ཚེ་རིང་གཏོར་ཁུ་བཙུགས་ཐབས།
ཚེ་རིང་གཏོར་ཁུ་བཙུགས་ཐབས་བཞུགས་པའི་དབུ་ཕྱོགས་ལགས་སོ། །
ན་མོ་ཨཱརྱ་མཉྫ་ཤི་ཡེ། མགོན་པོ་འཇམ་པའི་དབྱངས་ལ་ཕྱག་འཚལ་ལོ། །ལྷ་དང་སྲུང་མའི་ངོ་སོ་བསྟོད་པ་དང་། །ཡུལ་ལྷ་གཞི་བདག་མཉེས་པར་བྱ་བ་དང་། །མི་ནོར་ལོངས་སྤྱོད་འཕེལ་ཞིང་རྒྱས་པ་དང་། །དགྲ་ངོ་མདུན་ངོ་ལ་སོགས་ཞི་བའི་ཕྱིར། །ཚེ་རིང་གཏོར་སྐུ་བཙུགས་ཐབས་འདིར་བརྗོད་བྱ། །ཁང་པའི་སྟེང་ཕྱོགས་ས་དཔལ་བཟང་ངོས་སུ། །ས་རྡོ་གཙང་མས་ཟླུམ་པོ་དྲིལ་བུའི་དབྱིབས། །ལེགས་པར་བརྩེགས་ལ་ཞ་ལ་ས་དཀར་གསོལ། །དེ་ནང་རིབ་ནི་རིན་ཆེན་བུམ་པའང་། །རྫ་བུམ་དཀར་ཡོལ་ལ་སོགས་སྣོད་གཙང་ནི། །གས་ཆག་མེད་པ་ལྔ་ཕྲག་ཉེར་ལྔ་དང་། །རིན་ཆེན་དར་ཟབ་འབྲུ་སྣ་མང་པོ་དང་། །ཁྱད་པར་དུང་དང་མགྲོན་བུ་མུ་ཏིག་དང་། །ཉ་ཕྱེས་བྱི་རུ་བཻཌཱུརྱ་སོགས་
བཀང་། །ཚེ་གཟུངས་དབྱངས་གསལ་རྟེན་འབྲེལ་སྙིང་པོ་དང་། ༈ ཨེ་ག་ག་ན་དེ་ཝི་སྭ་ཧཱ། ཡཾ་ཝ་ཡ་ཝ་དེ་ཝི་སྭ་ཧཱ།རཾ་ཨཀྵེ་དེ་ཝི་སྭཱ་ཧཱ། ཁཾ་ས་ཎི་དེ་ཝི་སྭ་ཧཱ། ལཾ་ཐུ་མི་དེ་ཝི་སྭ་ཧཱ། ས་ཡི་ལྷ་མོ་འབྱུང་བ་ལྔ་ཡི་སྔགས། །ནོར་ལྷ་གཏེར་བདག་སྙིང་པོ་བྲིས་ལ་བཅུག །ཁ་ཆོད་ལེགས་བསྡམས་ཆུ་མི་འགྲོ་བར་བྱ། །གཞན་ཡང་ལྷ་འདྲེ་ཡུལ་ལྷ་གཉེན་པོ་ཡི། །ས་རྡེལ་རྡོ་རྡེལ་ཀུན་ཀྱང་དེ་རུ་བཞག །སྟེང་ན་སྲོག་ཤིང་ཚུལ་དུ་ཤུག་པ་དང་། །བཟང་ཤིང་སྣ་ཚོགས་དར་ཚོན་བལ་གྱིས་བརྒྱན། །གཏོར་ཁུའི་དངོས་ལ་ཉི་ཟླ་ནོར་བུ་དང་། །ཁྱུང་འབྲུག་སེང་གསུམ་བཀྲ་ཤིས་རྟགས་བརྒྱད་སོགས། །རྒྱབ་སོགས་བཀྲ་ཤིས་སྨོན་ལམ་འདོད་གསོལ་བྲི། །མདའ་དར་མདུང་ཁྲ་གྲི་ཁྲབ་རྣམས་ཀྱང་
བཙུགས། །མཁར་སྒོང་སྲིན་མེད་ལེགས་ཤིང་ཆེ་བ་དང་། །འབྲས་ཀྱི་གཡག་ལུག་ར་གསུམ་བཅས་ལ་བཞག །ཞི་བརྔན་བསང་གསུམ་གང་རུང་ཚར་བའི་རྗེས། །ཁུ་ཡེའི་གོང་དུ་འདི་ཉིད་འདོན་པར་བྱ། །དེ་ནས་གཏོར་ཁུ་ཆབ་དང་ཕུད་ཀྱིས་བྲན། ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ༔ ཀྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཧཱུྃ་ཡིག་ལས་བྱུང་བའི། །རིན་ཆེན་གཞལ་ཡས་གྲུ་བཞི་སྒོ་བཞི་པ། །དེ་ནང་རིན་ཆེན་ཁྲི་སྟེང་པད་ཟླ་ལ། །དྷཱི༔ལས་བྱུང་བའི་འཇམ་དཔལ་གསེར་གྱི་མདོག །རལ་གྲི་པོ་ཏི་བསྣམས་ནས་སྐྱིལ་ཀྲུང་བཞུགས། །མཚན་དཔེའི་རབ་རྒྱན་རིན་ཆེན་བརྒྱན་གྱིས་མཛེས། །དེ་ཡི་གཡས་སུ་འཕགས་པ་སྤྱན་རས་གཟིགས། །རྒྱབ་ཏུ་གསང་བདག་གཡོན་དུ་ཤཱཀྱ་ཐུབ། །སྟེང་གི་ཆ་ལ་དྲུག་པ་རྡོ་རྗེ་འཆང་། །བཀའ་བརྒྱུད་བླ་མ་སྤྲིན་ཚོགས་བཞིན་དུ་གཏིབས། །བར་གྱི་ཆ་ལ་ཡི་དམ་ལྷ་ཚོགས་དང་། །འོག་གི་ཆ་ལ་ཆོས་སྐྱོང་སྲུང་མའི་ཚོགས། །འཇམ་དཔལ་མདུན་དུ་ས་བདག་དབང་ཆེན་ནི། །ཤི་བྷ་དྲ་ཞལ་གཅིག་ཕྱག་བཞི་སེར། །དང་པོ་ཐལ་སྦྱར་སྐུ་སྨད་སྦྲུལ་དུ་འཁྱིལ། །གཡས་གཡོན་ཐ་མས་ལྗོན་ཤིང་རི་རབ་འཛིན། །ར་བ་བཞི་ཡིས་དབུ་ལ་བརྒྱན་པའོ། །གཡས་སུ་
སྲས་མཆོག་ས་འཛིན་ལག་པ་ཆེ། །གཡོན་དུ་བཙུན་མོ་ལྷ་མོ་བརྟན་མ་དང་། །མདུན་དུ་ཡུལ་འདིས་ས་བདག་ཆེན་པོ་སྟེ། །ཕྱི་རོལ་འབྱུང་བ་དུས་བཞི་སྤར་སྨེ་དང། །ལོ་སྐོར་བཅུ་གཉིས་རྒྱལ་བློན་བཅུ་བདུན་པོ། །ལོ་རྒན་དྲུག་ཅུ་དཔལ་མགོན་བདུན་ཅུ་གཉིས། །དགྲ་བླ་ཝེར་མ་ཕ་མཚུན་མ་མཚུན་ཚོགས། །སྐྱོབ་པའི་ལྷ་ལྔ་བརྟན་པའི་ལྷ་དགུ་དང་། །མགོན་སྐྱོབ་སྡོང་གྲོགས་བྱེད་པའི་ལྷ་སྲུང་རྣམས། །ཏིལ་གྱི་གོང་བུ་ཁ་ཕྱེས་ལྟ་བུར་བཞུགས། །སྒོ་བཞིར་སྟག་སྐྱ་གཡུ་འབྲུག་བྱ་དམར་དང་། །རུས་སྦལ་རྒྱ་བོ་སྒོ་སྲུང་ཚུལ་དུ་གནས། །ཕྱི་ཁྱམས་འདོད་ཡོན་སྣ་ཚོགས་མཆོད་སྤྲིན་གཏིབས། །ཀུན་གྱི་གནས་གསུམ་ཡིག་འབྲུ་གསུམ་པོ་དང་། །མིང་ཡིག་དང་པོའི་མཚན་ལས་འོད་ཟེར་འཕྲོས། །འཕགས་པ་འཇམ་དཔལ་འབྱུང་བའི་ལྷ་ཚོགས་དང་། །འཇིག་རྟེན་སྐྱོང་བ་དང་བཅས་སྤྱན་དྲངས་གྱུར། །བཛྲ་ས་མ་ཡ་ཛཿ ཀྱཻ། དེ་རིང་གནམ་ལ་སྐར་མ་བཟང། །ས་ལ་དུས་ཚོད་དགེ་བ་ཡིན། །བཀྲ་ཤིས་གདུགས་ཀྱི་སྔ་དྲོ་ལ། །རྣལ་འབྱོར་བདག་ཅག་འཁོར་བཅས་དང་། །རྒྱུ་སྦྱོར་ཡོན་གྱི་བདག་པོ་ཡི། །མགོན་སྐྱབས་བྱེད་
པའི་ལྷ་སྲུང་ལ། །ཕྱི་དང་ནང་གི་རྟེན་བཙུགས་ན། །སྐྱབས་གནས་དཀོན་མཆོག་གསུམ་པོ་དང་། །བླ་མ་ཡི་དམ་མཁའ་འགྲོ་དང་། །ཆོས་སྐྱོང་ནོར་ལྷའི་ཚོགས་དང་བཅས། །གཙུག་ལག་འབྱུང་བའི་ལྷ་ཚོགས་དང་། །འཇིག་རྟེན་སྐྱོང་བའི་ཐམས་ཅད་དང་། །འགོ་ཞིང་སྡོང་གྲོགས་བྱེད་པ་རྣམས། །རྟེན་ལ་སྤྱན་འདྲེན་གཤེགས་སུ་གསོལ། །ཆོས་སྐྱོང་སྲུང་མ་རྟེན་ལ་བྱོན། །འདིར་ཆོས་སྐྱོང་གང་དགོས་སྦྱར། ཕོ་ལྷ་དགྲ་ལྷ་རྟེན་ལ་བྱོན། །ཚེ་ལྷ་སྲོག་ལྷ་རྟེན་ལ་བྱོན། །ཕ་མཚུན་མ་མཚུན་རྟེན་ལ་བྱོན། །སྟོང་ཆ་གསུམ་གཞི་བདག་རྟེན་ལ་བྱོན། །ཡུལ་ལྷ་ཟོ་དོར་རྟེན་ལ་བྱོན། །འདིར་ཡུལ་ལྷ་གང་དགོས་སྦྱར། མ་ལྷ་བུ་རྫི་རྟེན་ལ་བྱོན། །མཁར་ལྷ་ཞིང་ལྷ་རྟེན་ལ་བྱོན། །ནོར་ལྷ་གཏེར་བདག་རྟེན་ལ་བྱོན། །འདིར་ནོར་ལྷ་གང་དགོས་སྦྱར། ས་བདག་ཀླུ་གཉན་རྟེན་ལ་བྱོན། །ཁྱིམ་ལྷ་ཕུག་ལྷ་རྟེན་ལ་བྱོན། །མགོན་སྐྱོབས་སྡོང་གྲོགས་བྱེད་པ་རྣམས། །ཐམས་ཅད་མ་ལུས་རྟེན་ལ་བྱོན། །ཨོཾ་ཨཱརྱ་མཉྫ་ཤི་སརྦ་དེ་ཝ་ལོ་ཀ་པཱ་ལ་ས་པཱ་རི་ཝཱ་ར་བཛྲ་ས་མ་ཡ་ཛཿ ཛཿཧཱུྃ་བཾ་ཧོཿ བཅོམ་ལྡན་མགོན་པོ་འཇམ་པའི་དབྱངས། །འཇིག་རྟེན་འདས་དང་
མ་འདས་པ། །ལྷ་སྲུང་མགོན་བྱེད་ཁྱེད་རྣམས་ལ། །ཕྱི་དང་ནང་གི་རྟེན་འཛུགས་ན། །རྣལ་འབྱོར་བདག་ཅག་ཡོན་མཆོད་ལ། །རྟག་ཏུ་མགོན་སྐྱབས་མཛད་པའི་ཕྱིར། །རྟེན་འདི་རྣམས་ལ་རྟེན་ཆོས་ལ། །མཆོད་པའི་གནས་འདིར་བཞུགས་གསོལ། །ཨོཾ་ཨཱརྱ་མཉྫ་ཤྲཱི་སརྦ་དེ་ཝ་ལོ་ཀ་པཱ་ལ་ས་པཱ་རི་ཝཱ་ར་ས་མ་ཡ་ཏིཥྛ་ལྷན། པདྨ་ཀ་མ་ལཱ་ཡེ་ཧཱུྃ། སླར་ཡང་རིགས་ལྔ་སྤྱན་དྲངས་ནས། །དབང་བསྐུར་སྐུ་གང་དྲི་མ་དག །ཆུ་ལྷག་སྤྱི་བོར་ལུད་པ་ལས། །ཡེ་ཤེས་ལྷ་རྣམས་ཐམས་ཅད་ལ། །རང་རང་ཀྱི་བདག་པོ་དང་། །འཇིག་རྟེན་པ་རྣམས་ཐམས་ཅད་ལ། །འཇམ་པའི་དབྱངས་ཀྱིས་དབུ་བརྒྱན་གྱུར། །ཀྱཻ། དཀོན་མཆོག་གསུམ་གྱི་ཐུགས་རྗེ་ཡིས། །འཇིག་རྟེན་འདས་དང་མ་འདས་ཚོགས། །ས་བདག་ཀླུ་གཉན་ཐམས་ཅད་ལ། །དགོས་འདོད་ཆར་ལྟར་འབེབས་པ་ཡི། །ཟག་མེད་ལོངས་སྤྱོད་སྣ་ཚོགས་པ། །ཀུན་བཟང་མཆོད་པའི་སྤྲིན་ཕུང་ལྟར། །ཐམས་ཅད་ཕུན་སུམ་ཚོགས་གྱུར་ཅིག །ཨོཾ་བཛྲ་སྤ་ར་ཎ་ཁཾ། རྒྱས་པར་སྤྲོ་ན་འདིར་སྔགས་དྲུག་ཕྱག་དྲུག་སྦྱར། ཀྱཻ། དགོས་འདོད་ཐམས་ཅད་འབྱུང་བ་ཡི། །
ཡིད་བཞིན་ནོར་བུ་རིན་ཆེན་དང་། །གཟི་བརྗིད་འོད་འབར་གསེར་ཉི་དང་། །མུན་སེལ་སྒྲོན་མེ་དུང་ཟླ་དང་། །མཁའ་ལ་བཀྲག་ཕྱུག་སྐར་ཚོགས་དང་། །འོད་ཟེར་འཇའ་ར་སྣ་ཚོགས། །རིན་ཆེན་གདུགས་དང་གསེར་ཉ་དང་། །གཏེར་ཆེན་བུམ་པ་པདྨ་བཟང་། །དུང་དཀར་གཡས་འཁྱིལ་དཔལ་བེའུ་དང་། །མཆོག་གི་རྒྱལ་མཚན་འཁོར་། དོན་ཀུན་འགྲུབ་པའི་བཀྲ་ཤིས་བརྒྱད། །ཚེ་རིང་སྲ་བརྟན་མཆོད་རྫས་རྣམས། །བླ་མ་ཡི་དམ་ཆོས་སྐྱོང་དང་། །ནོར་ལྷ་བཀའ་སྡོད་རྣམས་ལ་འབུལ། །མགོན་སྐྱབས་བྱེད་པའི་ལྷ་རྣམས་དང་། །ལྷ་ཀླུ་སྡེ་བརྒྱད་འཁོར་དང་བཅས། །སྲུང་མ་རྣམས་ཀྱི་རྟེན་དུ་བཙུགས། །སྐུ་གསུང་ཐུགས་ཀྱི་དངོས་གྲུབ་སྩོལ། །ཚེ་དབང་ལོངས་སྤྱོད་རྒྱས་པ་དང་། །བདག་གི་བསམ་པ་འགྲུབ་པར་མཛོད། །ཀྱཻ། དཔག་བསམ་ཤིང་གི་རྩེ་མོ་ན། །ནམ་མཁའ་ལྡིང་གི་བྱ་རྒྱལ་ཁྱུང་། །གནམ་ལྕགས་འབར་བའི་མཆུ་སྡེར་ཅན། །སྤྱན་ལ་ཉི་ཟླའི་འོད་ཟེར་འཕྲོས། །གཤོག་པ་བར་སྣང་ཁམས་སུ་ཁྱབ། །ཁྱུང་གི་སྤྱི་གཙུག་ནོར་བུ་ལ། །དངོས་གྲུབ་སྣ་ཚོགས་ཆར་ལྟར་འབེབས། །རྭ་དང་མཆུ་
སྡེར་ཐམས་ཅད་ལ། །གནམ་ལྕགས་ཐོག་གི་ཚྭ་ཚྭ་འཕྲོ། །སྟོབས་དང་ལྡན་པའི་བྱ་ཁྱུང་འདི། །བླ་མ་ཡི་དམ་མཁའ་འགྲོ་དང་། །ནོར་ལྷ་བཀའ་སྡོད་རྣམས་ལ་འབུལ། །མགོན་སྐྱབས་བྱེད་པའི་ལྷ་རྣམས་དང་། །ལྷ་ཀླུ་སྡེ་བརྒྱད་འཁོར་དང་བཅས། །སྲུང་མ་རྣམས་ཀྱི་རྟེན་དུ་བཙུགས། །སྐུ་གསུང་ཐུགས་ཀྱི་དངོས་གྲུབ་སྩོལ། །ཚེ་དབང་ལོངས་སྤྱོད་རྒྱས་པ་དང་། །བདག་གི་བསམ་པ་འགྲུབ་པར་མཛོད། །ཀྱཻ། ནམ་མཁའ་སྟོང་པའི་དབྱིངས་རུམ་ན། །གཡུ་འབྲུག་མེ་ཡི་ཟེ་བ་ཅན། །བར་སྣང་ཁམས་སུ་པགས་བཞི་བརྡལ། །སྤྲིན་དང་ཕྱོགས་མཚམས་རྣམས་སུ་རྒྱུག །གློག་གི་ལྕེ་ལ་ཐོག་གི་རྐང་། །འབྲུག་རུ་སྲིད་པའི་རྩེ་ལ་སླེབས། །འབྲུག་ལྕེ་བར་སྣང་ཁམས་སུ་ཁྱབ། །འབྲུག་སྐད་དྲག་པོས་ཀུན་ཏུ་ཁྱབ། །དུས་ཚོད་འཛིན་ཅིང་མཚམས་བཞིར་སྲུང་། །སྟོབས་དང་ལྡན་པའི་གཡུ་འབྲུག་འདི། །བླ་མ་ཡི་དམ་ཆོས་སྐྱོང་དང་། །ནོར་ལྷ་བཀའ་སྡོད་རྣམས་ལ་འབུལ། །མགོན་སྐྱོབ་བྱེད་པའི་ལྷ་རྣམས་དང་། །ལྷ་ཀླུ་སྡེ་བརྒྱད་འཁོར་དང་བཅས། །སྲུང་མ་རྣམས་ཀྱི་རྟེན་དུ་བཙུགས། །སྐུ་གསུང་ཐུགས་ཀྱི་དངོས་གྲུབ་སྩོལ། །
ཚེ་དང་ལོངས་སྤྱོད་རྒྱས་པ་དང་། །བདག་གི་བསམ་པ་འགྲུབ་པར་མཛོད། །ཀྱཻ། གངས་རི་དཀར་པོའི་རྩེ་མོ་ནས། །སེམས་ཅན་ཀུན་གྱི་རྒྱལ་པོ་ནི། །དུང་སེང་གཡུ་ཡི་རལ་པ་ཅན། །སྤྱན་མིག་སྐར་ཆེན་ཤར་བ་འདྲ། །ཤངས་ནི་ཁྲོ་གཉེར་དག་དང་ལྡན། །མཆེ་བ་ཟླ་བ་ཚེས་པ་འདྲ། །གཡུ་རལ་ཨག་ཚོམ་སྤྲིན་ལྟར་གཏིབས། །རྔ་མ་སྤྲིན་ཕུང་གཏིབས་པ་འདྲ། །མཐུ་ཆེན་སེང་གེའི་ངར་སྐད་ཀྱིས། །གནོད་བྱེད་མ་ལུས་རྡུལ་དུ་རློགས། །རྩལ་ཆེན་སེངྒེའི་སྟོབས་དང་ལྡན། །བླ་མ་ཡི་དམ་ཆོས་སྐྱོང་དང་། །ནོར་ལྷ་བཀའ་སྡོད་རྣམས་ལ་འབུལ། །མགོན་སྐྱབས་བྱེད་པའི་ལྷ་རྣམས་དང་། །ལྷ་ཀླུ་སྡེ་བརྒྱད་འཁོར་དང་བཅས། །སྲུང་མ་རྣམས་ཀྱི་རྟེན་དུ་བཙུགས། །སྐུ་གསུང་ཐུགས་ཀྱི་དངོས་གྲུབ་སྩོལ། །ཚེ་དབང་ལོངས་སྤྱོད་རྒྱས་པ་དང་། །བདག་གི་བསམ་པ་འགྲུབ་པར་མཛོད། །ཀྱཻ། དགྲ་བླའི་མདུང་མོ་འཚམ་རིང་ལ། །བ་དན་དཀར་པོའི་ལྕེ་བརྒྱད་བཏགས། །ཉི་ཟླ་ནོར་བུ་གཡུང་དྲུང་དང་། །དཔའ་མཚན་སྟག་གཟིག་ཁ་སྤྲོད་དང་། །མཐུ་རྩལ་སྣ་ཚོགས་བཀོད་པ་འདི། །བླ་མ་ཡི་དམ་ཆོས་སྐྱོང་དང་། །ནོར་ལྷ་བཀའ་
སྡོད་རྣམས་ལ་འབུལ། །མགོན་སྐྱོབ་བྱེད་པའི་ལྷ་རྣམས་དང་། །ལྷ་ཀླུ་སྡེ་བརྒྱད་འཁོར་དང་བཅས། །སྲུང་མ་རྣམས་ཀྱི་རྟེན་དུ་བཙུགས། །སྐུ་གསུང་ཐུགས་ཀྱི་དངོས་གྲུབ་སྩོལ། །ཚེ་དང་ལོངས་སྤྱོད་རྒྱས་པ་དང་། །བདག་གི་བསམ་པ་འགྲུབ་པར་མཛོད། །ཀྱཻ། དཀོན་མཆོག་གསུམ་གྱི་ཐུགས་རྗེ་དང་། །ཆོས་སྐྱོང་སྲུང་མའི་མཐུ་སྟོབས་དང་། །འབྱུང་བ་ལྔ་ཡི་རྒྱུ་རྐྱེན་ལས། །ངོ་མཚར་རྨད་བྱུང་གཡུ་ཤུག་འདི། །ལོ་མ་འབྲས་སུ་དྲི་ངད་ལྡན། །བཀྲ་ཤིས་ཡ་མཚན་རྨད་དུ་ཆེ། །ལོ་འབྲས་སྣ་ཚོགས་ཐིབས་སེ་ཐིབ། །དྲི་བཟང་དུད་པ་ཕ་ལ་ལ། །དཔག་བསམ་ཤིང་དང་བྱང་ཆུབ་ཤིང་། །སྲ་བརྟན་རྡོ་རྗེ་ཕུར་པའི་ཤིང་། །དཀོན་མཆོག་གསུམ་པོའི་བྱིན་གྱིས་བརླབས། །ཆོས་སྐྱོང་སྲུང་མའི་མཐུ་སྟོབས་ཀྱིས། །ལྷ་སྲིན་སྡེ་བརྒྱད་གནས་པའི་ཤིང་། །ཡོན་བདག་འཁོར་བཅས་སྐྱོབ་པའི་ཤིང་། །ངོ་མཚར་རྨད་བྱུང་ཤིང་མཆོག་དང་། །དར་ཚོན་སྣ་ལྔས་བརྒྱན་པ་འདི། །དཀོན་མཆོག་གསུམ་གྱི་རྟེན་དུ་འབུལ། །ཡི་དམ་ལྷ་ཚོགས་རྟེན་དུ་འབུལ། །ཆོས་སྐྱོང་སྲུང་མའི་རྟེན་དུ་བཙུགས། །འདིར་ཆོས་སྐྱོང་ནོར་ལྷ་ཐམས་ཅད་སྦྱར། །
ནོར་ལྷ་གཏེར་བདག་རྟེན་དུ་བཙུགས། །ཕོ་ལྷ་དགྲ་བླའི་རྟེན་དུ་བཙུགས། །མ་ལྷ་ཞང་ལྷའི་རྟེན་དུ་བཙུགས། །སྟོང་གསུམ་གཞི་བདག་རྟེན་དུ་བཙུགས། །ཡུལ་ལྷ་ཟོ་དོར་རྟེན་དུ་བཙུགས། །མ་ལྷ་བུ་རྫིའི་རྟེན་དུ་བཙུགས། །ས་བདག་ཀླུ་གཉན་རྟེན་དུ་བཙུགས། །ཚེ་ལྷ་སྲོག་ལྷའི་རྟེན་དུ་བཙུགས། །མཁར་ལྷ་ཞིང་ལྷའི་རྟེན་དུ་བཙུགས། །སྦྲ་ལྷ་རི་བོ་ལ་སོགས་པའི། །ལྷ་ཚོགས་མ་ལུས་རྟེན་དུ་བཙུགས། །འདིར་ཡུལ་ལྷ་གང་དགོས་སྦྱར། སྐུ་གསུང་ཐུགས་ཀྱི་དངོས་གྲུབ་སྩོལ། །ཚེ་དབང་ལོངས་སྤྱོད་རྒྱས་པ་དང་། །བདག་གི་བསམ་པ་འགྲུབ་པར་མཛོད། །ཀྱཻ། གཡུ་འབྲུག་མཚལ་གྱི་ཟེ་བ་ཅན། །སྨུག་པོ་གདོང་གི་ཕོ་ལྷ་ཡིན། །བརྟན་ཤིང་རྟེན་ལ་ཕོ་ལྷ་བཞུགས། །གཏོར་ཁུ་འདི་ལ་རྟེན་ཆོས་ལ། །བདག་དང་ཡོན་བདག་མགོན་སྐྱབས་མཛོད། །དགྲ་བླ་ཀརྨ་ལེགས་ཕྲོམ་འདི། །མི་བུ་སྒྲ་ཡི་ཕོ་ལྷ་ཡིན། །བརྟན་ཤིང་རྟེན་ལ་ཕོ་ལྷ་བཞུགས། །གཏོར་ཁུ་འདི་ལ་རྟེན་ཆོས་ལ། །བདག་དང་ཡོན་བདག་མགོན་སྐྱབས་མཛོད། །དགྲ་བླ་དུང་གཡག་དཀར་པོ་དེ། །མི་བུ་འབྲུ་ཡི་དགྲ་བླ་ཡིན། །མདའ་དང་བལ་ཚོན་རྟེན་ལ་འཁོར། །
གཏོར་ཁུ་འདི་ལ་རྟེན་ཆོས་ལ། །བདག་དང་ཡོན་བདག་མི་ནོར་སྤེལ། །དགྲ་བླ་དུང་མི་དཀར་པོ་དེ། །མི་བུ་དབྲ་ཡི་དགྲ་བླ་ཡིན། །མདུང་དར་རྟེན་ལ་དགྲ་བླ་འཁོར། །གཏོར་ཁུ་འདི་ལ་རྟེན་ཆོས་ལ། །བདག་དང་ཡོན་བདག་མི་ནོར་སྤེལ། །དགྲ་བླ་མཚལ་སྟག་དམར་པོ་འདི། །དབལ་ཟླ་གཉིས་ཀྱི་དགྲ་བླ་ཡིན། །བརྟན་ཤིང་རྟེན་ལ་ཕོ་ལྷ་བཞུགས། །གཏོར་ཁུ་འདི་ལ་རྟེན་ཆོས་ལ། །བདག་དང་ཡོན་བདག་མི་ནོར་སྤེལ། །འོག་རྟ་མགྱོགས་པའི་ཁ་འཛིན་མཛོད། །དགྲ་བླ་ཀུན་ཐུབ་འཇིག་མེད་དེ། །སྐྱེ་བོ་ཡོངས་ཀྱི་དགྲ་བླ་ཡིན། །བཟང་ཤིང་འདི་ལ་རྟེན་ཆོས་ལ། །བདག་དང་ཡོན་བདག་མི་ནོར་སྤེལ། །དགྲ་བླ་གཡུ་ཡི་ཁུ་བྱུག་ནི། །གཏམ་སྙན་ཐོས་པའི་དགྲ་བླ་ཡིན། །གཏོར་ཁུ་འདི་ལ་རྟེན་ཆོས་ལ། །བདག་དང་ཡོན་བདག་མི་ནོར་སྤེལ། །དགྲ་བླ་གཡུ་ཡི་ནེ་ཚོ་ནི། །བུ་སྲིང་ཡོངས་ཀྱི་དགྲ་བླ་ཡིན། །གཏོར་ཁུ་འདི་ལ་རྟེན་ཆོས་ལ། །བདག་དང་ཡོན་བདག་མི་ནོར་སྤེལ། །དགྲ་བླ་གསེར་སྦལ་སེར་པོ་འདི། །ཡུལ་མཁར་འཛིན་པའི་དགྲ་བླ་ཡིན། །བཟང་ཤིང་འདི་ལ་རྟེན་ཆོས་ལ། །ཡུལ་མཁར་
འཛིན་པའི་དགྲ་བླ་མཛོད། །ཀྱཻ། དེ་རིང་ཚེ་རིང་གཏོར་སྐུ་བཙུགས། བཟང་ཤིང་སྣ་དགུའི་རྟེན་ཤིང་བཙུགས། །བདག་དང་ཡོན་བདག་འཁོར་བཅས་རྣམས། །མི་ན་ལུས་ཀྱི་རྟེན་ཕུར་བཙུགས། །མི་འཆི་སྲོག་གི་རྟེན་ཕུར་བཙུགས། །འཕེན་པོ་མི་ཡི་རྟེན་ཕུར་བཙུགས། །ཕྱུག་པོ་ནོར་གྱི་རྟེན་ཕུར་བཙུགས། །བསམ་པ་འགྲུབ་པའི་རྟེན་ཕུར་བཙུགས། །བཙན་ཕྱུག་འཕན་གསུམ་རྟེན་ཕུར་བཙུགས། །རིན་ཆེན་ལོ་ཐོག་རྟེན་ཕུར་བཙུགས། །ལྷ་མི་དཔལ་གསུམ་རྟེན་ཤིང་བཙུགས། །ཁྱུང་དཀར་མཛོ་ཡི་རྟེན་ཕུར་ཀློབཙུགས། །ཟལ་དཀར་འབྲི་ཡི་རྟེན་ཤིང་བཙུགས། །ཅང་ཤེས་རྟ་ཡི་རྟེན་ཤིང་བཙུགས། །གཡང་མོ་ལུག་གི་རྟེན་ཤིང་བཙུགས། །ཚེ་རེ་ར་ཡི་རྟེན་ཤིང་བཙུགས། ཁ་རྗེ་བརྟན་པའི་རྟེན་ཤིང་བཙུགས། །ཕ་ཚན་མི་འཐོར་རྟེན་ཤིང་བཙུགས། །ཁམས་གསུམ་དབང་སྡུད་རྟེན་ཤིང་བཙུགས། །དགོས་འདོད་ལྷུན་གྲུབ་རྟེན་ཤིང་བཙུགས། །རྟེན་ཤིང་འདི་རྣམས་མ་འབུད་ཅིག །ཚེ་སྲོག་དུར་ལ་མ་ཁྱེར་ཅིག །སྲོག་གི་རྟེན་ཕུར་མ་འབུད་ཅིག །ཚེ་ཡི་དམུ་དག་མ་ཆད་ཅིག །ལྷ་དང་སྲུང་མ་ཐམས་ཅད་ཀྱང་། །རྟེན་
ཤིང་འདི་ལ་རྟེན་ཆོས་ལ། །རྣལ་འབྱོར་བདག་གི་མགོན་སྐྱབས་མཛོད། །ཡོན་བདག་འདི་ལ་ཁ་འཛིན་མཛོད། །ཀྱཻ། སྟག་སྐྱ་གཡུ་འབྲུག་བྱ་དམར་དང་། །རུ་སྦལ་རྒྱུ་བོ་བཞི་པོ་ནི། །ཕྱོགས་བཞི་སྲུང་བའི་སྲུང་མ་ཡིན། །རྟེན་ཤིང་འདི་ལ་རྟེན་ཆོས་ལ། །ཕྱོགས་བཞི་སྲུང་བའི་སྲུང་མ་མཛོད། །ཕྱི་དགྲ་ནང་དུ་མ་ཤོར་ཅིག །དངོས་གྲུབ་ཕྱི་རུ་མ་གཏོང་ཞིག །སྐུ་གསུང་ཐུགས་ཀྱི་དངོས་གྲུབ་སྩོལ། །ཚེ་དབང་ལོངས་སྤྱོད་རྒྱས་པ་དང་། །བསམ་པ་ཡིད་བཞིན་འགྲུབ་པ་དང་། །ལྷ་དང་སྲུང་མ་ཁྱེད་རྣམས་ཀྱང་། །ཇི་སྲིད་རྟེན་འདི་འབྱུང་བཞི་ཡིས། །གནོད་པས་ཞིག་པར་མ་གྱུར་བར། །དེ་སྲིད་བརྟན་པར་བཞུགས་ནས་ཀྱང་། །མགོན་སྐྱབས་སྡོང་གྲོགས་རྒྱབ་རྟེན་མཛོད། །ཉིན་གྱི་དུས་སུ་མེལ་ཚེ་མཛོད། །མཚན་གྱི་དུས་སུ་བྱ་ར་མཛོད། །དགྲ་རྐུན་དམག་ཇག་གནོད་པ་ཟློག །གདོན་དང་གྱོད་བྱུར་ངན་པ་ཟློག །བསམ་པ་ཡིད་བཞིན་འགྲུབ་པར་མཛོད། །དངོས་གྲུབ་མ་ལུས་བསྩལ་དུ་གསོལ། །བཅོལ་བའི་ཕྲིན་ལས་འགྲུབ་པར་མཛོད། །དེ་ནས་བཀྲ་ཤིས་བརྗོད། སྨོན་ལམ་བཏབ། རྟེན་འབྲེལ་སྙིང་པོ་བརྗོད་ཅིང་རབ་
གནས་བྱའོ། །ཞེས་པ་འདི་ནི་སློབ་དཔོན་དགའ་རབ་རྡོ་རྗེས་མཛད་པའི་གཏོར་ཁུ་ལ་གཞི་བྱས་ཨོ་རྒྱན་རིན་པོ་ཆེའི་མཛད་པའི་བུམ་གཏེར་མན་ངག་དང་། དགའ་རབ་རྡོ་རྗེས་མཛད་པའི་གསས་མཁར་ཁ་བསྟོད། ཀླུ་ཐོ་བཅའ་ཐབས་རྒྱས་པ་དང་། གཏོར་ཁུ་ཕྱག་ལེན་ངག་ཁྲིད་སོགས་ཐོས་པ་ལ་བརྟེན་ནས་བྲིས་པ་ཡིན། འདི་བྲིས་ཉེས་འགལ་གང་མཆིས་ཐམས་ཅད་བཤགས། དགེ་བས་འགྲོ་ཀུན་བདེ་སྐྱིད་འཕེལ་ཕྱིར་བསྔོ། ཞེས་པ་འདི་སྔགས་འཆང་༧ ཀརྨ་ཨ་རཱ་གས་ཕག་ལོ་ཆོ་འཕྲུལ་ཆེན་པོའི་ཚེས་བཅུ་གཅིག་ཉིན་པར་སྦྱར་བའོ། །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།