ལྷ་ཀླུ་གཉན་གསུམ་བཤགས་པ་དང་ས་བདག་ཀླུ་གཉན་ལ་ཕོག་ཐུག་སོང་བ་ཞི་བའི་བསང་བཅས།

ལྷ་ཀླུ་གཉན་གསུམ་བཤགས་པ་ནི། ཀྱཻ། བདག་ཅག་རྒྱུ་སྦྱོར་ཡོན་བདག་གིས། །གར་འགྲོ་གར་འདུག་གནས་པའི་ཚོགས། །ཡུལ་ཕྱོགས་འདི་ལ་བརྟན་པའི་གནས། །ལྷ་ཀླུ་གཉན་གསུམ་ཁྱེད་རྣམས་ལ། །ཕ་མ་སྔ་རབས་འདས་པ་དང་། །བུ་ཚ་ཕྱི་རབས་མན་ཆད་དུ། །ས་གཉན་བརྐོས་དང་རྡོ་གཉན་རློགས། །ཆུ་གཉན་དཀྲུག་དང་ཤིང་གཉན་བཅད། །མ་རིག་མ་ཤེས་ཅི་བགྱིས་པ། །མཐོལ་ལོ་བཤགས་སོ་དག་གྱུར་ཅིག །ཅེས་པ་འདི་ཨ་རཱ་གས་སོ།། །། ༈ ས་བདག་ཀླུ་གཉན་ལ་ཕོག་ཐུག་སོང་བ་ཞི་བའི་བསང་ནི། ཀྱཻ། གཞན་ཡང་ཡུལ་ཕྱོགས་འདིར་གནས་པའི། །ཕ་རི་གཡས་ལ་ཚུར་རི་གཡོན། །མདུན་རི་རྒྱབ་རི་མཚེར་ས་ལ། །གནས་པའི་ཡུལ་ལྷ་གཞི་བདག་དང་། །ས་བདག་ཀླུ་གཉན་ཐམས་ཅད་ལ། །བསང་དང་མཆོད་པ་འདི་འབུལ་ལོ། །ཐམས་ཅད་མཉེས་ཤིང་ཚིམ་གྱུར་ཅིག །ཐུགས་དང་འགལ་བ་བཟོད་པར་གསོལ། །ཕོག་ཐུག་འགྲམ་འཁྲུག་ཞི་གྱུར་ཅིག །ཁ་འཛིན་སྡོང་གྲོགས་རྒྱབ་རྟེན་མཛོད། །ཅེས་པ་འདི་ནི་རཱ་ག་ཨ་སྱས་མཛད་པའོ། །སརྦ་མངྒ་ལཾ།། །།