བར་སྒོའི་བསང་མཆོད།
བར་སྒོའི་བསང་མཆོད་ནི། ཡང་མཆོད་པ་གཅིག་བྱས་ལ། ཀྱཻ། གཞན་ཡང་བསང་ཞིང་མཆོད་པ་ནི། །ངོམ་ཡུལ་ས་ཡི་ཐིག་མཚམས་ན། །བར་སྒོ་རིན་ཆེན་སྤྱང་འདྲའི་རི། །དབྱར་གསུམ་སྔོན་པོ་གཡུ་ཡི་མདོག །ཨིནྡྲ་ནཱི་ལ་སྤུང་པ་འདྲ། །སྟོན་གསུམ་སེར་པོ་གསེར་གྱི་མདོག །ཛམ་བུ་ཆུ་གསེར་སྨྱུང་པ་འདྲ། །དགུན་དཔྱིད་ཁྲ་བོ་གཟི་ཡི་མདོག །གཟི་མཆོང་འདྲེས་མ་སྤུང་པ་འདྲ། །རི་རྒྱལ་བྲག་གི་ཟུར་ཕུད་ཅན། །སྤྲིན་དཀར་ལྡིང་བའི་ཅོད་པན་ཅན། །ན་བུན་སྐྱེ་བུན་ཐུ་ལུ་ལུ། །འཇའ་སྤྲིན་ཉི་ཟླ་ཏ་ལ་ལ། །གསེར་སྤང་སེར་པོ་ལྡེམས་སེ་ལྡེམ། །གཡུ་ཡི་ནེའུ་སིང་ཀྱི་ལི་ལི། །ཤེལ་གྱི་ཆུ་མིག་ཤ་ར་ར། །དུང་གི་ཁུ་འཕང་ཁྲ་ལ་ལ། །མཛེས་སྡུག་མེ་ཏོག་ཡ་ལ་ལ། །བྱ་རིགས་སྐད་སྙན་ཏངས་སེ་ཏང་། །རི་དྭགས་རྩེ་རྒྱུག་སྤྲེངས་སེ་སྤྲེང་། །གཅན་གཟན་ངར་སྐད་ལྷང་སེ་ལྷང་། །རྒྱལ་བའི་ཞབས་ཀྱིས་བཅགས་པའི་ས། །སྒྲུབ་པ་མཐའ་རུ་ཕྱིན་པའི་ས། །དབང་བཞི་ཆུ་བོ་རྒྱས་པའི་ས། །བླ་མེད་གསང་སྔགས་སྒྲུབ་པའི་གནས། །ཉམས་དང་རྟོགས་པ་འཕེལ་བའི་གནས། །བར་སྒོ་རིན་ཆེན་སྤུང་པོ་ལ། །གཉུག་མར་
གནས་པའི་དམ་ཚིག་ཅན། །དགེ་བསྙེན་བར་སྒོ་འཁོར་དང་བཅས། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་མཆོད། །གནས་གནས་ཆེན་པོ་བར་སྒོ་ལ། །གཞན་ཡང་མཆོད་པ་འབུལ་བ་ནི། །གཡག་ལུག་ར་དང་བྱ་རྟ་འབྲུག །ཤེལ་ཚིགས་དར་ཚོན་འབྲུ་སྨན་སྤོས། །ཕྱེ་མར་ཇ་ཆང་ཟས་ཀྱི་ཕུད། །དངོས་སུ་འབྱོར་དང་ཡིད་ཀྱིས་སྤྲུལ། །མཆོད་པའི་བྱེ་བྲག་དཔག་མེད་འབུལ། །འཁོར་བཅས་མཉེས་ཤིང་ཚིམ་གྱུར་ཅིག །ཀྱཻ། དྲག་མོ་ན་བར་སྒོ་ལ་སོགས། །ཡུལ་ལྷ་གཞི་བདག་མ་ལུས་ཀུན། །ཐམས་ཅད་བདག་ལ་དགོངས་སུ་གསོལ། །བདག་དང་ཡོན་བདག་འདི་རྣམས་ཀྱི། །ཕ་མེས་སྔ་རབས་མན་ཆོད་ནས། །བུ་ཚ་གཞོན་སྐྱེས་ཡན་ཆོད་ཀྱི། །ཁྱེད་རྣམས་ཐུག་གས་དང་འགལ་བའི་ལས། །ས་གཉན་བརྐོས་དང་རྡོ་གཉན་རྫོགས། །ཤིང་གཉན་བཅད་དམ་ན་གཉན་བརྐོས། །ཞིང་མུ་བཅད་དམ་ཁང་ལས་བྱས། །རི་དྭགས་བསད་དང་རི་མེ་བཀྱེས། །ཆུ་གཉན་ཡུལ་དྲང་ཆུ་མིག་བསུབ། །ཉ་ལྕོང་སྦལ་སྦྲུལ་སྐམ་དང་བསད། །ཐབ་གཞོབ་མི་གཙང་བཙོག་ནལ་གཡོས། །མནའ་གཉན་བསྐྱེལ་
དང་སྤང་ལེན་བྱས། །རྡོ་ལྕགས་རྙིར་གསུམ་གཉན་ཁ་བཀྲལ། །དཀར་ཐབ་དམར་ཐབ་ཇ་ཐབ་ཤོར། །གཉན་གཏད་དྲག་ལས་ཐུབ་ཐུབ་བྱས། །དེ་རྣམས་ཐུགས་དང་འགལ་བ་རྣམས། །དེ་དག་གང་བྱས་མཐོལ་ལོ་བཤགས། །བཤགས་པས་མི་དག་གང་ཡང་མེད། །ཁྱེད་ཀྱི་བཟོད་པ་དང་དུ་བཞེས། །ཕྱིན་ཆད་མི་བགྱིད་དམ་བཅའོ། །མངོན་ཤེས་མི་ལྡན་བག་མེད་པས། །གལ་ཏེ་ཁྱེད་དང་འགལ་བགྱིད་ན། །ཁྱེད་ཀྱིས་བཟོད་པར་མཛད་དུ་གསོལ། །བདག་ཅག་ཡུལ་འདིར་གནས་པའི་མི། ཁྱེད་རྣམས་ཡུལ་འདིར་གནས་པའི་ལྷ། །མིས་ཀྱང་ལྷ་ལ་དུས་སུ་མཆོད། །ལྷས་ཀྱང་མི་ལ་ཁ་འཛིན་མཛོད། །ཐབ་མགྲོན་གཉིས་ཀྱི་དམ་ཚིག་སྲུངས། །ཉིན་གྱི་དུས་སུ་བྱ་ར་མཛོད། །མཚན་གྱི་དུས་སུ་མེལ་ཚེ་མཛོད། །མི་ལ་ན་ཚ་མ་བཏང་ཞིག །ཕྱུགས་ལ་གོད་ཀ་མ་བཏང་ཞིག །ཞིང་ལ་བཙའ་སད་སེར་གསུམ་མ་བཏང་ཞིག །དགྲ་རྐུན་གཅན་གཟན་མ་བཏང་ཞིག །ཡམས་ནད་རིམས་ནད་ཞི་བར་མཛོད། །ཕྱི་ནང་འཁྲུག་རྩོད་ཞི་བར་མཛོད། །ཆོས་དང་དབང་ཐང་རྒྱས་པར་མཛོད། །རྟ་དྲེལ་བེལ་ལུག་འཕེལ་
བར་མཛོད། །རྐང་བཞི་ཕྱུགས་ཀྱི་དངོས་གྲུབ་སྩོལ། །རྨ་གཡང་ཟས་ཀྱི་དངོས་གྲུབ་སྩོལ། །རྒྱུད་འཛིན་རིགས་ཀྱི་དངོས་གྲུབ་སྩོལ། །གཞན་ཡང་ཇི་ལྟར་བསམ་པ་ཡི། །དངོས་གྲུབ་མ་ལུས་བསྩལ་དུ་གསོལ། །མཆོད་པ་བྱས་ཤིང་ཁ་འཛིན་སྡོང་གྲོགས་དཔའ་ཡ་དཔུང་རོགས། །རོགས་ལྡན་ཟེར་བ་མཛོད་ཅིག །ཅེས་པ་འདི་རིག་འཛིན་དབང་དྲག་རྡོ་རྗེས་བསྐུལ་མར་བརྟེན་ནས་དགེ་སློང་རཱ་ག་ཨ་སྱས་སྦྱར་བའོ།།