གཏོ་འབོད་གསང་བ་ཀུན་འདུས།
གཏོ་འབོད་གསང་བ་ཀུན་འདུས་བཞུགས་པའི་དབུ་ཕྱོགས་ལགས་སོ། །
མཉྫ་ཤི་ལ་ན་མོ། ཀོང་ཙེ་རྒྱལ་པོས་མཛད་པའི་གཏོ་ཐམས་ཅད་ཀྱི་གོང་སེལ་སྲིད་པའི་གཏོ་འབོད་ཆེན་མོ། སྤར་ཁ་ཐམས་ཅད་ཀྱི་སྤྱི་གཞུང་ཆེན་པོ་ཡིན་ཏེ། དེ་ལ་བཅའ་ཐབས་ནི་སོ་སོའི་གཞུང་ལས་བྱུང་བ་ལྟར་བྱས་ལ་འདི་སྐད་དོ།། ཀྱཻ། ཉོན་ཅིག་ལྷ་སྲིན་སྡེ་བརྒྱད་རྣམས། །གནམ་ལོ་རྒྱལ་པོའི་མངའ་འོག་ན། །ཟླ་བ་བློན་པོའི་མཆན་འོག་ན། །ཞིག་དང་ཟ་མའི་དུས་ཚོད་ལ། །གཏོ་མཁན་རྒྱལ་པོས་གཏོ་བྱེད་ན། །དཔྱད་མཁན་རྒྱལ་པོས་དཔྱད་ཅིག་བྱེད་། །འབྱུང་བ་འཁྲུག་པ་ང་ཡིས་བསྡེབ། །གཏོ་འདི་དང་པོ་སུས་མཛད་ན། །སྔོན་གྱི་བསྐལ་པ་དང་པོ་ལ། །འོག་མིན་ཆོས་ཀྱི་ཕོ་བྲང་
ནས། །འཕགས་པ་འཇམ་དཔལ་གཞོན་ནུས་མཛད། །བར་གྱི་བསྐལ་པ་དབུས་མ་ལ། །དགའ་ལྡན་ལྷ་ཡི་ཕོ་བྲང་ན། །རྣམ་པར་རྒྱལ་བའི་ཁང་བཟང་དུ། །ལྷ་ཡི་རྒྱལ་པོ་ཚངས་པས་མཛད། །དེ་ནས་བསྐལ་པ་ཐ་མ་ལ། །རི་བོ་མཆོག་རབ་སྟེང་ཤོད་ན། །ཀླུ་ཤིང་ཏ་ལའི་ལོ་མ་ལ། །ལྷ་མོ་རྣམ་རྒྱལ་མ་ཡིས་མཛད། །དེ་ནས་གཏོ་འདི་སུས་མཛད་ན། །རི་བོ་མཆོག་རབ་སྐྱེད་པ་ན། །རྒྱལ་ཆེན་རིགས་བཞི་ལྷ་ཡིས་མཛད། །དེ་ནས་གཏོ་འདི་སུས་མཛད་ན། །རི་བོ་མཆོག་རབ་རྩ་བ་རུ། །ཀོང་ཙེ་འཕྲུལ་གྱི་རྒྱལ་པོས་མཛད། །དེ་ནས་
གཏོ་འདི་སུས་མཛད་ན། །རྒྱུ་མངོན་པར་ཤེས་པ་མི་བཞིས་མཛད། །གཏོ་མཁན་བདག་ལ་མ་གནོད་ཅིག །ལོ་ཡི་མགོ་ལ་གཏོ་བྱེད་ན། །ཤིང་ཕོ་བྱི་བ་གཏོ་ལ་བྱོན། །གཏོ་མཁན་བདག་ལ་མ་གནོད་ཅིག །དྲུག་ཅུ་ལོ་ཡི་སྐག་སྒྱུར་ཅིག །ཟླ་བའི་མགོ་ལ་གཏོ་བྱེད་ན། །མེ་ཕོ་སྟག་ནི་གཏོ་ལ་བྱོན། །ཟླ་བ་བཅུ་གཉིས་སྐག་སྒྱུར་ཅིག །ཉི་མའི་མགོ་ལ་གཏོ་བྱེད་ན། །ས་ཕོ་སྟག་ནི་གཏོ་ལ་བྱོན། །ཉི་མས་དམག་ལམ་མ་བྱེད་ཅིག །ཉི་སྐག་སུམ་བརྒྱ་དྲུག་ཅུ་སྒྱུར། །དུས་ཚོད་མགོ་ལ་གཏོ་བྱེད་ན། །ལྕགས་མོ་ཡོས་ནི་གཏོ་ཚེལ་བྱོན། །དུས་ཚོད་བདུད་དུ་མ་གཅོད་ཅིག །གཟའ་ཡི་མགོ་ལ་གཏོ་བྱེད་ན། །གཟའ་ཆེན་ཉི་མ་གཏོ་ལ་བྱོན། །གཟའ་ནད་གདུག་པ་མ་གཏོང་ཞིག །རྒྱུ་སྐར་མགོ་ལ་གཏོ་བྱེད་ན། །སྐར་མ་སྨིན་དྲུག་གཏོ་ལ་བྱོན། །གཟའ་སྐར་ངན་པ་བསྒྱུར་དུ་གསོལ། །སྤར་ཁའི་མགོ་ལ་གཏོ་བྱེད་ན། །ལི་ཡི་བུ་མོ་གཏོ་ལ་བྱོན། །སྤར་ཁའི་གདན་ས་ངན་པ་ཟློག །སྨེ་བའི་མགོ་ལ་གཏོ་བྱེད་ན། །སྨེ་བ་གཅིག་དཀར་གཏོ་ལ་བྱོན། །སྨེ་སྡོད་ངན་པ་བཟློག་ཏུ་གསོལ། །འབྱུང་བ་མགོ་ལ་གཏོ་བྱེད་ན། །འབྱུང་བ་ཤིང་ནི་གཏོ་ལ་
བྱོན། །འབྱུང་བ་འཁྲུགས་པ་གཏོ་ཡིས་ཟློག །དར་གུད་མགོ་ལ་གཏོ་བྱེད་ན། །དབུགས་རྒྱུ་ཉིད་ཀྱང་གཏོ་ལ་བྱོན། །དར་གུད་སྐྱེ་གནས་ངན་པ་ཟློག ༈ ། ཀྱཻ༔ སྣང་སྲིད་ལྷ་འདྲེ་ཀུན་ཉོན་དང་། །སངས་རྒྱས་རྐང་གཉིས་གཙོ་སྟེ་བདེན་པའི་མཆོག །ཆོས་ཉིད་ཆགས་དང་བྲལ་ཏེ་བདེན་པའི་མཆོག །དགེ་འདུན་འདུས་པའི་གཙོ་སྟེ་བདེན་པའི་མཆོག །བདེན་པའི་མཆོག་ནི་དཀོན་མཆོག་གསུམ་གྱི་བཀའ། །བདེན་པའི་བཀའ་ལ་མི་ཉན་གང་ཡང་མེད། །སྲིད་པའི་ཆུ་ལ་མི་འཐུང་གང་ཡང་མེད། །རི་རབ་ཟོམ་ལ་མི་བརྟེན་གང་ཡང་མེད། །གཙུག་ལག་གཏོ་ཡིས་མི་འགྱུར་གང་ཡང་མེད། །ཀོང་ཙེས་དེ་སྐད་གསུངས་པ་ལས། །སློབ་མ་ཡང་རྩེས་འདི་སྐད་ཞུས། །ལྷས་སྦྱིན་ནག་པོས་རྒྱལ་བའི་བཀའ་མི་ཉན། །བདུད་ཀྱི་བདེན་དགུ་ཟོར་མོ་མདའ་ཡིས་ཕུག །བྱ་ཁྱུང་རྒྱལ་པོས་སྲིད་པའི་ཆུ་མི་འཐུང་། །ལས་ཀྱི་རྣམ་སྨིན་ཀོང་ཙེས་གཏོས་མི་འགྱུར། །ཡང་ཅེས་དེ་སྐད་ཞུས་པ་ལ། །ཀོང་ཙེ་རྒྱལ་པོས་འདི་སྐད་གསུངས། །ལྷ་སྲིན་སྡེ་བརྒྱད་རྒྱལ་བའི་བཀའ་ལ་འདུས། །བྱ་ཁྱུང་རྒྱལ་པོས་དཔག་བསམ་ཆུ་ལ་འཐུང་། །བདུད་ཀྱི་
བདེན་དགུ་ཟོར་མོ་མདའ་ཡིས་ཕིག །ལོ་ཀག་ཟླ་ཀག་ཀོང་ཙེའི་གཏོ་ཡིས་འགྱུར། །ལས་ཀྱི་རྣམ་སྨིན་ཆོས་ཉིད་བདེན་པས་སྦྱོང་། །ལྷས་སྦྱིན་ནག་པོས་རྒྱལ་བའི་བཀའ་ལ་ཉན། །སེམས་ཅན་ཐམས་ཅད་སྲིད་པའི་ཆུ་ལ་འཐུང་། །རི་དྭགས་ཆེ་དགུ་རི་རབ་ཟོམ་ལ་བརྟེན། །བདག་དང་རྒྱུ་སྦྱོར་ཡོན་བདག་འདི་དག་གིས། །སྲིད་པ་ལས་ཀྱི་གཏོ་བྱེད་ན། །རྒྱུ་སྦྱོར་ཡོན་བདག་བསྐྱབ་ཏུ་གསོལ། །འཇམ་ལྕགས་ཀྱི་མཆིལ་མ་ཐིགས་གཅིག་ལ། །འབྱུང་བ་དང་པོ་ཆུ་རུ་སྲིད། །འཇམ་དཔལ་སྐུ་ཡི་སྤྲུལ་པ་ལས། །རུས་སྦལ་སེར་པོ་གཅིག་ཏུ་སྲིད། །བརྟག་ན་སྣང་བ་མ་ཡིན་པས། །དེ་ནས་འབྱུང་བ་ལྔ་རུ་སྲིད། །དྭངས་མ་ཁེན་པ་གཏོ་ལ་བྱོན། །སྙིང་མ་ཁོན་མ་གཏོ་ལ་བྱོན། །གིན་ཟོན་ལྕམ་དྲལ་གཏོ་ལ་བྱོན། །དྭ་ལི་ལྕམ་དྲལ་གཏོ་ལ་བྱོན། །ནལ་ཕྲུག་ཁམ་ཟིན་གཏོ་ལ་བྱོན། །མ་ཧཱ་གསེར་གྱི་རུས་སྦལ་གྱི། །རྩ་རྒྱུས་མཆིན་པའི་སྤྲུལ་པ་ལས། །འབྱུང་བ་དང་པོ་ཤིང་དུ་སྲིད། །ཤིང་གི་སྟག་ཡོས་གཏོ་ལ་བྱོན། །མ་ཧཱ་གསེར་གྱི་རུས་སྦལ་གྱི། །དྲོད་དང་སྙིང་གི་སྤྲུལ་པ་ལས། །འབྱུང་བ་གཉིས་པ་མེ་རུ་སྲིད། །མེ་ཡི་རྟ་སྦྲུལ་གཏོ་ལ་
བྱོན། །མ་ཧཱ་གསེར་གྱི་རུས་སྦལ་གྱི། །རུས་དང་གློ་བའི་སྤྲུལ་པ་ལས། །འབྱུང་བ་གསུམ་པ་ལྕགས་སུ་སྲིད། །ལྕགས་ཀྱི་བྱ་སྤྲེའུ་གཏོ་ལ་བྱོན། །མ་ཧཱ་གསེར་གྱི་རུས་སྦལ་གྱི། །རླན་དང་མཁལ་མའི་སྤྲུལ་པ་ལས། །འབྱུང་བ་བཞི་པ་ཆུ་རུ་སྲིད། །ཆུ་ཡི་བྱི་ཕག་གཏོ་ལ་བྱོན། །མ་ཧཱ་གསེར་གྱི་རུས་སྦལ་གྱི། །མཚེར་པ་ཤ་ཡི་སྤྲུལ་པ་ལས། །འབྱུང་བ་ལྔ་པ་ས་རུ་སྲིད།། །ཁྱི་འབྲུག་གླང་ལུག་བཞི་པོ་གཏོ་ལ་བྱོན། །དུག་ལྔ་འདུས་པའི་སེམས་ཀྱིས་མ་བྱོན་ཅིག །སྙིང་རྗེ་བྱམས་པའི་སེམས་ཀྱིས་གཏོ་ལ་བྱོན། །མ་ཧཱ་གསེར་གྱི་རུས་སྦལ་གྱི། །མིག་གི་རྫི་མ་ཆགས་པ་ལས། །ཐོ་རས་སྐར་ཆེན་གཅིག་ཏུ་སྲིད། །སྨེ་བ་གཅིག་དཀར་གཏོ་ལ་བྱོན། །མིག་གི་འབྲས་བུ་ནག་པ་ལ། མྱ་ངན་བྱུར་གྱི་མཚེ་གཉིས་བྱུང་། །སྨེ་བ་གཉིས་ནག་གཏོ་ལ་བྱོན། །ཤངས་ལ་བྱེ་བྲལ་རླུང་གསུམ་བྱུང་། །སྨེ་བ་གསུམ་མཐིང་གཏོ་ལ་བྱོན། །ཞལ་གྱི་རླངས་པ་སྔོན་པོ་ལ། །བྱུར་གྱི་མཚོ་མོ་རྡོལ་བ་སྟེ། །གྱོད་ཀྱི་དུ་བ་སྤུན་བཞི་བྱུང་། །སྨེ་བ་བཞི་ལྗང་གཏོ་ལ་བྱོན། །མ་ཧཱ་གསེར་གྱི་རུ་སྦལ་གྱི། །ཤ་དང་པགས་པའི་བར་ཤེད་ན། །ཆུ་
སེར་གྱི་ནི་མཚོ་ལྔ་བྱུང་། །སྨེ་བ་ལྔ་སེར་གཏོ་ལ་བྱོན། །རུ་སྦལ་སྒལ་ཚིགས་བར་ཤེད་ནས། །དཔལ་གྱི་གངས་རི་དྲུག་ཏུ་བྱུང་། །སྨེ་བ་དྲུག་དཀར་གཏོ་ལ་བྱོན། །ལྟེ་བ་ཁྲག་གི་ཐིགས་པ་བདུན། །སྨེ་བ་དེ་ནི་བདུན་དམར་བྱུང་། །དེ་ལ་ཤན་པ་མི་བདུན་སྲིད། །སྨེ་བ་བདུན་དམར་གཏོ་ལ་བྱོན། །རུས་སྦལ་དཔྲལ་བའི་འཁོར་ལོ་ནས། །མེ་ཏོག་ཧ་ལོ་དཀར་པོ་བྱུང་། །།དེ་ལ་སྨེ་བ་བརྒྱད་དཀར་སྲིད། །སྨེ་བ་བརྒྱད་དཀར་གཏོ་ལ་བྱོན། །དབང་པོ་བུ་གའི་སྒོ་དགུ་ནས། །ནོར་ལྷ་ལྕམ་དྲལ་དགུ་རུ་སྲིད། །སྨེ་བ་དགུ་དམར་གཏོ་ལ་བྱོན། །རུས་སྦལ་སྤྱན་མིག་གཡས་གཡོན་ལ། །ཉི་མ་ཟླ་བ་གཉིས་སུ་བྱུང་། །ཉི་མ་ཟླ་བ་གཏོ་ལ་བྱོན། །མཆེ་བ་བཞི་ཡི་ཟུར་བརྒྱད་ལ། །དྲང་སྲོང་དེ་ནི་གཟའ་བརྒྱད་བྱུང་། །གཟའ་ཆེན་བརྒྱད་པོ་གཏོ་ལ་བྱོན། །སྒལ་ཚིགས་ཉི་ཤུ་རྩ་བརྒྱད་ལ། །རྒྱུ་སྐར་ཉི་ཤུ་རྩ་བརྒྱད་བྱུང་། །རྒྱུ་སྐར་ཉེར་བརྒྱད་གཏོ་ལ་བྱོན། །རུས་སྦལ་ངར་སྐད་ལྕེ་གཉིས་ལ། །གློག་དང་གཡུ་འབྲུག་གཉིས་སུ་བྱུང་། །གློག་འབྲུག་ངར་ཅན་གཏོ་ལ་བྱོན། །སྙན་གཉིས་འཇའ་ཚོན་སྣ་ལྔ་བྱུང་། །འཇའ་ཚོན་སྣ་ལྔ་གཏོ་ལ་
བྱོན། །རུས་སྦལ་ཁྲོས་པས་ཐོག་སེར་འབེབས། །ཐོག་སེར་བདག་པོ་གཏོ་ལ་བྱོན། །རུས་སྦལ་ཁ་ཡི་རླངས་པ་ལ། །ཁ་ཆར་རླུང་དང་བུ་ཡུག་བྱུང་། །བུ་ཡི་ཡུག་བདག་པོ་གཏོ་ལ་བྱོན། །ཡས་ཀྱི་དེ་ནི་ཡ་བདུད་དང་། །མས་ཀྱི་དེ་ནི་མ་བདུད་དང་། །ལྷ་སྲིན་སྡེ་བརྒྱད་ཐམས་ཅད་ཀྱང་། །ཐམས་ཅད་དུག་ལྔའི་སེམས་ཀྱིས་མ་བྱོན་པར་། །སྙིང་རྗེ་བྱམས་པའི་སེམས་ཀྱིས་གཏོ་ལ་བྱོན། །དེ་རིང་གཏོ་ལ་མ་བྱོན་ན། །འཕགས་པ་རྣམས་ཀྱི་བཀའ་ཆད་ཀྱིས། །ལུས་དང་སེམས་ཀྱང་འབྲལ་བར་འགྱུར། །གལ་ཏེ་འོང་ནས་གཏོ་བླངས་ན། །ཁྱེད་རྣམས་བཀྲ་ཤིས་ཕུན་སུམ་ཚོགས། །རྒྱུ་སྦྱོར་ཡོན་བདག་སྐག་ལས་ཐར། །གཏོ་མཁན་བདག་ཀྱང་ངོ་སོ་ཆེ། །བཤམས་པའི་ཡས་ཀྱང་ཆུད་མ་ཟོས། །ཀྱཻ། དང་པོ་ཅི་ཡང་མེད་པ་ལ། །ནམ་མཁའ་གྲུ་གསུམ་ཡངས་པ་སྲིད། །དེ་ལ་རླུང་གི་དཀྱིལ་འཁོར་སྲིད། །དེ་ལ་ཆུ་ཡི་དཀྱིལ་འཁོར་སྲིད། །དེ་ལ་གསེར་གྱི་ས་གཞི་སྲིད། །དེ་སྟེང་རི་རབ་གླིང་བཞི་སྲིད། །དེ་ནས་འགྲོ་བ་རིགས་དྲུག་སྲིད། །དེ་ནས་མི་དང་གདོན་གཉིས་མ་མཐུན་ནས། །འཕགས་པ་འཇམ་དཔལ་ཐུགས་
རྗེ་ཡིས། །ཞལ་ནས་བཀའ་སྩལ་གསུངས་པ་ལ། །སྣང་སྲིད་ལྷ་འདྲེ་ཁྱེད་རྣམས་ཀྱང་། །བགེགས་ཀྱི་དབྱེན་ལ་མ་ཉོན་ཅིག །བདེན་ཚིག་རྒྱལ་བའི་བཀའ་མ་བཅག །གལ་ཏེ་རྒྱལ་བའི་བཀའ་བཅག་ན། །ཁྱེད་རྣམས་རྡུལ་དུ་རླག་པར་བྱེད། །གལ་ཏེ་ང་ཡི་བཀའ་ཉན་ན། །ཁྱེད་ལ་ཅི་འདོད་དངོས་གྲུབ་འོང་། །སྣང་སྲིད་ལྷ་འདྲེ་ཁྱེད་རྣམས་ཀྱང་། །མཐོ་བའི་གནས་ནས་སྤྱན་འདྲེན་ན། །དཀོན་མཆོག་གསུམ་གྱི་ཞབས་དྲུང་དུ། །འཁོར་ཞིང་འཁོར་ཞིང་གཏོ་ལ་བྱོན། །སྟོན་པའི་དམ་ཆོས་ཉན་ཕྱིར་གཏོ་ལ་བྱོན། །དགེ་འདུན་ཞལ་མཐོང་དགོངས་ཤིང་གཏོ་ལ་བྱོན། །མཐོ་རིས་བདེ་སྐྱིད་དགོངས་ཤིང་གཏོ་ལ་བྱོན། །དབང་པོ་ཚང་བར་དགོངས་ཤིང་གཏོ་ལ་བྱོན། །གཤིན་རྗེའི་ཞགས་པ་བཀྲོལ་ཞིང་གཏོ་ལ་བྱོན། །རི་རབ་རི་བདུན་ཀུན་ནས་གཏོ་ལ་བྱོན། །རོལ་པའི་མཚོ་བདུན་ཀུན་ནས་གཏོ་ལ་བྱོན། །གླིང་བཞི་གླིང་ཕྲན་ཀུན་ནས་གཏོ་ལ་བྱོན། །རི་རྩེ་མཐོན་པོ་ཀུན་ནས་གཏོ་ལ་བྱོན། །ལུང་པ་ཆུ་ཀླུང་ཀུན་ནས་གཏོ་ལ་བྱོན། །རི་སུལ་གད་ཁུག་ཀུན་ནས་གཏོ་ལ་བྱོན། །མཆོད་སྦྱིན་དར་བའི་ཡུལ་ནས་གཏོ་ལ་བྱོན། །རི་རབ་བང་རིམ་ཀུན་
ནས་གཏོ་ལ་བྱོན། །ལྗོན་ཤིང་བྲག་རི་ཀུན་ནས་གཏོ་ལ་བྱོན། །སྤང་སྣ་སྤང་ལྗོངས་ཀུན་ནས་གཏོ་ལ་བྱོན། །རྒྱ་མཚོ་ཆེ་ཆུང་ཀུན་ནས་གཏོ་ལ་བྱོན། །ཆུ་ཀླུང་འབབ་ཆུ་ཀུན་ནས་གཏོ་ལ་བྱོན། །ལུ་མ་ལྡིང་ཀ་ཀུན་ནས་གཏོ་ལ་བྱོན། །ཤིང་གཅིག་དུར་ཁྲོད་ཀུན་ནས་གཏོ་ལ་བྱོན། །ལམ་སྲང་སུམ་མདོ་ཀུན་ནས་གཏོ་ལ་བྱོན། །ཕོ་བྲང་འདུན་ས་ཀུན་ནས་གཏོ་ལ་བྱོན། །ཚོང་འདུས་ལུང་མདོ་ཀུན་ནས་གཏོ་ལ་བྱོན། །མྱ་ངན་འགོག་པའི་ཡུལ་ནས་གཏོ་ལ་བྱོན། །མེ་ཏོག་ནགས་ཚལ་ཀུན་ནས་གཏོ་ལ་བྱོན། །དམྱལ་བ་ཚ་གྲང་ཡུལ་ནས་གཏོ་ལ་བྱོན། །ཡི་དྭགས་བཀྲེས་སྐོམ་ཡུལ་ནས་གཏོ་ལ་བྱོན། །བྱོལ་སོང་གླེན་ལྐུགས་ཡུལ་ནས་གཏོ་ལ་བྱོན། །བྲེལ་ཕོངས་མི་ཡི་ཡུལ་ནས་གཏོ་ལ་བྱོན་། །འཐབ་རྩོད་ལྷ་མིན་ཡུལ་ནས་གཏོ་ལ་བྱོན། །ཕམ་ལྟུང་ལྷ་ཡི་ཡུལ་ནས་གཏོ་ལ་བྱོན། །སྟེང་འོག་ཕྱོགས་མཚམས་ཀུན་ནས་གཏོ་ལ་བྱོན། །ས་འོག་ས་སྟེང་ཀུན་ནས་གཏོ་ལ་བྱོན། །ཉིན་མོ་རྒྱུ་བའི་གདོན་རྣམས་གཏོ་ལ་བྱོན། །མཚན་མོ་རྒྱུ་བའི་གདོན་རྣམས་གཏོ་ལ་བྱོན། །སྲོག་ཆགས་ཀུན་ལ་གནོད་པ་ཡི། །ལོ་སྐག་དང་ནི་ཟླ་སྐག་དང་། །
ཞག་སྐག་དང་ནི་དུས་ཚོད་སྐག་རྣམས་ལ། །དབང་རྣམས་བྱེད་ཅིང་གནོད་པ་ཡི། །སྐག་དང་གཤེད་དང་དུར་འཁྲུག་དང་། །དེ་དག་བཟློག་ཅིང་བསྒྱུར་བའི་ཕྱིར། །དེ་རིང་གཏོ་ལ་སྤྱན་འདྲེན་ནོ། །འདོད་ཆགས་གླེན་པའི་སེམས་ཀྱིས་མ་འབྱོན་ཅིག །གཏི་མུག་རྨོངས་པའི་སེམས་ཀྱིས་མ་འབྱོན་ཅིག །ཞེ་སྡང་འཐབ་རྩོད་སེམས་ཀྱིས་མ་འབྱོན་ཅིག །ང་རྒྱལ་ཁོང་ཁྲོའི་སེམས་ཀྱིས་མ་འབྱོན་ཅིག །ཕྲག་དོག་ངན་པའི་སེམས་ཀྱིས་མ་འབྱོན་ཅིག །སྙིང་རྗེ་བྱམས་པའི་སེམས་ཀྱིས་གཏོ་ལ་བྱོན། །དགའ་དང་གུས་པའི་སེམས་ཀྱིས་གཏོ་ལ་བྱོན། །སྣང་སྲིད་ལྷ་འདྲེ་ཁྱེད་རྣམས་ཀྱང་། །ཚོང་པ་རིན་ཆེན་གླིང་དུ་ཕྱིན་པ་ལྟར། །དགོས་འདོད་རེ་བ་སྐོང་བའི་གཏོ་བཅོས་བྱེད། །སྣང་སྲིད་ལྷ་འདྲེ་ཁྱེད་རྣམས་ཀྱང་། །འདུས་འདུས་དེ་ནི་གཏོ་ལ་འདུས།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།