གཉན་ཆེན་བྱང་ཆུབ་གྲགས་ཀྱི་བསང་མཆོད།
གཉན་ཆེན་བྱང་ཆུབ་གྲགས་ཀྱི་བསང་མཆོད་བཞུགས་སོ། །དེ་ནས་མཆོད་པ་གཅིག་བྱས་ལ་འདི་སྐད་དོ།། ཀྱཻ། ཡང་གཅིག་བསང་ཞིང་མཆོད་པ་ནི། །རྡོ་རྗེ་གདན་གྱི་བྱང་གི་ཕྱོགས། །རྒྱལ་བས་ལུང་བསྟན་གདོང་དམར་ཡུལ། །སྤྱན་རས་གཟིགས་ཀྱི་ཞིང་ཁམས་མཆོག །ཁ་བ་ཅན་གྱི་ལྗོངས་ཡུལ་མཐིལ། །མདོ་ཁམས་གླིང་ཁྲི་བར་མ་ཡི། །ངོམ་དུ་རུང་བའི་ཡུལ་གྱི་སྨད། །ཟླ་ངོམ་འདུས་པའི་སོ་མཚམས་ན། །གཉན་ཆེན་བྱང་ཆུབ་གྲགས་པ་ནི། །རིན་ཆེན་རི་བོ་རྔམ་འཇིགས་པོ། །གནམ་ལྕགས་འབར་བའི་རལ་གྲི་འདྲ། །བསམ་ཆོད་འབར་བའི་ཆུ་གྲི་འདྲ། །རིན་ཆེན་འབར་བའི་སྤུ་གྲི་འདྲ། །དམར་སྨུག་དར་གྱི་ཡོལ་བ་འདྲ། །ཟབ་ཆེན་སྨུག་པོ་བརྐྱང་པ་འདྲ། །འབྲུག་ཆེན་དགུང་དུ་མཆོང་བ་འདྲ། །མཆོང་གི་རྫ་སྨུག་ན་བུན་འཐིབས། །གསེར་སྤང་རི་དྭགས་སྣ་ཚོགས་རྩེ། །གཡུ་ཡི་ནེའུ་སིང་མེ་ཏོག་བཀྲམ། །སྤྲིན་ནག་འཇིགས་པའི་འབྲུག་སྒྲ་ལྡིར། །གློག་འོད་འཁྱུགས་ཤིང་ཐོག་མདའ་འཕེན། །སྦྲང་ཆར་ཟམ་ཟིམ་ཁུ་འཕང་འདྲིལ། །དེ་འདྲ་གནས་ཀྱི་མངའ་བདག་ནི། །བྱང་ཆུབ་གྲགས་པ་ཞེས་སུ་གྲགས། །དགེ་བསྙེན་ཆེན་པོ་དམ་
ཚིག་ཅན། །འཁོར་དང་བཅས་པ་མ་ལུས་ཀུན། །དིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་མཆོད། །འདོད་ཡོན་མཆོད་པ་སྣ་ཚོགས་འབུལ། །འཁོར་བཅས་མཉེས་ཤིང་ཚིམ་གྱུར་ཅིག །མཆོད་ན་མགོན་སྐྱོབ་བྱེད་པའི་ལྷ། །ལྷ་ཆེན་བྱང་གྲགས་འཁོར་བཅས་བསང་། །རིགས་ནི་སྔོན་པོ་ཀླུ་ཡི་རིགས། །ཀླུ་ཆེན་བྱང་གྲགས་འཁོར་བཅས་བསང་། །གཉན་རིགས་རྣམས་ཀྱི་སྡེ་དཔོན་མཛད། །གཉན་ཆེན་བྱང་གྲགས་འཁོར་བཅས་བསང་། །སྐྱབས་གསུམ་འཛིན་པའི་དམ་ཚིག་ཅན། །དགེ་བསྙེན་བྱང་གྲགས་འཁོར་བཅས་བསང་། །སྲུང་ནི་སངས་རྒྱས་བསྟན་པ་སྲུངས། །བསྟན་སྲུང་བྱང་གྲགས་འཁོར་བཅས་བསང་། །སློབ་དཔོན་པདྨའི་བཀའ་ཉན་པ། །བཀའ་སྲུང་བྱང་གྲགས་འཁོར་བཅས་བསང་། །ཁྱད་པར་ཡུལ་འདིའི་མགོན་སྐྱབས་མཛད། །ཡུལ་ལྷ་བྱང་གྲགས་འཁོར་བཅས་བསང་། །བཙའ་སད་སེར་གསུམ་ཟློག་པར་མཛོད། །ཞིང་ལྷ་བྱང་གྲགས་འཁོར་བཅས་བསང་། །རྟ་དྲེལ་ནོར་ཕྱུགས་འཕེལ་བར་མཛད། །ནོར་ལྷོ་བྱང་གྲགས་འཁོར་བཅས་བསང་། །མངག་ན་དགྲ་ལ་རྒྱུག་འདུར་
མཁས། །དགྲ་བླ་བྱང་གྲོགས་འཁོར་བཅས་བསང་། །དགེ་བསྙེན་ཆེན་པོའི་བཀའ་ཉན་པ། །སྤོ་རྒྱལ་སྟག་ཡག་རུ་གུང་སོགས། །དཀར་པོ་ལྷ་ཡི་སྡེ་ཚོགས་བསང། །མོ་ནོ་མཆེད་གསུམ་ལ་སོགས་པའི། །དགེ་བསྙེན་དམ་ཚིག་ཅན་རྣམས་བསང་། །རྩིང་ངེ་གསའ་ཡེར་རྡོ་རྫུ་སོགས། །ཡུལ་ལྷ་གཉན་པོ་ཐམས་ཅད་བསང་། །སྨན་གདོང་གཡོ་ལྕམ་རོ་རིང་སོགས། །ཁྲ་བོ་གཉན་གྱི་སྡེ་ཚོགས་བསང་། །གཡའ་ཁྱམ་རྣ་ལྗོན་ལ་སོགས་པའི། །ཀླུ་རིགས་གཉན་རིགས་ཐམས་ཅད་བསང་། །སྨན་མོ་སྤུན་བདུན་མོ་འོག་སོགས། །སྨན་རིགས་སྨན་ཟེར་ཐམས་ཅད་བསང་། །བཙན་རྒོད་ཞལ་བཟང་ལ་སོགས་པའི། །ཡུལ་ཕྱོགས་འདིར་གནས་བཙན་རྣམས་བསང་། །ཁྱེད་རྣམས་བསང་བའི་ཡོན་ཏན་གྱིས། །སངས་རྒྱས་བསྟན་པ་དར་བ་དང་། །དཀོན་མཆོག་དབུ་འཕང་མཐོ་བ་དང་། །ནད་རིམས་འཁྲུག་རྩོད་ཞི་བ་དང་། །མི་ནད་ཕྱུགས་ནད་མེད་པ་དང། །བཀྲ་ཤིས་བདེ་ལེགས་རྒྱས་པར་ཤོག །བདག་ཅག་ཡོན་མཆོད་འཁོར་བཅས་ཀྱི། །ཁ་འཛིན་སྡོང་གྲོགས་མ་གཡེལ་ཅིག །ཨ་རཱ་གས་སོ།།