བདེན་སྟོབས་ཆར་འབོད།
བདེན་སྟོབས་ཆར་འབོད་བཞུགས་སོ།། ན་མོ། ཕྱོགས་བཅུ་དུས་གསུམ་སངས་རྒྱས་ཐམས་ཅད་ཀྱིས། །དང་པོ་བྱང་ཆུབ་མཆོག་ཏུ་སེམས་བསྐྱེད་ཅིང་། །གྲངས་མེད་བསྐལ་པར་ཕར་ཕྱིན་དྲུག་རྣམས་ལ། །བསླབ་ཅིང་ཐ་མ་མངོན་པར་སངས་རྒྱས་ཕྱིར། །དེ་ལྟར་གསུངས་པའི་ལོ་རྒྱུས་དེ་བདེན་ན། །དེ་ཡི་བདེན་པས་ཆར་ཆེན་མྱུར་དུ་ཕོབ། །ལམ་གྱི་མཆོག་གྱུར་དམ་པའི་ཆོས་ཡིན་ཞིང་། །ཚོགས་ཀྱི་ཞིང་མཆོག་འཕགས་པའི་དགེ་འདུན་ཡིན། །གསུངས་པ་དེ་བདེན་དེ་ཡི་བདེན་པའི་མཐུས། །།མྱུར་བ་ཉིད་དུ་ཆར་ཆེན་ཀྱིས་འབེབས་གྱུར་ཅིག །འཇིག་རྟེན་སྐྱོང་བའི་དཔལ་མགོན་བདུན་ཅུ་ཡི། །སོ་སོར་མཐུ་སྟོབས་གཟི་བརྗིད་ཆེར་བདེན་པ། །བདེན་ན་དེ་ཡི་བདེན་པས་ཆར་ཆེན་ཕོབ། །སྤྲིན་ཆེན་པོ་ཡི་མདོ་ལས་གསུངས་པ་ཡི། །སངས་རྒྱས་རྣམས་ཀྱིས་བདེན་པས་ཀླུ་རྣམས་ཀྱི། །ནད་དང་སྡུག་བསྔལ་ཐམས་ཅད་ཞི་གྱུར་ཅིག །སྔགས་བདག་ཀླུ་ཆེན་བརྒྱད་དང་རིགས་བཞིའི་ཀླུ། །ཡུལ་ཕྱོགས་འདིར་གནས་ཀླུ་རིགས་ཐམས་ཅད་ཀྱིས། །ཡུལ་ཕྱོགས་འདི་རུ་ཆར་རྒྱུན་མྱུར་དུ་ཕོབ། །གལ་ཏེ་ཆར་རྒྱུན་མྱུར་དུ་མི་འབེབས་ན། །ཀླུ་རྣམས་བྱ་ཁྱུང་
རྒྱལ་པོས་ཟ་གྱུར་ཅིག །ཆར་པ་ཕབ་ན་ཀླུ་རྣམས་ཐམས་ཅད་ཀུན། །བཀྲག་མདངས་མཐུ་སྟོབས་ཕུན་སུམ་ཚོགས་གྱུར་ཅིག །སྣང་སྲིད་ལྷ་འདྲེ་གཞི་བདག་ཐམས་ཅད་ཀྱིས། །ཡུལ་འདིར་ཆར་པ་འབེབས་པའི་སྡོང་གྲོགས་མཛོད། །ཆར་པ་འབེབས་ལ་བར་ཆད་མ་བྱེད་ཅིག །ཆར་པ་དེ་ལ་གནོད་བྱེད་བགེགས་རིགས་རྣམས། །ད་ལྟ་ཉིད་དུ་སྟོབས་ནུས་མེད་གྱུར་ཅིག །བདེན་ལྡན་ཇི་སྙེད་བདེན་པའི་ནུས་པ་ཡིས། །མྱུར་བ་ཉིད་དུ་ཆར་ཆེན་འབེབས་པར་ཤོག །ཅེས་ྋརཱ་ག་ཨ་སྱས་སྦྱར་བའོ།། །།
ཀླུ་ཡི་ཚོགས་ལ་བསྟོད་བཤགས་ཕྲིན་ལས་མཛད་པ་ནི། ན་མོ་ནཱ་ག་སརྦ་སཏྭ་ཡེ། ས་བཅུ་ལ་གནས་སེམས་དཔའ་ཆེ། །སྟོང་གསུམ་ཀླུ་རྣམས་ཀུན་གྱི་བདག །ལག་འགྲོ་ཆེན་པོར་ཕྱག་འཚལ་བསྟོད། །ཀླུ་དབང་རྒྱལ་པོའི་སྤྲུལ་པ་སྟེ། །ཀླུ་རིགས་ཀུན་ལས་མཐུ་ཆེ་བ། །སྔགས་ཀྱི་བདག་པོར་ཕྱག་འཚལ་བསྟོད། །རིགས་གསུམ་མགོན་པོའི་སྤྲུལ་པ་སྟེ། །དགའ་བོ་འཇོག་པོ་ནོར་རྒྱས་ཀླུ། །ཀླུ་ཡི་སེམས་དཔར་ཕྱག་འཚལ་བསྟོད། །འཇམ་དབྱངས་སྤྲུལ་པས་ཀླུ་རྣམས་འདུལ། །ནཱ་ག་རཀཱ་མི་མགོན་དཀར། །ཀླུ་ཡི་མགོན་པོར་ཕྱག་འཚལ་བསྟོད། །ས་བརྒྱད་སེམས་དཔའ་ཀླུ་ཡི་རྗེ། །རྡོ་རྗེ་རྒྱལ་པོ་སྨྱོ་ཁ་སོགས། །བསྟན་སྲུང་རྣམས་ལ་བསྟོད་པ་བགྱི། །ཀླུ་བདུད་དུག་གི་སྤུ་གྲི་སོགས། །བཀའ་དང་བསྟན་པ་སྲུང་མཛད་པའི། །ཀླུ་རིགས་སྲུང་མ་རྣམས་ལ་བསྟོད། །དེ་དག་འཁོར་དུ་གཏོགས་པ་ཡི། །ཀླུ་དང་ས་བདག་ཐམས་ཅད་ཀྱི། །ཐུགས་དང་འགལ་བ་མཐོལ་ལོ་བཤགས། །བདག་ཅག་འཁོར་དང་བཅས་པ་ལ། །ཀླུ་ལས་གྱུར་པའི་ནད་ཀུན་སོལ། །ཀླུ་གཡང་དངོས་གྲུབ་བསྩལ་དུ་གསོལ། །ཞེས་པ་འདི་བཀའ་བསྒོ་འགའ་རེ་བྱེད་དགོས་
བྱུང་སྐབས། གཟུགས་ནི་མ་མཐོང་བར། གནས་འདིའི་སའི་འོག་མར་ཟད་ཅིག་ནས། ཀླུ་ཡིན་སྙམ་པ་ཞིག་གིས་སྐད་ཆེན་པོས་རྒྱུན་ཏུ་ཧཱུྃ་ཧཱུྃ་ཕཊ་ཕཊ་ཟེར་བ་འདིས་ང་ལ་གནོད་དོ་མ་བྱེད་ཟེར་བ་གྲགས། བཀའ་བསྒོ་ནམ་བྱེད་དུས། ནཱ་ག་ཀླུ་འདུལ་གྱི་སྔགས་རིང་གཉིས་དམིགས་པ་དང་བཅས་པ་བྱས་པས་ཕོག་ཐུག་སོང་བར་གོ་ནས། དེ་མི་བྱེད་བསམས་ནས་བཤགས་པ་དེ་ཨ་རཱ་གས་མཛད་པའོ།། །།