ལས་ཐབས་བཟང་ངན་འགྲོས་སོགས་ལ་སྔོན་འགྲོ་གསེར་སྐྱེམས།
ལས་ཐབས་བཟང་ངན་འགྲོས་སོགས་ལ་སྔོན་འགྲོ་གསེར་སྐྱེམས་འབུལ་བ་བཞུགས་སོ། །
དམག་དང་བག་མ་མགྲོན་སྣ་སྐྱེས་ལ་སོགས། །ལས་ཐབས་གང་ལ་སྔོན་འགྲོ་གསེར་སྐྱེམས་འདོན། །ཇ་ཆང་ཕུད་དང་འོ་མ་གང་འཛོམ་གྱི། །ནང་དུ་འབྲུ་སྣ་བཏབ་ལ་གསེར་སྐྱེམས་བརྡར། །རིན་ཆེན་ཕྱེ་མ་གང་འཛོམ་བཏབ་ལ་ཕྱོགས་བཅུར་མཆོད། །ཧཱུྃ༔ རང་ཉིད་སྐད་ཅིག་དམ་ཡེ་དབྱེར་མེད་པའི། །དམག་དང་བག་མ་སྐྱས་སྣ་མགྲོན་སྣ་སོགས། །མི་རུང་ལས་ཐབས་འཇོམས་ཤིང་ཞི་བའི་ལྷ། །སྤྱན་རས་གཟིགས་དབང་ཤིན་ཏུ་དཀར་བའི་སྐུ། །ཕྱག་གཡས་མཆོག་སྦྱིན་གཡོན་པས་བགྲང་ཕྲེང་འཛིན། །ལོངས་སྐུའི་རྒྱན་རྫོགས་དར་དང་རིན་ཆེན་བརྒྱན། །སྐུ་ཡིས་ནམ་མཁའ་བར་སྣང་ཐམས་ཅད་
ཁྱབ། །ཞབས་གཉིས་བཞེངས་པས་འགྲོ་དྲུག་གནས་ནས་འདྲེན། །ཐུགས་ཀར་ཧྲཱིཿལ་སྔགས་ཕྲེང་གཡས་སུ་འཁོར། །ཨོཾ་མ་ཎི་པདྨེ་ཧཱུྃ། བརྒྱ་རྩ་བཟླ། ཀྱཻ། སྣང་ཞིང་སྲིད་པའི་ས་བདག་ཐམས་ཅད་དང་། །གནམ་ས་བར་གྱི་ལྷ་འདྲེ་ཐམས་ཅད་ཉོན། །བྷྲཱུཾ་ལས་རིན་ཆེན་སྣོད་མཆོག་རྒྱ་ཆེ་བར། །ཁཾ་ལས་བྱུང་བའི་ཟག་མེད་བདུད་རྩིའི་མཚོ། །འབྲུ་ཡི་སྙིང་ཁུ་བདུད་རྩི་ཆང་དང་ནི། །དཔག་བསམཾ་ཤིང་གི་སྙིང་ཁུ་ཡུ་མར་ཇ། །མེ་ཏོག་རྩི་ཐོག་སྙིང་པོ་འོ་མ་མར། །སྟོང་གསུམ་སེམས་ཅན་ཀུན་གྱི་ཟས་ཀྱི་མཆོག །གསེར་ཕྱེ་དངུལ་ཕྱེ་བརྡར་བའི་
རིན་ཆེན་མཆོག །མཚོ་རོ་གཡུ་དང་བ་ལ་དུང་ལ་སོགས། །རིན་ཆེན་ཕྱེ་མ་ལྷ་ཀླུ་གཞི་བདག་ནོར། །འབྲས་མཆོག་ས་ལུ་གྲོ་དང་འཕེལ་ཆེན་ནས། །འདི་དག་འཛམ་བུ་གླིང་གི་ནོར་གྱི་མཆོག །གཅིག་ཏུ་སྦྱར་བའི་གསེར་སྐྱེམས་མཚན་དུ་གསོལ། །ཨོཾ་ཨཱཿཧཱུྃ་དང་ཧ་ཧོ་ཧྲཱིཿརྣམས་ཀྱིས། །ཟག་མེད་ཡེ་ཤེས་བདུད་རྩིར་བྱིན་གྱིས་བརླབས། །སྣང་སྲིད་ལྷ་འདྲེ་ས་བདག་རྣམས་ལ་འབུལ། །ཁྱེད་ཅག་ཐོགས་མེད་ཡིད་ཀྱི་མངོན་ཤེས་དང་། །རྫུ་འཕྲུལ་མྱུར་མགྱོགས་ཤུགས་ཀྱིས་མཆོད་པ་བཞེས། །བདག་དང་ཡོན་བདག་རྣམས་ལ་བདེ་ལེགས་སྩོལ། །ཧཱུྃ། སྟོང་གསུམ་འཛམ་གླིང་དཀྱིལ་འཁོར་འདིར། །གནས་ཤིང་བརྟན་བཅས་ཕྱོགས་ལ་དབང་བའི་ལྷ། །ཤར་ཕྱོགས་ཤིང་ཁམས་བུ་མོ་ལྗང་གུ་ཟིན། །ཤར་སྟོད་སྟག་ལྔ་ཤར་སྨད་ཡོས་བུ་ལྔ། །སྨིན་དྲུག་ལ་སོགས་ཤར་གྱི་སྐར་མ་དྲུག །ཤར་གྱི་གཟའ་བདུན་འབར་བ་རཱ་ཙ་དང་། །གླང་པོའི་གདོང་དང་བརྒྱ་བྱིན་ལ་སོགས་པ། །ཤར་ན་གནས་དང་ཤར་ནས་འོང་བ་ཡི། །སྣང་ཞིང་སྲིད་པའི་ལྷ་འདྲེ་ཐམས་ཅད་ཀྱི། །གསེར་སྐྱེམས་བདུད་རྩིའི་མཆོད་པ་འདི་བཞེས་ལ། །དམག་དང་བག་མ་སྐྱེས་མགྲོན་ལམ་
ཕྱེས་ཤིག །་་ལོ་རིམ་སྐབས། ཡུལ་འདིར་བཙའ་སད་སེར་བའི་རྒྱུན་ཆོད་ཅིག །ལོ་ལེགས་ཆར་འབེབས་ཅི་བསམ་ལྷུན་གྲུབ་མཛོད། །ཅེས་བསྒྱུར། རོ་ལམ་སྐབས། རོ་དང་ཐལ་སོལ་དཀར་རྩིའི་ལམ་སོལ་ཅིག །ཅེས་བསྒྱུར། །ཕྱོགས་དེར་ལས་ཐབས་ངན་པ་གང་བྱུང་ཡང་། །ཁྱོད་ལ་སྟོན་པ་མིན་པས་བཟོད་པར་བཞེས། །ཀོ་ལོང་རུ་ང་ཕྲག་དོག་མ་མཛད་ཅིག །ཤར་ལྷོ་རླུང་ཁམས་བུད་མེད་སྨྱོན་མ་ཟོན། །འབྲུག་ལྔ་ས་སྐར་སྐག་དང་གཟའ་ཆེན་པོ། །རཱ་ཧུ་ལ་དང་མེ་ལྷ་གདོང་ར་སོགས། །ཤར་ལྷོར་གནས་དང་ཤར་ལྷོར་རྒྱུ་བ་རྣམས། །གསེར་སྐྱེམས་བདུད་རྩིའི་མཆོད་པ་འདི་བཞེས་ལ། །དམག་དང་བག་མ་སྐྱེས་མགྲོན་ལམ་ཕྱེས་ཤིག །ལས་ཐབས་མ་ཤེས་ཕོག་ཐུག་གང་བྱུང་ཡང་། །ཁྱོད་ལ་སྟོན་པ་མིན་པས་བཟོད་པར་བཞེས། །ཀོ་ལོང་རུ་ང་ཕྲག་དོག་མ་མཛད་ཅིག །ལྷོ་ཕྱོགས་མེ་ཁམས་བུ་མོ་དམར་མོ་ལི། །ལྷོ་སྟོད་སྦྲུལ་ལྔ་ལྷོ་སྨད་རྟ་ལྔ་དང། །མཆུ་ལ་སོགས་ཏེ་ལྷོ་ཕྱོགས་མེ་སྐར་དྲུག །གཟའ་ཆེན་ཁྱབ་འཇུག་ཕྱོགས་སྐྱོང་གཤིན་རྗེ་དང་། །ཞིང་སྐྱོང་མ་ཧེའི་གདོང་ཅན་ལ་སོགས་པ། །ལྷོ་ན་གནས་དང་ལྷོ་ནས་
རྒྱུ་བ་ཡི། །སྣང་སྲིད་ལྷ་འདྲེ་གཉེན་པོ་ཐམས་ཅད་ལ། །གསེར་སྐྱེམས་བདུད་རྩིའི་མཆོད་པ་འདི་བཞེས་ལ། །དམག་དང་བག་མ་སྐྱས་མགྲོན་ལམ་ཕྱེས་ཤིག །ལས་ཐབས་མི་རུང་བྱ་བ་གང་བྱས་ཀྱང་། །ཁྱོད་ལ་སྟོན་པ་མིན་པས་བཟོད་པར་བཞེས། །ཀོ་ལོང་རུ་ང་ཕྲག་དོག་མ་མཛད་ཅིག །ལྷོ་ནུབ་ས་ཁམས་ཁོན་མ་རྒན་མོ་དང་། །ལུག་ལྔ་སྲིན་པོའི་སྐར་མ་ས་ག་དང་། །ཞིང་སྐྱོང་ཤ་ཟའི་གདོང་དང་གཟའ་བདུད་ནི། །བིའི་པ་ཏྲ་ལ་སོགས་ལྷོ་ནུབ་ན། །གནས་དང་དེ་ན་རྒྱུ་བ་ཐམས་ཅད་ཀྱིས། །འབྲུ་དང་གསེར་སྐྱེམས་མཆོད་པ་འདི་བཞེས་ལ། །དམག་དང་བག་མ་སྐྱེས་མགྲོན་ལམ་ཕྱེས་ཤིག །ལས་ཐབས་བྱ་བ་མི་རུང་གང་ཡིན་ཀྱང་། །ཁྱོད་ལ་སྟོན་པ་མིན་པས་བཟོད་པར་བཞེས། །ཀོ་ལོང་རུ་ང་ཕྲག་དོག་མ་མཛད་ཅིག །ནུབ་ཕྱོགས་ལྕགས་ཁམས་སྐྱེས་བུ་ཆེན་པོ་དང་། །ནུབ་སྟོད་སྤྲེལ་ལྔ་ནུབ་སྨད་བྱ་ལྔ་དང་། །ལྷ་མཚམས་ལ་སོགས་ལྕགས་ཀྱི་སྐར་མ་དྲུག ། དུ་བ་འཇུག་རིང་ས་བདག་ཝ་རུ་ཎ། །ཆུ་སྲིན་གདོང་ཅན་ལ་སོགས་ནུབ་བྱང་ན། །གནས་དང་ནུབ་ན་རྒྱུ་བ་ཐམས་ཅད་ལ། །གསེར་སྐྱེམས་བདུད་རྩིའི་མཆོད་པ་འདི་བཞེས་
ལ། །དམག་དང་བག་མ་སྐྱེས་མགྲོན་ལམ་ཕྱེས་ཤིག །ལས་ཐབས་ངན་པའི་ཕོག་ཐུག་གང་བྱུང་ཡང་། །བཟོད་པར་བཞེས་ལ་དགེ་བའི་སྡོང་གྲོགས་མཛོད། །ཀོ་ལོང་རུ་ང་ཕྲག་དོག་མ་མཛད་ཅིག །ནུབ་བྱང་ཕ་རྒན་ཁེན་པ་གནམ་ཁྱི་དང་། །ཁྱི་ལྔ་སྐར་མ་བྱི་བཞིན་སྲིན་པོ་རོག་ཏི་དང་། །བ་ཡ་བེ་དང་ཤ་བའི་གདོང་པ་ཅན། །ནུབ་བྱང་གནས་དང་ནུབ་བྱང་ནས་རྒྱུ་བ། །ཀུན་གྱིས་གསེར་སྐྱེམས་མཆོད་པ་འདི་བཞེས་ལ། །དམག་དང་བག་མ་སྐྱེས་མགྲོན་ལམ་ཕྱེས་ཤིག །ལས་ཐབས་བྱ་བ་ཁྱེད་ལ་སྟོན་པ་མིན། །བཟོད་པར་བཞེས་ནས་དགེ་བའི་སྡོང་གྲོགས་མཛོད། །ཀོ་ལོང་རུ་ང་ཕྲག་དོག་མ་མཛད་ཅིག །བྱང་ཕྱོགས་ཆུ་ཁམས་བྱིསྦ་སྔོན་པོའི་ཁམས། །བྱང་སྟོད་ཕག་ལྔ་བྱང་སྨད་བྱི་བ་ལྔ། །མོན་གྲེ་ལ་སོགས་ཆུ་ཡི་སྐར་མ་དྲུག །གནོད་སྦྱིན་རྟ་གདོང་ཧ་ལིང་ཀ་ལ་སོགས། །བྱང་ན་གནས་དང་བྱང་ནས་རྒྱུ་བ་དང་། །གསེར་སྐྱེམས་བདུད་རྩིའི་མཆོད་པ་འདི་བཞེས་ལ། །དམག་དང་བག་མ་སྐྱེས་མགྲོན་ལམ་ཕྱེས་ཤིག །ལས་ཐབས་ངན་པ་ཁྱོད་ལ་སྟོན་པ་མིན། །བཟོད་པར་བཞེས་ལ་དགེ་བའི་སྡོང་གྲོགས་མཛོད། །ཀོ་ལོང་
རུ་ང་ཕྲག་དོག་མ་མཛད་ཅིག །བྱང་ཤར་རི་ཡི་བནྡེ་སེར་པོ་གིན། །གླང་ལྔ་བྲ་ཉེ་བགེགས་དང་འབྱུང་པོ་དང་། །སྒྲ་གཅན་ལ་སོགས་བྱང་ཤར་ལ་གནས་པ། །དེ་དག་ཀུན་ལ་འབྲུ་སྣ་གསེར་སྐྱེམས་འབུལ། །དམག་དང་བག་མ་སྐྱེས་མགྲོན་ལམ་ཕྱེས་ཤིག །ལས་ཐབས་ངན་པ་ཁྱོད་ལ་སྟོན་པ་མིན། །བཟོད་པར་བཞེས་ལ་དགེ་བའི་སྡོང་གྲོགས་མཛོད་།ཀོ་ལོང་རུ་ང་ཕྲག་དོག་མ་མཛད་ཅིག །ཧཱུྃ། ལོ་ལ་འཁོར་ཞིང་ཕྱོགས་ལ་དབང་བ་ཡི། །ཐེ་སེ་རྒྱལ་པོ་ཐེ་ཁྱིམ་བཙུན་མོ་དང་། །ཧོ་པན་ཡུམ་རྒན་བརྟན་སོ་སྲས་བུ་དང་། །གཙང་ཀུན་འཕྱེའོ་གཙང་ཀུན་བློན་པོ་དང་། །རྩིས་མཁན་སེ་བ་བླ་མཁྱེན་སྔ་ཕྱི་གཉིས། །སྐུ་སྲུང་སེ་ཤར་ཤན་པ་མི་གསོད་དང་། །སེ་ལོ་ས་འཕྱགས་སེའུ་གདན་བཏིང་དང་། །སེ་ཏེ་རྟ་ཁྲིད་སེ་བ་རང་རྟ་དང་། །ཧོ་པན་བྱ་ར་སེ་བྱི་ནོར་སྲུང་དང་། །ས་བྱ་དུས་འཛིན་དཀར་ཤམ་བུ་མོ་དང་། །སྦལ་ཏེ་མག་པ་ཧལ་ཁྱི་རོ་ཟན་སོགས། །ལོ་ལ་འཁོར་བའི་ས་བདག་ཁྱེད་རྣམས་ཀྱི། །འབྲུ་སྣ་གསེར་སྐྱེམས་མཆོད་པ་འདི་བཞེས་ལ། །དམག་དང་བག་མ་སྐྱེས་མགྲོན་ལམ་ཕྱེས་ཤིག །གལ་ཏེ་ཁྱེད་ཅག་སྟེང་དུ་ལམ་
བརྟོད་ན། །མཐུ་ཆེན་ཁྱེད་རྣམས་དོ་བསྡོ་མ་ཡིན་གྱིས། །ངེད་ཅག་མངོན་ཤེས་མི་ལྡན་འཁྲུལ་པའི་དབང་། །བཟོད་པར་བཞེས་ལ་དངོས་གྲུབ་དམ་པ་སྩོལ། །ཀོ་ལོང་རུ་ང་ཕྲག་དོག་མ་མཛད་ཅིག །ཟླ་བ་ལ་འཁོར་ཕྱོགས་ལ་དབང་བ་ཡི། །འབྲུག་ལྷ་གྲྭ་པ་ཐེ་སེ་གྲུལ་བུམ་དང་། །ཟླ་འགྲོས་བྱི་ལམ་ཕག་མགོ་ཟླ་དངོས་ལྷ། །ས་སྨན་ས་རྒྱལ་ལྷ་མོ་བརྟན་མ་དང་། །ས་བདག་རྒན་རྒོན་རྔ་ཟོར་དམར་པོ་དང་། །བྱི་ལམ་སྔོན་མོ་གནམ་ཐིག་སེར་ནག་དང་། །གཉན་འཕར་མགོ་དགུ་ས་བདག་ལྟོ་འཕྱེ་དང་། །འགྲོལ་བུ་ལྷ་ལྔ་གནམ་ཁྱི་ནག་པོ་དང་། །ཧལ་ཁྱི་ལ་སོགས་ཟླ་བའི་ས་བདག་རྣམས། །འབྲུ་སྣ་གསེར་སྐྱེམས་མཆོད་པ་འདི་བཞེས་ལ། །དམག་དང་བག་མ་སྐྱེས་མགྲོན་ལམ་ཕྱེས་ཤིག །ཁྱེད་ཅིག་ཕྱོགས་སུ་གལ་ཏེ་ལམ་བྱུང་ན། །སྟོབས་ཆེན་ཁྱོད་ལ་བསྡོ་བ་མ་ཡིན་ཏེ། །བདག་ཅག་མ་རིག་འཁྲུལ་པས་སྒྲིབ་པ་ལ། །བཟོད་པར་བཞེས་ལ་ཀོ་ལོང་མ་མཛད་ཅིག །ཞག་གི་དམག་མི་སུམ་བརྒྱ་དྲུག་ཅུ་ལ། །དབང་གི་ལོ་དང་སྤར་ཁ་གཟའ་སྐར་དང་། །ཁྲ་ཚ་ཟིན་ཕུང་གཟའ་ཡི་བུ་བཞི་སོགས། །དུས་ཚོད་མཚོན་ཆའི་བདག་པོ་
སྤར་སྨེ་ལོ། །ཀླུ་བརྒྱད་རྣལ་འབྱོར་མ་བརྒྱད་བིཥི་དང་། །གསེར་མཛོད་སེར་པོ་གཡུ་མཛོད་སྔོན་མོ་སོགས། །ཞག་དང་ཟ་མ་དུས་ཚོད་བདག་པོ་ལ། །འབྲུ་སྣ་གསེར་སྐྱེམས་མཆོད་པ་འདི་བཞེས་ལ། །དམག་དང་བག་མ་སྐྱེས་མགྲོན་ལམ་ཕྱེས་ཤིག །ཁྱེད་རྣམས་ཕྱོགས་སུ་མི་རུང་ལས་བྱས་ཀྱང་། །ཁྱེད་ཅག་རྣམས་ལ་བརྙས་ནས་འགྲན་བཙུགས་མིན། །མ་ཤེས་མ་རིག་འཁྲུལ་ན་བཟོད་པར་བཞེས། །བདག་དང་ཡོན་བདག་དགེ་བའི་སྡོང་གྲོགས་མཛོད། །ཕྱོགས་བཞི་སྐྱོང་བའི་རྒྱལ་པོ་ཆེན་པོ་བཞི། །ཤར་གྱི་སྟག་སྐྱ་ལྷོ་ཡི་གཡུ་འབྲུག་སྔོ། །ནུབ་ཀྱི་བྱ་དམར་བྱང་གི་རུས་སྦལ་རྒྱུ། །བྱང་ཤར་མེ་གླང་ལྷོ་ནུབ་རྡོ་ལུག་དང་། །ནུབ་བྱང་གནམ་ཁྱི་ཤར་ལྷོར་ར་གན་འབྲུག །བར་སྣང་གསེར་སྤྲེལ་གནམ་ཁྱི་བྱ་ཁྱུང་དཀར། །གངས་རི་གཡའ་རི་བྲག་རི་སྤང་གི་རི། །མཚོ་དང་གདེངས་ཀ་ཆུ་མིག་གད་བྲག་ཕུག །དེ་དག་ལ་གནས་ས་བདག་ཀླུ་དང་གཉན། །སྲིད་པ་བརྐོས་པའི་མཐུ་རྩལ་དྲག་ཤུལ་ཅན། །ཁ་དོག་ལྡན་ཞིང་འོད་དང་གཟི་བརྗིད་ལྡན། །སྡེ་ཆེ་སྟོབས་ཆེན་ཕ་རོལ་དཔུང་འཇོམས་པ། །ཁྱེད་ཅག་ཀུན་ལ་འབྲུ་སྣ་གསེར་སྐྱེམས་འབུལ། །
དམག་དང་སྐྱས་སྣ་བག་མགྲོན་ལམ་ཕྱེས་ཤིག །དམའ་དམའ་དབུ་ཆུམ་མཐོ་མཐོ་ཞབས་ཡར་སྐུམས། །བར་མ་སྐུ་གཟུར་སྤྱན་གཡོར་མཐུ་བ་སྡུས། །ཐབ་གཞོབ་འཁོན་དང་དམག་སྣ་སྟོན་པ་དང་། །བག་མ་སྐྱས་དང་མགྲོན་སྣ་ཅི་བྱས་ཀྱང་། །ཀོ་ལོང་རུ་ང་ཕྲག་དོག་མ་བྱེད་ཅིག །མ་ཤེས་དབང་གིས་ཕོག་ཐུག་བྱུང་ན་ཡང་། །བྲག་ཆེན་མ་རལ་མཚོ་ཆེན་མ་ལྷུད་ཅིག །གངས་ཆེན་མ་ཉིལ་ཆུ་ཆེན་མ་འཁྲུགས་ཤིག །ཤིང་ཆེན་མ་ཆག་སྐར་མདའ་མ་ལྷུང་ཞིག །གློག་ལྕེ་མ་བརྐྱང་སེར་བ་མ་འབེབས་ཤིག ། གནམ་གྱི་བྱ་ཁྱུང་གཤོག་པ་མ་རྡེབས་ཤིག །གཡུ་འབྲུག་སྔོན་མོས་རྐན་སྒྲ་མ་རྡེབས་ཤིག །གསེར་སྦལ་བར་སྣང་གསེར་སྤྲེལ་གར་མ་བྱེད། །མཆོང་ཉ་དུང་ཉས་རྔ་མ་མ་གཡུགས་ཤིག །ཁམ་པ་གཡག་གི་རྭ་ཅོ་མ་བརྡར་ཅིག །བཙན་གྱི་ཤ་བས་རྒྱབ་ནི་མ་སྤྲུགས་ཤིག །ནག་པོ་ཕག་གི་ཕུང་སྣ་མ་རྒྱུད་ཅིག །སྦྲུལ་ནག་གདུག་པའི་ལྕེ་གཉིས་མ་བརྐྱངས་ཤིག །གླང་བུ་སྟག་རིས་ས་ནི་མ་གཏོར་ཅིག །གདུག་པའི་ཕྱག་བརྙན་མ་བཏང་བདུད་མ་འབེབས། །བཙན་གྱི་རྐྱ་འཁྲུགས་མ་བཏང་གཤེད་མ་འབེབས། །སོ་སོར་བཅོས་སོ་
ཞི་བ་བདེ་ལེགས་མཛོད། །ར་ལ་ཕོག་ཀྱང་རུ་གཡུགས་མ་བརྡུངས་ཤིག །རྨིག་པའི་ཚིག་ལ་ཕོག་ཀྱང་མ་འཕྲལ་ཅིག །སྤུ་ཡི་དྲྭ་ལ་ཕོག་ཀྱང་མ་སྤྲུགས་ཤིག །སྤྱན་ལ་ཕོག་ཀྱང་སྡང་མིག་མ་བགྲད་ཅིག །ལྗགས་ལ་ཕོག་ཀྱང་དར་ལྕེ་མ་སྐྱོངས་ཤིག །སྙིང་དཀྱིལ་ཕོག་ཀྱང་བསམ་ངན་མ་འཆང་ཞིག །དམག་ཇག་སྐྱས་མགྲོན་བག་སྣ་ལ་སོགས་པ། །གཡས་སུ་བཟུར་ལ་གཡོན་དུ་འཆོར་མཛོད་ཅིག །ཐད་དུ་བྱོལ་ལ་བཙན་གཏམ་མ་བྱེད་ཅིག །ཁ་སྒམ་ཅན་གྱིས་ལྐོག་སྨྲས་མ་བྱེད་ཅིག །ཁྱེད་རྣམས་སོ་སོར་རང་རང་གནས་སུ་ཟློབཅོས། །དཀོན་མཆོག་གསུམ་གྱི་བདེན་པའི་བྱིན་རླབས་དང་། །བྱང་ཆུབ་སེམས་དཔའ་བརྒྱད་ཀྱི་བདེན་པ་དང་། །ཉན་ཐོས་ཆེན་པོ་མཆོག་བརྒྱད་བདེན་སྟོབས་མཐུས།།དེ་རིང་ཉི་མ་དགེ་ཞིང་རྒྱུ་སྐར་བཟང་། །སངས་རྒྱས་ཐམས་ཅད་རྫུ་འཕྲུལ་ཆེན་པོ་སྟེ། །དགྲ་བཅོམ་ཐམས་ཅད་ཟག་པ་ཟད་པ་ཟད། །བདེན་པ་དེ་ཡིས་ཆོ་ག་འདི་འགྲུབ་ཤོག ། ཨོཾ་སརྦ་ཏ་ཐཱ་ག་ཏ་ཤཱནྟཾ་ཀུ་རུ་ཡེ་སྭཱ་ཧཱ། དེ་བཞིན་གཤེགས་པ་བཞིའི་སྔགས་བརྗོད། དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ། །དེ་བཞིན་གཤེགས་པ་གཟུགས་མཛེས་དམ་པ་
ལ་ཕྱག་འཚལ་ལོ། །དེ་བཞིན་གཤེགས་པ་ཀླུ་འབྱམས་ཀླས་ལ་ཕྱག་འཚལ་ལོ། །དེ་བཞིན་གཤེགས་པ་འཇིགས་པ་ཐམས་ཅད་ཡོངས་སུ་བྲལ་བ་ལ་ཕྱག་འཚལ་ལོ། །ཨོཾ་ཀཱི་ལི་ཀཱི་ལི་ཨ་ཏི་པ་ལི་སྭཱ་ཧཱ། ཕུན་སུམ་ཚོགས་པ་བརྒྱད་ཀྱི་སྔགས་འདི་བརྗོད་པ་ཙམ་གྱིས། བདེན་པའི་ཆོས་ལ་ས་བདག་ཀླུ་གཉན་ཀུན་ཡིད་ཆེས་ནས། བྱང་ཆུབ་མཆོག་ཏུ་སེམས་བསྐྱེད་པར་གྱུར་ཅིག །ཨོཾ་ཨ་ཀ་ནི་ནི་ཀ་ནི། ཨ་བྷི་ལ་མ་དྷ་ལ་མནྟ་ཡེ་སྭཱ་ཧཱ། གནམ་ས་སྣང་བརྒྱད་ཀྱི་སྙིང་པོ་འདི་བརྗོད་པ་ཙམ་གྱིས། སྣང་སྲིད་ས་བདག་ཀླུ་གཉན་ཐམས་ཅད་ཞི་བ་དང་བདེ་ལེགས་སུ་གྱུར་ཅིག །ཨཙནྡྲསུཏྲིདྡེདུལཿ སརྦ་ཤཱནྟཾ་ཀུ་རུ་ཡེ་སྭཱ་ཧཱ། ཞེས་པ་འདི་ནི་རོ་བག་སྐྱས་མགྲོན་སོགས་ཀུན་ལ་མཁོ་བའི་ཕྱིར་དུ་རིག་སྔགས་འཆང་བའི་རྣལ་འབྱོར་པ་ཨ་རཱ་གས་སྦྱར་བ་འདིས་སྣང་སྲིད་ཐམས་ཅད་བདེ་ལེགས་སུ་གྱུར་ཅིག །སརྦ་མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།