མཚོ་སྨན་མཆོད་ཐབས་གུར་མདོས་བསྡུས་པ།
མཚོ་སྨན་མཆོད་ཐབས་གུར་མདོས་བསྡུས་པ་བཞུགས་སོ། །
ན་མོ་པདྨ་བཛྲ་ཡེ། ཆར་འབོད་དམ་ནི་ཀླུ་མཆོད་དུས། །ཡང་ན་སྤར་ཁའི་བཅོས་སོགས་ལ། །མཚོ་སྨན་མཆོད་པར་བྱེད་འདོད་ན། །དཀར་གཏོར་དགུའམ་ཡང་ན་གཅིག །རྒྱས་པར་ཆུ་གནས་སྣ་ཚོགས་གཟུགས། །ཤིང་རྩི་འབྲུ་སྣ་རིན་ཆེན་རིགས། །བསྡུ་ན་དཀར་གཏོར་གཅིག་ལ་ནི། །ཀླུ་སྨན་འོ་མས་བྲན་བྱས་ལ། །ཡི་དམ་བསྐྱེད་རིམ་ལྡན་པས་གྱེར། །སྟོང་པའི་ངང་ལས་པད་དཀར་འདབ་བརྒྱད་པའི། །འདབ་བརྒྱད་དབུས་དང་དགུ་ལ་མཚོ་ཆེན་དགུ། །དེ་ནང་རིན་ཆེན་མཁོར་ནང་དར་གུར་དགུ། །རིན་ཆེན་ཁྲི་ལ་མཚོ་སྨན་མཆེད་དགུ་པོ། །རིན་ཆེན་རྒྱན་དང་དར་གྱི་ན་བཟའ་ཅན། །འཁོར་ཚོགས་དང་བཅས་མངོན་
སུམ་ལྟ་བུར་གསལ། །རང་རང་ཐུགས་ཀའི་འོད་ཀྱིས་སྤྱན་དྲངས་གྱུར། །ཀྱཻ། རི་རབ་དབུས་དང་འཛམ་གླིང་ཕྱོགས་མཚམས་ནས། །ཀླུ་ཆེན་དགུ་ཡི་ལྕམ་མོ་མཚོ་སྨན་དགུ། །ལྷབ་ལྷུབ་ན་བཟའ་སིལ་སྙན་སྒྲ་དང་བཅས། །བྲན་དང་གཡོག་འཁོར་བཅས་པ་གཤེགས་སུ་གསོལ། །ཡིད་སྤྲུལ་རིན་ཆེན་དར་ཟབ་ཁྲི་སྟེང་དུ། །ཇི་སྲིད་མཆོད་པ་འབུལ་ཚེ་བརྟན་པར་བཞུགས། ཨོཾ་ནཱ་ག་རཱ་ཛ་ས་པ་རི་ཝཱ་ར་བཛྲ་ས་མ་ཡ་ཛ༔ ཛཿཧཱུྃ་བཾ་ཧོཿ ཏིཥྛ་ལྷན། ཧཱུྃ། མཚོ་སྨན་མཆེད་དགུ་འཁོར་དང་བཅས་པ་རྣམས། །སྔོན་ཚེ་ཐུབ་དབང་གསང་བདག་པད་
འབྱུང་གི། །སྤྱན་སྔར་ཁས་བླངས་དམ་ཚིག་དྲན་མཛོད་ལ། །བདག་གིས་བཅོལ་བའི་ཕྲིན་ལས་འགྲུབ་པར་མཛོད། །མཚོ་སྨན་མཆེད་དགུ་འཁོར་བཅས་མཆོད་པའི་རྫས། །ཆུ་སྐྱེས་མེ་ཏོག་ཆུ་སྲིན་སྡེར་མོ་སྨྱོས། །ནོར་བུའི་འོད་དང་ཙནྡན་སྦྱར་བའི་ཆབ། །དཀར་གསུམ་ཞལ་ཟས་སྙན་པའི་རོལ་མོ་འབུལ། །ཆུ་གནས་སྣ་ཚོགས་གཟུགས་དང་བསྟོད་དབྱངས་སྒྲ། །སྤོས་དཀར་དྲི་དང་བུར་སྦྲང་ཀ་རའི་རོ། །དར་ཟབ་ཆུ་དར་སྣ་ཚོགས་བཀྲག་མདངས་རིགས། །འབྲུ་སྣ་རིན་ཆེན་སྣ་ཚོགས་ཤེལ་ཚིགས་དང་། །བཟང་ཤིང་སྣ་ཚོགས་ཀླུ་སྨན་ཚང་བ་དང་། །བ་དཀར་ར་དཀར་འབྲི་ཟལ་འོ་མའི་མཚོ། །དངོས་འབྱོར་ཡིད་སྤྲུལ་མཆོད་པ་རྒྱ་མཚོས་མཆོད། །མཚོ་སྨན་འཁོར་བཅས་མཉེས་ཤིང་ཚིམ་གྱུར་ཅིག་་ཨརྒྷཾ་སོགས། ཤབྟ་པྲ་ཏིཙྪ་ཧོ༔ ཨོཾ་སྭ་བྷ་ཝ་སོགས། ཨོཾ་ཨ་ཀཱ་རོ་སོགས། ཨོཾ་ནཱ་ག་རཱ་ཛ་ས་པ་རི་ཝཱ་ར་ཨི་དཾ་བ་ལིཾཏ་ལ་ཁ་ཁ་ཁཱ་ཧི་ཁཱ་ཧི། རིན་ཆེན་སྣོད་དུ་གཏོར་མ་བདུད་རྩིའི་མཚོ། །འདོད་ཡོན་ལྔ་ལྡན་དབང་པོ་དྲུག་ཚིམ་པ། །ཟད་མེད་ནམ་མཁའི་མཛོད་དུ་གྱུར་པ་ནི། །ཀླུ་སྨན་མཚོ་སྨན་ཀུན་གྱི་ཡུམ་གཅིག་མ། །གསེར་གྱི་བུ་མོ་མཚོ་
སྨན་རྒྱལ་མོ་ཆེ། །དཔལ་ལྡན་མ་དང་ཁྲོ་མཆོག་ལྡན་མ་དང་། །དབྱིངས་ཕྱུག་ལྡན་མ་དང་ནི་འོད་ལྡན་མ། །དུག་མཚོ་ལྡན་མ་དང་ནི་མདངས་ལྡན་མ། །གསལ་མོ་ལྡན་དང་འཕྲུལ་ལྡན་ཛ་ལྡན་མ། །འཁོར་དང་བཅས་ལ་འབུལ་ལོ་དགྱེས་པར་རོལ། །སྐུ་གསུང་ཐུགས་རྣམས་མཉེས་ཤིང་ཚིམས་གྱུར་ནས། །འཇིག་རྟེན་བདེ་ཞིང་ལོ་ལེགས་འཁྲུག་པ་ཞི། །ཆར་ཆུ་དུས་འབེབས་སད་སེར་མེད་པར་མཛོད། །ཁྱད་པར་བདག་ཅག་དཔོན་སློབ་ཡོན་མཆོད་ལ། །ཆུ་ནད་རྨུ་ཆུ་གྲང་འགྲམ་མཁལ་རྐེད་ནད། །སྐྱོང་པ་ལྷོག་རྒོད་མཛེ་ཤུ་རྐང་འབམ་དང་། །དྲེག་གྲུམ་ལ་སོགས་ནད་རྣམས་མེད་པར་མཛོད། །ནོར་ཕྱུགས་དར་རྒྱས་ལོངས་སྤྱོད་ཀླུ་གཡང་ཕོབ། །མིང་གཅིག་སྲིང་གཅིག་བཞིན་དུ་གདུང་སེམས་ཀྱིས། །དུས་རྣམས་ཀུན་ཏུ་ཁ་འཛིན་སྡོང་གྲོགས་མཛོད། །བྷྱོ༔ ཀླུ་ཆེན་མཚོ་སྨན་ཀུན་གྱི་ཡུམ། །གསེར་གྱི་བུ་མོ་གཟི་མདངས་ལྡན། །ཐུགས་ལས་མཚོ་སྨན་མཆེད་དགུ་སྤྲུལ། །རིགས་བཞིའི་ཀླུ་རྣམས་འཁོར་གྱིས་བསྐོར། །དཀར་གསུམ་བ་ལི་ཀླུ་སྨན་འབུལ། །བསྟོད་དོ་བསྔགས་སོ་གསོལ་ལོ་མཆོད། །རང་རང་དངོས་གྲུབ་
ཐམས་ཅད་སྩོལ། །ཀླུ་ནད་ཆུ་ནད་རྐྱེན་ཁ་ཟློག །མེ་ཉི་ཆུ་ལས་བྱས་པ་དང་། །ཀླུ་ལ་གནོད་པའི་ལས་བྱས་བཤགས། །སྤར་ཁ་ཁཾ་ལ་རྩུབ་པ་ཡི། །ཆུ་ཡི་སྐག་རྣམས་ཐམས་ཅད་ཟློག །བཅོལ་བའི་ཕྲིན་ལས་འགྲུབ་པར་མཛོད། །བྷྱོ༔ མཚོ་སྨན་རྒྱལ་མོ་དབྱིངས་ཆེན་ལྡན། །སྔོན་མོ་མེ་ལོང་འཁོར་ལོ་འཛིན། །གཡུ་རལ་གསེར་གྱི་ཐོར་ཅོག་ཅན་། །མུ་མིན་གསེར་གྱི་ཆ་ག་ལ། །གསེར་གཡུའི་ཁྲི་ལ་མཛེས་པར་བཞུགས། །ས་བདག་རྗེ་མོ་ཀླུ་ཡི་གཙོ། །མ་མོའི་གཙོ་མོ་བྷྱོ་བཟློག་མཁན། །འོད་ཟེར་ཆེན་མོ་མཐུ་མོ་ཆེ། །ཀླུ་ཡི་རྒྱལ་མོ་ལྕམ་གཅིག་མ། །དཔལ་མོ་ལྡན་ཞེས་འཁོར་དང་བཅས། །དཀར་གསུམ་བ་ལི་ཀླུ་སྨན་འབུལ། །བསྟོད་དོ་བསྔགས་སོ་གསོལ་ལོ་མཆོད། །རང་རང་དངོས་གྲུབ་ཐམས་ཅད་སྩོལ། །ཀླུ་ནད་ཆུ་ནད་རྐྱེན་ཁ་ཟློག །བཅོལ་བའི་ཕྲིན་ལས་འགྲུབ་པར་མཛོད། །བྷྱོ༔ ཤར་ཕྱོགས་འཇོག་པོའི་གཡུ་མཚོ་ནས། །མཐའ་ཡས་ལྕམ་གཅིག་འཇོག་པོས་ཡུམ། །སྦྲུལ་རལ་ཆུ་སྲིན་གཡང་གཞི་གྱོན། །རུས་སྦལ་ནག་པོ་སེ་རལ་ཁ། །ཆུ་སྲིན་རྒྱལ་མཚན་མེ་ལོང་བསྣམས། །བསྲེ་ཡི་རྔ་མོང་བསྲེ་སྒ་ཆིབས། །
མགྱོགས་པ་མིག་དགུ་ཕོ་ཉ་འགྱེད། །མཚོ་སྨན་རྒྱལ་མོ་ཁྲོ་མཆོག་ལྡན། །འཁོར་དང་བཅས་པ་ཐམས་ཅད་ལ། །དཀར་གསུམ་བ་ལི་ཀླུ་སྨན་འབུལ། །བསྟོད་དོ་བསྔགས་སོ་གསོལ་ལོ་མཆོད། །རང་རང་དངོས་གྲུབ་ཐམས་ཅད་སྩོལ། །ཀླུ་ནད་ཆུ་ནད་རྐྱེན་ཁ་ཟློག །བཅོལ་བའི་ཕྲིན་ལས་འགྲུབ་པར་མཛོད། །བྷྱོ༔ ལྷོ་ཕྱོགས་སྟོབས་རྒྱུའི་མཚོ་མོ་ནས། །དགའ་བོའི་ལྕམ་གཅིག་སྟོབས་རྒྱུའི་ཡུམ། །སྦྲུལ་རལ་མཐིང་གི་ལ་འུ་གསོལ། །ཁྲམ་བམ་འཕྲུལ་གྱི་མེ་ལོང་འཛིན། །སྲིད་གསུམ་གཟིགས་ཤིང་གཏོང་གཅོད་བྱེད། །གློག་འཁྱུག་གསེར་གྱི་རྔ་མོང་ཆིབས། །དབྱིངས་ཕྱུག་ལྡན་མ་འཁོར་དང་བཅས། །དཀར་གསུམ་བ་ལི་ཀླུ་སྨན་འབུལ། །བསྟོད་དོ་བསྔགས་སོ་ལོ། གསོལ་ལོ་མཆོད། །རང་རང་དངོས་གྲུབ་ཐམས་ཅད་སྩོལ། །ཀླུ་ནད་ཆུ་ནད་རྐྱེན་ཁ་ཟློག །བཅོལ་བའི་ཕྲིན་ལས་འགྲུབ་པར་མཛོད། །བྷྱོ༔ ནུབ་ཕྱོགས་འོ་མཚོའི་འཇོག་པོའི་མཚོ། །ཡེ་ཤེས་ལྡན་མ་གསེར་སླག་གསོལ། །སྦྲུལ་རལ་གཡུ་ཡི་ལེན་ཕྲན་བརྒྱན། །ཕྱག་ནི་བྷནྡྷ་མེ་ལོང་འཛིན། །གཡུ་ཡི་རྔ་མོང་གཡུ་སྒྲ་ཆིབས། །རྡོ་དང་ཐོག་
འབེབས་ནད་ཡམས་གཏོང་། །མ་དྲོས་ལྕམ་གཅིག་འོད་ལྡན་མ། །འཁོར་དང་བཅས་པ་ཐམས་ཅད་ལ། །དཀར་གསུམ་བ་ལི་ཀླུ་སྨན་འབུལ། །བསྟོད་དོ་བསྔགས་སོ་གསོལ་ལོ་མཆོད། །རང་རང་དངོས་གྲུབ་ཐམས་ཅད་སྩོལ། །ཀླུ་ནད་ཆུ་ནད་རྐྱེན་ཁ་ཟློག །བཅོལ་བའི་ཕྲིན་ལས་འགྲུབ་པར་མཛོད། །བྷྱོ༔ བྱང་ཕྱོགས་རིགས་ལྡན་དུག་མཚོ་ནས། །རིགས་ལྡན་ལྕམ་གཅིག་མུན་པའི་མདོག །སྦལ་ནག་ཐུལ་པ་སྦྲུལ་གྱིས་བརྒྱན། །སྦྲུལ་ནག་ཆིབས་ཤིང་གཡུ་སྦལ་ཁྲིད། །རིགས་ལྡན་ལྕམ་གཅིག་དུག་མཚོ་ལྡན། །ཤེས་རབ་གསལ་བ་འཁོར་དང་བཅས། །དཀར་གསུམ་བ་ལི་ཀླུ་སྨན་འབུལ། །བསྟོད་དོ་བསྔགས་སོ་གསོལ་ལོ་མཆོད། །རང་རང་དངོས་གྲུབ་ཐམས་ཅད་སྩོལ། །ཀླུ་ནད་ཆུ་ནད་རྐྱེན་ཁ་ཟློག །བཅོལ་བའི་ཕྲིན་ལས་འགྲུབ་པར་མཛོད། །བྷྱོ༔ ཤར་ལྷོ་མ་སང་གཉན་དགའི་མཚོ། །གཉན་དགའ་ནོར་རྒྱལ་ལྕམ་གཅིག་མ། །དཀར་མོ་དར་དཀར་མུ་ཏིག་བརྒྱན། །གཡུ་འབུམ་འཕྲུལ་གྱི་མེ་ལོང་འཛིན། །གློག་བས་མྱུར་ཏེ་འཛམ་གླིང་བསྐོར། །མཚོ་སྨན་ཀུན་གྱི་ཕོ་ཉ་མོ། །ལས་ལ་བརྩོན་ཞིང་ཐམས་ཅད་བསྒྲལ། །རྡོ་རྗེ་
གར་གྱི་མདངས་ལྡན་མ། །ཀླུ་མོ་དཀར་མོ་འབུམ་དང་བཅས། །དཀར་གསུམ་བ་ལི་ཀླུ་སྨན་འབུལ། །བསྟོད་དོ་བསྔགས་སོ་གསོལ་ལོ་མཆོད། །རང་རང་དངོས་གྲུབ་ཐམས་ཅད་སྩོལ། །ཀླུ་ནད་ཆུ་ནད་རྐྱེན་ཁ་ཟློག །བཅོལ་བའི་ཕྲིན་ལས་འགྲུབ་པར་མཛོད། །བྷྱོ༔ ལྷོ་ནུབ་དུང་སྐྱོང་དུང་མཚོ་ནས། །དུང་སྐྱོང་ལྕམ་གཅིག་དུང་སྒྲ་སྒྲོག །དུང་གི་ལེའུ་གསེར་གཡུའི་རྒྱན། །དུང་གི་བུམ་པ་མེ་ལོང་འཛིན། །ཆིབས་སུ་དུང་གི་རྔ་མོང་ཆིབས། །གསལ་མོ་ལྡན་ཞེས་འཁོར་དང་བཅས། །དཀར་གསུམ་བ་ལི་ཀླུ་སྨན་འབུལ། །བསྟོད་དོ་བསྔགས་སོ་གསོལ་ལོ་མཆོད། །རང་རང་དངོས་གྲུབ་ཐམས་ཅད་སྩོལ། །ཀླུ་ནད་ཆུ་ནད་རྐྱེན་ཁ་ཟློག །བཅོལ་བའི་ཕྲིན་ལས་འགྲུབ་པར་མཛོད། །བྷྱོ༔ ནུབ་བྱང་པད་མའི་ཟངས་མཚོ་ནས། །ཀླུ་རྒྱལ་པདྨའི་ལྕམ་མོ་སྟེ། །ཆུ་སྲིན་རྒྱལ་མཚན་མེ་ལོང་བསྣམས། །ཆུ་སྲིན་ལྤགས་གྱོན་གཡུ་སྦལ་ཆིབས། །མ་མོ་ཀླུ་ཆེན་འབུམ་དང་བཅས། །བསྐུལ་བ་ཙམ་གྱིས་ནད་རྣམས་ཀྱིས། །འཆོལ་བ་མེད་པར་དགྲ་བགེགས་སྒྲོལ། །མཚོ་སྨན་རྒྱལ་མོ་འཕྲུལ་ལྡན་མ། །དཀར་གསུམ་བ་ལི་ཀླུ་སྨན་འབུལ། །
བསྟོད་དོ་བསྔགས་སོ་གསོལ་ལོ་མཆོད། །རང་རང་དངོས་གྲུབ་ཐམས་ཅད་སྩོལ། །ཀླུ་ནད་ཆུ་ནད་རྐྱེན་ཁ་ཟློག །བཅོལ་བའི་ཕྲིན་ལས་འགྲུབ་པར་མཛོད། །བྷྱོ༔ བྱང་ཤར་དུག་མཚོ་ནག་པོ་ནས། །ཆུ་ལྷའི་ལྕམ་གཅིག་སྦལ་ཐུལ་གྱོན། །སྤྱན་མིག་ཉི་ཟླ་དབུ་སྐྲ་གློག །གསེར་བུམ་འཕྲུལ་གྱི་མེ་ལོང་འཛིན། །དགྲ་སྙིང་གསོལ་ཞིང་སྦལ་ཁྲ་ཆིབས། །རྦད་ན་དགྲ་ལ་མཛེ་ཤུ་གཏོང་། །རཱ་ཛ་ལྡན་མ་ཛ་ལྡན་མ། །འཁོར་དང་བཅས་པ་ཐམས་ཅད་ལ། །དཀར་གསུམ་བ་ལི་ཀླུ་སྨན་འབུལ། །བསྟོད་དོ་བསྔགས་སོ་གསོལ་ལོ་མཆོད། །རང་རང་དངོས་གྲུབ་ཐམས་ཅད་སྩོལ། །ཀླུ་ནད་ཆུ་ནད་རྐྱེན་ཁ་ཟློག །བཅོལ་བའི་ཕྲིན་ལས་འགྲུབ་པར་མཛོད། །།བྷྱོ༔ མཚོ་སྨན་རྒྱལ་མོ་མཆེད་སྡེ་དགུ། །བློན་མོ་དགུ་དང་གཡོག་མོ་དགུ། །སྤྲུལ་པ་དགུ་དང་ཡང་སྤྲུལ་དགུ། །འཁོར་ཚོགས་དཔག་མེད་གྲངས་འདས་ཀྱང་། །དཀར་གསུམ་བ་ལིཾ་ཀླུ་སྨན་འབུལ། །བསྟོད་དོ་བསྔགས་སོ་གསོལ་ལོ་མཆོད། །རང་རང་དངོས་གྲུབ་ཐམས་ཅད་སྩོལ། །ཀླུ་ནད་ཆུ་ནད་རྐྱེན་ཁ་ཟློག །བཅོལ་བའི་ཕྲིན་ལས་འགྲུབ་པར་མཛོད། །ཁྱེད་ཅག་ཐུགས་དང་
འགལ་བའི་ལས། །ཐབ་གཞོབ་མནའ་གཉན་བསྐྱེལ་ལེན་དང་། །གྲུ་ཟམ་བཙུགས་དང་ཆུ་གནས་བསད། །ཁྲག་མཚོ་དྲག་ལས་གཏད་ཁྲམ་བརྒྱབ། །ཉེས་པ་གང་མཆིས་མཐོལ་ཞིང་བཤགས། །བཟོད་པར་བཞེས་ལ་དངོས་གྲུབ་སྩོལ། །གྲུ་ལོག་ཆུ་གྲི་ཆུ་ཁྱེར་སད་སེར་དང་། །དམུ་ཆུ་གྲང་ནད་མཁལ་སྐེད་ཆུ་ནད་དང་། །ཆུ་བྱིང་སྐྱང་ལྷོག་གནོད་པ་མ་གཏོང་ཞིག །གྲི་དམེ་ནང་འཁྲུག་གནོད་པ་བཟློག་ཏུ་གསོལ། །མི་འཕེལ་རྟ་ཧྲག་ནོར་ཕྱུགས་འཕེལ་ཁ་དང་། །ལོ་ལེགས་དཔལ་འབྱོར་ཀླུ་གཡང་དབབ་ཏུ་ལ་གསོལ། །རྟག་ཏུ་མིང་སྲིང་ཚུལ་གྱིས་ཕན་འདོགས་ཤིང་། །བྱམས་པའི་སེམས་ཀྱིས་རང་རང་གནས་སུ་གཤེགས། །ཕྱིན་ཆད་འཁོར་འདིར་གནོད་པ་མ་བྱེད་ཅིག །བཀྲ་ཤིས་བདེ་ལེགས་ཕུན་སུམ་ཚོགས་པར་ཤོག །ནཱ་ག་རཱ་ཛ་ས་པ་རི་ཝཱ་ར་གཙྪགཙྪ། ཞེས་བརྗོད་གཏོར་མ་ཆུའམ་མཚོ་རུ་འབུལ། འདི་ནི་གུར་མདོས་དོན་བསྡུས་ཉུང་ངུར་བྲིས། །ཉེས་འགལ་བཤགས་ཤིང་དགེ་བ་བྱང་་ཆུབ་བསྔོ། །ཞེས་པ་རཱ་ག་ཨ་སྱས་སྦྱར་བའོ། །དགེ་ལེགས་འཕེལ།། །། ༧ ནང་ཆེན་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།། །།