རྣལ་འབྱོར་ལམ་དུ་འགྲོ་བའི་གཏོར་འབུལ་དངོས་གྲུབ་མྱུར་དུ་སྟེར་བའི་དགའ་སྟོན་པད་དཀར་འཛུམ་པའི་ཟླ་གཞོན་གསར་པ།
རྣལ་འབྱོར་ལམ་དུ་འགྲོ་བའི་གཏོར་འབུལ་དངོས་གྲུབ་མྱུར་དུ་སྟེར་བའི་དགའ་སྟོན་པད་དཀར་འཛུམ་པའི་ཟླ་གཞོན་གསར་པ་ཞེས་བྱ་བ་བཞུགས་སོ།།
ཨོཾ་སྭ་སྟི་མངྒ་ལཾ་སིདྡྷི། བསླུ་མེད་དངོས་གྲུབ་མ་ལུས་མྱུར་སྟེར་བའི། །རྩ་གསུམ་ལྷག་པའི་ལྷ་ལ་གུས་བཏུད་ནས། །རྣལ་འབྱོར་ལམ་དུ་འཇུག་པའི་ལམ་གཏོར་ནི། །དངོས་གྲུབ་འདོད་པ་འཇོ་བའི་བཅུད་དུ་ལོངས། །གང་ཟག་སྡོམ་ལྡན་རྒྱལ་ཁམས་ཀུན་ཉུལ་བའི། །རྙེད་པ་འདོད་ཕྱིར་རྒྱུ་བའི་སྒྲུབ་པ་པོའི། །ཐོ་རངས་སམ་ནི་དགོང་མོའི་དུས་ལྟ་བུར། །གཏོར་ཐེབས་སམ་ནི་མཚན་ལྡན་ཐོད་པའི་ནང་། །དམར་གཏོར་ཆེ་བ་གཅིག་ལ་ཆུང་བ་དྲུག །ཟླུམ་བཤོས་དགུ་དང་དཀར་གཏོར་དྲུག་བསྐོར་བ། །ཟས་ཕུད་འབྲུ་སྣ་ཇ་ཆང་འོ་མ་བཅས། །ལེགས་སྦགས་གཙང་སྦྲ་ལྡན་པ་སྟེགས་ཁར་བཤམས། །རང་ཉིད་ལྷ་ཡི་ང་རྒྱལ་གསལ་བ་ཡི། །རཾ་ཡཾ་ཁཾ་ཞེས་གཏོར་མ་ཆུ་གཙང་བྲན། །སུ་བྷ་ཝས་སྦྱངས། གཏོར་
མ་མི་དམིགས་སྟོང་པའི་ངང་ཉིད་ལས། །གཏོར་སྣོད་ཨེ་ལས་ལྕགས་ཁང་གཏིང་ཟབ་པ། །གནོད་བྱེད་དགྲ་འདྲེ་མངོན་སུམ་གསལ་བ་ལ། །བདག་ལས་སྤྲུལ་པའི་ཕོ་ཉ་གྲངས་མེད་ཀྱིས། །གནོད་བྱེད་ཐམས་ཅད་རང་དབང་མེད་པར་བཀུག །དམིགས་པའི་རྟེན་ལ་སིས་སིབ་ཐིམ་པར་གྱུར། །ན་མོ། རྩ་གསུམ་མཆོག་གསུམ་བཀའ་སྲུང་ལྷ་ཚོགས་ཀྱིས། །བདེན་པའི་མཐུ་ཡིས་རྣལ་འབྱོར་བདག་ཅག་གི །ཚེ་བསོད་ཁ་རྗེ་དབང་ཐང་ཟ་ཐང་ལ། །གནོད་པར་བྱེད་པའི་སྒབ་འདྲེ་ལྟོགས་འགོང་ཚོགས། །སྲིད་གསུམ་འཇིག་རྟེན་བྲོས་ཡུལ་གར་
གནས་ཀྱང་། །སྐད་ཅིག་རང་དབང་མེད་པར་འདིར་ཁུག་ཅིག །གུ་རུ་དྷེ་ཝ་ཌཱཀི་ནཱི། བི་དྷརྨཱ་པ་ལ་ས་པཱ་རི་བཱ་ར་དགྲ་འདྲེ་ཐམས་ཅད་ནི་ཏྲི་ཨངྐུ་ཤ་ཛ་ཛཿ ཛཿཧཱུྃ་བཾ་ཧོཿ ཞེས་པ་ལན་གསུམ་བརྗོད། དམིགས་བྱའི་སྙིང་ཁར་མཚོན་ཆའི་ཙཀྲ་ནི། །མུ་ཁྱུད་མེད་ཅིང་རྩིབས་རྩེ་གྲངས་མེད་པ། །དྲག་ཏུ་འཁོར་བའི་རྣམ་ཤེས་ཚེ་སྲོག་ལུས། །བཅད་གཏུབ་རྡུལ་ཕྲན་བཞིན་དུ་བརླག་པར་གྱུར། །ཡི་དམ་སྔགས་མཐར། ནི་ཏྲི་ཧུར་ཐུ་ཛཿ གནོད་བྱེད་སྒབ་འདྲེ་བྲེལ་ཕོངས་མཱ་ར་ཡ་ཙིཏྟ་ནན་ཧུར་ཐུ་ཛཿ ཡཀཱ་ནག་པོ་གནོད་བྱེད་ཀྱི་སྙིང་ལ་གཟིར་ཟློབྲེང་ཤག །སརྦ་ཀྲིག་ནན་ཛཿ ཡཀྵ་ཧུར་ཐུ་ཛཿ སྒབ་འདྲེ་མཱ་ར་ཡ་ཛཿཧཱུྃ་བཾ་ཧོཿ གནོད་བྱེད་ཨེ་ཏྲི་ཧུར་ཐུ་ཛཿ མཱ་ར་ཡ་རྦད་སརྦ་ཆུད། སྲོག་ལ་གཟེར་གཟེར། གནོད་བྱེད་ཨེ་སྒབ་འདྲེ་འབྱུང་པོ། སྲིད་པའི་འདྲེ་དགུ། གཙུག་ལག་གདོན་བཅུ། བདག་ཅག་འཁོར་དང་བཅས་པའི་ཚེ་བསོད་ནམས་ལ་གནོད་པ། སྒོ་ཡི་ནོར་ལ་གནོད་པ། ཕུག་གི་སྲས་ལ་གནོད་པ། མཚན་གྱི་བུ་ལ་གནོད་པ། རྟེན་གྱི་གྲོགས་ལ་གནོད་པ། ཁ་རྗེ་དབང་ཐང་ལ་གནོད་པ། བསྟན་པ་དང་སློབ་མའི་རིགས་དང་ཆོས་བརྒྱུད་ལ་གནོད་པར་
བྱེད་པའི་བགེགས་རིགས་བརྒྱ་དང་རྩ་བརྒྱད་སརྦ་མཱ་ར་ཡ་ནན་ནན་བྱེར་བྱེར་ཛ་ཛཿ ཞེས་ལན་གསུམ་མམ་བདུན་བརྗོད། འདི་ནི་དབང་དང་རྒྱས་པའི་ལྷ་བརྟེན་ནས། །དངོས་གྲུབ་སྒྲུབ་ཀྱང་སྒབ་འདྲེའི་གནོད་པ་ཡི། །གྲགས་གཡེར་ཆེ་ཞིང་བུ་ཡུག་བཞིན་བབ་ཀྱང་། །བཤེས་གཉེན་པ་ལ་གཏོ་ནང་བཅུད་ཆུང་བ། །མི་ཁ་མི་དྲོ་ཁ་སྨྲས་འོང་བ་སོགས། །ཐབས་འདི་བགྱིས་པས་བཟློག་པའི་མན་ངག་ཡིན། །དེ་ནས་གཏོར་མ་བདུད་རྩིས་བྲན་བྱས་ལ། །ཨོཾ་ཨ་མྲྀ་ཏེ་ཧཱུྃ་ཕཊ། བྷྲཱུཾ། རང་རང་ཡིད་མཐུན་སྣོད་ཀྱི་ནང་དུ་བཅུད། །ངོ་བོ་དགྲ་བགེགས་ཤ་ཁྲག་རྣམ་པ་ནི། །སོ་སོའི་དགྱེས་རྫས་ཟག་མེད་བདེ་བའི་ཚོགས། །རྒྱ་ཆེ་གཏིང་ཟབ་ཀུན་བཟང་མཆོད་སྤྲིན་གྱུར། །ཨོཾ་ཨཱཿཧཱུྃ་ཧ་ཧོ་ཧི༔ ཞེས་ལན་གསུམ་གྱིས་བརླབས། རོལ་མོ་བཅས་སོ། །ཌཱ་དྲིལ་ཙམ་མམ། རྡོ་དྲིལ་རྐྱང་པས་རུང་སྟེ། གཏོར་འབུལ་དངོས་ནི། ཧཱུྃ། བརྒྱུད་པ་དགུ་ལྡན་རྩ་བརྒྱུད་བླ་མ་དང་། །རྒྱལ་བ་རབ་འབྱམས་བྱང་སེམས་ཉན་རང་ཚོགས། །བསླུ་མེད་དཀོན་མཆོག་རིན་ཆེན་རྣམ་པ་གསུམ། །འདིར་གཤེགས་བརྒྱན་པའི་གཏོར་མ་འདི་བཞེས་ལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །ཕྱོགས་བཅུའི་སངས་
རྒྱས་སྲས་བཅས་དགྲ་བཅོམ་ཚོགས། །འཇིག་རྟེན་དབང་ཕྱུག་འཕགས་པ་སྤྱན་རས་གཟིགས། །སྒྲོལ་མ་དཀར་ལྗང་འོད་ཟེར་ཅན་མ་སོགས། །འཇིགས་པ་ཀུན་སྐྱོབ་ལྷ་ཚོགས་བརྒྱན་པའི་གཏོར་མ་འདི་བཞེས་ལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །ཁྱད་པར་རིག་འཛིན་ཆེན་པོ་པདྨ་འབྱུང་། །སྐུ་གསུམ་སྐུ་ལྔ་གུ་རུ་མཚན་བརྒྱད་དང་། །རྒྱ་གར་རིག་འཛིན་བརྒྱད་དང་རྗེ་འབངས་ཚོགས། །འདིར་གཤེགས་བརྒྱན་པའི་གཏོར་མ་འདི་བཞེས་ལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །རྒྱལ་བ་ཞི་ཁྲོ་སྒྲུབ་པ་བཀའ་བརྒྱད་ལྷ། །བདེ་གསང་དགྱེས་རྡོར་མཱ་ཡཱ་ཐོད་པ་དང་། །གཤིན་རྗེའི་གཤེད་པོ་དུས་འཁོར་ཆེན་པོའི་ཚོགས། །འདིར་གཤེགས་བརྒྱན་པའི་གཏོར་མ་འདི་བཞེས་ལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །རྟ་ཕག་ཡབ་ཡུམ་མཁའ་འགྲོ་གིང་ལ་སོགས། །བླ་མེད་རྣལ་འབྱོར་བྱ་སྤྱོད་རྒྱུད་སྡེ་བཞི། །ཐེག་པ་རིམ་དགུའི་ཡི་དམ་
དཀྱིལ་འཁོར་ལྷ། །འདིར་གཤེགས་བརྒྱན་པའི་གཏོར་མ་འདི་བཞེས་ལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །དབང་དྲག་པདྨ་རིགས་ལྔ་ཁྲོ་བོ་བཅུ། །གུ་རུ་དྲག་པོའི་ལྷ་ཚོགས་མ་ལུས་དང་། །ཕག་ཁྲོས་སེང་གསུམ་གནས་གསུམ་མཁའ་འགྲོའི་ཚོགས། །འདིར་གཤེགས་བརྒྱན་པའི་གཏོར་མ་འདི་བཞེས་ལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །ལེགས་ལྡན་ཚོགས་བདག་སྐུ་གསུང་ཐུགས་ཀྱི་མགོན། །ཕྱོགས་བཅུའི་མགོན་པོ་སྡེ་བརྒྱད་མགོན་པོ་དང་། །ལྷ་དམག་བྱེ་བ་དུང་ཕྱུར་འཁོར་བཅས་རྣམས། །འདིར་གཤེགས་བརྒྱན་པའི་གཏོར་མ་འདི་བཞེས་རྗེལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །ཤོ་ལོ་ཀ་འདི་གསར་དུ་བསྒྲིགས། །མ་ནིང་དཔལ་འབར་སྲོག་བདུད་ལེགས་ལྡན་ནག །སྐུ་གསུང་ཐུགས་ཡོན་ཕྲིན་ལས་མགོན་པོ་སོགས། །ཕྱག་བཞི་ཕྱག་དྲུག་གུར་ཞལ་བེར་ནག་ཅན། །འདིར་གཤེགས་བརྒྱན་པའི་གཏོར་མ་འདི་བཞེས་ལ། །རྣལ་འབྱོར་
ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །ཨ་གྷོ་གཙང་རིས་དཔལ་མགོན་བདུན་ཅུ་ལྔ། །དུད་སོལ་རང་བྱུང་དམག་ཟོར་དཔལ་ལྷ་མོ། །ཕུར་སྲུང་ལ་སོགས་མོ་རྒྱུད་ལྷ་མོ་རྣམས། །འདིར་གཤེགས་བརྒྱན་པའི་གཏོར་མ་འདི་བཞེས་ལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །ཞང་བློན་རྡོ་རྗེ་བདུད་འདུལ་སྡེ་བདུན་དང་། །གསོ་རིག་སྨན་གྱི་བཀའ་སྲུང་མ་ལུས་ཚོགས། །ལས་གཤིན་ཞིང་སྐྱོང་གཟའ་བརྒྱད་བེག་རྩེ་དམར། །ལྷ་སྲིན་སྡེ་བརྒྱད་གིང་ཆེན་བཅོ་བརྒྱད་དང་། །བརྟན་མ་བཅུ་གཉིས་དྲེགས་ཆེན་བཅོ་བརྒྱད་ལ། །འདིར་གཤེགས་བརྒྱན་པའི་གཏོར་མ་འདི་བཞེས་ལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །དགེ་བསྙེན་ཉེར་གཅིག་རྒྱལ་ཆེན་བཅོ་བརྒྱད་དང་། །ཡུལ་རིས་སྐྱོང་བའི་ལྷ་ཀླུ་གཞི་བདག་དང་། །འཇིག་རྟེན་འདས་དང་མ་འདས་སྲུང་མ་རྣམས། །འདིར་གཤེགས་བརྒྱན་པའི་གཏོར་མ་འདི་བཞེས་ལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་
གྱིས་གྲུབ་པར་མཛོད། །རྣལ་འབྱོར་བདག་གིས་དེང་ནས་བྱང་ཆུབ་བར། །ཁྱོད་བསྒྲུབ་ཁྱོད་གསོལ་ཁྱོད་མཆོད་ཁྱོད་བསྟེན་ན། །སྔོན་གྱི་ཞལ་བཞེས་དམ་བཅའོ་མ་གཡེལ་བར། །མ་གཡེལ་མ་འདའ་བརྩེ་གདུང་ཆེ་བར་མཛོད། །འགལ་རྐྱེན་བར་དུ་གཅོད་པའི་ཚོགས་ཞི་ཞིང་། །མི་ལ་ན་ཚ་ཕྱུགས་ལ་གོད་ཁ་དང་། །ཞིང་ལ་བཙའ་སད་སེར་བ་མི་འབྱུང་ཞིང་། །འཁོར་དང་ལོངས་སྤྱོད་རྒྱས་པ་ཉིད་དུ་མཛོད། །མདུན་བསུ་བློ་ནས་སྐྱོལ་མ་རྒྱབ་ནས་རྟེན། །ལེགས་ཁ་དཔའ་ཁ་ཟུང་ལ་རྒྱལ་ཁ་གཏོད། །མཐུ་དཔུང་སྡོང་གྲོགས་རྒྱབ་རྟེན་མ་གཡེལ་བར། །ནད་ཡམས་འཁྲུག་རྩོད་མ་ལུས་མི་འབྱུང་མཛོད། །ལམ་བསྒྲོད་བདེ་ཞིང་དགྲ་རྐུན་ཇག་གསུམ་དབེན། །མཐོང་ཚད་ཀུན་གྱིས་བསྐུལ་ཞིང་ཡོངས་ཀྱིས་བསྟོད། །ལུས་སེམས་དབང་བསྒྱུར་དགོས་འདོད་ཆར་བཞིན་ཕོབ། །རྙེད་པ་ཆེན་པོ་རྒྱས་ཤིང་ཉམས་བདེ་མཛོད། །མདོར་ན་གང་བཅོལ་ལས་ཀྱི་ཕྲིན་ལས་རྣམས། །དུས་འདིར་མྱུར་དུ་སྒྲུབས་ཤིག་ས་མ་ཡ། །ཞེས་མཆོད་སྔགས་ནི། ཨོཾ་ཨཱཿཧཱུྃ། མ་ཧཱ་གུ་རུ་དེ་ཝ་ཌཱཀི་ནཱི་བྷི་དྷརྨཱ་པཱ་ལ་ལོ་ཀ་པ་ལ་བྷུ་མི་པ་ཏི་ས་པཱ་རི་ཝཱ་ར་ཨི་དཾ་བ་ལིཾ་ཏ་
སརྦ་པཱུ་ཛ་ལ་ཁ་ཁ་ཁཱ་ཧི་ཁཱ་ཧི། སརྦ་སིདྡྷི་མེ་པྲ་ཡཙྪནྟ་མ་མ་སརྦ་སིདྡྷི་ཨ་མོ་གྷ་ཡ་སྭཱ་ཧཱ། ཞེས་ལྷ་ཚོགས་སྤྱི་ལ་གཏོར་མ་ཆེ་བ་དེ་ཉིད་བསྔོ། དེ་ནས་བྱེ་བྲག་ཏུ་ཛ་དམར་ནི། ཧྲཱིཿདབང་གི་རང་བཞིན་ཛ་དམར་པད་རག་མདོག །ཀུ་རུ་ཀུལླེ་ཡུམ་དང་བཅས་པ་དང་། །ཛཾ་ལྷ་གནོད་སྦྱིན་ཕོ་ཉ་གྲངས་མེད་བཅས། །ཁམས་གསུམ་དབང་དུ་བསྡུས་པའི་མཐུ་སྟོབས་ཆེ། །འདིར་བྱོན་ཟག་མེད་གཏོར་མ་བདུད་རྩིའི་མཚོ། །དཀོར་ནོར་རིན་ཆེན་མང་པོ་ཁྱོད་ལ་འབུལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །ཁྱད་པར་འགྲོ་བ་མི་དང་མི་མིན་སོགས། །མཐོང་ཐོས་ཙམ་གྱིས་ཀུན་གྱིས་ཡིད་བསྐུལ་ནས། །ཟས་ནོར་ལོངས་སྤྱོད་འབད་མེད་དབང་དུ་བསྡུས། །འཁོར་ནོར་ལོངས་སྤྱོད་རྒྱས་པར་མཛད་དུ་གསོལ། །ཞེས་དང་། མདུང་དམར་ཅན་ནི། བོ། ནོར་སྐྱོང་རྒྱལ་པོ་གནོད་སྦྱིན་མདུང་དམར་ཅན། །ཕོ་ཉ་མངག་གཞུག་གནོད་སྦྱིན་འབུམ་དང་བཅས། །དབང་གི་བདག་ཉིད་གཡུལ་ལས་རྣམ་རྒྱལ་ལྷ། །སྔོན་གྱི་ཐུགས་དམ་ཞལ་བཞེས་དྲན་མཛོད་ལ། །འདིར་བྱོན་དམར་གྱི་གཏོར་མ་སྨན་རཀ་མཚོ། །དཀོར་ནོར་
སྤྱན་གཟིགས་རིན་ཆེན་མཆོད་པ་འབུལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །ཁྱོད་ཀྱི་ཕོ་ཉ་མྱུར་མགྱོགས་ལྡན་པ་རྣམས། །འགྲོ་བ་ཕོ་མོའི་སྙིང་དུ་རབ་ཞུགས་ཏེ། །སྣང་སེམས་དབང་བསྡུས་ཟས་ནོར་ཆར་ལྟར་ཕོབ། །འཛད་མེད་གཏེར་གྱི་དངོས་གྲུབ་བསྩལ་དུ་གསོལ། །ཞེས་དང་། ལྷ་ཆེན་དབང་ཕྱུག་ནི། ཛཿ ལེགས་ལྡན་ལྷ་ཆེན་དབང་ཕྱུག་སྐུ་མདོག་དམར། །ཨུ་མ་དེ་ཝི་དབང་གི་འཁོར་དང་བཅས། །ཁམས་གསུམ་དབང་བསྒྱུར་རླུང་ཞགས་བསྒྲུབ་པའི་ལྷ། །འཇིག་རྟེན་དབང་ཕྱུག་པད་འབྱུང་བཀའ་བཞིན་དུ། །འདིར་གཤེགས་ཟག་མེད་གཏོར་མ་རྒྱན་གྱིས་བརྒྱན། །སྨན་རཀ་ཛ་གད་ཕུད་ཀྱིས་མཆོད་པ་འབུལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །རྣལ་འབྱོར་བདག་ཉིད་འགྲོ་བའི་ཡུལ་ཕྱོགས་ཀྱི། །ཆེ་བཙན་དྲག་པོ་མི་དང་མི་མིན་སོགས། །ལྕགས་ཀྱུས་ཟུངས་ལ་རླུང་གི་ཞགས་པས་ཆིངས། །མོས་པ་རྣམ་བཞིས་དབང་དུ་འདུ་བར་མཛོད། །ཅེས་དང་། ལྷ་ཆེན་དབང་ཕྱུག་མཇུག་ཏུ་གནོད་སྦྱིན་ཤན་
དམར་མཆན། ཨོཾ་ཛཾ་བྷ་ལ་ཛ་ལེནྡྲ་ཡེ་དྷ་ན་མེ་དྷི་ཧཱུྃསྭཱ་ཧཱ། ཨོཾ་བཻ་ཤྲ་མ་ཎ་ཡེ་སྭཱ་ཧཱ། ཨོཾ་མ་ཧཱ་དེ་བ་ཛཿ ས་པཱ་རི་ཝཱ་ར་ཨི་དམ་བ་ལིཾ་ཏ་སརྦ་པཱུ་ཛ་ཁ་ཁ་ཁཱ་ཧི་ཁཱ་ཧི། མ་མ་སརྦ་ལོ་ཀ་ཝ་ཤཾ་ཀུ་རུ་ཧཱུྃསྭཱ་ཧཱ༔ ཞེས་འབུལ། གལ་ཆེན་ཐུན་མོང་མ་ཡིན་པའི་དབང་སྡུད་ཀྱི་དམིགས་པ་གནད་དང་སྦྱར་ཏེ། དབང་སྔགས་རྣམས་མན་ངག་བཞིན་བཟླ། ༈ ད་ནི་དབང་སྡུད་ཀྱི་དམིགས་པའི་ལྷ་ལ་ཕྲིན་ལས་བཅོལ་བ་ནི། ཇི་སེར་ནི། བོ། བྱང་ཕྱོགས་རིན་ཆེན་གཏེར་གྱི་གཞལ་ཡས་ནས། །ནོར་གྱི་བདག་པོ་ཨཱརླ་ཛཾ་བྷ་ལ། །དབུལ་བ་སེལ་བྱེད་ལྷ་མོ་ནོར་རྒྱུན་མ། །འཁོར་དུ་ནོར་ལྷ་ཕོ་མོའི་ཚོགས་དང་བཅས། །འདིར་བྱོན་ཟག་མེད་གཏོར་མ་བདུད་རྩིའི་མཚོ། །དཀོར་ནོར་སྤྱན་གཟིགས་རིན་ཆེན་མཆོད་པ་འབུལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །ཁྱད་པར་བདག་གི་བང་མཛོད་ཕྱི་ནང་དུ། །བསོད་ནམས་ནོར་གྱི་དངོས་གྲུབ་བསྩལ་དུ་གསོལ། །འཛམ་གླིང་གཏེར་གྱི་དངོས་གྲུབ་བསྩལ་དུ་གསོལ། །འཛད་མེད་གཡང་གི་དངོས་གྲུབ་བསྩལ་དུ་གསོལ། །ཞེས་དང་། ཛཾ་ནག་ནི། ཧཱུྃ། ཛཾ་ལྷ་ནག་པོ་སྟོང་ཟིལ་ལྷུན་པོའི་བདག །འཛད་
མེད་ནམ་མཁའི་མཛོད་ལ་མངའ་བརྙེས་པ། །ནོར་སྐྱུགས་གནོད་སྦྱིན་བྱེ་བ་འབུམ་དང་བཅས། །སྔོན་ཚེ་རྒྱལ་བའི་སྤྱན་སྔར་ཞལ་བཞེས་བཞིན། །འདིར་བྱོན་ཟག་མེད་གཏོར་མ་བདུད་རྩིའི་མཚོ། །དཀོར་ནོར་སྤྱན་གཟིགས་རིན་ཆེན་མཆོད་པ་འབུལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་འགྲུབ་པར་མཛོད། །བདག་གི་མི་ནོར་ཟས་གོས་ལོངས་སྤྱོད་ལ། །བརྗིད་ཅིང་བག་དྲོ་སྣུམ་ཞིང་བཅུད་ཆགས་པ། །མི་ཟད་དགོས་འདོད་ཐམས་ཅད་ལྷུན་གྲུབ་པའི། །ཕྱུ་དང་གཡང་གི་དངོས་གྲུབ་རྒྱ་ཆེན་ཕོབ། །ཅེས་དང་། །ཛ་ནག་མཇུག་ཏུ་ཇི་ལྗང་འདོན་མཁན། ཛཾ་དཀར་ལྷ་ལྔ་ནི། ཧཱུྃ། འཇིག་རྟེན་དབང་ཕྱུག་ཕྲིན་ལས་ཟློས་གར་ལས། །ལེགས་བྱུང་སྨུག་འཛིན་དཀར་པོ་འབྲུག་ལ་ཞོན། །འཁོར་དུ་ཌཱཀྐི་མཐིང་སེར་དམར་ལྗང་མདོག །ཕྲིན་ལས་བཞི་ཡི་ལྷ་མོའི་ཚོགས་དང་བཅས། །འདིར་བྱོན་ཟག་མེད་གཏོར་མ་བདུད་རྩིའི་མཚོ། །དཀོར་ནོར་སྤྱན་གཟིགས་རིན་ཆེན་མཆོད་པ་འབུལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །བདག་ལ་ཚེ་
དང་བསོད་ནམས་ཁ་རྗེ་ནོར། །དབང་ཐང་མཁོ་དགུའི་ཡོ་བྱད་མ་ལུས་པ། །ཁམས་གསུམ་སྲིད་པ་གསུམ་གྱི་གཡང་སྡུས་ལ། །དུས་འདིར་མྱུར་བ་ཉིད་དུ་བསྩལ་དུ་གསོལ། །ཞེས་དང་། གནོད་སྦྱིན་ཨ་པར་ཙི་ཏ་དང་། ཡེ་ཤེས་གྲགས་ནི། ཧཱུྃ། གནོད་སྦྱིན་དབང་པོ་གཞན་གྱིས་མི་ཐུབ་པ། །ནོར་སྟེར་དབང་པོ་བྲན་འཁོར་ཕོ་ཉའི་ཚོགས། །དགེ་བསྙེན་ཆེན་པོ་ནོར་བདག་ཡེ་ཤེས་གྲགས། །འཇིག་རྟེན་ནོར་ལྷའི་དཔུང་ཚོགས་དང་བཅས་ལ། །འདིར་བྱོན་ཟག་མེད་གཏོར་མ་བདུད་རྩིའི་མཚོ། །འབྲུ་སྨན་དཀོར་ནོར་རིན་ཆེན་མཆོད་པ་འབུལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །སྣང་བ་མཐའ་ཡས་པདྨའི་བཀའ་བཞིན་དུ། །མི་ཕྱུགས་ཟས་ནོར་ར་ལུག་གཡང་ཁུག་ལ། །འགྲོ་བ་ཕོ་མོའི་སྣང་སེམས་རབ་བསྐུལ་ནས། །རིན་ཆེན་གཏེར་མཛོད་མྱུར་དུ་རྒྱས་པར་མཛོད། །ཅེས་དང་། རེ་མནྟ་ཉི་མའི་སྙིང་པོ་དང་། ལུས་ངན་པོ་ནི། །ཧཱུྃ༔ ཅང་ཤེས་སྐྱོང་བའི་གནོད་སྦྱིན་ཀུ་བེ་ར། །རྟ་ལྷའི་རྒྱལ་པོ་ཨཱརླ་རེ་མན། །ཉི་མའི་སྙིང་པོ་ལ་སོགས་གནོད་སྦྱིན་གྱི། །ཕོ་ཉ་མངག་གཞུག་གཏེར་གྱི་སྲུང་མའི་
ཚོགས། །འདིར་གཤེགས་དམར་གྱི་གཏོར་མ་ཇ་ཆང་ཕུད། །འབྲུ་ཟས་དཀོར་ནོར་ལོངས་སྤྱོད་མཆོད་པ་འབུལ། །རྣལ་འབྱོར་ལམ་གྱི་བར་ཆད་ཞི་བ་དང། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །རྣལ་འབྱོར་བདག་གི་རྐང་བཞི་ཅང་ཤེས་རྟ། །སྲུང་སྐྱོབ་འཕེལ་རྒྱས་འགྲོ་བའི་རྔོག་ཆགས་གཡང་། །མ་ལུས་བདག་གིས་དབང་དུ་འདུ་བ་དང་། །མི་ཟད་གཏེར་གྱི་དངོས་གྲུབ་བསྩལ་དུ་གསོལ། །ཞེས་དང་། ༀ་ཛཾ་བྷ་ལ་ཛ་ལེནྡྲ་ཡེ་སྭཱ་ཧཱ། ཨོཾ་ཛ་ལཾ་སྭཱ་ཧཱ། ཨོཾ་པདྨ་ཀྲོ་དྷ་ཨཱརྱ་ཛཾ་བྷ་ལ་ཧྲི་ད་ཡ་ཧཱུྃ་ཕཊ། ཨ་པ་ར་ཙིཏྟ་ཛྷཱ་ན་ཀཱིརྟི་ཡ། ཀུ་བེ་ར། ཨཱརླ་རེ་མན། ས་པཱ་རི་ཝཱ་ར་ཨི་དམ་བ་ལི་ཏ་སརྦ་མ་ཧཱ་པཱུ་ཛ་ཁ་ཁ་ཁཱ་ཧི་ཁཱ་ཧི། མ་མ་སིདྡྷི་ས་མ་ཡ་ཕ་ལ་བསྡུས་བསྡུས་ཐམས་ཅད་བདག་ལ་དུང་དུང་སྭཱ་ཧཱ། ཞེས་ཕུལ་དེ་རྣམས་ནི་རྒྱས་པའི་ལྷ་ལ་ཕྲིན་ལས་བཅོལ་བའོ། །མགོན་པོ་དུར་ཁྲོད་བདག་པོ་ནི། ཧཱུྃ། ཨོ་རྒྱན་དུར་ཁྲོད་སྐྱོང་བའི་ནོར་བདག་ཆེ། །ཀེང་རུས་མགོན་པོ་དཀར་པོ་ཡབ་ཡུམ་ནི། །ཤ་ཟ་མཁའ་འགྲོ་རྒྱ་མཚོའི་ཚོགས་དང་བཅས། །འཁོར་ལོ་སྡོམ་པ་ཡབ་ཡུམ་པད་འབྱུང་བཀའ། །དྲན་པར་མཛད་ལ་གནས་འདིར་
གཤེགས་སུ་གསོལ། །ཤ་ཁྲག་དམར་གྱི་བརྒྱན་པའི་གཏོར་མ་བཞེས། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །རྣལ་འབྱོར་བདག་གི་ལོངས་སྤྱོད་དཀོར་ནོར་ལ། །དགྲ་ཇག་རྐུན་གསུམ་ཐལ་བ་རྡུལ་བཞིན་རློགས། །ཁམས་གསུམ་དབང་སྡུས་ཟས་ནོར་དངོས་གྲུབ་སྩོལ། །མ་གཡེལ་སྲུང་མས་མེལ་ཚེ་མཛད་དུ་གསོལ། །ཞེས་དང་། ངས་ནུས་མ་ནི། བྷྱོ། དུར་ཁྲོད་གནས་དང་ཉེར་བཞིའི་ཡུལ་སྐྱོང་བའི། །དཀོར་གྱི་བདག་པོ་རྡོ་རྗེ་ངས་ནུས་མ། །འདིར་གཤེགས་དམར་གྱི་གཏོར་མ་སྨན་རཀ་ཆང་། །དམ་རྫས་རྣམ་པ་དུ་མའི་མཆོད་པ་འབུལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །རྣལ་འབྱོར་བདག་གིས་དཀོར་ནོར་ཁབ་སྐུད་ཅིག །གཞན་ལ་མ་བསྐུལ་སྲུང་སྐྱོབ་འཕེལ་རྒྱས་མཛོད། །ཅེས་དང་། དཀོར་སྲུང་རྒྱལ་པོ་སྐུ་ལྔ་ནི། ཧཱུྃ། རྒྱལ་པོ་ཆེན་པོ་གནོད་སྦྱིན་པེ་ཧར་ཆེ། །སྐུ་ལྔ་ཡབ་ཡུམ་བློན་འབངས་འཁོར་ཚོགས་བཅས། །འདིར་བྱོན་དམར་གྱི་གཏོར་མ་ཤ་ཁྲག་ཆང་། །སྤྱན་གཟིགས་དཀོར་ནོར་དུ་མའི་མཆོད་པ་
འབུལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །ང་ཡི་ལྷ་ཆ་དཀོར་ཆ་ཟས་ནོར་བཅས། །བཅོལ་ཏད་དོ་གཡར་དམ་མ་གཡེལ་ཅིག །འགྲོ་བ་ཀུན་གྱི་ཡིད་བསྐུལ་ཟས་ནོར་རྣམས། །མྱུར་དུ་ལོངས་ལ་ཤུགས་ཀྱིས་འདུ་བར་མཛོད། །ཅེས་དང་། ཨོཾ་ཧི་རཱ་ཛ་གྷི་རཱ་ཛ་ཀུ་མ་ཀུ་མ་ཊུ་ཐིས་སྭཱ་ཧཱ། མ་མ་ར་ལི་པྲ་མ་ཛ་ཛཿ རཱ་ཛ་གིང་ཀ་ར་ས་པཱ་རི་ཝཱ་ར་མ་ཧཱ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། དགྲ་རྐུན་ཇག་གསུམ་ཐམས་ཅད་མཱ་ར་ཡ་ཆིངས་ཆིངས་སརྦ་ཨུཏ་ཙ་ཏ་ཡ་ཕཊ། མ་མ་རཀྵ་རཀྵ་ཀུ་རུ་ཡེ་སྭཱ་ཧཱ། ཞེས་ཕུལ་དེ་རྣམས་ནི་སྲུང་སྐྱོབ་ལྷ་ལ་ཕྲིན་ལས་བཅོལ་བའོ། །གཡུ་སྒྲོན་མ། ཚེ་རིང་མ། སྙིང་དྲུང་བཅས་ནི། ཀྱི།ལྷ་སྨན་རྒྱལ་མོ་རྡོ་རྗེ་གཡུ་སྒྲོན་མ། །འཁོར་དུ་པྲ་སྟོན་སྨན་མོ་འབུམ་དང་བཅས། །ཇོ་མོ་འཕྲུལ་གྱི་རྒྱལ་མོ་ཚེ་རིང་མ། །མཐིང་གི་ཞལ་བཟང་ལ་སོགས་པྲ་ཡི་བདག །སྙིང་དྲུང་བཙན་པོ་པྲ་བདག་རྣོ་མཐོང་རྒྱལ། །སྣང་གསལ་པྲ་ཡི་ལྷ་ཚོགས་ཐམས་ཅད་ཀུན། །འདིར་བྱོན་དཀར་གསུམ་གཏོར་མ་རྒྱན་དང་ལྡན། །ཇ་ཆང་གསེར་སྐྱེམས་ཕུད་ཀྱིས་མཆོད་པ་འབུལ། །རྣལ་འབྱོར་
ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །རྣལ་འབྱོར་བདག་གིས་གང་སྨྲས་གང་འདོད་ཀུན། །མངོན་ཤེས་འཆུག་མེད་རི་མོ་ཇི་བཞིན་རྒྱུ། །ཅི་བྱས་ལམ་འགྲོ་གང་བཤད་རྣོ་མཐོང་བའི། །དངོས་གྲུབ་མ་ལུས་ད་ལྟ་མྱུར་སྒྲུབས་ཤིག །ཅེས་དང་། ཨོཾ་མ་མ་ཌཱཀི་མ་མ་ཌཀི་ནཱི་དཱ་ན་ར་ཙ་ས་པཱ་རི་ཝཱ་ར་ཨི་དཾ་བ་ལིཾ་ཏ་སརྦ་པཱུ་ཛ་ཁ་ཁ་ཁཱ་ཧི་ཁཱ་ཧི། ཨོཾ་མ་མ་ཨ་ལ་ཀ་ཁ་ཡ། ཁྲ་ཁྲ་ཀ་ཁ་ཡ། ཙཀྲ་ཀ་ཁ་ཡ། པྲ་མོ་ཤག །པྲ་མོ་སྟོན། ཆུ་བུར་མིག་གི་སྒོ་སོལ། རྣོ་མཐོང་བ་ལྷ་ཡི་ཡུལ་སྟོན། རྣོ་མཐོང་གསལ་བའི་སྒྲོན་མེ་སྦོར་སྭཱ་ཧཱ། ཞེས་ཕུལ། དེ་རྣམས་རྣོ་མཐོང་བའི་ལྷ་ལ་ཕྲིན་ལས་བཅོལ་བའོ། །དམ་ཅན་ནི། ཀྱཻ། དམ་ཅན་སྐྱེས་བུ་རྡོ་རྗེ་ལེགས་པ་རྩལ། །མཆེད་འཁོར་སུམ་བརྒྱ་དྲུག་ཅུ་འཁོར་དང་བཅས། །འདིར་གཤེགས་ཤ་ཁྲག་དམར་གྱི་གཏོར་མ་དང་། །སྨན་རཀ་ཇ་ཆང་ཕུད་ཀྱི་མཆོད་པ་འབུལ། །རྣལ་འབྱོར་ལམ་གྱི་བར་ཆད་ཞི་བ་དང། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །ཁྱོད་ཀྱི་མཐུ་སྟོབས་རྫུ་འཕྲུལ་དཔག་མེད་ཀྱིས། །འགྲོ་བའི་ཡིད་བསྐུལ་དམག་ཇག་ཁེ་སྤོག་འགྲུལ། །ཀུན་ལ་
ཐོགས་མེད་དཔའ་གདིང་ལེགས་དང་སྤྱོད། །མ་གཡེལ་རེམ་ཞིག་ཕྲིན་ལས་མྱུར་དུ་སྒྲུབས། །ཞེས་དང་། གླིང་རྗེ་གེ་སར་རྒྱལ་པོ་ནི། ཀྱཻ། འཛམ་གླིང་སེང་ཆེན་གེ་སར་རྒྱལ་པོ་ནི། །སྐྱེས་བུ་དོན་གྲུབ་དགྲ་བླའི་དམག་དཔུང་བཅས། །འདིར་བྱོན་དཀར་གསུམ་གཏོར་མ་རྒྱན་དང་ལྡན། །ཇ་ཆང་གསེར་སྐྱེམས་ཕུད་ཀྱི་མཆོད་པ་འབུལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །ལམ་གྱི་བར་ཆད་གྲ་ཇག་ཆོམ་རྐུན་སོགས། །མ་ལུས་རྡུལ་ཕྲན་བཞིན་དུ་བརླག་པ་དང་། །གང་བསམ་ཐོགས་མེད་འགྲུབ་པའི་རྒྱལ་ཁ་ཐོབ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཅེས་དང་། འགོ་བའི་ལྷ་ལྔ་ནི། ཀྱཻ། ཕ་ལྷ་མ་ལྷ་ཞང་ལྷ་དགྲ་ལྷ་དང་། །སྲོག་ལྷ་ཕྲག་ལྷ་འགོ་བའི་ལྷ་མཆོག་ཀུན། །འདིར་བྱོན་དཀར་གསུམ་གཏོར་མ་རྒྱན་དང་ལྡན། །ཇ་ཆང་གསེར་སྐྱེམས་ཕུད་ཀྱི་མཆོད་པ་འབུལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །བདག་ནི་འགྲོ་སྡོད་གཞི་བྱེས་དུས་ཀུན་ཏུ། །སྲུང་སྐྱོབ་སྡོང་གྲོགས་རྒྱབ་རྟེན་མ་གཡེལ་
ཅིག །ཅེས་དང་། གཞི་བདག་ནི། ཀྱཻ། ཡུལ་འདིའི་གཞི་བདག་རྒེ་ཞེས་བྱ་བ། །ཡབ་ཡུམ་བློན་འབངས་བྲན་གཡོག་འཁོར་དང་བཅས། །ཁྱད་པར་གནས་འདིའི་ས་མིག་ཉེ་འཁོར་ལ། །ལྷ་ཀླུ་བདུད་བཙན་མ་མོ་ཐེའུ་རིང་སོགས། །གནས་བདག་གཞི་བདག་མ་ལུས་ཡོད་དོ་ཅོག །ཤཱཀ་ཐུབ་པདྨ་འབྱུང་གནས་བཀའ་བཞིན་དུ། །འདིར་བྱོན་ཟག་མེད་གཏོར་མ་རྒྱན་གྱིས་བརྒྱན། །ཇ་ཆང་གསེར་སྐྱེམས་ཕུད་ཀྱི་མཆོད་པ་འབུལ། །རྣལ་འབྱོར་ལམ་གྱི་བར་ཆད་ཞི་བ་དང་། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །རྣལ་འབྱོར་བདག་ཅག་ཡུལ་འདིའི་འགྲོ་སྡོད་ལ། །ཀོ་ལོང་རུ་ང་ཕྲག་དོག་མ་མཛད་པར། །མགོན་སྐྱོབས་དཔུང་གཉན་དཔའ་ཡ་དཔུང་རོགས་གྱིས། །སྙན་པའི་དར་ཕྱོར་གྲགས་པའི་དུང་བུས་ལ། །ཁྱེད་རྣམས་སྐྱབས་མཆིས་ཡུལ་འདིའི་མི་སྡེ་ཀུན། །རྣལ་འབྱོར་བདག་ལ་མྱུར་དུ་འདུན་ཅིང་འཁོར། །ཟས་ནོར་ལོངས་སྤྱོད་ཆར་བཞིན་འབེབས་པ་སོགས། །བཅོལ་བའི་ཕྲིན་ལས་མ་གཡེལ་མྱུར་དུ་མཛོད། །ཅེས་དང་། ༀ་བཛྲ་སཱ་དྷུ་ས་མ་ཡ་ཧཱུྃ་ཕཊ། ཨོཾ་ཨ་ཏིང་མི་བུ་གེ་སར་རྒྱལ་པོ་ཧཱུྃ། དེ་བ་པཉྩ་བྷུ་མི་པ་ཏི་
ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། མ་མ་སརྦ་སིདྡྷི་ཀརྨ་ཨ་མོ་གྷ་ཀུརླན་སྭཱ་ཧཱ། ཞེས་ཕུལ། དེ་རྣམས་ནི་འཕྲལ་གྱི་ལས་ལ་མྱུར་བའི་ལྷ་རྣམས་ལ་ཕྲིན་ལས་བཅོལ་བའོ། །དེ་ནས་གཏོར་མ་བཏེག་ལ། ཕུད་སྣོད་འཐོར་ཞིང་། ཧོཿ དགོངས་སུ་གསོལ་ལོ། །གསོལ་ལོ། །མཆོད་དོ། །བསྔོའོ། །འབུལ་ལོ། །འདྲེན་ནོ། །བཞེས་སུ་གསོལ། བླ་མ་ཡི་དམ་མཁའ་འགྲོ་དམ་ཅན་མཐུ་ལྡན་གྱི་སྲུང་མ་མཐུ་དང་རྫུ་འཕྲུལ་གྱི་བདག་པོ་ཁྱེད་རྣམས་བདག་གི་བྱང་ཆུབ་སྒྲུབ་པའི་མཐུ་རྐྱེན་དང་། ཁྱེད་རྣམས་བསྒྲུབ་ཅིང་མཆོད་པའི་ཡོ་བྱད་དང་ལྡན་པའི་མི་སྙིང་བསྒུལ། མི་སེམས་གཡོས་ཤིག །སྣང་བ་སྒྱུར་ཅིག །བདག་ལ་གཡང་ཅན་གྱི་ནོར་སྩོལ་ཅིག །བརྗིད་ཅན་གྱི་གོས་བཀོན་ཅིག །བཅུད་ཅན་གྱི་ཟས་སྡུས་ཤིག །འབྲུ་དང་ནོར་གྱི་ཆར་ཕོབ་ཅིག །མཐུ་ལྡན་ཁྱེད་རྣམས་རེམ་ཞིག །མཐུ་དང་རྫུ་འཕྲུལ་རྩལ་དང་ནུས་པ་ཅི་འདུག་ད་རེས་བལྟའོ། །རྣལ་འབྱོར་བཅོལ་བའི་ཕྲིན་ལས་ད་ལྟ་ཉིད་དུ་སྒྲུབས་ཤིག །ཧཱུྃ། སྐྱབས་ཀྱི་དམ་པ་ཁྱེད་རྣམས་ཀྱིས། །རྣལ་འབྱོར་འདོད་པའི་རེ་བ་སྐོངས། །ཞི་རྒྱས་དབང་དང་མངོན་སྤྱོད་ཀྱི། །ལས་ཀྱི་དངོས་
གྲུབ་མྱུར་དུ་སྩོལ། །མཐུ་ལྡན་རྣམས་ཀྱི་རྫུ་འཕྲུལ་གྱིས། །སྲིད་པ་གསུམ་ཡང་དབང་དུ་སྡུས། །འགྲོ་བ་མི་ཡི་རྣམ་ཤེས་ཁུག །སྦྱིན་བདག་རྣམས་ཀྱི་སྙིང་ལག་བསྐུལ། །གཡང་ཅན་ནོར་དང་བརྗིད་ཅན་གོས། །བཅུད་ཅན་ཟས་ལ་སོགས་པ་ཡི། །བདག་ལ་ཟས་ནོར་ལོངས་སྤྱོད་ཀྱི། །དངོས་གྲུབ་མ་ལུས་བསྩལ་དུ་གསོལ། །བདག་གི་སྲུང་མ་ཁྱེད་རྣམས་ཀྱིས། །ཐུགས་དམ་གནད་ནས་བསྐུལ་བའི་ཚེ། །ཁྱེད་རྣམས་སྤྲུལ་པའི་ཕོ་ཉ་ནི། །འགྲོ་བ་མི་ཡི་སྙིང་ལ་ཞུགས། །རྣམ་ཤེས་བསྒྱུར་ལ་དབང་དུ་བསྡུས། འཇིག་རྟེན་ཁམས་ཀྱི་ལོངས་སྤྱོད་རྣམས། །མ་ལུས་ཐམས་ཅད་དབང་དུ་བསྡུས། །སྒྲུབ་པ་པོ་ལ་དངོས་གྲུབ་སྩོལ། །ཅེས་བརྗོད་གཏོར་མ་འགྲོ་ཕྱོགས་གཙང་སར་འབུལ། ཁྱི་དང་སློང་མོར་མི་སྦྱིན་དམ་ཚིག་ཡིན། །དུས་རྒྱུན་ནངས་སྔ་དགོང་མོ་གཉིས་ཀ་འམ། །གང་རུང་རྒྱུན་དུ་འདི་ལྟར་བརྩོན་བྱས་ན། །ཐེ་ཚོམ་མེད་ན་དངོས་གྲུབ་མྱུར་ཐོབ་འབྱུང་། །གནང་སྦྱིན་གང་རུང་དགེ་ཕྱོགས་གཏོང་བ་གནད། །ལོག་མཚོའི་མ་སྦག་བྱང་ཆུབ་ལམ་དུ་འགྱུར། །དེ་སྐད་བླ་མ་པདྨ་ཆོས་དབང་དང་། །སྔགས་འཆང་གུ་རུ་སྐྱབས་སོགས་དོན་གཉེར་འགས། །ལམ་གཏོར་ཧ་ཀྱང་རྒྱས་མིན་བསྡུས་པ་མིན། །གནད་དོན་ཤིན་ཏུ་གསལ་བ་དགོས་ཞེས་ངོར། །སྔགས་འཆང་བརྫུ་
བག་ཆགས་མེད་ཨ་རཱ་གས། །ཐུན་མཚམས་ཤིག་ཏུ་བགྱིས་པའི་དགེ་བ་དེས། །གང་བྱས་ལམ་དུ་འགྲོ་ཞིང་བྱང་ཆུབ་བསྒྲོད། །མཐར་ཐུག་པདྨ་འོད་དུ་སྐྱེ་བར་ཤོག །བཀྲ་ཤིས་ཤོག །ཞལ་དྲོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།