ཇོ་མོ་མོ་དིལ་མའི་ཀ་བསྟོད།
ཀ་ཡེ་གསོན་དང་ཇོ་མོ་མོ་དིལ་མ། །ཁ་དོག་དཀར་ལ་དམར་བའི་མདངས་ཆགས་ཤིང་། །ག་ཤལ་རིན་ཆེན་ཕྲེང་བ་མང་པོའི་བརྒྱན། །ང་ཡིས་ཁྱོད་ལ་མཆོད་ཅིང་བསྟོད་པ་ནི། །ཅ་ཅོའི་བསྟོད་དབྱངས་རོལ་མོའི་སྤྱན་དྲངས་ན། །ཆ་ལུགས་སྨན་བཙུན་གཟུགས་མཛེས་ཇོ་མོ་ལ། །ཇ་ཆང་ཕུད་དང་བསང་གི་མཆོད་པ་འབུལ། །ཉ་རྒྱས་ཟླ་ལྟར་དགྱེས་འཛུམ་མདངས་དང་བཅས། །ཏ་ལུག་ནོར་ལ་གོད་ཁ་མེད་པ་དང་། །ཐ་ན་འཕར་སྤྱང་གནོད་པ་ཡན་ཆད་སྲུངས། །ད་ནི་བདག་ཅག་ཡོན་མཆོད་ཁ་འཛིན་མཛོད། །ན་ཚ་ཤི་ཆད་ནད་ཡམས་མ་བཏང་ཞིག །པ་དེ་པུ་དེའི་ཆོ་འཕྲུལ་མ་སྟོན་ཅིག །ཕ་རོལ་གནོད་པར་བྱེད་པའི་དགྲ་དང་བགེགས། །བ་མོར་ཉི་ཟེར་ཕོག་ལྟར་མེད་པར་མཛོད། མ་རྒན་སེམས་ཅན་ཀུན་ལ་ཕན་པའི་ཕྱིར། །རྩྭ་ཁ་ལོ་ཏོག་རྟག་ཏུ་ལེགས་པ་དང་། །ཚ་གྲང་འདུས་པའི་ནད་རིམས་ཞི་བར་མཛོད། །ཛ་ཡེ་རྒྱལ་བ་པད་འབྱུང་བཀའ་བཞིན་དུ། །ཝ་ལེར་མངོན་ཤེས་ལྡན་པའི་སྨན་མོ་ཁྱོད། །ཞ་ལྟར་བསྟན་དང་བསྟན་འཛིན་སྤྱི་བོར་བཀུར། །ཟ་བྱེད་དུང་གི་མཆེ་བ་གཙིགས་པ་མོ། །འ་འུར་འབྲུག་སྒྲ་རླུང་འཚུབ་
སེར་དྲག་བཅས། །ཡ་མཚན་མཛེས་པའི་བརྒྱན་དང་ནི་བཟས་བཀླུབ། །རྭ་ཅོ་བཞིན་དུ་ཤེས་རྒྱུད་གྱོང་ན་ཡང་། །ལ་ཆེན་ཨོ་རྒྱན་ཆེན་པོའི་དགེ་བསྙེན་མོ། །ཤ་ཕུད་ཕྱེ་མར་གཡུ་ཤུག་དུད་པས་བསང་། །ས་ཆ་གར་འགྲོ་གར་འདུག་ཁ་འཛིན་མཛོད། །ཧ་ཧ་ཧི་ཧི་དགྱེས་པའི་གད་མོར་བཅས། །ཨ་ལ་ལ་ཧོ་རྨ་གཡང་དངོས་གྲུབ་སྩོལ། །ཅེས་རཱ་ག་ཨ་སྱས་སོ། །