ཆར་འབེབས་ཤིན་ཏུ་ཉུང་བསྡུས།
ཆར་འབེབས་ཤིན་ཏུ་ཉུང་ངུ་བསྡུས་པ། ཆར་འབེབས་ཤིན་ཏུ་ཉུང་ངུ་ལས། །ཟབ་པའི་མཐར་ཐུག་ལག་ལེན་ཡིན། སྐྱབས་གནས་དཀོན་མཆོག་རྩ་གསུམ་ལ། །སྙིང་ནས་བདག་སོགས་སྐྱབས་སུ་མཆི། །སེམས་ཅན་ཀུན་གྱི་དོན་གྱི་ཕྱིར། །བདག་གིས་འཕགས་པོ་བསྒྲུབ་པར་བགྱི། །ལན་གསུམ། ཨོཾ་སྭ་བྷ་ཝས་སྦྱངས། ཆོས་རྣམས་མི་དམིགས་སྟོང་པ་ཉིད། །སྟོང་པའི་ངང་ལས་པད་ཟླར་ཧྲཱིཿ །ཡོངས་གྱུར་བདག་ཉིད་སེང་གེའི་སྒྲ། །སྐུ་མདོག་དཀར་པོ་ལོངས་སྐུའི་ཆས། །ཕྱག་གཡས་རྩེ་གསུམ་སྦྲུལ་གྱིས་དཀྲིས། །གཡོན་པས་མཆོག་སྦྱིན་རལ་གྲི་དང་། །ཐོད་སྣོད་བཅས་ཤིང་སྟག་ཤམ་ཅན། །རོལ་སྟབས་སེང་གེ་དཀར་མོའི་སྟེང་། །རྒྱལ་བ་རིགས་ལྔའི་སྤྲིན་སྤྲོས་གྱུར། །གནས་གསུམ་འབྲུ་གསུམ་འོད་ཟེར་གྱིས། །ཡེ་ཤེས་དབང་ལྷ་བཅས་པ་རྣམས། །སྤྱན་དྲངས་ཐིམ་ཞིང་དབང་བསྐུར་ནས། །འོད་དཔག་མེད་པའི་དབུ་རྒྱན་གྱུར། །ཨོཾ་ཨཱཙཱཧཱུསེང་ཧ་ན་དཱ་ཧཱུྃ་ཕཊ། མདུན་བསྐྱེད་ནི། ཨོཾ་སྭ་བྷཱ་ཝས་སྦྱངས། མདུན་བསྐྱེད་མི་དམིགས་སྟོང་པར་གྱུར། །སྟོང་པའི་ངང་ལས་རྒྱ་མཚོའི་དབུས། །རིན་ཆེན་ཁང་བཟང་དབུས་སུ་ནི། །པདྨ་
འདབ་བརྒྱད་ལྟེ་བར་ཕུཿ །དེ་ལས་ཆུ་བདག་ཝ་རུ་ཎ། །ཤར་དུ་མཐའ་ཡས་ལྷོར་འཇོག་པོ། །ནུབ་ཏུ་སྟོབས་རྒྱུ་བྱང་རིགས་ལྡན། །ཤར་ལྷོར་ནོར་རྒྱས་སྲིན་དུང་སྐྱོང་། །ནུབ་བྱང་པདྨ་རླུང་པད་ཆེན། །ཀུན་ཀྱང་མདོག་སྔོ་སྟོད་མི་ལུས། །སྐུ་སྨད་སྦྲུལ་འཁྱིལ་བུམ་པ་བསྣམས། །དར་དང་རིན་ཆེན་དུ་མས་བརྒྱན། །སྦྲུལ་མགོའི་གདེངས་ཀ་ཆར་སྤྲིན་དབུས། །ཀླུ་རིགས་དུ་མས་བསྐོར་བའོ། །རང་རང་མདུན་གྱི་ཐུགས་འོད་ཀྱིས། །ཀླུ་རྒྱལ་འཁོར་བཅས་སྤྱན་དྲངས་ཐིམ། །ནཱ་ག་ར་ཛ་སརྦ་ནཱ་ག་ནཱ་གི་ཛཿཧཱུྃ་བཾ་ཧོཿ ཏིཥྛ་ལྷན། ཀླུ་རྒྱལ་འཁོར་དང་བཅས་པ་ལ། །ཉེར་སྤྱོད་བདུན་དང་འདོད་ཡོན་ལྔ། །རིན་ཆེན་འབྲུ་དང་དར་ཟབ་མཛོད། །སྐྱེད་ཚལ་ཁང་བཟང་ཆུ་མཚོ་དང་། །ཉ་སྦལ་སྦྲུལ་ལྕོང་དཀོར་ནོར་རིགས། །ནད་སེལ་ཀླུ་སྨན་སྣ་ཚོགས་དང་། །དཀར་གསུམ་མངར་གསུམ་མཆོད་པ་འབུལ། །འཛམ་གླིང་སྤྱི་དང་ཁྱད་པར་དུ། །ས་ཕྱོགས་འདི་རུ་ཆར་གྱི་རྒྱུན། །ཕོབ་ལ་བཀྲེས་ཕོངས་ཞི་བར་མཛོད། །སརྦ་ནཱ་ག་རཱ་ཛ་ནཱ་ག་ནཱ་གི་ས་པ་རི་ཝཱ་ར་ཨརྒྷཾ་སོགས་ནས། ཤཔྟ་པྲ་ཏིཙྪ་ཡེ་སྭཱ་ཧཱ། སརྦ་པཱུ་ཛ་ཨཱཿཧཱུྃ། བསྟོད་པ་ནི། ཐུབ་པའི་
སྤྱན་སྔར་བསྟན་པ་སྲུང་བ་དང་། །འགྲོ་བའི་ཕན་བདེ་སྤེལ་བའི་གཡར་དམ་ཅན། །དམ་ལྡན་བུ་བཞིན་སྐྱོང་བའི་ཀླུ་ཆེན་དགུ། །ཡབ་ཡུམ་འཁོར་དང་བཅས་ལ་ཕྱག་འཚལ་བསྟོད། །བསྙེན་པ་ནི། ཕུནཱ་ག་རཱ་ཛ་སརྦ་ནཱ་ནི་སྭཱ་ཧཱ། ཅི་ནུས་བཟླའོ། །སྤྲིན་སྡུད་པ་དང་ཆར་དབབ་པ་ནི། སརྦ་མ་ཧཱ་མེ་གྷ་ཐིབ་ཐིབ། བྷ་རི་ཤ་ཡ་ཕོབ་ཕོབ། ཤར་ཤར། ཟིལ་ཟིལ། ཕྲོ་ཕྲོ། སྤྲིན་གཏིབས་གཏིབས། ཆར་ཕོབ་ཕོབ། ཕུནཱ་ག་རཱ་ཛ་ནཱ་ག་ནཱ་གི་ཏི་པ་ར་ཙ་ནཱ་ག་ཀ་ལ་བྷ་རི་ཤ་ཡ་ཕོབ་ཡ། ཞེས་དྲག་ཏུ་བཟླའོ། །གཏོར་མ་ཨོཾ་སྭ་བྷཱ་ཝས་སྦྱངས། ཨོཾ་ལས་རིན་ཆེན་སྣོད་དུ་ནི། །ཁཾ་ཞུ་གཏོར་མ་བདུད་རྩིར་གྱུར། །འདོད་ཡོན་ལྔ་ལྡན་གཏོར་མ་འདི། །ཀླུ་རྒྱལ་འཁོར་བཅས་དགྱེས་པར་རོལ། །ཨོཾ་སརྦ་ནཱ་ག་རཱ་ཛ་ནཱ་ག་ནཱ་གི་ས་པ་རི་ཝཱ་ར་ཨི་དམ་བ་ལི་ཏ་ཁ་ཁ་ཁཱ་ཧི་ཁཱ་ཧི། ལན་བདུན། ཀླུ་རྒྱལ་འཁོར་བཅས་གཏོར་མ་འདི། །བཞེས་ལ་འཛམ་གླིང་ནམ་མཁའ་ལ། །སྤྲིན་བསྡུས་ཆར་གྱི་རྒྱུན་ཕོབ་ལ། །མུ་གེ་ཞི་དང་འབྲུ་འཕེལ་མཛོད། །ཅེས་ཟངས་ཀྱི་སྣོད་དུ་ཀླུ་སྨན་སྦྱར་བའི་ཆུ་སྦྱིན་ནི། ཨོཾ་བཱ་སུ་ཀི་ནཱཾ་སྭཱ་ཧཱ། བརྒྱ་རྩ་བརྒྱད་བཟླས་ལ། ཆུ་རྒྱུན་མ་ཆད་པར་བླུག །རླུང་
གིས་སྤྲིན་གཏོར་ན། རླུང་ནོན་སྔགས་ནི། ཨོཾ་ཡཾ་ཡཾ་བཱ་ཡུ་དེ་ཝ་ཆར་ཡུ་ཆུར་ཡ་ནྟཾ་བྷ་ཡ་ནན། ཆར་ཡ་ནན། ཆུར་ཡ་ནན། བཱ་ཡུ་ནན་སྭཱ་ཧཱ། ཨོཾ་བ་ཡུ་དེ་ཝ་ཡཾ་ཡཾ་བྷནྡ་རླུང་མཱ་ར་། ཡ། མཱ་ར་ཡ་ཆར་བབ་པའི་བར་དུ་གཅོད་པ་ཐམས་ཅད་བྷནྡྷ་བྷནྡྷ་ནན། སྔགས་རྒྱས་པ་འདི་བརྒྱ་རེ་རྡོ་དཀར་ནག་ལ་བསྔགས་ལ། རླུང་གང་ནས་བྱུང་བ་ལ་གཏོར། །རྗེས་ཆོག་ནི། ཨོཾ་སིདྡྷ་ནཱ་ད་ན་ག་རཱ་ཛ་ནཱ་ག་ནཱ་གི་ཨརྒྷཾ་ནས། ཤཔྟ་པྲ་ཏིཙྪ་ཡེ་སྭཱ་ཧཱ། རྗེ་བཙུན་སྤྱན་རས་གཟིགས་དབང་དང་། །ཀླུ་རྒྱལ་འཁོར་བཅས་ཕྱག་འཚལ་ལོ། །ཆོ་ག་ལྷག་ཆད་ཉམས་པ་དང་། །ཐུགས་འགལ་ཉེས་རྣམས་བཟོད་པར་གསོལ། །བཀྲ་ཤིས་བརྗོད། ཆར་བབ་ན་ཀླུ་མཆོད་བྱ། ཆར་ཆོག་འདི་ཚིག་ཉུང་ཡང་དོན་ཤིན་ཏུ་ཚང་ཞིང་ཟབ་པར་ཡོད་དོ། །ཆར་འབེབས་ཟབ་ཅིང་སྟབས་བདེ་བ་ནི། དུག་རིག་མ་ཡིན་པའི་མེ་ཏོག་སྣ་ཚོགས་དང་། གླ་རྩི་གུ་གུལ་དུག་རིགས་མ་འདྲེས་པའི་སྨན་སྣ་ཚོགས། ཀླུ་གཏོར་ནང་ལ་ཡོད་པའི་སྨན་གང་འཛོམ། ནས་རྗེན་ཐག་ལ་བསྲེས། བ་དཀར་ར་དཀར་འབྲི་ཟལ་འོ་མ་འཛོམ་ན་རབ། མ་རྙེད་ན་འོ་མ་གང་འཛོམ་གྱིས་སྦྲུས། རིལ་བུ་སྲན་མ་ཙམ་བརྒྱ་སྟོང་གང་འགྲུབ་བྱ། སྔགས་འདི་ཁྲི་ཙམ་དུ་བཟླས་ནས་ཁ་རླངས་མ་སོང་བར་ཕུ་བཏབ་ལ་སྔགས། ཉི་མའི་ཟེར་ཙམ་མ་ཕོག་པར་གྲིབ་སྐམ་བྱས་ལ་འཚགས། དེ་ནས་ཆར་འབོད་དུས་
རིལ་བུ་རེ་བཟུང་གྲོ་ཤོག་གམ་རས་སོགས་ཀྱིས་བཏུམ་ལ། མཚོ་དང་ཆུ་མིག་རྣམས་སུ་བཅུག །སྔགས་འདི་ཅི་མང་བཟླ་བར་བྱ། རང་ཉིད་ཕག་མོར་བསྒོམས་པས་ཆར་ཕོབ་ཅེས་བཀའ་བསྒོ་བར་བསྒོམ། ཨོཾ་བཛྲ་བེ་རོ་ཙ་ནི་ཡེ་ཧ་རི་ནི་ས་ནཱ་ག་ཀ་ལ་བྷ་རི་ཤ་ཡ་སྭཱ་ཧཱ། འབབ་དཀའ་བར་གྱུར་ན་ཁག་མང་དུ་སྦས། ཞག་གསུམ་ནས་འབབ་པར་གསུངས་ཏེ་མྱོང་བ་ལན་མང་དུ་འགྲུབ། ཅེས་པའི་ལས་ཚོགས་དེ་རྣམས་འོག་མིན་ཀརྨའི་དགེ་སློང་གིས་བསྐུལ་ངོར་རཱ་ག་ཨ་སྱས་སྨྲས་པ་དགེ་སློང་པདྨ་སྦྱིན་པས་བྲིས་པའོ། །འདི་མང་དུ་སྤེལ་ན་རང་གི་བསོད་ནམས་ལ་ཅུང་ཞིག་གནོད་པས་སྤེལ་ཚོད་རང་གིས་རིགས་པས་རྟོགས་དགོས། །བཀྲ་ཤིས། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།