ཞི་བརྔན་བསང་གཞུང་ལྷ་མོ་དཔལ་ཆེན། རྣམ་ཐོས་སྲས་སོགས་ལ་སྦྱར་དུ་རུང་བའི་ཁུ་ཡེ།
ཞི་བརྔན་བསང་གཞུང་ལྷ་མོ་དཔལ་ཆེན། རྣམ་ཐོས་སྲས་སོགས་ལ་སྦྱར་དུ་རུང་བའི་ཁུ་ཡེ་བཞུགས་སོ། །གུ་རུ་ཛ་ཡེ་བི་ཛ་ཡེ། ཀྱཻ། སྟོང་གསུམ་མི་མཇེད་འཇིག་རྟེན་གྱི། །དཀོག་མཆོག་གསུམ་གྱི་ཐུགས་རྗེ་དང་། །ཡི་དམ་ཆོས་སྐྱོང་བྱིན་རླབས་རྣམས། །ཁུ་ཡེ་ཕྱྭ་དང་གཡང་དུ་ལེན། །ནམ་མཁའ་ཡངས་པའི་དབྱིངས་རུམ་ནས། །ལྷ་གནས་ཉི་ཟླ་སྐར་གསུམ་སོགས། །མཐོན་པོ་དགུང་གི་ཕ་གཡང་རྣམས། །ཁུ་ཡེ་ཕྱྭ་དང་གཡང་དུ་ལེན། །དབང་ཆེན་གསེར་གྱི་ས་གཞིའི་སྟེང་། །གླིང་གཞི་རི་རབ་རྒྱ་མཚོ་སོགས། །དོང་མོ་ས་ཡི་མ་གཡང་རྣམས། །ཁུ་ཡེ་ཕྱྭ་དང་གཡང་དུ་ལེན། །བར་སྣང་ཆར་སྤྲིན་གཡུ་འབྲུག་དང་། །ལྷ་སྲིན་སྡེ་བརྒྱད་འཁོར་བཅས་ཀྱི། །བསོད་ནམས་མཐུ་སྟོབས་བུ་གཡང་རྣམས། །ཁུ་ཡེ་ཕྱྭ་དང་གཡང་དུ་ལེན། །ཁྱད་པར་འཛམ་གླིང་འདི་ཉིད་ཀྱི། །ཡུལ་དབུས་རྒྱ་གར་རྡོ་རྗེ་གདན། །རྒྱལ་བས་གསུངས་པའི་ཆོས་གཡང་རྣམས། །ཁུ་ཡེ་ཕྱྭ་དང་གཡང་དུ་ལེན། །རྒྱལ་པོ་ཆེན་པོ་སྡེ་བཞི་ཡི། །གསེར་དངུལ་ཟངས་ལྕགས་འཁོར་ལོས་སྒྱུར། །རྒྱལ་པོ་རྣམས་ཀྱི་བསོད་ནམས་གཡང་། །ཁུ་ཡེ་ཕྱྭ་དང་གཡང་དུ་ལེན། །ལྷ་མི་དྲང་
སྲོང་ཚེ་རིང་ལྷ། །ཚེ་ཡི་རིག་འཛིན་ཐོབ་པ་ཡི། །འཆི་མེད་རྣམས་ཀྱི་ཚེ་གཡང་རྣམས། །ཁུ་ཡེ་ཕྱྭ་དང་གཡང་དུ་ལེན། །ཛཾ་ལྷ་ནོར་རྒྱུན་རྣམ་སྲས་སོགས། །ནོར་ལྷ་གཏེར་བདག་ཐམས་ཅད་དང་། །ལྷ་ཀླུ་མི་ཡི་ཕྱུག་གཡང་རྣམས། །ཁུ་ཡེ་ཕྱྭ་དང་གཡང་དུ་ལེན། །དཔལ་མགོན་བདུན་ཅུ་རྩ་ལྔ་སོགས། །འཇིག་རྟེན་སྐྱོང་བྱེད་ཐམས་ཅད་ཀྱི། །རྫུ་འཕྲུལ་མཐུ་སྟོབས་ཡོན་ཏན་རྣམས། །ཁུ་ཡེ་ཕྱྭ་དང་གཡང་དུ་ལེན། །གཞན་ཡང་འཛམ་གླིང་འདི་ཉིད་ཀྱི། །རྒྱལ་སྲིད་བདུན་དང་བཀྲ་ཤིས་བརྒྱད། །འདོད་ཡོན་ལྔ་དང་བདུད་རྩི་རྣམས། །ཁུ་ཡེ་པྲ་དང་གཡང་དུ་ལེན། །རྒྱ་གར་རྒྱ་ནག་བོད་དང་ཧོར། །བལ་པོ་སོག་པོ་སྟག་གཟིག་ཁྲོམ། །རྒྱལ་བློན་འཁོར་བཅས་བསོད་ནམས་གཡང་། །ཁུ་ཡེ་ཕྱྭ་དང་གཡང་དུ་ལེན། །གཏེར་གྱི་བུམ་དང་དཔག་བསམ་ཤིང་། །ཡིད་བཞིན་ནོར་བུ་འདོད་འཇོའི་བ། །མ་རྨོས་ལོ་ཐོག་འབྲུ་བཅུད་རྣམས། །ཁུ་ཡེ་ཕྱྭ་དང་གཡང་དུ་ལེན། །དམ་རྫས་སྣ་ཚོགས་སྤྱན་གཟིགས་དང་། །མཆོད་རྫས་སྣ་ཚོགས་དཀོར་ནོར་དང་། །སེང་གེ་སྟག་གཟིག་ཁྱུང་ཆེན་རྣམས། །ཁུ་ཡེ་ཕྱུ་དང་གཡང་དུ་ལེན། །རིན་
ཆེན་གསེར་དངུལ་བྱི་རུ་གཡུ། །རྨོག་རལ་ཕུབ་མདུང་ཁྲབ་དང་བེར། །ཇ་དར་གོས་ཆེན་རས་ཕྲུག་རྣམས། །ཁུ་ཡེ་ཕྱྭ་དང་གཡང་དུ་ལེན། །རྟ་ནོར་མཛོ་དྲེལ་ར་ལུག་དང་། །མཁར་ཁང་ས་ཞིང་གུར་དང་སྦྲ། །ཡུལ་འབྲོག་དགོན་གནས་བཅས་པ་རྣམས། །ཁུ་ཡེ་ཕྱྭ་དང་གཡང་དུ་ལེན། །ཤ་ཆང་ཐུད་མར་གྲོ་ནས་ཡུང་། །སྦྲང་རྒུན་བུ་རམ་གྲོ་མ་འབྲས། །འཛམ་གླིང་ཚེ་བཅུད་སྨན་མཆོག་རྣམས། །ཁུ་ཡེ་ཕྱྭ་དང་གཡང་དུ་ལེན། །ཕོ་གྲགས་མོ་འཛོང་བུ་འཕེལ་དང་། །མི་འཕེན་སྡེ་འཕེལ་ཟས་ནོར་འཕེན། །མི་ནོར་ཟས་གསུམ་འཕེན་གཡང་རྣམས། །ཁུ་ཡེ་ཕྱྭ་དང་གཡང་དུ་ལེན། །སློབ་དཔོན་རྒྱུད་དང་ཕ་མྱེས་རྒྱུད། །འཇིག་རྟེན་འདས་དང་མ་འདས་པའི། །དགྲ་བགེགས་འདུལ་བའི་དགྲ་བླ་རྣམོས། །ཁུ་ཡེ་ཕྱུ་དང་གཡང་དུ་ལེན། །ཁམས་གསུམ་སྣོད་བཅུད་ཐམས་ཅད་ཀྱི། །ལྷ་མིའི་བཀྲ་ཤིས་བདེ་ལེགས་དང་། །ཕུན་སུམ་ཚོགས་པའི་ཡོན་ཏན་རྣམས། །ཁུ་ཡེ་ཕྱུ་དང་གཡང་དུ་ལེན། །གནམ་གྱི་འཁོར་ལོ་རྩིབས་བརྒྱད་དང་། །ས་ཡི་པདྨ་འདབ་བརྒྱད་དང་། །ལོགས་ཀྱི་བཀྲ་ཤིས་རྫས་བརྒྱད་རྣམས། །ཁུ་
ཡེ་ཕྱྭ་དང་གཡང་དུ་ལེན། །ཕྱུ་སྐོར་དེ་ནི་ཀྱི་ལི་ལི། །གཡང་སྐོར་དེ་ནི་སྒ་ར་ར། །ཕྱུ་ཁུག་གཡང་ལོང་ཨ་ལ་ལ་ཧོ། ཀི་བསྭོ་ཆའོ་ལྷ་རྒྱལ་ལོ། །ཞེས་པའང་ཞི་བརྔན་བསང་གསུམ། འཛམ་གླིང་སྤྱི་བསང་། བདུད་རྩི་ཀུན་ཁྱབ། ལྷ་མོ་དཔལ་ཆེན། རྣམ་སྲས་སྐྱ་བརྒྱད། འཛམ་ལྷ་ཉེར་གཅིག །དགྲ་བླ་དཔང་བསྟོད་སོགས་རྟེན་འབྲེལ་གྱི་ཁུ་ཡེ་གང་ལ་སྦྱར་རུང་བ་འདི་ཡང་༧ ཀརྨ་ཨ་རཱ་གས་སོ། །སརྦ་མངྒ་ལཾ།། །།