམར་པོ་ཞུངས་སེ་ཞུང་། །ཡ་མ་དགྲ་བོའི་སྟེང་དུ་ཡ། །ཁྱེར་ཁྱེར་དགྲ་བོའི་བླ་སྲོག་ཁྱེར། །རཱ་ཙྪ་མི་མགོ་སྤྱང་མོ་སོགས། །ཆོ་འཕྲུལ་སྣ་ཚོགས་ཟེངས་སེ་ཟེང་། །ཕོབ་ཕོབ་དགྲ་ལ་ལྟས་ངན་ཕོབ། །བརྒྱན་པའི་གཏོར་མ་འདི་བཞེས་ལ། །བསྟན་དང་བདག་ལ་སྡང་བའི་དགྲ། །མ་ཐོག་མྱུར་དུ་སྒྲོལ་ལ་ཤོག །བཙན་རྗེ་འོད་འབར་མཐུ་མ་ཆུང་། །མ་ཐོགས་མྱུར་དུ་ཕྲིན་ལས་མཛོད། །ཨོཾ་ན་ཤ་ད་ན་དགྲ་
བགེགས་སྒྲེ་མོ་མཱ་ར་ཡ་ཕཊ། ཅེས་བསྐུལ་ལོ། །བསྐུལ་པ་འདི་གལ་ཆེ་ན་ལན་རེ་ཙམ་མ་གཏོགས་མི་རུང་། རྒྱུན་གྱི་བསང་མཆོད་ཉུང་དུ་བྱེད་འདོད་ན། ཧཱུྃ། གསང་ལུང་སྐེད་ཀྱི་རི་བོ་ནས། །བཙན་ལ་འོད་འབར་མཐུ་བོ་ཆེ། །མི་དཀར་ཅང་ཤེས་གཡུ་རྔོག་ཆིབས། །ཤེལ་གྱི་རྨོག་ཁྲབ་སྐུ་ལ་གསོལ། །རལ་གྲི་མདུང་དར་ཕྱག་ན་བསྣམས། །སྟག་རལ་གཟིག་ཤུབས་སྐྱེད་ལ་བསྐོར། །འདིར་གཤེགས་བརྒྱན་པའི་གཏོར་མ་བཞེས། །གཡུ་ཤུག་ཕྱེ་མར་དུད་པས་བསངས། །ཚེ་བསོད་དཔལ་འབྱོར་རྒྱས་པ་དང་། །སྣང་སྲིད་དབང་དུ་འདུ་བ་དང་། །དགྲ་བགེགས་གནོད་བྱེད་ཚར་གཅོད་སོགས། །གང་བཅོལ་ཕྲིན་ལས་མྱུར་འགྲུབ་མཛོད། །སྔོན་གྱི་དམ་ལས་མ་འདའ་བར། །ད་ལྟ་ཉིད་དུ་ལས་མཛོད་ཅིག །ཨོཾ་ན་ཤ་ད་ན་སྭཱ་ཧཱ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཅེས་པ་འདི་ས་སྐྱོང་ཆེན་པོ་རིན་ཆེན་རྣམ་རྒྱལ་གྱིས་བཀའ་ཡིས་བསྐུལ་བ་ལ་བརྟེན་ནས་སྤྲུལ་སྐུ་མི་འགྱུར་རྡོ་རྗེའི་གཏོར་མའི་རྟེན་རྫས་སྔགས་རྒྱན་ཆ་ལུགས་སྤྲུལ་པ་འདི་ལྟར་གདའ་བས། འདི་རྣམས་ཚིགས་བཅད་ཀྱི་བསང་མཆོད་གཅིག་ཁྱོད་ཀྱིས་བརྩམས་ཤིག་ཅེས་བཀའ་གནང་བ་ལ་བརྟེན་ནས། དོན་སྤྲུལ་སྐུའི་གསུང་གི་ཚིག་རེས་ནི། དགེ་སློང་རཱ་ག་ཨ་སྱས་སྦྱར་བ་ལགས། །མངྒ་
ལཾ། ། ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།