གནམ་སྒོ་དང་ས་སྒོ་གཅོད་ཐབས།
ཨ་རཱ་གས་མཛད་པའི་གནམ་སྒོ་དང་ས་སྒོ་གཅོད་ཐབས་བཞུགས་སོ།། ༈ ན་མོ་མཉྫའི་ཡེ། ཁྱི་ཐོད་འགྲམ་པ་གཉིས་ལ་ཉི་ཟླ་བྲི། དཔྲལ་བར་ཁེན་གྱི་ཕྱག་རྒྱ་བྲི། ཤིང་རིས་འཇའ་རིས་རྒྱབ་ཏུ་སྔགས་འོག་མ་དང་རྟེན་འབྲེལ་སྙིང་པོ་བྲིས་པ། ནམ་མཁའ་ཤིང་རྩི། བཤོས་བུ་རྩེ་ལྔ་པ་ལ་འབྲུ་སྣ་ལྔ། ཨ་ཀཱ་རོས་བྱིན་གྱིས་བརླབས་ལ། ཀྱཻ། གནམ་གྱི་རིམ་པ་བཅུ་གསུམ་ན། །བདུད་ཀྱི་རྒྱལ་པོ་རེ་རེ་བཞུགས། །དེ་ལ་སྐུ་གླུད་གཏོར་མ་འབུལ། །དེ་སྟེང་རིམ་པ་བཅུ་གསུམ་ན། །བདུད་བཙན་རྗེ་བོ་རེ་རེ་བཞུགས། །ཡས་དང་གླུད་ལ་མི་དགྱེས་པས། །ཡས་ལམ་ཕྱེས་ལ་སྐུ་གཟུར་ཅིག །གནམ་གྱི་རིམ་པ་བཅུ་གསུམ་ན། །བདུད་རྗེ་རེ་ལྡེ་མགོ་ཉག་བཞུགས། །དེ་ལ་ཡས་གླུད་གཏོར་མ་འབུལ། །གནམ་སྒོ་ཆོད་ལ་མ་བྱེ་ཅིག །དེ་སྟེང་རིམ་པ་བཅུ་གསུམ་ན། །བདུད་རྗེ་བདུད་བཙན་རེ་རེ་བཞུགས། །ཡས་གླུད་བཤོས་བུ་རྩེ་མང་འབུལ། །གནམ་གྱི་སྒོ་མོ་བཅུ་གསུམ་ཆོད། །འདན་བུ་ཆུག་ལ་ལྡེའུ་མིག་སྐུང་། །གནམ་ནད་སྒོ་མོ་གྱེན་དུ་ཆོད། །ཁྱད་པར་ཉི་མ་ནུབ་བྱང་གི །ནམ་མཁའ་གཡུ་ཡི་ལྡིང་ཁང་ནས། །སྲིད་པ་གསུམ་གྱི་མེས་པོ་སྟེ། །ཁེན་པ་རྒན་པོས་གནམ་ཁྱི་
ཆིབས། །མི་རྒན་དུང་རལ་དར་དཀར་གསོལ། །ཤེལ་གྱི་འཁར་བ་ལག་ན་ཐོགས། །གནམ་ཐེལ་དཀར་པོ་ལས་ལ་རྦད། །གཟའ་ཆེན་སྤེན་པ་ཕོ་ཉར་འགྱེད། །ཁྱེད་ལ་གཏོར་གླུད་འབུལ་བ་ནི། །དུང་གི་ཁྱི་ཐོད་ཉི་ཟླས་བརྒྱན། །དཔྲལ་བར་ཁེན་གྱི་ཕྱག་རྒྱ་བྲི། །ནམ་མཁའ་འཇའ་རིས་ཤིང་རྩི་དང་། །བཤོས་བུ་འབྲུ་སྣ་མཆོད་པ་འབུལ། །ཡར་གྱི་གནམ་སྒོ་བྱེ་བ་ཆོད། །གནམ་ཐིལ་གདུག་པ་མ་གཏོང་ཞིག །ཐོག་དང་སེར་ཟེར་མ་གཏོང་ཞིག །གཟའ་ནད་དལ་ཡམས་མ་གཏོང་ཞིག །གནམ་སྒོ་རྣམ་ལྔ་བྱེ་བ་ཆོད། །གནམ་ཐེལ་གདུག་པ་མ་གཏོང་ཞིག །ཨོཾ་སརྦ་ཏཾ་ཏྲི་སྭཱ་ཧཱ། བྷ་ཏ་ལི་ཟློག །ཅེས་ཚར་བཅུ་གསུམ་འདོན་ལ་ཁྱི་མགོ་ནུབ་བྱང་དུ་བཙུགས། རྟེན་འབྲེལ་སྙིང་པོ་བརྗོད། གཏོར་མ་འབྲུ་སྣ་གནམ་དུ་གཏོར། ཁེན་བུག་གམ་སྤུངས་ལ། མི་རྒན་ལ་ཁར་ཕྱིན་པ། གཟའ་ནད་མང་བ་ཐོག་སེར་རྒོད་པ་ལ་རྟེན་འབྲེལ་གྱིས་ཕན་ནོ། །ཞེས་༧རཱ་ག་ཨ་སྱས་བསྒྲིགས་པའོ།། ༈ །།ས་སྒོ་གཅོད་ཐབས་བཞུགས་སོ། །ན་མོ་མཉྫའི་ཡེ། ལུག་ཐོད་དཔྲལ་བར་ཁོན་གྱི་ཕྱག་རྒྱ་བྲི། དེ་ལ་ངར་མི་བསྐྱོན་ཞིང་འབྲུ་སྣ་བཤོས་བུ་མང་ལ་ཆངས་བུ་དང་བཅས། ཨ་ཀཱ་རོས་བྱིན་གྱིས་བརླབས་ལ། ཀྱཻ། ཁོན་མ་རྒན་མོ་ལུག་
ལ་ཆིབས། །ཕྱག་ན་འཇོར་དང་དབྱག་པ་འཛིན། །སྤྲུལ་པ་ས་དམག་བྱེ་བ་འབུམ། །ས་བདག་ས་སྲིན་ལས་ལ་འགྱེད། །ལྔ་སེར་སྤྱང་ཀི་རྗེས་ན་འབྲང་། །ཁྱོད་ལ་མཐུན་རྫས་ལུག་མགོ་དང་། །བཤོས་བུ་ངར་མི་འབྲུ་སྣ་འབུལ། །ས་སྒོ་བྱེ་བ་བཅད་དུ་གསོལ། །ས་སྲིན་དུར་སྲི་མ་བཏང་ཞིག །དམུ་ཆུ་གྲང་རླུང་མ་བཏང་ཞིག །མཛེ་ལྷོག་ཤུ་གྲུམ་མ་གཏོང་ཞིག །ས་སྒོ་རྣམ་ལྔ་བྱེ་བ་ཆོད། །ཨོཾ་ཨ་བྷི་དུ་སྭཱ་ཧཱ། ཨོཾ་བྷ་ཏ་ལི་ཟློག །ཅེས་ཚར་དགུའམ་བཅུ་གསུམ་འདོན། །རྟེན་འབྲེལ་སྙིང་པོ་བརྗོད་ལ། །གཏོར་མ་འབྲུ་སྣ་གནམ་དུ་མཆོད། །ལུག་མགོ་ལྷོ་ནུབ་ཏུ་བསྐྱལ་ལོ། །ས་སྒོ་བྱེ་བ་དང་ས་བདག་གི་ནད་ཐམས་ཅད་དང་ཕོག་ཐུག་ཤོར་བ་ལ་ཕན་པར་བཤད། རྒྱས་བསྡུས་གཉིས་ཀྱི་དོན་བསྡུས་ལས། ཨ་རཱ་གས་བསྡུས་སོ། །སརྦ་མངྒ་ལཾ།། །།