ཤར་ལུང་ཡུལ་ལྷ་སྟོན་རྒྱལ་དཀར་པོའི་བསང་ཡིག་དང་གསོལ་མཆོད།
ཤར་ལུང་ཡུལ་ལྷ་སྟོན་རྒྱལ་དཀར་པོའི་བསང་ཡིག་དང་གསོལ་མཆོད་བཞུགས་སོ།། ན་མོ་པྲ་ཝ་ཀ་ར་ཡེ། པད་འབྱུང་སྤྲུལ་པའི་སྐུ་ལ་ཕྱག་འཚལ་ལོ། །གསོལ་མཆོད་ཡུལ་ལྷའི་བསང་མཆོད་རིམ་པ་འབྲི། །གཡུ་ཤུག་ཕྱེ་མར་མཆོད་པ་བྱ། །སྤྲོ་ན་དཀར་གཏོར་གཡག་ལུག་ར། །མདའ་དར་ལ་སོགས་བཤམ་པར་བྱ། །བསང་གཞུང་ཚར་རྗེས་ཁ་འཛིན་གྱི། །གོང་དུ་འདི་ཉིད་སྦྱར་བར་བྱ་བ་སྟེ། །བདག་བསྐྱེད་མཆོད་པ་བྱིན་གྱིས་བརླབས། །འདི་ཉིད་འདོན་ཅིང་ཁུ་ཡེ་བྱས་ཀྱང་རུང་།། ཀྱཻ། རྡོ་རྗེ་གདན་གྱི་བྱང་གི་ཕྱོགས། །རྒྱལ་བས་ལུང་བསྟན་གདོང་དམར་ཡུལ། །ཐུགས་རྗེ་ཆེན་པོས་བྱིན་རླབས་པའི། །ཁ་བ་ཅན་ལྗོངས་བོད་ཀྱི་ཡུལ། །མདོ་ཁམས་གླིང་ཁྲི་བར་མ་ན། །རྨ་གཡང་ཆགས་པའི་ཤར་ལུང་ཞེས། །པད་འབྱུང་སེ་བཙུན་གཞོན་ནུ་སོགས། །དམ་པ་དུ་མས་བྱིན་རླབས་ཤིང། །ཞབས་ཀྱིས་བཅགས་པའི་ཡུལ་གྱི་དབུས། །རིན་ཆེན་ས་གཞི་ལྷུན་ཆགས་པའི། །ཤེལ་བྲག་ངང་དཀར་རྩེ་རེ་རེ། །མཆོང་གི་རྫ་སྨུག་ཐིབས་སེ་ཐིབ། །ཤེལ་གྱི་ཆུ་མིག་ཤ་ར་ར། །གཡུ་ཡི་ནེའུ་སིང་ཀྱི་ལི་ལི། །ན་བུན་སྐྱི་བུན་ཐིབས་སེ་ཐིབ། །རི་དྭགས་རྩེ་སྒྱུ་སྤྲེངས་སེ་སྤྲེང་། །གཅན་གཟན་ངར་སྐད་འུ་རུ་རུ། །བྱ་རིགས་གཤོག་སྡང་
ཁྲིགས་སེ་ཁྲིག །གཡུ་འབྲུག་སྔོན་མོ་དི་རི་རི། །བདུད་རྩིའི་ཆར་རྒྱུན་སི་ལི་ལི། །དུང་གི་ཁུ་འཕང་ཁྲ་ལ་ལ། །དེ་འདྲའི་གནས་ཀྱི་མངའ་བདག་ནི། །སྟོན་རྒྱལ་དཀར་པོ་ཞེས་སུ་གྲགས། །གསང་མཚན་རྡོ་རྗེ་གོ་ཆ་ཞེས། །མི་དཀར་མཛེས་ཤིང་དཔའ་བརྗིད་ལྡན། །དབུ་ལ་དངུལ་གྱི་རྨོག་ཞུ་གསོལ། །དར་འཕྲུ་རྒོད་འཕྲུ་རླུང་ལྟར་འཚུབ། །སྐུ་ལ་དར་དཀར་རིལ་གའི་སྟེང་། །དངུལ་ཁྲབ་དཀར་པོ་ཞུ་ལུབས་གསོལ། །ཕྱག་གཡས་མདུང་དར་དཀར་པོ་ཕྱར། །གཡོན་པས་རྟ་ཡི་སྲབ་མདའ་འཛིན། །སྟག་རལ་གཡས་ལ་གཟིག་ཤུབས་གཡོན། །ཡ་ཚྭ་དཀར་ཕྲན་གློག་ལྟར་འཁྱུག །རྟ་ནི་བྲ་བོ་འཕུར་ཤེས་ལ། །གསེར་སྒ་གསེར་སྲབ་གཡུ་མཐུར་ཅན། །ཆིབས་ནས་སྤྲུལ་པ་སྣ་ཚོགས་འགྱེད། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་མཆོད། །གཞན་ཡང་ཡུལ་ལྷ་དྲག་རྩལ་ཅན། །རྣ་བ་ཕྲ་ཕྲོམ་ཞེས་བྱ་ནི། །མི་ནི་དཀར་པོ་ཆས་བཟང་ལ། །མགོ་ལ་སྐྲ་མེད་དུང་གི་མདོག །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་མཆོད། །མང་རྒྱལ་འབར་བ་ཞེས་བྱ་ནི། །མི་སྔོན་
གོས་སྔོན་བརྗིད་པ་གསོལ། །ཆིབས་སུ་རྟ་དཀར་གཡུ་རྔོག་ཆིབས། །ཕྱག་ན་ལྷ་མདའ་ལེབ་མ་འཛིན། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་མཆོད། །ག་པུར་རུ་རྫུ་མི་སྔོན་པོ། །རྟ་དཀར་རླུང་ཤུགས་ལྡན་པ་ཆིབས། །ཕྱག་ན་སྦ་ལྕག་རྔ་གཤང་བསྣམས། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་མཆོད། །རྩ་དེ་ནས་སྤུངས་ལ་གནས་པའི། །བུད་མེད་མཛེས་སྡུག་རྒྱན་དང་ལྡན། །ཕྱག་ན་གཞོང་པ་འབྲས་ཀྱིས་བཀང་། །དེ་སྟེང་དར་གྱིས་བཀབ་པ་འཛིན། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་མཆོད། །རྒྱལ་ཆེན་གྲུ་གུ་ཞེས་བྱ་བ། །མི་དཀར་ཆས་དང་ལྡན་པ་ལ། །རྟ་དཀར་སྒྲ་སྲབ་ལྡན་པ་ཆིབས། །ཕྱག་ན་ཤེལ་ཕྲེང་འཛིན་པར་བྱེད། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་མཆོད། །ཤོ་རོང་ནེ་ཁྱམ་སྤོག་རྨོག་ནི། །མི་ནི་དཀར་པོ་ཆེན་པོ་ལ། །གསེར་ཁྲབ་གསོལ་ཞིང་རྟ་སེར་ཆིབས། །ཕྱག་ན་དར་མདུང་དཀར་པོ་བསྣམས། །འདིར་གཤེགས་བསང་དང་
མཆོད་པ་བཞེས། །གཡུ་ཤུག་ཕྱེ་མར་གསུར་གྱི་མཆོད། །ཁྱུང་ཚང་བྲག་ལ་གནས་པ་ཡི། །མི་དམར་ཆོས་བཟང་མཆེད་གཉིས་ལ། །གཅིག་ནི་ཞལ་རས་མཛེས་པ་ལ། །གཅིག་ནི་ཁ་ཤོ་བརྗིད་པའི་ཞལ། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་མཆོད། །སྐུ་ལྷ་རྔམ་རྩ་མི་སྔོན་པོ། །ཆིབས་སུ་འབྲོང་བུ་དར་མ་ཆིབས། །གཡས་གཡོན་ཕྱག་ན་མདའ་གཞུ་འཛིན། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་མཆོད། །སྐུ་ཁྱམ་བྲག་དམར་ལ་གནས་པ། །མི་ནི་དམར་པོ་བརྗིད་པའི་ཞལ། །ན་བཟའ་ཕྲུག་དཀར་ལའུ་གསོལ། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་མཆོད། །ཇོ་བོ་ཡར་རྒྱུ་ལ་གནས་པ། །མི་དཀར་སྐུ་ལ་རྨོག་ཕུབ་གསོལ། །སྟག་རལ་གཡས་ལ་གཟིག་ཤུབས་གཡོན། །ཕྱག་གཡས་བ་དན་དཀར་པོ་འཛིན། །གཡོན་པས་རྟ་ཡི་སྲབ་སྐྱོགས་སྒྱུར། །ཆིབས་སུ་རྟ་དཀར་དུང་མདོག་ཆིབས། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་མཆོད། །ཇོ་བོ་རྡོ་ཚ་ལ་གནས་པའི། །མི་
དམར་སྐུ་ལ་ཕྲུག་དཀར་གསོལ། །ཕྱག་གཡས་མདའ་དར་དཀར་པོ་ཕྱར། །གཡོན་པས་འཕྲུལ་གྱི་སྲབ་སྐྱོགས་སྒྱུར། །ཆིབས་སུ་རྟ་སྔོན་ཆུ་མདོག་ཆིབས། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་མཆོད། །གཞན་ཡང་ཤར་ལུང་ས་ཕྱོགས་འདིར། །གནས་པའི་ལྷ་ཀླུ་གཞི་བདག་ཚོགས། །ཕ་རི་གཡས་ལ་ཚུར་རི་གཡོན། །འབབ་པ་ཆུ་ལ་སྲ་བ་བྲག །སྐྱེ་བ་ཤིང་དང་འགྲོ་བ་ལམ། །མཚེར་ས་སྦྲ་ཁང་ལ་གནས་པའི། །ཡིད་ཀྱི་གཟུགས་ཅན་ཐམས་ཅད་ལ། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་མཆོད། །སྟོན་རྒྱལ་དཀར་པོའི་གཙོར་བྱས་པའི། །ཡུལ་ལྷ་གཞི་བདག་ཁྱེད་རྣམས་ལ། །བསང་མཆོད་དམ་པ་འདི་འབུལ་བས། །ཐམས་ཅད་མཉེས་ཤིང་ཚིམ་གྱུར་ཅིག །ཉམས་དང་རྒུད་པ་སོས་གྱུར་ཅིག །བཀྲག་མདངས་གཟི་བརྗིད་འཕེལ་གྱུར་ཅིག །བདག་ཅག་ཡོན་མཆོད་འཁོར་བཅས་ཀྱི། །ཕ་མྱེས་སྔ་རབས་འདས་པ་དང་། །བུ་ཚ་ཕྱི་རབས་ཡན་ཆད་ཀྱིས། །ཁྱེད་ཅག་ཐུགས་དང་འགལ་བའི་ལས། །གང་བགྱིས་ཐམས་ཅད་མཐོལ་ལོ་
བཤགས། །བདག་ཅག་ཡུལ་འདིར་གནས་པའི་མི། །ཁྱེད་ཅག་ཡུལ་འདིར་གནས་པའི་ལྷ། །མིས་ཀྱང་ལྷ་ལ་དུས་སུ་མཆོད། །ལྷས་ཀྱང་མི་ལ་ཁ་འཛིན་མཛོད། །གནས་མགྲོན་གཉིས་ཀྱི་དམ་ཚིག་སྲུང་། །མི་ལ་ན་ཚ་མ་བཏང་ཞིག །ཕྱུགས་ལ་གོད་ཁ་མ་བཏང་ཞིག །ལོ་ལེགས་ནོར་ཕྱུགས་འཕེལ་བ་དང་། །དགྲ་ཇག་ཆོམ་རྐུན་གནོད་པ་ཟློག །ཕྱི་ནང་འཁྲུག་རྩོད་ཞི་བར་མཛོད། །གཞི་བྱེས་ལམ་གསུམ་གར་འགྲོ་ཡང་། །སྐྱེལ་བསུ་མཐུན་རྐྱེན་རོགས་དན་མཛོད། །ལ་ཆུ་འཕྲང་གསུམ་འཇིགས་ལས་སྐྱོབས། །ཁ་འཛིན་སྡོང་གྲོགས་མ་གཡེལ་ཅིག །ཁྱད་པར་ས་ཕྱོགས་ཡུལ་ཁམས་འདིར། །བདུད་རྩིའི་ཆར་རྒྱུན་མྱུར་དུ་ཕོབ། །གལ་ཏེ་ཆར་པ་མ་བབ་ན། །ཁྱད་པར་གྲོང་པ་སྒེའི། །ལོ་ཏོག་ཁྱེད་ཅག་རྣམས་ལ་བཅོལ། །སེར་བ་མ་གཏོང་ཐུབ་པར་བསྲུངས། །གལ་ཏེ་སེར་བ་ཤོར་བྱུང་ན། །ཁྱེད་རྣམས་མཐུ་རྩལ་མི་ཞན་པས། །དེ་བས་སྨྲ་བབ་ཅང་ཡོད་དམ། །མཐུ་རྩལ་ཅི་གདའ་ད་ལྟ་བལྟ། །མ་གཡེལ་བཅོལ་བའི་ཕྲིན་ལས་མཛོད། །དེ་ནས་གཏོར་མ་ཡོད་ན་སྐབས་འདིར་བསྔོ། བསང་དུས་མིན་ཡང་དཀར་གཏོར་ཕུལ། རཾ་ཡཾ་ཁཾ་གིས་མི་
གཙང་དྲི་མ་སྦྱངས། །ཧཱུྃ་ལས་རིན་ཆེན་སྣོད་ཡངས་རྒྱ་ཆེ་བར། །ཁཾ་ཡིག་ལས་བྱུང་གཏོར་མ་བདུད་རྩི་མཚོ། །ཁ་དོག་དྲི་རོ་ནུས་པ་ཕུན་སུམ་ཚོགས། །ཨོཾ་གིས་ཟག་མེད་བདུད་རྩིར་གྱུར། །ཕུད་རླངས་རང་རང་མཐུན་རྫས་དཔག་མེད་འཕྲོ། །ས་དང་བར་སྣང་ནམ་མཁའ་གང་བར་གྱུར། །འདོད་གསོལ་ཕྲིན་ལས་བཅོལ་བ་ནི། །ཧཱུྃ། སྔོན་ཚེ་སློབ་དཔོན་པདྨ་ཐོད་ཕྲེང་གི །བཀའ་དང་དམ་ལ་བཏགས་པའི་ཐ་ཚིག་ཅན། །ཡུལ་ལྷའི་གཙོ་བོ་སྟོན་རྒྱལ་དཀར་པོ་ནི། །འཁོར་དང་བཅས་པ་འདིར་གཤེགས་གཏོར་མ་བཞེས། །རྣ་བ་ཕྲ་ཕྲོམ་མང་རྒྱལ་འབར་བ་དང་། །ག་པུར་རུ་རྫུ་རྩ་དེ་ནས་སྤུང་དང་། །རྒྱལ་ཆེན་གྲུ་གུ་ཁྱུང་ཚང་བྲག་དམར་དང་། །ནེ་ཁྱམ་སྤོག་རྨོག་སྐུ་ལྷ་རྔམ་རྩ་དང། །སྐུ་ཁྱམ་བྲག་དམར་ཇོ་བོ་ཡར་རྒྱུ་དང་། །ཇོ་བོ་རྡོ་ཚ་ལ་སོགས་གཞི་བདག་རྣམས། །འདིར་གཤེགས་དམ་རྫས་བརྒྱན་པའི་གཏོར་མ་བཞེས། །སྔར་བྱས་གཏང་རིག་ཕྱིས་སུ་ཞུ་སྐྱེམས་འབུལ། །ད་ལྟའི་གཉེར་ཟས་གཉན་པོ་འདི་བཞེས་ལ། །བདག་ཅག་ཡོན་མཆོད་འཁོར་དང་བཅས་པ་ཡི། །ནད་གདོན་བར་ཆད་ཐམས་ཅད་ཞི་བ་དང་། །
ཚེ་དང་བསོད་ནམས་དབང་ཐང་འཕེལ་བ་དང་། །འདོད་དགུ་ལོངས་སྤྱོད་དབང་དུ་འདུ་བ་དང་། །གནོད་བྱེད་དགྲ་བགེགས་བཟློག་ཅིང་བསྒྱུར་བ་སོགས། །རང་རང་ཅི་ལྟར་ནུས་པའི་སྡོང་གྲོགས་མཛོད། །རིག་འཛིན་རྒྱལ་བའི་བཀའ་ལས་མ་འདའ་བར། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །།ཨོཾ་ཤ་ར་ཏྲི་སོད། ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨབྷྲཱུཾ་སོགས། ཧཱུྃ། ལྷ་ཆེན་སྟོན་རྒྱལ་དཀར་པོ་ནི། །མི་དཀར་དཔའ་བརྗིད་ལྡན་པ་ལ། །དབུ་ལ་དངུལ་གྱི་རྨོག་ཞུ་གསོལ། །བྱ་ཕོད་ལྡེམ་དར་ཉི་ལྟར་ཤར། །སྐུ་ལ་དངུལ་ཁྲབ་འོད་དུ་འབར། །སྟག་རལ་གཟིག་ཤུབས་སྐྱེད་ལ་བསྐོར། །ཕྱག་གཡས་དར་མདུང་དཀར་པོ་ཕྱར། །སྣང་སྲིད་ཡུལ་ལྷའི་དམག་ཚོགས་སྡུས། །གཡོན་པས་འཕྲུལ་གྱི་སྲབ་སྐྱོགས་སྒྱུར། །ཅང་ཤེས་བྲ་བོ་འཕུར་ཤེས་ཆིབས། །ཡུལ་ལྷ་མང་པོའི་འཁོར་དང་བཅས། །དགེ་བསྙེན་ཆེན་པོ་ཁྱེད་ལ་བསྟོད། །བརྒྱན་པའི་གཏོར་མ་འདི་བཞེས་ལ། །བཅོལ་བའི་ཕྲིན་ལས་འགྲུབ་པར་མཛོད། །གཏོར་མ་གཙང་སར་ཕུལ། ཨོཾ་ཤ་ར་ཏྲི་སོད། ཡིག་འབྲུ་ལྔ་སྟོན་རྒྱལ་དཀར་པོའི་སྲོག་སྔགས་སོ། །སྤྲུལ་སྐུ་མི་
འདོན་བྱ་རཱ་ག་ཨ་སྱས་སྤེལ། །འབྲི་བའི་ཐབས་ནི་མར་མེའི་ངོགས། །འཕྲལ་དུ་ཡི་གེར་བྲིས་པ་ལ། །ཉེས་མཆིས་བཤགས་ཤིང་དགེ་མཆིས་ན། །ཡུལ་འདིར་འགྱུར་རྡོ་རྗེས་གསུངས་པ་ལ་དཔང་པོ་བྱས་ནས་ཀྱང་། བདེ་ལེགས་འབྱུང་ཕྱིར་བསྔོ། །མངྒ་ལཾ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།