ལམ་ལྷ་ཁ་འཛིན་བྱ་བ།
ལམ་ལྷ་ཁ་འཛིན་བྱ་བ་ནི། ཀྱཻ། བསང་དང་མཆོད་པ་འདི་ཕུལ་བས། །སྲིད་ཞིའི་མགྲོན་རྣམས་ཐུགས་མཉེས་ནས། །ཚོགས་གཉིས་རྫོགས་པའི་ཁ་འཛིན་མཛོད། །ཡོན་ཏན་མགྲོན་རྣམས་ཐུགས་དམ་བསྐང་། །ཕྲིན་ལས་ཀུན་འགྲུབ་ཁ་འཛིན་མཛོད། །སྙིང་རྗེའི་མགྲོན་ཀུན་ཚིམ་གྱུར་ཅིག །ཅི་ལྟར་ནུས་པའི་ཁ་འཛིན་མཛོད། །ལན་ཆགས་མགྲོན་ཀུན་མགུ་གྱུར་ཅིག །ཕན་སེམས་ལྡན་པའི་ཁ་འཛིན་མཛོད། །འཇིག་རྟེན་ཆོས་སྐྱོང་ཐམས་ཅད་ཀྱིས། །འཇིག་རྟེན་བདེ་བའི་ཁ་འཛིན་མཛོད། །རྣམ་སྲས་ཛི་ལྷ་ནོར་རྒྱུན་མས། །ནོར་རྣམས་འཕེལ་བའི་ཁ་འཛིན་མཛོད། །རེ་མན་དང་ཀུ་བེ་རས། །རྟ་རྣམས་འཕེལ་བའི་ཁ་འཛིན་མཛོད། །ཨ་པར་ཙི་ཏ་གང་བཟང་གིས། །ལུག་རྣམས་འཕེལ་བའི་ཁ་འཛིན་མཛོད། །ལྷ་མོ་དཔལ་དང་བརྟན་མ་ཡིས། །འབྲུ་རྣམས་འཕེལ་བའི་ཁ་འཛིན་མཛོད། །།ཡུལ་ལྷ་གཞི་བདག་ཐམས་ཅད་ཀྱིས། །སད་སེར་མེད་པའི་ཁ་འཛིན་མཛོད། །ཕོ་ལྷ་དགྲ་ལྷ་ཐམས་ཅད་ཀྱིས། །བུ་རྟ་སྤེལ་བའི་ཁ་འཛིན་མཛོད། །ལྷ་དང་སྲུང་མ་ཐམས་ཅད་ཀྱིས། །སྲུང་སྐྱོབ་སྡོང་གྲོགས་ཁ་འཛིན་མཛོད། །ཅེས་པ་
བསང་གི་ཁ་བཀང་དུ་། ༧ ཀརྨ་རཱ་ག་ཨ་སྱས་བྲིས་པའོ།།