རླུང་རྟའི་བསང་།
རླུང་རྟའི་བསང་བཞུགས་སོ།། འབྱུང་བ་བཞི་ཡི་ལྷ་ལ་ཕྱག་འཚལ་ལོ། །བསང་གཞུང་རྣམས་སྔོན་དུ་སོང་ནས་འདི་སྐད་དོ།། ཀྱཻ། བསང་མཆོད་ཕུན་སུམ་ཚོགས་པ་འདིས། །སངས་རྒྱས་ཆོས་དང་དགེ་འདུན་བསང་། །བླ་མ་ཡི་དམ་མཁའ་འགྲོ་དང་། །ཆོས་སྐྱོང་ནོར་ལྷ་གཏེར་བདག་བསང་། །བདག་ལ་སྲུང་ཞིང་སྐྱབས་པ་དང་། །རླུང་རྟ་དར་ཞིང་རྒྱས་པར་མཛོད། །ཀྱཻ། དབུས་ཀྱི་ཕྱོགས་ན་གནས་པའི་ལྷ། །རླུང་རྟ་དར་བའི་དགྲ་བླ་ནི། །རྟ་མཆོག་རྒྱལ་པོ་བ་ལ་ཧཱ། །མྱུར་མགྱོགས་ཆེ་བའི་དགྲ་བླ་བསང་། །བདག་གི་རླུང་རྟ་དར་བར་མཛོད། །རྒུད་པའི་རླུང་རྟ་བསྐྱེད་དུ་གསོལ། །ཀྱཻ། ཤར་གྱི་ཕྱོགས་ན་གནས་པའི་ལྷ། །རླུང་རྟ་དར་བའི་དགྲ་བླ་ནི། །དུང་སེང་གཡུ་ཡི་རལ་པ་ཅན། །དཔའ་རྩལ་ཆེ་བའི་དགྲ་བླ་བསང་། །བདག་གི་རླུང་རྟ་དར་བར་མཛོད། །རྒུད་པའི་རླུང་རྟ་བསྐྱེད་དུ་གསོལ། །ཀྱཻ། ལྷོ་ཡི་ཕྱོགས་ན་གནས་པའི་ལྷ། །རླུང་རྟ་དར་བའི་དགྲ་བླ་ནི། །གཡུ་འབྲུག་ཟངས་ཀྱི་ཟེ་བ་ཅན། །ངར་སྐད་ཆེ་བའི་དགྲ་བླ་བསང་། །བདག་གི་རླུང་རྟ་དར་བར་མཛོད། །རྒུད་པའི་རླུང་རྟ་བསྐྱེད་དུ་གསོལ།
ཀྱཻ། ནུབ་ཀྱི་ཕྱོགས་ན་གནས་པའི་ལྷ། །རླུང་རྟ་དར་བའི་དགྲ་བླ་ནི། །རྒྱ་སྟག་མཚལ་གྱི་ཐིག་ལེ་ཅན། །དཔའ་རྩལ་ཆེ་བའི་དགྲ་བླ་བསང་། །བདག་གི་རླུང་རྟ་དར་བར་མཛོད། །རྒུད་པའི་རླུང་རྟ་བསྐྱེད་དུ་གསོལ། །ཀྱཻ། བྱང་གི་ཕྱོགས་ན་གནས་པའི་ལྷ། །རླུང་རྟ་དར་བའི་དགྲ་བླ་ནི། །ཁྱུང་ཆེན་ནོར་བུའི་ཐོར་ཚུགས་ཅན། །སྟོབས་རྩལ་ཆེ་བའི་དགྲ་བླ་བསང་། །བདག་གི་རླུང་རྟ་དར་བར་མཛོད། །རྒུད་པའི་རླུང་རྟ་བསྐྱེད་དུ་གསོལ། །ཀྱཻ། ཕྱོགས་བཞི་མཚམས་ན་གནས་པའི་ལྷ། །འབྱུང་བ་ལྔ་ཡི་ལྷ་རྣམས་བསང་།འབྱུང་ལྔའི་རླུང་རྟ་དར་བར་མཛོད། །རྒུད་པའི་རླུང་རྟ་བསྐྱེད་དུ་གསོལ། །སྤར་ཁ་བརྒྱད་ཀྱི་ལྷ་རྣམས་བསང་། །སྤར་ཁའི་རླུང་རྟ་དར་བར་མཛོད། །རྒུད་པའི་རླུང་རྟ་བསྐྱེད་དུ་གསོལ། །སྨེ་བ་དགུ་ཡི་ལྷ་རྣམས་བསང་། །སྨེ་བའི་རླུང་རྟ་དར་བར་མཛོད། །རྒུད་པའི་རླུང་རྟ་བསྐྱེད་དུ་གསོལ། །ལོ་ཟླ་ཞག་དུས་ལྷ་རྣམས་བསང་། །ལོ་ཟླའི་རླུང་རྟ་དར་བར་མཛོད། །རྒུད་པའི་རླུང་རྟ་བསྐྱེད་དུ་གསོལ། །འགོ་བའི་ལྷ་དང་སྐྱོབ་པའི་ལྷ། །ཕ་ལྷ་མ་ལྷ་ཞང་ལྷ་དང་། །ཕྲག་ལྷ་ལུས་ལྷའི་ལྷ་རྣམས་བསང་། །
བདག་གི་རླུང་རྟ་དར་བར་མཛོད། །རྒུད་པའི་རླུང་རྟ་བསྐྱེད་དུ་གསོལ། །བསྐྱེད་ཅིག་རླུང་རྟ་ཡར་ལ་བསྐྱེད། །བདག་ཅག་སྟོབས་ནུས་དབང་ཐང་བསྐྱེད། །རླུང་རྟ་རྒུད་པ་ཡར་ལ་བསྐྱེད། །ལུས་ལ་གཟི་མདངས་དཔའ་རྩལ་བསྐྱེད། །ངག་ལ་བདེན་པའི་ནུས་མཐུ་བསྐྱེད། །སེམས་ལ་བདེ་བའི་ཏིང་འཛིན་བསྐྱེད། །ནད་གདོན་ཞི་ལ་ཚེ་བསོད་འཕེལ། །སྣང་བ་དབང་སྡུས་དགྲ་བགེགས་སྒྲོལ། །ཕྱོགས་ལས་རྒྱལ་བའི་རྒྱལ་མཚན་ཕྱོར། །འདོད་པའི་དོན་ཀུན་འགྲུབ་པར་མཛོད། །རྒྱལ་ལོ་རྒྱལ་ལོ་ལྷ་རྒྱལ་ལོ། །བདག་ཅག་ལྷ་ངོ་རྒྱལ་གྱུར་ཅིག །ཕ་རོལ་དགྲ་བགེགས་ཆོམ་ལ་ཕོབ། །ཚེ་བསོད་དཔལ་འབྱོར་སྲོག་ལུས་དང་། །དབང་ཐང་རླུང་རྟ་ཡར་སྐྱེད་ཅིག །ནག་ཕྱོགས་བདུད་རིགས་ཆམ་ལ་ཕོབ། །བཅོལ་བའི་ཕྲིན་ལས་འགྲུབ་པར་མཛོད། །སརྦ་བི་ཛ་ས་མ་ཡ། ཁྱུང་ལ་གསེར་དང་དར་སེར། སེངྒེ་ལ་དངུལ་དང་དར་དཀར་པོ། སྟག་ལ་པདྨ་རཱ་ག་དང་དར་དམར། །འབྲུག་ལ་གཡུ་དང་དར་ལྗང་ཁུ། མུ་མེན་དང་ལེ་བརྒན་དར་མཐིང་ཁ། སྙིང་པོ་ནི། གྷ་ཛ་སིང་ཧ་བེ་ཏྲི་ཁའུ་སརྦ་ཨརླ་ས་དྷ་འདུ་འདུ་ཧོཿ སྨན་ལྔ་བྱུག་གོ །རླུང་རྟ་བཞིའི་སྔགས་རྣམས་ལུས་ལ་འཆང་བའི་ཚེ་ལུས་ངག་