དགྲ་བླའི་དཔའ་བསང་།
དེ་ནས་དགྲ་བླའི་དཔའ་བསང་བྱ་བ་ནི། ཕུད་རྣམས་མཆོད། ཕྱེ་མར་བསྲེགས། མདའ་གཞུ་དང་གོ་ཆ་གྱོན་ལ་བསང་ཁང་གཡས་བསྐོར་དུ། ཀྱཻ། དགྲ་བླའི་སྐུ་མཁར་རྫོང་རྩ་ན། །རྨིང་གཞི་སྲ་བ་ལྕགས་ལས་བྱས། །ལོགས་བཞི་རིན་ཆེན་གསེར་ལས་བྱས། །ཁ་བད་སྔོན་པོ་གཡུ་ལས་བྱས། །གསེར་གྱི་སྐས་ཆེན་ལྡེམས་སེ་ལྡེམ། །བྱི་རུའི་སྒོ་མོ་ཁྲིགས་སེ་ཁྲིག །སྐུ་མཁར་དེ་ཡི་མདངས་གསོལ་བ། །དགྲ་བླའི་ལྷ་ཚོགས་དེ་ནས་བྱུང་། །མཆོད་ཅིང་དགྲ་བླ་དེ་རུ་མཆོད། །སྲིད་པ་ཆགས་པའི་དགྲ་བླ་བསང་། །འབྱུང་བ་རླུང་གི་དགྲ་བླ་བསང་། །སྨོན་པ་འགྲུབ་པའི་དགྲ་བླ་བསང་། །གླིང་བཞི་དར་བའི་དགྲ་བླ་བསང་། །དཔའ་སྙིང་ཆེ་བའི་དགྲ་བླ་བསང་། །མྱུར་མགྱོགས་ཆེ་བའི་དགྲ་བླ་བསང་། །སྲིད་པའི་ལྷ་ལུང་དཀར་པོ་བསང་། །སྨོན་པའི་རྫི་ལུང་འཕྱོ་བ་དགྲ་བླ་བསང་། །འོད་ཟེར་མི་རྟ་ཆ་བརྒྱད་བསང་། །བྱེས་ཀྱི་དགྲ་བླ་སྤུན་གསུམ་བསང་། །ཕྱི་རབས་རྒྱུད་ཀྱི་དགྲ་བླ་བསང་། །སྔ་རབས་རྒྱུད་ཀྱི་དགྲ་བླ་བསང་། །རྨུ་རབས་རྒྱུད་ཀྱི་དགྲ་བླ་བསང་། །གཙུག་རབས་རྒྱུད་ཀྱི་དགྲ་བླ་བསང་། །གདོང་གི་གདོང་ལྷ་སྨུག་པོ་བསང་། །
དབྲ་ཡི་དབྲ་མོ་ར་ཁྲ་བསང་། །འགྲུ་ཡི་འགྲུ་མོ་ཁྲོམ་ཁྲོམ་བསང་། །སྒྲ་ཡི་སྒྲ་མོ་ལེགས་ཕྲོམ་བསང་། །དབལ་ཟླ་གཉིས་ཀྱི་དགྲ་བླ་བསང་། །དགྲ་བླའི་བྲ་མ་མཆེད་དགུ་བསང། །བྲོས་ན་ཐར་བའི་དགྲ་བླ་བསང་། །བལྟས་ན་ཟས་པའི་དགྲ་བླ་བསང་། །དཔའི་ཁ་རྒྱལ་བའི་དགྲ་བླ་བསང་། །བཟང་ཁ་ཡག་བྱེད་དགྲ་བླ་བསང་། །མི་ཕོ་དཔའ་བའི་དགྲ་བླ་བསང་། །རྟ་ཕོ་མགྱོགས་པའི་དགྲ་བླ་བསང་། །ཀྱཻ། རྟེན་བཙུགས་རྣམས་ལ་བརྟེན་པ་ནི། །དགྲ་བླ་གཉེན་པོ་དཔང་དུ་བསྟོད། །དགྲ་བླ་མི་དང་མ་འབྲལ་ཅིག །དགུང་ལ་ཉི་ཟླ་ཤར་བ་བཞིན། །དགྲ་བླ་གཉེན་པོ་དཔང་དུ་བསྟོད། །དགྲ་བླ་མི་དང་མ་འབྲལ་ཅིག །གངས་དང་སེང་གེ་འགྲོགས་པ་བཞིན། །དགྲ་བླ་གཉེན་པོ་དཔང་དུ་བསྟོད། །དགྲ་བླ་མི་དང་མ་འབྲལ་ཅིག །བྲག་དང་ཐང་དཀར་འགྲོགས་པ་བཞིན། །དགྲ་བླ་གཉེན་པོ་དཔང་དུ་བསྟོད། །དགྲ་བླ་མི་དང་མ་འབྲལ་ཅིག །ནགས་དང་རྒྱ་སྟག་འགྲོགས་པ་བཞིན། །དགྲ་བླ་གཉེན་པོ་དཔང་དུ་བསྟོད། །དགྲ་བླ་མི་དང་མ་འབྲལ་ཅིག །སྤང་ལ་ཤ་རྐྱང་འགྲོགས་པ་བཞིན། །དགྲ་བླ་
གཉེན་པོ་དཔང་དུ་བསྟོད། །དགྲ་བླ་མི་དང་མ་འབྲལ་ཅིག །འཛམ་གླིང་ལོ་ཏོག་རྒྱས་པར་ཤོག །དགྲ་བླ་གཉེན་པོ་དཔང་དུ་བསྟོད། །དགྲ་བླ་མི་དང་མ་འབྲལ་ཅིག །མཁར་ལ་གཡུ་འོད་བརྒྱན་པ་བཞིན། །དགྲ་བླ་གཉེན་པོ་དཔང་དུ་བསྟོད། །དགྲ་བླ་མི་དང་མ་འབྲལ་ཅིག །ལུས་དང་གྲིབ་བཞིན་འགྲོགས་པ་བཞིན། །དགྲ་བླ་གཉེན་པོ་དཔང་དུ་བསྟོད། །དགྲ་བླ་མི་དང་མ་འབྲལ་ཅིག །གཞུ་ལ་གྲོ་བས་གཡོགས་པ་བཞིན། །དགྲ་བླ་གཉེན་པོ་དཔང་དུ་བསྟོད། །དགྲ་བླ་མི་དང་མ་འབྲལ་ཅིག །མཚོ་ལ་ཉ་མོ་འགྲོགས་པ་བཞིན། །དགྲ་བླ་གཉེན་པོ་དཔང་དུ་བསྟོད། །དགྲ་བླ་མི་དང་མ་འབྲལ་ཅིག །སྐྱེས་བུ་གོ་ཆས་བརྒྱན་པ་བཞིན། །དགྲ་བླ་གཉེན་པོ་དཔང་དུ་བསྟོད། །དགྲ་བླ་མི་དང་མ་འབྲལ་ཅིག །རྟ་མཆོག་དར་སྣས་བརྒྱན་པ་བཞིན། །དགྲ་བླ་གཉེན་པོ་དཔང་དུ་བསྟོད། །དགྲ་བླ་མི་དང་མ་འབྲལ་ཅིག །རྨོག་ལ་རྒོད་འཕྲུ་བཙུགས་པ་བཞིན། །དགྲ་བླ་གཉེན་པོ་དཔང་དུ་བསྟོད། །དགྲ་བླ་མི་དང་མ་འབྲལ་ཅིག །ཁྲབ་ལ་དར་ཕོན་བརྒྱན་བ་བཞིན། །དགྲ་བླ་གཉེན་པོ་དཔང་དུ་བསྟོད། །
དགྲ་བླ་མི་དང་མ་འབྲལ་ཅིག །ཕུབ་ལ་རྔ་ཞོལ་བརྒྱན་པ་བཞིན། །དགྲ་བླ་གཉེན་པོ་དཔང་དུ་བསྟོད། །དགྲ་བླ་མི་དང་མ་འབྲལ་ཅིག །མདུང་ལ་བ་དན་བཏགས་པ་བཞིན། །དགྲ་བླ་གཉེན་པོ་དཔང་དུ་བསྟོད། །དགྲ་བླ་མི་དང་མ་འབྲལ་ཅིག །མདའ་མོ་སྒྲོ་མཚལ་སྒྲོན་པ་བཞིན། །དགྲ་བླ་གཉེན་པོ་དཔང་དུ་བསྟོད། །དགྲ་བླ་མི་དང་མ་འབྲལ་ཅིག །དགྲ་བླ་གཉེན་པོ་བསྟོད་པའི་བྱིན་རླབས་ཀྱིས། །རྟ་རྒྱུག་དཔུང་པ་མ་འབུད་ཅིག །རྨོག་ཞུ་མགོ་ནས་མ་བྲུལ་ཞིག །ཁྲབ་ཀྱི་རྒྱུན་ཐག་མ་ཆད་ཅིག །མདའ་མོ་ལྟོང་ནས་མ་གས་ཤིག །མདུང་མོ་སྐེད་ནས་མ་ཆག་ཅིག །ཁ་འཛིན་སྡོང་གྲོགས་རྒྱབ་རྟེན་མཛོད། །བཅོལ་བའི་ཕྲིན་ལས་འགྲུབ་པར་མཛོད། །སྔར་ཡི་གེ་མེད་པ་ལ་དགོས་པ་ཞིག་བྱུང་དུས། ༧ དགེ་སློང་ཀརྨ་ཆགས་མེད་ཀྱིས་སྦྱར་བ་དགེ་ལེགས་འཕེལ། སརྦ་མངྒ་ལཾ།། །།