ཡུལ་གར་འདུག་ཟོ་དོར་བསང་མཆོད།
ཡུལ་གར་འདུག་ཟོ་དོར་བསང་མཆོད་བཞུགས་སོ།། ཀྱཻ། སྟོང་གསུམ་སྲིད་པའི་འཇིག་རྟེན་ན། །ས་ཕྱོགས་ཡུལ་རིས་འདི་དག་ལ། །གནས་པའི་ས་བདག་ཀླུ་དང་གཉན། །ཡུལ་ཕྱོགས་འདི་ལ་གནས་པ་མ་ལུས་ཀུན། །རྣལ་འབྱོར་བདག་གིས་སྤྱན་འདྲེན་ནོ། །མཆོད་པའི་གནས་འདིར་གཤེགས་སུ་གསོལ། །ཁྱེད་ནི་རྫུ་འཕྲུལ་སྟོབས་དང་ལྡན། །བར་སྣང་ས་གཞི་ཀུན་གྱི་བདག །བཟང་ངན་གཉིས་ཀྱི་ཤན་ཕྱེས་ལ། །འགྲོ་བ་མི་དང་ལྷན་ཅིག་བཞུགས། །ཁྱད་པར་ཡུལ་འདིར་གནས་པའི་ཡུལ་ལྷ་རྣམས། །ས་གནས་འདིར་མྱུར་དུ་སྤྱན་འདྲེན་ན། །མཆོད་པ་འབུལ་གྱིས་བཞེས་སུ་གསོལ། །ཛཿཧཱུྃ་བཾ་ཧོཿ ཁྱོད་ལ་མཆོད་པ་འབུལ་བ་ནི། །རིན་ཆེན་འབྲས་ཀྱི་གཡག་ལུག་ར་སྐྱེས་དང་། །སྨྱུག་རྒོད་མདའ་དར་རིན་ཆེན་རྣམས། །ཕྱེ་མར་བལ་བུ་མཁན་ཤུག་དང་། །ཆང་ཕུད་གསེར་སྐྱེམས་འབྲུ་ལྔ་དང་། །དཀར་གསུམ་མངར་གསུམ་གསེར་དངུལ་དང་། །དག་ཅིང་གཙང་མའི་མཆོད་པ་ཡི། །བདག་གི་བསམ་པ་དག་པ་དང་། །དཀོན་མཆོག་གསུམ་གྱི་བདེན་པ་དང་། །ཏིང་འཛིན་སྔགས་དང་ཕྱག་རྒྱ་ཡིས། །བྱིན་གྱིས་རླབས་པའི་
མཆོད་སྤྲིན་གྱིས། །ཁྱེད་ཀྱི་དབང་པོའི་སྤྱོད་ཡུལ་དུ། །འདོད་དགུ་ཅི་བཞིན་ཚིམ་གྱུར་ཅིག་།བདག་ཅག་ཡོན་མཆོད་འཁོར་བཅས་ལ། །ཞིང་གི་བཙའ་སད་སེར་གསུམ་དང། །དགྲ་བགེགས་གཡུལ་ངོ་བཟློག་ཏུ་གསོལ། །མི་ཕྱུགས་ནད་ཡམས་མ་བཏང་ཞིག །དཀར་པོ་དགེ་བའི་སྡོང་གྲོགས་མཛོད། །བདག་གི་འདོད་པའི་བསམ་པ་སྒྲུབས། །བསོད་ནམས་ནོར་གྱི་དངོས་གྲུབ་སྩོལ། །སྡང་བའི་དགྲ་ལ་ཕྲིན་ལས་གྱིས། །བདག་ནི་བྱེས་སུ་འགྲོ་ན་སྐྱེལ་མ་མཛོད། །གཞི་ལ་འདུག་ན་ཡུལ་དཔོན་གྱིས། །མཐུ་དཔུང་སྡོང་གྲོགས་རྒྱབ་རྟེན་གྱིས། །བཅོལ་བའི་ཕྲིན་ལས་འགྲུབ་པར་མཛོད། །ཅེས་པ་ཡུལ་གར་འདུག་གི་ཟོ་དོར་བསང་མཆོད་རཱ་ག་ཨ་སྱས་མཛད་པའོ།།