དགྲ་བླ་བཅུ་གསུམ་གྱི་བསང་ཤིན་ཏུ་བསྡུས་པ།
དགྲ་བླ་བཅུ་གསུམ་གྱི་བསང་ཤིན་ཏུ་བསྡུས་པ་བཞུགས་སོ།། བསོ། ལེགས་ལྡན་དགྲ་བླའི་དམག་ཚོགས་རྣམས། །དར་མདུང་ཕྱར་ལ་དུང་སྐད་སྒྲོག །ལྷ་དམག་མགོན་དམག་གཉན་དམག་གསུམ། །ལྷ་མགོན་དགྲ་བླ་དྲང་མཁན་དྲུག །ནོར་ལྷ་གྲོགས་ལྷ་ཟས་ལྷ་དགུ། །ཚོང་ལྷ་མགྲོན་ལྷ་ལམ་ལྷ་དང་། །སྲོག་ལྷ་དཀར་དང་བཅུ་གསུམ་སྲིད། །སྔོན་གྱི་ཐུགས་དམ་རྗེས་དགོངས་ལ། །དམ་ཚིག་དབང་གིས་གཤེགས་སུ་གསོལ། །རང་རང་དགྱེས་པའི་གདན་ལ་བཞུགས། །བཙན་པའི་གོ་ཁྲབ་ལུས་ལ་གྱོན། །།རྣོ་བའི་མཚོན་ཆ་ལག་ན་ཐོགས། །མགྱོགས་པའི་རྟ་ཕོ་ཆིབས་སུ་ཆིབས། །མྱུར་བར་སྡང་བའི་དགྲ་ལ་རྒྱུགས། །འཁོར་དང་བཅས་པ་ཁྱེད་རྣམས་ལ། །བདུད་རྩི་བསང་གི་མཆོད་པ་འབུལ། །ཆོས་སྐྱོང་དགྲ་བླ་ཁྱེད་རྣམས་ཀྱིས། །དགྲ་དང་ཟོན་དུ་མ་ནོར་བར། །དགྲ་ཡི་དམག་ལམ་སྟོབས་ཀྱིས་སྒྲོལ། །ཕྲག་ལྷ་བཟུང་ལ་ནོར་གཡང་ཁུག །བདག་ཅག་རྣལ་འབྱོར་འཁོར་བཅས་ལ། །དམག་ལ་འགྲོ་ན་དམག་དཔོན་མཛོད། །ཇག་ལྷ་མགྲོན་ལྷ་ཚོང་ལྷ་དང་། །ཕར་ལ་འགྲོ་ན་སྐྱེལ་མ་མཛོད། །ཟས་ལྷ་གྲོགས་ལྷ་ནོར་ལྷ་དང་། །
ཚུར་ལ་འོང་བའི་བསུ་མ་མཛོད། །ཚེ་ལྷ་སྲོག་ལྷ་ཁྱིམ་ལྷ་དང་། །གཞི་ལ་འདུག་པའི་ཁ་འཛིན་མཛོད། །མི་ནོར་ཟས་གསུམ་འཕེལ་བར་མཛོད། །དཀར་པོ་དགེ་བའི་སྡོང་གྲོགས་མཛོད། །ཐེའུ་རང་རྐྱལ་ཁ་མ་བྱེད་ཅིག །རྨོངས་སྡུག་དབུལ་གསུམ་མེད་པར་མཛོད། །དགྲ་འདྲེ་གདོན་གསུམ་མེད་པར་མཛོད། །བཅོལ་བའི་ཕྲིན་ལས་འགྲུབ་པར་མཛོད། །ཅེས་མགོན་པོ་དགྲ་ལྷ་བཅུ་གསུམ་ཉུང་བསྡུས་འདི་ནི་ཨ་རཱ་གས་བྲིས་པའོ། །སརྦ་མངྒ་ལཾ།། །།