ངར་གླུད་བསྔོ་ཐབས།
ངར་གླུད་བསྔོ་ཐབས་སྤྱི་འགྲོ་འདི་མདོས་གང་ལ་སྦྱར་རུང་བ་བཞུགས་སོ།། ངར་གླུད་བསྔོ་འདོན་ནི། ཧཱུྃ། བགེགས་རྒྱལ་བྱི་ན་ཡ་ཀ་ནི། །བགེགས་རིགས་ཀུན་གྱི་སྡེ་དཔོན་ཆེན་པོ་ཡིན། །སྟོང་གསུམ་བདག་པོ་སྤྲིན་གྱི་སྒྲོན། །རྡོ་རྗེ་མཆུ་ལ་སོགས་པ་ཡི། །གཙོ་བོ་གདོན་ཆེན་བཅོ་བརྒྱད་དང་། །བྱི་སྦའི་གདོན་ཆེན་བཅོ་ལྔ་དང་། །བགེགས་རིགས་སྟོང་ཕྲག་བརྒྱད་ཅུ་སོགས། །ལན་ཆགས་བདག་པོ་ཐམས་ཅད་ལ། །བདག་ཅག་དཔོན་སློབ་ཡོན་མཆོད་ཀྱི། །ཚེ་སྐྱིན་སྲོག་གླུད་ངར་མི་འབུལ། །ཆངས་རྗེས་དྲི་གླུད་ཤེལ་ཚིགས་སྦྱིན། །འབྲུ་ནག་ཡོས་ཚིགས་ཚ་སྒོག་སྦྱིན། །འབྲུ་མཆོག་ངར་གྱི་མི་བོ་ཆེ། །ཞོ་ཤའི་སྙིང་ལ་ལུང་ཐང་མིག །མགྲོན་བུའི་སོ་ལ་མུ་ཏིག་ཀླད། །དུང་གི་པའི་རུས་པ་བསེ་ཡི་ཤ །རླུང་གི་དབུགས་ལ་ནམ་མཁའི་སེམས། །མེ་ཡི་དྲོད་དང་དར་ཟབ་གོས། །ཚོན་རྩི་བཀྲག་ལ་ཟེར་མོའི་སྒྲ། །ལག་གཡས་གསེར་དང་གཡོན་པ་དངུལ། །རྐང་གཡས་ལྕགས་ལ་གཡོན་པ་ཟངས། །རྒྱུ་ནི་འབྲུ་སྣ་རྟེན་འབྲེལ་རྫ་ས། །རྐྱེན་ནི་རིག་པ་མཁའ་ལ་རྒྱས། །ཕ་ནི་གནམ་ལ་མ་ནི་ས། །ཕུང་ཁམས་སྐྱེ་མཆེད་ཐམས་ཅད་
ཚང་། །རིན་ཆེན་མང་དང་གཟུགས་མཛེས་དང་། །འབྱམས་ཀླས་འཇིགས་ཀུན་བྲལ་བ་ཡི། །དེ་བཞིན་གཤེགས་པའི་བདེན་པ་དང་། །ན་མཿསརྦ་ཏ་ཐཱ་དང་། །ག་ཏ་ཨ་ཝ་ལོ་ཀི་ཏེ། །ཨོཾ་དང་སམ་བྷ་ར་དང་ནི། །སམ་བྷ་ར་ཧཱུྃ་བྱིན་གྱིས་བརླབས། །མི་བས་གླུད་བཟང་ལྷ་ཕྲུག་འདྲ། །ཕོ་གླུད་སྐྱེས་ཕྲན་སྟག་ཆས་ཅན། །མོ་གླུད་མོ་བཙུན་གཡུ་འབིལ་ཅན། །བཙུན་གླད་དགེ་སློང་སྣམ་སྦྱར་ཅན། །མཛེས་སྡུག་བཀྲག་མདངས་ཡིད་འཕྲོག་པ། །གཅིག་ལས་བྱེ་བ་བརྒྱ་སྟོང་ཕྲག །ལན་ཆགས་བདག་པོ་བདག་མོ་ཡི། །སྤྱན་སྔར་བརྒྱ་སྟོང་བརྒྱ་སྟོང་རེ། །གླུ་ལེན་བྲོ་བརྡུང་དགྱེས་པར་བསྐང་། །བདག་ཅག་དཔོན་སློབ་ཡོན་མཆོད་ཀྱི། །ཚེ་སྲོག་ཉམས་པ་གླུད་ཀྱིས་བསླུ། །བྷི་ན་ཡ་ཀ་ལ་སོགས་པའི་།།དྲེགས་པའི་སྡེ་དཔོན་སུམ་ཅུ་ཡི། །སྔགས་བདག་དྲེགས་ཆེན་བཅོ་བརྒྱད་དང་། །མ་མོ་མཁའ་འགྲོ་ཐམས་ཅད་ནི། །ཁྱེད་རྣམས་ལྷ་ཡི་སྤྲུལ་པ་སྟེ། །ཁྱོད་ལ་བྱང་ཆུབ་སེམས་ཡོད་པས། །གཞན་ལ་གནོད་པ་ག་ལ་བྱེད། །ཁྱེད་རྣམས་འཁོར་དང་སྡེ་རིགས་སུ། །གཏོགས་པའི་འདྲེ་ངན་འབྱུང་པོ་དང་། །ལན་ཆགས་བདག་པོ་བདག་མོ་དང་། །
བྱེ་བ་དུང་ཕྱུར་གྲངས་མེད་ལ། །ངར་མི་ཆངས་སྤྱད་གླུད་འདི་བསྔོ། །རེ་སྡེ་མགོ་ཉག་བྱི་བའི་བདུད། །བདུད་པོ་གཤེད་རྒྱལ་གླང་ལོའི་བདུད། །ཁ་སྟ་འབྲེང་ཡུག་སྟག་ལོའི་བདུད། །ཚེ་དབང་རྒྱལ་པོ་ཡོས་ལོའི་བདུད། །ཕོ་ཁྲམ་རྒྱལ་པོ་འབྲུག་ལོའི་བདུད། །ངུལ་མོ་ཆེན་མོ་སྦྲུལ་ལོའི་བདུད། །གཏུམ་པོ་ལག་རིང་རྟ་ལོའི་བདུད། །བདུད་རྒྱལ་རུ་རིང་ལུག་ལོའི་བདུད། །རེ་ཏི་མགོ་ཉག་སྤྲེལ་ལོའི་བདུད། །གཟུགས་མེད་སྒྲ་གཅན་བྱ་ལོའི་བདུད། །ཡོར་མོ་ནག་མོ་ཁྱི་ལོའི་བདུད། །ངུར་མོ་འགྲམ་རིང་ཕག་ལོའི་བདུད། །ལོ་བདུད་ལོ་གཤེད་བཅུ་གཉིས་ལ། །ངར་མི་གླུད་མདོས་འདི་འབུལ་ལོ། །ལོ་བདུད་ཟླ་བདུད་ཞག་བདུད་དང་། །དུས་ཚོད་བདུད་དུ་མ་འབེབས་ཤིག །ཡུལ་འདྲེ་ནག་མོ་ཁྱི་ཞོན་སོགས། །སྲིད་པའི་འཁྲུག་འདྲེ་བཅོ་བརྒྱད་དང་། །བྲལ་ཐེལ་ནག་པོ་འུག་ཞོན་སོགས། །ཐན་སྐྱ་ཉི་ཤུ་རྩ་གཅིག་ལ། །ངར་མི་ཆངས་བུ་དྲི་གླུད་བསྔོ། །ཁྱི་འབྲུག་གླང་ལུག་གཤེད་ཀྱི་ཕ། །གློག་འགྱུ་མ་ནི་གཤེད་ཀྱི་མ། །གཤེད་བུ་ཕྱོགས་བཞི་སྐྱ་པ་བཞི། །མི་ནག་ཁྲམ་ཐོགས་བཅུ་གསུམ་སོགས། །ཟ་བའི་འདྲེ་དང་
ཤི་བའི་གཤེད། །ཐམས་ཅད་གླུད་འདིས་ཚིམ་པར་གྱིས། །བསེ་རག་རྒྱལ་པོ་གཞོན་ནུ་པ། །མི་རྒན་ཁོ་ཤོག་གྱོན་པ་དང་། །བསེ་རག་ལྟོགས་འགོང་དབུལ་སྲི་རྣམས། །གླུད་འདི་ཁྱེར་ལ་མྱུར་དུ་དེངས། །ལྟེ་ཕུར་ནག་མོ་བྱ་མཆུ་མ། །ཕོ་གྱོང་བཟའ་ནི་དཔོན་གཡོག་གསུམ། །འདྲེ་སྲིན་དགུ་པོ་འཁོར་དང་བཅས། །ངར་མི་ཆངས་སྤྱད་ཁྱེར་ལ་སོང་། །གཞན་ཡང་བདག་ཅག་ཡོན་མཆོད་ལ། །ཚེ་རབས་ཐོག་མ་མེད་པ་ནས། །ཟས་ནོར་སྲོག་གི་ལན་ཆགས་པ། །ཟ་རེ་འཐུང་སྐོམ་བྱེད་པ་ཡི། །འདྲེ་ངན་གདོན་རིགས་ཀུན་རྣམས་ལ། །ངོར་མི་ཤ་དུམ་ཆངས་བུ་དང་། །འབྲུ་ནག་རམ་རུག་སྦྲང་མ་སོགས། །ཡས་སྟགས་འདི་ཡིས་ཚིམ་གྱུར་ཅིག །རང་གི་ལུས་ལ་དཔེ་ལོངས་ལ། །གཞན་ལ་གནོད་པ་མ་བྱེད་ཅིག །ཁྱེད་ཅག་མི་རྟག་ཚེ་འཕོས་ཏེ། །རང་བྱས་རང་ལ་སྨིན་གྱུར་ནས། །མནར་མེད་སྡུག་བསྔལ་ཡ་རེ་ང་། །དེ་བས་མ་གནོད་གཞན་དུ་སོང་། །བྱང་ཆུབ་སེམས་དང་ལྡན་གྱུར་ཅིག །ཅེས་ངར་འཕྱོང་། ༧ ཀརྨ་ཨ་རཱ་གས་སྦྱར།། །།