སྦྲ་བསང་ཡིད་བཞིན་ནོར་བུ་དང་ཕྱེ་མར་བསྐུ་ཐབས།
སྦྲ་བསང་ཡིད་བཞིན་ནོར་བུ་བཞུགས་སོ།། ཀྱཻ། དེ་རིང་སྐྱིད་ཀྱི་ཉི་མ་ལ། །ཡ་མཚན་ཅན་གྱི་གཡུ་སྦྲ་འདི། །རྒྱུ་ནི་བྱང་གི་འབྲོང་བུ་ལ། །ར་རྒྱལ་གཡག་དང་ངུར་མ་འབྲི། །དེ་ཡི་སྤུ་རྩིད་དག་ལས་བྱས། །ཤེས་རིག་གསལ་བའི་བཟོ་བོ་ཡིས། །མ་ཡོ་གྲུ་བཞི་ལེགས་པར་བྱས། །ཙནྡན་ཤིང་གི་གུང་ཤིང་ལ། །ལྷ་ཤིང་དྲང་བས་ཀ་བ་བྱས། །ཆོན་ཐག་གཡུ་མཐིང་སྔོན་པོ་ལ། །སྲ་ཤིང་དག་གི་ཕུར་པ་བྱས། །ཀྱཻ། བླ་མ་ཡི་དམ་རིག་འཛིན་གྱིས། །གཡུ་སྦྲ་འདི་ལ་དབང་བསྐུར་ཅིག །མཁའ་འགྲོ་ཆོས་སྐྱོང་དཔལ་མགོན་གྱིས། །གཡུ་སྦྲ་འདི་ལ་བྱིན་ཕོབ་ཅིག །ཁྱད་པར་དགྲ་བླ་ཝེར་མ་འདིས་། །གཡུ་སྦྲ་འདི་ལ་མངའ་གསོལ་ཅིག །ཅང་ཤེས་ཤུག་མགོན་ཕོ་ལྷ་འདིས། །གཡུ་སྦྲ་འདི་ལ་སྲུང་ཚུགས་ཤིག །ཁྱིམ་ལྷ་ཐབ་ལྷ་ཕུག་ལྷ་འདིས། །གཡུ་སྦྲ་འདི་ལ་ཁ་འཛིན་མཛོད། །མ་ལྷ་ཞང་ལྷ་ཡུལ་ལྷ་འདིས། །གཡུ་སྦྲ་འདི་ལ་རྒྱབ་རྟེན་མཛོད། །ཕྱ་ལྷ་གཡང་ལྷ་ཟས་ལྷ་འདིས། །གཡུ་སྦྲ་འདི་ལ་གཡང་སྐྱིལ་ཅིག །མི་སོགས་ཀྱིས་སྨོན་ལམ་བཏབ། །འབྲུ་སྣ་དང་མེ་ཏོག་འཐོར་ལ་འདི་སྐད་དོ།། ཀྱཻ། རི་བོ་སྦྲ་ཡི་ཡ་ལོག་འདི། །བླ་མ་
དཔོན་ཆེན་བཞུགས་པའི་ས། །བྱིན་རླབས་བཀའ་གསལ་འབྱུང་བར་ཤོག །རི་བོ་སྦྲ་ཡི་གོང་དཀྱིལ་ན། །གཉེན་དང་ཕ་ཁུ་འཛོམ་པའི་ས། །དགའ་བྲོ་སྐྱིད་གླུ་བྱེད་པར་ཤོག །རི་བོ་སྦྲ་ཡི་མ་ལོག་འདི། །མ་སྲུ་སྨན་ཤར་འཛོམ་པའི་ས། །བཟའ་བཏུང་ཕུན་སུམ་ཚོགས་པར་ཤོག །རི་བོ་སྦྲ་ཡི་སྒོ་འགྲམ་ན། །དོམ་དྲེད་འདྲ་བའི་སྒོ་ཁྱི་ཡིས། །དགྲ་རྐུན་གོད་འདྲེ་ཁོག་པར་ཤོག །རི་བོ་སྦྲ་ཡི་གཡས་ཕྱོགས་ན། །བཙས་པོའི་བུ་ཁྱིམ་ཕོག་པ་ལ། །ཕ་ཕྱུག་བུ་ཕྲུག་འཛོམ་པར་ཤོག །རི་བོ་སྦྲ་ཡི་གཡོན་ཕྱོགས་ན། །དཀོར་ནོར་ཕྱུགས་ཀྱི་ར་བ་ལ། །བརྒྱ་གྲངས་སྟོང་གྲངས་འཕེལ་བར་ཤོག །རྒྱུ་སྦྱོར་ཡོན་བདག་འདི་དག་ལ། །མི་གྲངས་ནས་ལས་འཕེལ་བར་ཤོག །མི་འབྲུ་གསེར་ལས་བཟང་བར་ཤོག །མི་སྲོག་བྲག་ལས་སྲ་བར་ཤོག །བུ་རྒྱུད་སྟག་ལས་དཔའ་བར་ཤོག །ཟས་ནོར་ཆུ་བོ་རྒྱ་མཚོ་ལྟར། །ལོངས་སྤྱོད་ཕུན་སུམ་ཚོགས་པར་ཤོག །བདག་དང་ཡོན་བདག་འཁོར་བཅས་ལ། །འཆི་མེད་ཚེ་ཡི་དངོས་གྲུབ་སྩོལ། །འཛད་མེད་གཏེར་གྱི་དངོས་གྲུབ་སྩོལ། །རྐང་བཞི་ཕྱུགས་ཀྱི་དངོས་གྲུབ་སྩོལ། །མགྱོགས་བྱེད་རྟ་ཡི་དངོས་
གྲུབ་སྩོལ། །འབྲུ་བཅུད་ནས་ཀྱི་དངོས་གྲུབ་སྩོལ། །རྨ་གཡང་ཟས་ཀྱི་དངོས་གྲུབ་སྩོལ། །དཀར་མོ་ལུག་གི་དངོས་གྲུབ་སྩོལ། །བཀྲ་ཤིས་དར་རྒྱས་ཕུན་སུམ་ཚོགས་པར་ཤོག །ཀི་བསྲོ་ཆའོ། །ལྷ་རྒྱལ་ལོ། །ཞེས་སྦྲ་སར་བྱས་པའི་འགའ་ཡི་སྐབས། །རཱ་ག་ཨ་སྱས་སྦྱར་བའོ། །མངྒ་ལཾ།། ༈ ཕྱེ་མར་བསྐུ་ཐབས་བཞུགས་སོ། །ཕོ་ལྷ་ལ་རྟ་བཅས་རྟེན་བཙུགས། ཝེར་མ་ལ་རྟ་བཅས་རྟེན་བཙུགས། ཕྱུགས་ལྷ་ལ་རྟ་བཅས་རྟེན་བཙུགས། ཡ་དཀར་གྱི་ཀ་བར་བསྐུས། ཡ་དཀར་གྱི་བ་ཁ་མ་སྡེར། གཡུ་ཡི་སྡོང་མ་ལ་བསྐུས། གཡུ་ཡི་སྡོང་མ་སྐེད་དུ་མ་ཆག སྦྲ་རི་བོ་ལ་བསྐུས། གསེར་སྦྲ་སེར་པོ་སྲུབ་ཏུ་མ་རལ། སྒོ་བ་གཡས་ལ་བསྐུས། སྒོ་གཡས་སུ་སྟག་འགྱིང་། སྒོ་གཡོན་ལ་བསྐུས། སྒོ་བ་གཡོན་ལ་འབྲོང་འགྱིང་། སྦྲ་སྣེ་བཞི་ལ་བསྐུས། ཕྱོགས་བཞིས་དགྲ་བཞི་ཐུལ། མ་སྐྱེད་ཕྱུག་མོ་ལ་བསྐུས། ཇ་ཆང་འོ་མའི་རྒྱུན་མི་འཆད་པའི་གཡང་སྟེར། ཕྱུ་ཡི་རུ་མ་མ་སྐམ་ཞིག །གཡང་གི་རྟེན་ཕུར་མ་འཆུག་ཅིག །བཀྲ་ཤིས་པར་གྱུར་ཅིག་མངྒ་ལཾ། སརྦ་སིདྡྷི་ཕ་ལ་ཧོ། ཕྱེ་མར་སྐུ་ཐབས་རྫོགས་སོ།། །།