གཤེད་གཏོ་གཙང་གྱེར།
གཤེད་གཏོ་གཙང་གྱེར་ལ་གཏོར་ཆུང་ཤ་དུམ་ཁྲག་ཐིག་འབྲུ་སྣ་ཡོས་བཀྲ་བཏབ་ལ་བྲན་ཅིང་འདི་སྐད་དོ། །ཧཱུྃ། བདག་ནི་འཕགས་པ་འཇམ་དཔལ་ལ། །ཁྲོས་པ་ཡབ་གཅིག་གཤིན་རྗེ་གཤེད། །ཟློག་སྒྱུར་བྱེད་པའི་བདག་པོ་ཡིན། །ཉོན་ཅིག་སྣང་སྲིད་ལྷ་འདྲེ་ཉོན། །བྷྱོ༔ དྲག་པོ་རྩང་དང་ཕུར་པའི་ལྷ། །སྲིད་པ་ལས་ཀྱི་མདོས་བཤམས་ན། །ཐ་མ་རྒྱལྕགས་རི་མུ་ཁྱུད་ལ། །དྲག་པོ་ལས་ཀྱི་རྩང་ཕུར་བཙུགས། །ཞེ་སྡང་མཚོན་ཆར་བྱིན་གྱིས་བརླབས། །རྩང་སྟོད་མེ་འབར་ལྷབས་སེ་ལྷབ། །བཙན་གྱི་ལས་བྱེད་ཤ་ར་ར། །རྩང་སྨད་མུན་ནག་ཐིབས་སེ་ཐིབ། །བདུད་དམག་བྲོ་བརྡུང་ཁྲིགས་སེ་ཁྲིག །བདུད་བཙན་དམག་སྣ་དགྲ་ལ་འགྱེད། །རྐེད་པ་རྒྱ་མདུད་ཁོང་སེང་ལ། །ཁྲོས་པའི་འབྲུག་སྒྲ་འུ་རུ་རུ། །ལས་ཀྱི་རྩང་ཕུར་བཞེངས་སུ་གསོལ། །ཞེ་སྡང་གཙང་ཕུར་ཟུར་གསུམ་ལ། །ཛདང་བྷྱོ་ཡི་ཡི་གེ་བྲིས། །གྲུ་གསུམ་མཐིང་ནག་ལྕགས་རི་ལ། །རྣལ་འབྱོར་སྔགས་འཆང་ལས་གྲུབ་པའི། །སྤྲུལ་པའི་ཕོ་ཉར་བྱིན་གྱིས་བརླབས། །ཁྲོ་བོ་ཆེན་པོ་ཡང་དག་གསལ། །མཚོན་གྱི་སྤྲུལ་པའི་ཕྱག་རྒྱ་གསལ། །གདུག་པ་འདུལ་ཕྱིར་དབལ་དང་
ལྡན། །རྩེ་མོ་ཆོས་ཉིད་དབྱིངས་སུ་འཕྱོ། །རྩ་བ་དུག་གསུམ་གནས་སུ་ཟུག །རྐེད་པ་ཕོ་ཉ་དབྱིངས་སུ་འགྱེད། །རྩེ་མོར་གྲི་ཁྲག་དམར་པོ་བྱུག །བསྐལ་པའི་མེ་འབར་ལམས་སེ་ལམ། །རྩ་བར་དུར་ཁྲོད་སོལ་བ་བྱུག །འཇིགས་པའི་མུན་པ་ཐིབས་སེ་ཐིབ། །དེ་འདྲའི་རྩང་ཕུར་བཞེངས་སུ་གསོལ། །ཡར་གྱི་རྩེ་མོ་ལྷ་མཐོང་ཡུལ་དུ་འཛུགས། །ལྷ་མ་ཡིན་གྱི་ཁ་རླངས་སྟོང་བ་དང་། །མི་མ་ཡིན་གྱི་ཆོ་འཕྲུལ་བཟློག་ཏུ་གསོལ། །མར་གྱི་རྩེ་མོ་དུར་ཁྲོད་གནས་སུ་ཟུག །ནད་སྣ་ཡམས་སྣ་དལ་སྣ་བསྒྱུར་དུ་གསོལ། །རྐེད་པ་རྒྱ་མདུད་ཁམས་གསུམ་དབལ་དང་ལྡན། །དགྲ་འདྲེ་མི་ཁ་གཤེད་ཁ་བྷྱོ་ཐུན་བྷྱོ། །ལྟས་ངན་མ་ལུས་བསྒྱུར་དུ་གསོལ། །གནག་པའི་དགྲ་བོ་མི་ནོར་ལ། །ཡུལ་མཁར་གླིང་ལ་རྩང་ཕུར་ཡ། །སྒོ་ཡི་ནོར་ལ་རྩང་ཕུར་ཡ། །མཁྱེན་གྱི་བུ་ལ་རྩང་ཕུར་ཡ། །དམ་ཉམས་དགྲ་བགེགས་རྡུལ་དུ་རློགས། །བཅོལ་བའི་ཕྲིན་ལས་འགྲུབ་པར་མཛོད། །ཨ་རྭ་གས་སྦྱར་བའོ།། ༈ གཏོ་སྒོ་དབྱེ་བ་ནི། ཀྱཻ། ཀོང་ཙེ་འཕྲུལ་གྱི་རྒྱལ་པོ་ཡིས། །གཏོ་ཡས་གླུད་ཀྱིས་ཐམས་ཅད་བཅོས། །རྒྱ་རྗེ་སྟོང་འབྱམ་འཁོར་བཅས་ཀྱིས། །གཏོ་ཡས་
གླུད་ཀྱིས་ཐམས་ཅད་བཅོས། །ངན་དགུ་དུག་བཅུ་ཐམས་ཅད་སྒྱུར། །གཏོ་དང་ཡས་ཀྱིས་ཐམས་ཅད་འཆིང་། །མགུ་ཞིང་དགྱེས་པའི་སྨོན་ལམ་བཏབ། །འདོད་པའི་ལོངས་སྤྱོད་ཡ་མཚན་ཅན། །གླུད་དུ་བསགས་པའི་ཡས་སྟགས་རྣམས། །སོ་སོར་འདོད་པ་ཚིམ་གྱུར་ཅིག །ཀྱཻ། ད་ནི་ཐ་མ་སྒོ་དབྱེ་འཚལ། །ཕྱོགས་བཞིའི་སྒོ་བཞི་མ་ཕྱེས་ན། །གཏོ་ཡས་བསགས་པ་གང་དུ་སྟོང་། །ད་ནི་གཏོ་སྒོ་ཤར་དུ་དབྱེ། །ཤར་ཕྱོགས་དྲི་ཟ་ཡུལ་འཁོར་སྲུང་། །ཕྲག་མ་དོག་ལ་རུ་མ་ཐུར། །ས་བདག་སྟག་སྐྱ་ཞེ་སྡང་ཅན། །གདུག་པའི་ཞེ་སྡང་མ་སྟོན་ཅིག །གཏོ་ཡས་གླུད་ཀྱི་སྣ་མ་སྐྱིལ། །གསེར་སྐྱེམས་དམ་པ་འདི་གསོལ་ལ། །གཏོ་མཁན་ཡོན་བདག་འཁོར་བཅས་ལ། །གདུག་པའི་པའི་མདའ་རྒོད་མ་འཕེན་ཅིག །ཡང་ཅིག་གཏོ་སྒོ་ལྷོ་རུ་དབྱེ། །གཏོ་ཡི་ལམ་བསྟན་ལྷོ་རུ་བསྟན། །ལྷོ་ཕྱོགས་གྲུ་བུམ་འཕགས་སྐྱེས་པོ། །ཕྲག་མ་དོག་ལ་རུ་མ་ཐུར། །ས་བདག་འབྲུག་སྔོན་ང་རྒྱལ་ཅན། །གདུག་པའི་ང་རྒྱལ་སྐད་མ་འདོན། །གཏོ་ཡས་གླུད་ཀྱི་སྣ་མ་སྐྱེལ། །གསེར་སྐྱེམས་དམ་པ་འདི་གསོལ་ལ། །གཏོ་མཁན་ཡོན་བདག་འཁོར་
བཅས་ལ། །ང་རྒྱལ་གདུག་པ་མ་སྟོན་ཅིག །ཡང་ཅིག་གཏོ་སྒོ་ནུབ་ཏུ་དབྱེ། །གཏོ་ཡི་ལམ་བསྟན་ནུབ་ཏུ་བསྟན། །ནུབ་ཕྱོགས་ཀླུ་གདོན་མིག་མི་བཟང་། །ཡ་ང་ཕྲག་དོག་མ་བྱེད་ཅིག །ས་བདག་བྱ་དམར་འདོད་ཆགས་ཅན། །གདུག་པའི་འདོད་ཆགས་དུག་མ་སྦྱོར། །གསེར་སྐྱེམས་དམ་པ་འདི་བཞེས་ལ། །གཏོ་ཡས་གླུད་ཀྱི་སྣ་མ་སྐྱིལ། །གཏོ་མཁན་ཡོན་བདག་འཁོར་བཅས་ལ། །འདོད་ཆགས་མེ་ཆེན་མ་སྔར་ཅིག །ཡང་ཅིག་གཏོ་སྒོ་བྱང་དུ་དབྱེ། །གཏོ་ཡི་ལམ་བསྟན་བྱང་དུ་བསྟན། །བྱང་ཕྱོགས་གནོད་སྦྱིན་རྣམ་ཐོས་སྲས། །ཡ་ང་ཕྲ་དོག་མ་བྱེད་ཅིག །ས་བདག་སྦལ་ནག་གཏི་མུག་ཅན། །གདུག་པའི་གཏི་མུག་ཐོག་མ་འབེབས། །གཏོ་ཡས་གླུད་ཀྱི་སྣ་མ་སྐྱིལ། །གསེར་སྐྱེམས་དམ་པ་འདི་གསོལ་ལ། །གཏོ་མཁན་ཡོན་བདག་འཁོར་བཅས་ལ། །གཏི་མུག་ཁྲོས་པའི་ཞེ་མ་གནག །ཡང་གཏོ་ཡི་སྒོ་ནི་མཚམས་བཞིར་དབྱེ། །གཏོ་ཡི་ལམ་བསྟན་མཚམས་བཞིར་བསྟན། །མཚམས་བཞིར་བསྲུང་བའི་མ་ལྷ་དང་། །སྲིན་པོ་རླུང་ལྷ་དབང་ལྡན་དང་། །ས་བདག་རྒྱལ་བློན་འཁོར་དང་བཅས། །རུ་ང་ཕྲག་དོག་མ་བྱེད་ཅིག །གསེར་
སྐྱེམས་དམ་པ་འདི་གསོལ་ལ། །གཏོ་ཡས་གླུད་ཀྱི་སྣ་མ་འདྲེན། །གཏོ་མཁན་ཡོན་བདག་འཁོར་བཅས་ལ། །ཕྲག་དོག་རུ་ཡུག་མ་མཛད་ཅིག །ཀྱཻ། གཏོ་ཡི་ལམ་བསྟན་སྟེང་དུ་བསྟན། །རིམ་པ་བཅུ་གསུམ་ཡང་སྟེང་ན། །གནམ་གྱི་གུང་རྒྱལ་འབོད་སྟོང་དང་། །དགུ་ཐིག་ཤུག་རིང་གཏོ་གླུད་ལམ། །གཏོ་གླུད་གཉེན་པོ་དེར་གཤེགས་ལ། །ལྷ་སྲིན་སྡེ་བརྒྱད་ཁ་ཁོག་ཅིག །ཡང་གླུད་ཀྱི་ལམ་བསྟན་ཐུར་དུ་བསྟན། །རྒྱ་མཚོ་མཐའ་མེད་གཏིང་རུམ་ན། །ཀླུ་སྲིན་རྒྱལ་མོ་འབོད་སྟོང་སྟོང་། །ཆུ་བོ་གཞུང་རིང་གཏོ་གླུད་ལམ། །གཏོ་གླུད་གཉེན་པོ་དེར་གཤེགས་ལ། །ཆུ་སྲིན་གདུག་པའི་ཁ་ཁོག་ཅིག །ཀརྨ་རཱ་ག་ཨ་སྱས་སྦྱར་བའོ། །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།