རག་ཕྲོམ་བསང་མཆོད།
རག་ཕྲོམ་བསང་མཆོད་བཞུགས་སོ།། ཀྱཻ། ཐུགས་རྗེ་ཆེན་པོའི་ཞིང་ཁམས་མཆོག །བསིལ་ལྡན་ཁ་བ་ཅན་གྱི་ཡུལ། །རི་མཐོ་ས་གཙང་ངོམ་གྱི་ཡུལ། །དུང་བྲག་རྩེ་མཐོ་དགོངས་ལ་སྙེགས། །རྩེ་ལ་ལྷོ་སྤྲིན་འདབ་ཆགས་ལྡིང་། །མདུན་དུ་ཤེལ་གྱི་ཆུ་མིག་ལ། །སྨན་དང་བདུད་རྩིའི་ཟིལ་པ་འཕྲོ། །ཞོལ་དུ་རི་དྭགས་རྩེ་ཀྱུ་བྱེད། །ལྗོན་ཤིང་ནགས་ཚལ་བྲག་རིས་བསྐོར། །དེ་འདྲ་ཡུལ་གྱི་གནས་བདག་ནི། །ལྷ་ཆེན་རག་སྦོམ་ཞེས་སུ་གྲགས། །མི་དཀར་ཆས་ལྡན་རྟ་དཀར་ཆིབས། །རབ་དཀར་ཟླ་བའི་བཞིན་རས་ཅན། །ཞྭ་དཀར་དར་འཕྲུ་དར་དཀར་མནབས། །འཁོར་གསུམ་ཐོགས་ནས་དར་མདུང་དང་། །ཕྱག་གཉིས་སྦ་ལྕག་སྲབ་སྐྱོགས་འཛིན། །ཞི་འཛུམ་ལྷ་ཡི་ངང་ཚུལ་ཅན། །ལྷ་འཁོར་མང་པོའི་འཁོར་གྱིས་བསྐོར། །ཉེ་སྐོར་གཞི་བདག་ཕལ་ཆེ་བ། །ཁྱེད་ཀྱི་འཁོར་གཡོག་སྡེ་རིགས་ཏེ། །མ་ལུས་འཁོར་དང་བཅས་པ་རྣམས། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱིས་མཆོད། །དཀར་གསུམ་ཇ་ཆང་འབྲུ་སྣས་མཆོད། །རབ་ཏུ་མཉེས་ཤིང་ཚིམས་གྱུར་ནས། །གནས་མགྲོན་གཉིས་
ཀྱི་དམ་ཚིག་སྲུངས། །རྟག་ཏུ་ཁ་འཛིན་སྡོང་གྲོགས་མཛོད། །སྔོན་ཚེ་པདྨའི་བཀའ་བསྒོས་བཞིན། །བཅོལ་བའི་ཕྲིན་ལས་འགྲུབ་པར་མཛོད། །ཀྱཻ། རིན་ཆེན་མཆོང་གི་གཡའ་རི་ནས། །མོ་ནོ་མི་སྨུག་སྦྲུལ་རལ་ཅན། །སྐུ་མདོག་ལྗང་སེར་འོད་དང་ལྡན། །དྲེལ་སྔོན་ཆེས་ལྡན་མོ་ཐིག་བསྐལ། །བུད་མེད་རྒྱུན་ལྡན་མང་པོས་བསྐོར། །ཀླུ་གཉན་མོ་ནོ་འཁོར་དང་བཅས། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་མཆོད། །དཀར་གསུམ་ཇ་ཚང་འབྲུ་སྣ་མཆོད། །ཀྱཻ། རི་རྒྱལ་ཀོ་དོ་ཞེས་བྱ་བ། །མི་སྨུག་རལ་པའི་ཅོད་པན་ཅན། །སྤྲུལ་པ་ཚོང་དཔོན་ཆེན་པོར་བརྫུ། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་མཆོད། །ཀྱཻ། རྒན་མོ་བྱ་ཁྲི་རྒན་མོའི་གཟུགས། །རལ་པ་འཕྱང་ཞིང་རྟ་ནག་ཆིབས། །རམ་ཁང་ཡར་ཤོག་མར་ཤོག་ནས། །འདིར་གཤེགས་བསང་དང་མཆོད་པ་། བཞེས། །གཡུ་ཤུག་ཕྱེ་མར་གསུར་གྱི་མཆོད། །རྟ་འདྲ་ལྷ་སྒྲོན་འགྱོ་ཚོ་དང་། །རོ་སྡུག་འབྲུག་རང་ལ་གནས་རྣམས། །འདིར་གཤེགས་བསང་དང་མཆོད་པ་བཞེས། །གཡུ་
ཤུག་ཕྱེ་མར་གསུར་གྱི་མཆོད། །ས་གཉན་ཤིང་ལ་བརྟེན་བཅས་པའི། །བྲག་ནག་འབོམ་ནེ་ན་ཡོན་སོགས། །ཡུལ་ཕྱོགས་འདི་གནས་གཞི་བདག་རྣམས། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་མཆོད། །དཀར་གསུམ་ཇ་ཆང་འབྲུ་སྣ་མཆོད། །རབ་ཏུ་མཉེས་ཤིང་ཚིམས་གྱུར་ནས། །ཕོག་ཐུག་བྱུང་ན་བཟོད་པར་གསོལ། །ན་ཚ་གོད་ཁ་མ་བཏང་ཞིག །བཙའ་སད་སེར་བ་མ་བཏང་ཞིག །ལོ་ལེགས་ཡུལ་ཕྱོགས་བདེ་བ་དང་། །རང་རང་ཇི་ལྟར་ནུས་པ་ཡི། ཁ་འཛིན་སྡོང་གྲོགས་ཕྲིན་ལས་མཛོད། །ཅེས་ཨ་རཱ་གས་ཆར་འབོད་སྐབས་སུ་སྦྱར་བའོ། །