མཚམས་ཀྱི་ཆུ་མིག་ཀེ་རུའི་བསང་མཆོད།
མཚམས་ཀྱི་ཆུ་མིག་ཀེ་རུའི་བསང་མཆོད་བཞུགས་སོ།། ཧཱུྃ། མཚམས་ཀྱི་ཆུ་མིག་ཀེ་རུ་ནི། །རིན་ཆེན་འབར་བའི་གཞལ་ཡས་སུ། །ཀླུ་རྒྱལ་མི་མགོན་དཀར་པོ་ནི། །ཞལ་གཅིག་ཕྱག་གཉིས་ཞི་ཉམས་ཅན། །དར་ཚོན་སྣ་ཚོགས་རྒྱན་གྱིས་སྤྲས། །གསེར་ཁྲི་དྲུག་མགྱོགས་སྟེང་དུ་ནི། །ཁྲི་སྙན་ས་ལེའི་པགས་སྟེང་བཞུགས། །གཡས་གཡོན་རིགས་བཞིའི་གཡུ་མཚོ་དང་། །ཀླུ་ལྕམ་བཙན་བདུད་ལ་སོགས་པའི། །ཆབ་འབངས་གྲོང་ཁྱེར་བསམ་མི་ཁྱབ། །མགྲོན་ལྟར་བྱེས་སུ་འབྱོན་པའི་དུས། །ཤིང་རྟ་སྔོན་པོའི་སྟེང་རོལ་དུ། །གཞལ་ཡས་ཁང་གི་ནང་དུ་བཞུགས། །དེ་ཡི་སྟེང་དུ་གདུགས་རྒྱལ་མཚན། །བ་དན་རོལ་མོ་བསམ་མི་ཁྱབ། །གཡས་གཡོན་རླུང་འཚུབ་མི་སྲུན་ཤིང་། །མཚམས་འཇའ་དམར་སྤྲིན་འབྲུག་སྒྲ་སྒྲོག །ཤིན་ཏུ་མྱུར་བར་འབྱོན་པའི་དུས། །མི་དཀར་རྟ་དཀར་ཆིབས་སུ་བཅིབས། །སྦྲུལ་མགོའི་གདེངས་ཀ་བདུན་དང་ལྡན། །ཕྱག་གཡས་གཡང་ལྷ་དར་དཀར་བསྣམས། །ཕྱག་གཡོན་དོན་ཡོད་ཞགས་པ་འཛིན། །རལ་གྲི་བདུད་དགྲ་དཔུང་འཇོམས་བཏགས། །སྤྱན་གསུམ་ཞལ་སེར་སྐུ་ལུས་དཀར། །དར་དཀར་
གསོལ་ཞིང་སྦྲུལ་ཞགས་ཐོགས། །རྒྱལ་རིགས་ཀླུ་དམག་འབུམ་དང་ལྡན། །ཁྱེད་ལ་མཆོད་པ་འབུལ་བ་ནི། །ཀླུ་སྨན་དར་ཟབ་སྣ་ཚོགས་དང་། །མེ་ཏོག་བདུག་སྤོས་མར་མེ་དྲི། །གཟུགས་སྒྲ་དྲི་རོ་རེག་བྱ་དང་། །བདུད་རྩི་སྨན་དང་གཏོར་མ་འབུལ། །མཐུན་རྫས་དུ་མས་མཉེས་གྱུར་ཅིག །ཁྱེད་རྣམས་མཆོད་པའི་ཡོན་ཏན་གྱིས། །བདག་ཅག་རྣལ་འབྱོར་ཐམས་ཅད་ལ། །བསྟན་ཕན་སེམས་དགེ་ཆོས་བྱེད་རྣམས། །ཚེ་བསོད་རྒྱས་པའི་སྡོང་གྲོགས་མཛོད། །སྤྱིར་དང་བསྟན་པ་བླ་མ་དང་། །ཁྱད་པར་རྣལ་འབྱོར་བདག་སོགས་ལ། །མདོར་ན་མི་དང་མི་མ་ཡིན། །སྔར་བྱས་ཕྱི་སེམས་དར་བྱེད་པའི། །།གནོད་པའི་དགྲ་བོ་ད་ལྟ་སྒྲོལ། །དངོས་གྲུབ་ཀུན་སྩོལ་ཕྲིན་ལས་མཛོད། །ཅེས་ཨ་རྭ་གས་སོ།།