ཆར་འབེབས་བསང་མཆོད་བདུད་རྩི་སྤྲིན་ཕུང་འཁོར་བའི་སེམས་ཅན་ཚ་གདུང་སེལ་བའི་དངོས་གྲུབ་ཆུ་རྒྱུན།
ཆར་འབེབས་བསང་མཆོད་བདུད་རྩི་སྤྲིན་ཕུང་འཁོར་བའི་སེམས་ཅན་ཚ་གདུང་སེལ་བའི་དངོས་གྲུབ་ཆུ་རྒྱུན་ཞེས་བྱ་བ་བཞུགས་སོ།།
དཀར་གསུམ་མངར་གསུམ་འབྲུ་སྣ་ཀླུ་སྨན་གསེར་སྐྱེམས་རྩི་བཅུད་བདུད་རྩིས་སྦྲུས་པའི་ཕྱེ་ཕུད། ཀླུ་བཤོས་རྒྱན་ལྡན་དར་ཚོན་སྣ་ལྔས་བརྒྱན་པ། ཀླུ་ཤིང་སྣ་ཚོགས་རྫས་བསགས་བྱིན་གྱིས་བརླབས་ལ། ཨེ་མ་ཧོཿ བདག་དང་ཀླུ་ཡི་གཙོར་བྱས་སེམས་ཅན་ཀུན། །བླ་མེད་དཀོན་མཆོག་གསུམ་ལ་སྐྱབས་སུ་མཆི། །བདག་གིས་ཡུལ་ཕྱོགས་གནས་ཡུལ་འདི་རྣམས་སུ། །ཆར་པ་མ་བབས་ལོ་ཏོག་ཐམས་ཅད་སྐམ། །འབུ་སྲིན་རྣམས་ལ་ཚ་དམྱལ་སྡུག་བསྔལ་མྱོངས། །འགྲོ་ཀུན་མུ་གེའི་འཇིགས་པ་བསལ་བའི་ཕྱིར། །འགྲོ་ལ་ཕན་ཕྱིར་ཆར་པ་འབེབས་པར་བྱ། །རང་ཉིད་འཕགས་པ་ཐུགས་རྗེ་ཆེན་
པོའི་སྐུ། །དཀར་གསལ་ཞལ་གཅིག་ཞི་འཛུམ་ཐོར་ཙུགས་ཅན། །དར་དང་རིན་ཆེན་རྒྱན་ལྡན་སེམས་སྐྱིལ་བཞུགས། གཡས་པས་མཆོག་སྦྱིན་བདུད་རྩི་སྨན་ཆར་འབེབས། །གཡོན་པས་པད་དཀར་ཡུ་བ་ཐུགས་ཀར་འཛིན། །ཡེ་ནས་དམ་ཡེ་དབྱེར་མེད་ངང་དུ་གསལ། །ཐུགས་ཀའི་ཧཱུྃལས་བྱམས་པའི་འོད་ཟེར་འཕྲོས། །འཇིག་རྟེན་འདས་དང་མ་འདས་ཀླུ་ཡི་ཚོགས། །ཆར་ལ་དབང་བའི་ལྷ་སྲིན་ཡུལ་ལྷ་བཅས། །ནམ་མཁའ་ས་གཞི་གང་བར་སྤྱོད་གྱུར་ཅིག །སྟོང་པའི་ངང་ལས་འབྱུང་བ་རིམ་བརྩེགས་ལས། །འབྱུང་བའི་དྭངས་མ་ཀླུ་
ཤིང་སྣ་ཚོགས་འཁྲུངས། །བསྲེགས་པའི་དུད་པས་བདུད་རྩིས་ནམ་མཁའ་གང་། །སྤོས་སྤྲིན་དྲ་བས་སངས་རྒྱས་ཞིང་ཀུན་ཁྱབ། །དེ་ལ་བཀྲ་ཤིས་རྫས་རྟགས་རིན་ཆེན་བདུན། །འདོད་ཡོན་ལོངས་སྤྱོད་ཆར་རྒྱུན་ལྟ་བུར་འབེབས། །བདུད་རྩི་ཀླུ་སྨན་ན་བུན་བཞིན་དུ་གཏིབས། །ཟད་མི་ཤེས་པ་ནམ་མཁའི་མཛོད་བཞིན་གྱུར། །ཨོཾ་ཨཱཿཧཱུྃ་བཛྲ་སྤ་ར་ཎ་ཁཾ།མཁའ་མཉམ་སེམས་ཅན་བདེ་ལ་འགོད་མཛད་པའི། །ཀླུ་སྒྲུབ་པཀི་སྐྱེར་སྒང་སངས་རྒྱས་དབོན། །བྱ་ཡུལ་པ་དང་རང་བྱུང་རྡོ་རྗེ་སོགས། །བདེ་གཤེགས་སྤྲིན་གྱི་སྒྲོན་མ་ཆོས་ཀྱི་རྗེ། །ཀླུ་འདུལ་མགོན་པོ་བླ་མའི་ཚོགས་བཅས་ལ། །མཆོད་རྫས་སྤྲིན་ཕུང་ཞིང་ཀུན་ཁྱབ་པར་འབུལ། །ཐུགས་རྗེའི་ཆར་གྱིས་སེམས་ཅན་ཚིམས་པར་མཛོད། །རྒྱལ་བ་སྲས་བཅས་བདེན་པས་ཆར་ཕོབ་ཅིག །འཇམ་པའི་དབྱངས་དང་ཕྱག་རྡོར་སྤྱན་རས་གཟིགས། །འཁོར་ལོ་སྡོམ་པ་ཤཱཀ་ཐུབ་པདྨ་འབྱུང་། །འཁོར་ཆེན་ནཱ་ག་རཀྵ་རྟ་མགྲིན་སོགས། །ལྔ་བཅུ་རྩ་ལྔ་ཡི་དམ་ལྷ་ཚོགས་ལ། །མཆོད་རྫས་བདུད་རྩི་དྲི་ལྡན་བསང་མཆོད་འབུལ། །ཡུལ་ཕྱོགས་འདི་རུ་ཆར་རྒྱུན་དངོས་གྲུབ་སྩོལ། །ཀླུ་རིགས་ལས་བྱུང་
སེམས་དཔའ་སེམས་མ་དང་། །སྤྲིན་ཆེན་སྤྲིན་ལ་གནས་བཅས་སྤྲིན་ལ་དབང་། །གང་གཱའི་བྱེ་སྙེད་སངས་རྒྱས་བྱང་སེམས་ལ། །དཀར་གསུམ་འབྲུ་སྨན་དྲི་བཟང་དུད་པས་བསང་། །ཐུགས་རྗེའི་སྤྲིན་དང་ཆར་རྒྱུན་དབབ་ཏུ་གསོལ། །དངོས་གྲུབ་འཛད་མེད་གཏེར་ལ་དབང་བ་ཡི། །རྣམ་སྲས་མཆེད་འཁོར་གཏེར་བདག་ཆེན་པོ་བརྒྱད། །འཛམ་ལྷ་རིགས་ལྔ་ལྷ་མོ་ནོར་རྒྱུན་མ། །གནོད་སྦྱིན་བྱེ་བ་འབུམ་སྡེ་ཚོགས་བདག་ལ། །འབྲུ་སྣ་ཟས་སྣ་ཕྱེ་མར་གསུར་གྱི་བསང་། །དངོས་གྲུབ་ཆར་གྱི་གཏེར་ཆེན་བསྩལ་དུ་གསོལ། །ཀྱཻ། རྒྱ་མཚོ་ཆེ་དང་རོལ་མཚོ་ཆེན་པོ་བདུན། །ཆུ་བོ་ཆུ་ཆེན་འབབ་ཆུ་གདེངས་ཀ་ནས། །ལོངས་སྤྱོད་ཟད་མེད་ཆར་ལ་དབང་བའི་ཕྱིར། །ཀླུ་རྒྱལ་ཆེན་པོ་གཙུག་ན་རིན་ཆེན་ནི། །སྐུ་སྟོད་མཚན་ལྡན་མི་ཡི་ལུས་པོ་ལ། །སྐུ་སྨད་སྦྲུལ་མཇུག་རྒྱ་མཚོའི་ནང་ལ་བསྐྱོད། །སྦྲུལ་མགོ་བདུན་གྱི་གདེངས་ཀས་རབ་ཏུ་མཛེས། །ཕྱག་གཉིས་ཐལ་སྦྱར་བདུད་རྩིའི་བུམ་པ་ནས། །འཛད་མེད་ཆར་གྱི་རྒྱུན་ནི་རབ་ཏུ་འབེབས། །ཀླུ་ཚོགས་མང་པོའི་འཁོར་གྱིས་བསྐོར་ནས་ནི། །དངོས་གྲུབ་ཆར་རྒྱུན་སྩོལ་ཕྱིར་
གནས་འདིར་གཤེགས། །ཁྱད་པར་ཀླུ་ལ་མཁོ་བའི་ཡོ་བྱད་དང་། །དཀར་གསུམ་མངར་གསུམ་བདུད་རྩི་ཀླུ་སྨན་འབུལ། །འབྲུ་སྣ་དྲི་བཟང་དར་ཟབ་སྤོས་སྣས་བསང་། །ས་ཕྱོགས་ཡུལ་རིས་རྒྱལ་ཁམས་འདི་ཉིད་དུ། །འཛད་མེད་ཆར་གྱི་རྒྱུན་ནི་མྱུར་དུ་ཕོབ། །དེ་ཝའི་ཀོ་ཊའི་བླ་མཚོའི་ཕོ་བྲང་ནས། །སྦལ་སྦྲུལ་ཆུ་གནས་བརྩེ་ཞིང་འཕྱོ་བའི་དབུས། །གནས་བདག་གཏེར་སྲུང་དགེ་བསྙེན་སྨྱོ་ཁ་ནི། །སྐུ་སྟོད་མི་ལ་སྐུ་སྨད་སྦྲུལ་དུ་འཁྱིལ། །མགོ་ལུས་མིག་གང་སྦྲུལ་གྱི་གདེངས་ཀ་ཅན། །གདེངས་ཀའི་གསེབ་ནས་ཆར་རྒྱུན་ཤ་ར་ར། །དངོས་གྲུབ་འཛད་མེད་གཏེར་གྱི་བུམ་པ་བསྣམས། །བུམ་པའི་ཁ་ནས་སྨན་ཆར་ཐུ་ལུ་ལུ། །སྤྲུལ་པ་ཀླུ་གཉན་ཀླུ་བདུད་བྱེ་བ་འབུམ། །ཆར་པ་སློང་ཕྱིར་གནས་འདིར་སྤྱན་འདྲེན་གཤེགས། །ཡིད་སྤྲུལ་བཀྲ་ཤིས་རྫས་རྟགས་རིན་ཆེན་བདུན། །རྟ་གླང་ར་ལུག་ཆུ་གནས་རྟེན་རྫས་འབུལ། །དཀར་གཏོར་ཇ་ཆང་མང་པོ་གསུར་གྱི་བསང་། །ཡུལ་ཕྱོགས་འདི་རུ་ཚོར་གྱི་དངོས་གྲུབ་སྩོལ། །མཆེད་འཁོར་སྨྱོ་ཁ་ཐང་ལྷ་མཁར་ནག་དང་། །ཀླུ་བདུད་མགོ་དགུ་ཟླ་བའི་གདོང་པ་ཅན། །སྐུ་ལྷ་བཀྲག་མེད་ཟུ་ར་ར་སྐྱེས་
དང་། །ཕྱི་འཁོར་བཙན་དང་ནང་འཁོར་ཀླུ་སྨན་འབུམ། །ཕྱག་ན་ཆར་སྤྲིན་ཆུ་ཡི་ཞགས་པ་བསྣམས། །རྫུ་འཕྲུལ་ཆར་དང་གློག་ཞགས་ཁྱུགས་སེ་ཁྱུག །གསེར་སྐྱེམས་དར་སྣ་ཀླུ་སྨན་དྲི་ཡིས་བསང་། །གནས་ཡུལ་འདི་རུ་དྲག་ཆར་མྱུར་དུ་ཕོབ། །ཀླུ་རྣམས་ཀུན་གྱི་གཙོ་བོ་ཀླུ་ཆེན་བརྒྱད། །མཐའ་ཡས་འཇོག་པོ་ནོར་རྒྱས་དུང་སྐྱོང་དང། །པདྨ་ཆུ་ལྷ་རིགས་ལྡན་སྟོབས་ཀྱི་བདག །ཀླུ་རྒྱལ་དགའ་བོ་མི་མགོན་ཝ་རུ་ཎ། །སྐུ་སྟོད་མཚན་ལྡན་ལྷ་ཡི་ལུས་པོ་ལ། །སྐུ་སྨད་གསེར་སྤྲུལ་རྒྱ་མཚོའི་ནང་ནས་འཕྱོ། །སྦྲུལ་གྱི་གདེངས་ཀ་སྤྲིན་ཕུང་དབུ་ལ་བརྒྱན། །འབྲུག་སྒྲོག་གློག་འབྱིན་དུས་སུ་ཆར་འབེབས་པ། །སྐུ་ལ་སྤྲུལ་པའི་ཀླུ་ཚོགས་སྤྲིན་བཞིན་གཏིབས། །ཕྱག་ན་དགོས་འདོད་ཆར་གྱི་སྒྲོམ་བུ་བསྣམས། །ཀླུ་སྨན་དཀར་གསུམ་མངར་གསུམ་གསུར་གྱི་བསངས། །ཡུལ་ཕྱོགས་འདི་རུ་ཆར་གྱི་རྒྱུན་ཕོབ་ཅིག །ཀྱཻ། ཀླུ་ཡི་རྒྱལ་པོ་ནག་པོ་ཆེན་པོ་དང་། །ཀླུ་ཡི་རྒྱལ་པོ་མ་དྲོ་གཟི་ཆེན་དང་། །རྒྱ་མཚོ་དང་ནི་རྒྱ་མཚོ་ཆེན་པོ་དང་། །དཔལ་གྱི་འོད་དང་འོད་པོ་ཆེ་ལ་སོགས། །ཀླུ་རྒྱལ་ཉེ་དགའ་ཚངས་པ་སྟག་སྨྱོས་ཆེ། །
ཨེ་ལེའི་འདབ་མ་འགེལ་པ་དཀར་ཀོ་གསུམ། །གདོང་བུ་ཅན་དང་གཙུག་ཕུད་གདེངས་ཀ་ཅན། །ཁ་བརྒྱ་མིག་སྟོང་རྐང་ལག་མང་པོའི་ཀླུ། །ཁམས་གསུམ་སྲིད་པ་གསུམ་གྱི་ཀླུ་རྣམས་ཀྱིས། །ཐམས་ཅད་ཕྱག་ན་རིན་ཆེན་ཆར་སྒྲོམ་འཛིན། །ཀླུ་སྨན་བདུད་རྩི་ཀླུ་ཤིང་དྲི་ཡི་བསང་། །ཡུལ་ཕྱོགས་འདི་ན་ཆར་གྱི་རྒྱུན་བསྒྲེངས་ཤིག །ཀྱཻ། ཀླུ་ཆེན་བརྒྱད་ཀྱི་བདག་མོ་ཀླུ་མོའི་གཙོ། །ཡུམ་ཆེན་དཔལ་མོ་ཀུན་ཤེས་འོད་ལྡན་མ། །སྐུ་མདོག་དཀར་གསལ་གཟི་བརྗིད་འོད་དང་ལྡན། །སྤྱི་གཙུག་ནོར་བུ་འབར་བའི་རྒྱལ་མཚན་ཥྛིལ། །འགྲོ་དྲུག་དབུལ་ཕོངས་སྡུག་བསྔལ་སེལ་བའི་ཕྱིར། །རྟག་ཏུ་བདུད་རྩིའི་ཆུ་རྒྱུན་འབབས་པར་མཛོད། །སྐུ་ལ་རིན་ཆེན་སྣ་ཚོགས་བརྒྱན་དང་ལྡན། །ཕྱག་ན་ནོར་བུ་ཆར་གྱི་སྒྲོམ་བུ་བསྣམས། །འཛམ་གླིང་བདུད་རྩི་སྨན་གྱི་ཆར་ཆེན་འབེབས། །ཀླུ་སྨན་ཀླུ་མོ་ཀླུ་ཕྲུག་འཁོར་གྱིས་བསྐོར། །ཆར་གྱི་དངོས་གྲུབ་སྩོལ་ཕྱིར་གནས་འདིར་གཤེགས། །མཚོ་དང་རྫིང་བུ་གདེངས་ཀ་ནེའུ་གསིང་དང་། །མངར་གསུམ་ཀླུ་སྨན་རྒྱ་མཚོ་ཆེན་པོ་ལ། །མཛེས་པའི་དཀར་གསུམ་བདུད་རྩིའི་གཏོར་མ་འབུལ། །ཡུལ་ཁམས་འདི་དག་ཆར་
གྱིས་འགེངས་པར་མཛོད། །ཀླུ་ཆེན་བརྒྱད་ཀྱི་བཙུན་མོ་ཆར་པས་དངོས་གྲུབ་ཆར་འབེབས་ཞེས་བྱ་བའོ། །ཀླུ་ཡི་རྒྱལ་པོ་ཆར་འབེབས་འབྲུག་སྒྲ་སྒྲོག །རྒྱལ་རིགས་རྗེའུ་རིགས་དམངས་རིགས་བྲམ་ཟེའི་རིགས། །ཀླུ་སྨན་ཀླུ་བཙན་ཀླུ་བདུད་གདོལ་པའི་རིགས། །ཀླུ་གཉན་ས་བདག་བྱེ་བ་དུང་ཕྱུར་ལ། །བདུད་རྩི་ཀླུ་ཤིང་འབྲུ་སྣ་གསུར་གྱི་བསང་། །ཀླུ་ཡིས་སྙིང་ནས་ཆར་དྲག་མྱུར་དུ་ཕོབ། །འབྱུང་བ་རིམ་བརྩེགས་རིན་ཆེན་གཞལ་ཡས་ཁང་། །བདུད་རྩིའི་རྫིང་བུ་དཔག་བསམ་ཤིང་གིས་བསྐོར། །དེ་དབུས་མ་ཧཱ་གསེར་གྱི་རུས་སྦལ་ཏེ། །ཀིཾ་ལས་ས་སྙིང་སྨྱུ་གུ་དྲིལ་འཛིན་དཀར། །ས་ཡི་ལྷ་མོ་བརྟན་མ་བུམ་འཛིན་དཀར། །ས་བདག་དབང་ཆེན་ཤྲཱི་བྷ་དྲ་སེར། །ཞལ་གཅིག་ར་བ་བཞི་ཡི་གདེངས་ཀ་ཅན། །ཕྱག་བཞི་ཐལ་སྦྱར་ལྗོན་ཤིང་རི་རབ་འཛིན། །དེ་ལས་འཇའ་སྤྲིན་བདུད་རྩིའི་ཆར་རྒྱུན་འབེབས། །སྐུ་སྨད་སྦྲུལ་འཁྱིལ་རུས་སྦལ་སྟེང་དུ་བཞུགས། །ལྟོ་འཕྱེ་ས་འཛིན་ལག་པ་ཆེན་པོ་སྔོ། །སྐུ་ལ་བདུད་རྩིའི་ཟིལ་པ་ན་བུན་འཁྲིགས། །ཀླུ་ཚོགས་ས་བདག་མང་པོའི་འཁོར་གྱིས་བསྐོར། །བྱམས་པའི་ཚུལ་གྱིས་ཆར་པ་འབེབས་ཕྱིར་
གཤེགས། །ཀླུ་སྨན་མེ་ཏོག་ཤིང་ཐོག་སྣ་ཚོགས་དང་། །གསེར་དངུལ་གཟི་མཆོང་བཻཌུར་གཡུ་བྱུར་སོགས། །རིན་ཆེན་སྣ་ཚོགས་དཀོར་ནོར་ཁྲི་འབུམ་འབུལ། །རྩི་བཅུད་འབྲུ་སྣ་དྲི་བཟང་དུད་པས་བསང་། །སྟོང་གསུམ་ས་བཅུད་བསྡུས་ནས་གནས་འདིར་བསྟིམ། །སྲིད་པ་གསུམ་གྱི་ཆར་གཡང་ཀུན་བསྡུས་ལ། །སེམས་ཅན་འཆི་གསོས་བདུད་རྩི་ཆར་རྒྱུན་ཕོབ། །ཐེ་སེ་ཧལ་ཁྱི་བླ་མཁྱེན་ལྔ་སེར་དང་། །སྤར་སྨེ་ལོ་ཟླ་ཞག་དུས་ས་བདག་སོགས། །གཟའ་བརྒྱད་རྒྱུ་སྐར་ཉི་ཤུ་རྩ་བརྒྱད་བཅས། །ས་བདག་བྲག་བདག་ཆུ་བདག་ཤིང་གི་བདག །ས་བདག་རྗེ་བློན་མ་ལུས་འཁོར་བཅས་ལ། །དཀར་གསུམ་མངར་གསུམ་ཀླུ་ཤིང་དུད་པས་བསང་། །ས་གཞི་འབྱུང་བའི་ཁུ་རླངས་ནམ་མཁར་འཕྱུར། །སྤྲིན་གྱིས་ཚོགས་གཉིས་ཆར་གྱི་རྒྱུན་ཆེན་ཕོབ། །གཞན་ཡང་རྒྱལ་ཆེན་སྡེ་བཞི་ཕྱོགས་སྐྱོང་བཅུ། །བརྟན་མ་བཅུ་གཉིས་མགུར་ལྷ་བཅུ་གསུམ་དང་། །དགེ་བསྙེན་ཉེར་གཅིག་ཚེ་རིང་མཆེད་ལྔ་སོགས། །ཆེར་ལ་དབང་བའི་ལྷ་སྲིན་ཡུལ་ལྷ་ལ། །དམ་རྫས་གསེར་སྐྱེམས་ཀླུ་བཤོས་བརྒྱན་ལྡན་འབུལ། །དྲི་ཞིམ་འབྲུ་སྣ་གཡུ་ཤུག་གསུར་གྱི་བསང་། །ཞག་
ལ་མ་འགོར་ད་ལྟ་མྱུར་དུ་ཕོབ། །བདག་གི་ཆར་པ་འབེབས་ལ་བར་ཆོད་པའི། །ལྷ་འདྲེ་མི་གསུམ་སྡེ་བརྒྱད་ཡུལ་ལྷ་དང་། །རླུང་ལྷ་རླུང་གི་བདག་པོ་འབྱུང་པོའི་རིགས། །དཀར་ཕྱོགས་མི་དགའ་བསམ་ངན་གདུག་རྩུབ་ཅན། །འདོད་ཡོན་ལྔ་ལྡན་གསུར་གྱི་ཚིམས་གྱུར་ཅིག །སྔོན་ཚེ་ཐུབ་དབང་གསང་བདག་པད་འབྱུང་གི །དམ་ཚིག་གཉན་པོ་རྗེས་སུ་དྲན་མཛོད་ལ། །ཆར་ལ་བར་ཆད་མ་བྱེད་སྡོང་གྲོགས་མཛོད། །བཀའ་ལ་མི་ཉན་བར་ཆད་བགེགས་བྱེད་ན། །རིགས་གསུམ་མགོན་པོའི་ལྷ་ཚོགས་ཐུགས་ཁྲོས་ནས། །ལྕང་ལོ་ཅན་དུ་ཁྲོ་བོའི་ཆད་པས་སྡིག །དམ་ཚིག་ཉམས་ན་རྡོ་རྗེའི་དམྱལ་བར་ལྟུང་། །ལུས་ངག་རྡུལ་ཕྲན་བརླགས་པར་གདོན་མི་ཟ། །དེ་བས་ས་ཕྱོགས་འདི་རུ་ཆར་ཕོབ་ཅིག །ཐུགས་རྗེའི་བྱིན་རླབས་ལྡན་རྣམས་དགོངས་སུ་གསོལ། །སེམས་ཅན་རྣམས་ལ་བརྩེ་བས་གཟིགས་མཛོད་ལ། །སངས་རྒྱས་དཀོན་མཆོག་བདེན་པས་ཆར་ཕོབ་ཅིག །དམ་ཆོས་དཀོན་མཆོག་བདེན་པས་ཆར་ཕོབ་ཅིག །དགེ་འདུན་དཀོན་མཆོག་བདེན་པས་ཆར་ཕོབ་ཅིག །རྒྱུ་འབྲས་བསླུ་མེད་བདེན་པས་ཆར་ཕོབ་ཅིག །བསང་གིས་
བརྔན་ཞིང་བདེན་པའི་སྟོབས་ཚིག་གིས། །ལྷ་ཚོགས་རྣམས་ཀྱིས་ཀླུ་གཉན་ཆར་ལ་བསྐུལ། །ནམ་མཁར་འབྲུག་སྒྲོག་སྤྲིན་དཔུང་ཆུ་དྲག་འཁྲུགས། །བར་སྣང་སྨུག་གཞོབ་ཆར་གྱིས་སྐྱོགས་ཆེན་ཕོབ། །ས་གཞི་ཐམས་ཅད་ཆུ་བོའི་རྒྱ་མཚོར་གྱུར། །དེ་ལྟར་ཕབ་པའི་བསངས་མཆོད་དགེ་བ་འདིས། །ཀླུ་གཉན་ས་བདག་ལྷ་སྲིན་མ་ལུས་པ། །ཐབ་གཞོབ་ཕོག་ཐུག་འགྲམ་འཁྲུག་ཞི་གྱུར་ནས། །ནད་མེད་སྡུག་བསྔལ་ཀུན་དང་བྲལ་གྱུར་ཅིག །བྱེ་ཚན་མེ་ཆེན་བྱ་ཁྱུང་འཇིགས་པ་དང་། །ཤ་རུལ་མི་གཙང་མེ་རྡུལ་གནམ་ལྕགས་དུག༔ དཀར་ནག་འཁྲུག་རྩོད་འཇིགས་དང་བྲལ་གྱུར་ཅིག །ཞྭ་བོ་གྲུམ་པོ་མཛེ་ཕོ་ལུས་ངན་དང་། །ཀླུ་ནད་མི་རུང་སྣ་ཚོགས་ཞི་གྱུར་ཅིག །ཀླུ་རྣམས་བཀྲག་མདངས་གཟི་བརྗིད་ལྡན་གྱུར་ནས། །སྦྲུལ་མགོ་གདེངས་ཀ་དཔལ་འབྱོར་རྒྱས་གྱུར་ཅིག །ལོངས་སྤྱོད་ཆར་གྱི་རྒྱུན་ལ་དབང་གྱུར་ནས། །ས་གཞི་འབྱུང་བའི་སྟོབས་རྣམས་འཕེལ་གྱུར་ཅིག །རྩྭ་ཤིང་རྩི་བཅུད་ལོ་འདབ་རྒྱས་གྱུར་ནས། །སེམས་ཅན་མུ་གེའི་འཇིགས་པ་ཞི་གྱུར་ཅིག །འབྲས་བུ་ལོ་ཏོག་ཕུན་སུམ་ཚོགས་གྱུར་ནས། །མི་རྣམས་བདེ་སྐྱིད་ལོངས་
སྤྱོད་རྒྱས་གྱུར་ཅིག །ཚད་པས་གདུང་བའི་འབུ་སྲིན་སེམས་ཅན་ལ། །མི་འཇིགས་སྐྱབས་ཀྱིས་སྦྱིན་པར་འགྱུར་བར་ཤོག །ཀླུ་གཉན་ས་བདག་ཡིད་གཟུགས་ཐམས་ཅད་ལ། །དམ་པ་ཆོས་ཀྱི་སྦྱིན་པ་འབྱུང་བར་ཤོག །ཆར་པས་ཁྱབ་པའི་སེམས་ཅན་མ་ལུས་ཀུན། །ལུས་རྟེན་འདི་ལ་མངོན་པར་སངས་རྒྱས་ཤོག །ཅེས་པ་༧ རཱ་ག་ཨ་སྱས་སོ། །བསང་ཞོར་ཆར་འབེབས་ཕྲིན་བཅོལ་ལོ། །འདི་བྲིས་དགེ་བས་སེམས་ཅན་ཐམས་ཅད་ལ། །འཛད་མེད་ཆར་གྱིས་རྒྱུན་ལ་མངའ་བརྙེས་ནས། །འགྲོ་ཀུན་མུ་གེའི་འཇིགས་དང་བྲལ་བར་ཤོག །ཀླུ་གཏོར་གཏོར་ཆུ་དཀར་གཏོར་ཀླུ་སྨན་ཕུལ་བ་ཐམས་ཅད་ཆུ་མིག་ཏུ་འཕང་ངོ་། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།