གསེར་སྐྱེམས་འདོད་དགུ་ཆར་འབེབས།
གསེར་སྐྱེམས་འདོད་དགུ་ཆར་འབེབས་བཞུགས་སོ།
རྒྱུན་གྱི་གསེར་སྐྱེམས་འདོད་དགུ་ཆར་འབེབས་འདི་ལ་སྤྱི་ལྟར་བཤམས་ལ། ཨོཾ་ཨཱཿཧཱུྃ་ཧཱུྃ༔ བདག་གཞན་ཕྱི་ནང་མི་དམིགས་གསལ་སྟོང་ངང་། །མ་བཅོས་ལྷུག་པར་རང་སེམས་ཡི་གེ་ཧི། །དེ་ཉིད་འོད་ཟེར་འཕྲོས་འདུས་དོན་གཉིས་བྱས། །ཚུར་འདུས་རང་ཉིད་ཁ་སར་པཱ་ཎིའི་སྐུ། །འོད་དཀར་འཇའ་ཟེར་ལམ་མེར་ཀྲོང་བསྐྱེད་གསལ། །ཐུགས་ཀར་པདྨ་འདབ་དྲུག་ལྟེ་བར་ཧྲཱིཿ །མཐའ་མར་ཡིག་དྲུག་མགལ་མེ་ལྟ་བུར་འཁོར། །ཨོཾ་མ་ཎི་པདྨེ་ཧཱུྃ་ཧཱུྃ༔ ཨོཾ་བཛྲ་ཡཀྵ་ཧཱུྃ། ཨོཾ་བཛྲ་ཛྭ་ལ་ཨ་ན་ལ་ཧ་ན་ད་ཧ་པ་ཙ་མ་ཐ་བྷཉྫར་ཎ་ཧཱུྃ་ཕཊ༔ ཨོཾ་སྭ་བྷ་ཝ་ཤུདྡྷསརྦ་དྷརྨཱསྭ་བྷ་ཝ་
ཤུདྡྷོ྅ཧཾ། སྟོང་པ་ཉིད་དུ་གྱུར་སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ཨཱཿཧཱུྃ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་གསེར་སྐྱེམས་བདུད་རྩིའི་རྒྱ་མཚོ་དྭངས་ཤིང་ཐོགས་པ་མེད་པ་ཟག་པ་མེད་པའི་བདེ་བ་ཁྱད་པར་ཅན་བསྐྱེད་པ་ནམ་མཁའ་མཛོད་ཀྱི་རང་བཞིན་དུ་གྱུར། སྔགས་དྲུག་ཕྱག་དྲུག་དང་། ཨོཾ་ཨཱཿཧཱུྃ། ཨོཾ་ཧཱུྃ་ཏྲཱཾ་ཧྲཱིཿཨཱཿ ཨཱོྃ་ལས་འདོད་པའི་ཡོན་ཏན་ལྔ། །བྷྲཱུཾ་ལས་རིན་ཆེན་གཞལ་ཡས་ཁང་། །ཏྲཱཾཿལས་རིན་ཆེན་རཏྣའི་སྣོད། །ཧྲཱི༔ལས་གསུང་དབྱངས་དྲུག་ཅུ་སྟེ། །ཨཱཿལས་ཅི་འདོད་ཕུན་སུམ་ཚོགས། །སོ་
སོར་དགའ་མགུ་ཚིམ་བྱེད་པའི། །འདོད་པའི་ཡོ་བྱད་ཆེན་པོར་གྱུར། །སླར་ཡང་གནས་གསུམ་ཡིག་འབྲུའི་འོད་ཟེར་གྱིས། །མདུན་དུ་མཆོད་པའི་མགྲོན་རྣམས་སྤྱན་དྲངས་གྱུར། །ན་མོ། སངས་རྒྱས་རྐང་གཉིས་གཙོ་སྟེ་བདེན་པའི་མཆོག །ཆོས་ཉིད་ཆགས་དང་བྲལ་ཏེ་བདེན་པའི་མཆོག །དགེ་འདུན་འདུས་པའི་གཙོ་སྟེ་བདེན་པའི་མཆོག །བདེན་པའི་མཆོག་ནི་དཀོན་མཆོག་གསུམ་གྱི་བཀའ། །དཀོན་མཆོག་བཀའ་ལ་མི་ཉན་གང་ཡང་མེད། །འཕགས་པའི་སྤྱན་གྱིས་མི་གཟིགས་གང་ཡང་མེད། །འབྱུང་བ་ལྔ་ལ་མི་བརྟེན་གང་ཡང་མེད། །ཟས་དང་སྐོམ་ལ་མི་ཆགས་གང་ཡང་མེད། །བདེན་པའི་ཚིག་གིས་མི་ཁྲོལ་གང་ཡང་མེད། །དེ་ཕྱིར་དཀོན་མཆོག་གསུམ་གྱི་བཀའ་བཞིན་དུ། །རྣམ་བཞིའི་མགྲོན་དང་ཡུལ་འདིའི་གཞི་ཡི་བདག །མཆོད་སྦྱིན་གནས་འདིར་སྤྱན་འདྲེན་གཤེགས་སུ་གསོལ། །བཛྲ་ས་མ་ཡ་ཛཿ པདྨ་ཀ་མ་ལཱ་ཡེ་ཧཱུྃ། ཧཱུྃ། རིག་འཛིན་རྩ་བརྒྱུད་བླ་མ་ཐམས་ཅད་དང་། །ཡི་དམ་རྒྱུད་སྡེ་བཞི་ཡི་ལྷ་ཚོགས་དང་། །མ་སྲིང་མཁའ་འགྲོ་རྒྱ་མཚོ་ཆོས་སྐྱོང་བཅས། །ནོར་ལྷ་དམ་ཅན་གཏེར་བདག་ཐམས་ཅད་རྣམས། །
འདོད་ཡོན་བདུད་རྩི་གསེར་སྐྱེམས་འདི་བཞེས་ལ། །བདག་རྒྱུད་བྱིན་རླབས་མཆོག་ཐུན་དངོས་གྲུབ་སྩོལ། །ལྷ་ཀླུ་གནོད་སྦྱིན་རྒྱལ་པོ་གཟའ་བཙན་དང་། །དྲི་ཟ་གྲུལ་བུམ་མིའམ་ཅི་ལ་སོགས། །བདུད་དང་སྲིན་པོ་མ་མོ་གཟའ་སྨན་དང་། །རྨ་དང་ཐེའུ་རང་གྲོང་སྲིན་འདྲེ་མོར་བཅས། །ཡུལ་ལྷ་གཞི་བདག་གནས་བདག་གཏེར་བདག་དང། །དཀོར་བདག་ལ་སོགས་ལྷ་སྲིན་འབྱུང་པོའི་ཚོགས། །བཀའ་དང་དམ་ལ་གནས་པའི་དགེ་བསྙེན་རྣམས། །འདོད་ཡོན་བདུད་རྩི་གསེར་སྐྱེམས་འདི་བཞེས་ལ། །གནོད་སེམས་སྤོང་ལ་བདག་གི་སྡོང་གྲོགས་མཛོད། །ས་ཡི་ལྷ་མོ་བརྟན་མ་ལ་སོགས་པའི། །ས་བདག་རྗེ་བློན་འཁོར་དང་བཅས་པ་རྣམས། །སྡེ་དཔོན་སུམ་ཅུ་དགེ་བསྙེན་ཉེར་གཅིག་སོགས། །རྒྱུ་སྐར་ཉེར་བརྒྱད་བརྟན་མ་མགུར་ལྷ་རྣམས། །འདོད་ཡོན་བདུད་རྩི་གསེར་སྐྱེམས་འདི་བཞེས་ལ། །སངས་རྒྱས་བསྟན་སྲུངས་བདག་གི་མཐུན་རྐྱེན་སྒྲུབས། །བོད་ཁམས་དཀར་པོའི་ཕྱོགས་རྣམས་སྐྱོང་བ་ཡི། །དགེ་བསྙེན་ཡུལ་ལྷ་གཞི་བདག་ཐམས་ཅད་དང་། །ཁྱད་པར་ཡུལ་ལྗོངས་གནས་མཆོག་དམ་པ་འདིར། །ཡུལ་ལྷའི་རྒྱལ་པོ་ཆྒེ་
འཁོར་དང་བཅས། །འདིར་ཕྱོགས་གནས་པའི་ཟོ་དོར་ཐམས་ཅད་ལ། །འདོད་ཡོན་བདུད་རྩི་གསེར་སྐྱེམས་འདི་བཞེས་ལ། །བདག་གི་བསམ་པའི་དོན་ཀུན་བསྒྲུབ་ཏུ་གསོལ། །གར་འགྲོ་གར་འདུག་ས་ཕྱོགས་ཐམས་ཅད་ལ། །གཉུག་མར་གནས་པའི་ལྷ་ཀླུ་གཞི་བདག་དང་། །འགོ་ཞིང་གྲོགས་མཛོད་ལེགས་སྤེལ་ཉེས་བཟློག་པའི། །ཕོ་ལྷ་དགྲ་བླ་རྒྱུད་ཀྱི་ལྷ་སྲུང་རྣམས། །འདོད་ཡོན་བདུད་རྩི་གསེར་སྐྱེམས་འདི་བཞེས་ལ། །འབྱོར་སྤེལ་བསུ་སྐྱེལ་ཁ་འཛིན་རྒྱབ་རྟེན་མཛོད། །རྟག་ཏུ་དགེ་ཞིང་ཡུལ་རིས་རྒྱལ་ཁམས་སུ། །ནད་མུག་མཚོན་ཞི་བདེ་ལེགས་ཕུན་ཚོགས་ཤོག །མི་ཤེས་འཁྲུལ་པས་ཁྱེད་རྣམས་ཐུགས་ཕོག་པ། །ཉེས་པའི་ཚོགས་མཆིས་འདོད་ཡོན་བདུད་རྩིས་བཤགས། །དགེ་བས་རྣམ་མཁྱེན་རྒྱལ་བའི་ཞིང་ཁམས་སུ། །བདག་གཞན་ཕྱིར་མི་ལྡོག་པའི་ས་ཐོབ་ཤོག །ན་མོ། བདག་གི་བསམ་པའི་སྟོབས་དག་དང་། །དེ་བཞིན་གཤེགས་པའི་སྦྱིན་སྟོབས་དང། །ཆོས་ཀྱི་དབྱིངས་ཀྱི་སྟོབས་རྣམས་དང་། །འཕགས་པ་རྣམས་ལ་མཆོད་པ་དང་། །སེམས་ཅན་ཀུན་ལ་ཕན་བདག་སླད། །དོན་རྣམས་གང་དག་བསམ་པ་ཀུན། །དེ་
དག་ཐམས་ཅད་ཅི་རིགས་པ། །ཐོགས་པ་མེད་པ་འབྱུང་བར་ཤོག །ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །རྒྱུ་ལས་འགོག་པ་གང་ཡིན་པ། །དགེ་སྦྱོང་ཆེན་པོའི་འདི་སྐད་གསུངས། །སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །རྒྱུན་དུ་བྱ་བའི་ལས་བཟང་ངན་རྣལ་འབྱོར་འགྲོ་འདུག་སྐབས་སོགས་མཁོ་ས་མང་ཕྱིར་དང་སྒར་པ་འགྲོ་སར་གནས་བདག་འགའ་རེའི་སློང་ལ་བརྟེན་ནས་ཨ་རཱ་གས་ངོམ་སྟོད་དུ་བྲིས་པས་དགེ་བར་གྱུར་ཅིག་༈ །ཕྱི་ནང་གསང་བའི་ལྷ་སྲིན་སྡེ་བརྒྱད་འཁོར་དང་བཅས་པ་ཐམས་ཅད་ལ་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ་རྣལ་འབྱོར་པ་བདག་གི་བསྲུང་ཡུལ་འདི་ལ་བཙའ་སད་སེར་བ་མི་འབེབས་པའི་སྲུང་སྐྱོབ་དང་རྣལ་འབྱོར་པ་བདག་གི་མི་མཐུན་གནོད་པའི་རྐྱེན་དང་བྲལ་ནས་མཐུན་པའི་བསམ་པ་ཡིད་བཞིན་དུ་འགྲུབ་པའི་ཕྲིན་ལས་སྡོང་གྲོགས་རྒྱ་ཆེན་པོ་མཛོད་ཅིག། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།