གནམ་ཆོས་ཐུག་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས༔ ཧ་ས་གརྦྷའི་སྒྲུབ་ཐབས་ཀྱི་ལྷན་ཐབས་ཤིན་ཏུ་བསྡུས་པ་རྣལ་འབྱོར་རང་དོན་རྟེན་འབྲེལ་ངན་པ་རྣམས་ཟློག་པའི་གདམས་པ་ཟབ་མོ།
གནམ་ཆོས་ཐུག་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས༔ ཧ་ས་གརྦྷའི་སྒྲུབ་ཐབས་ཀྱི་ལྷན་ཐབས་ཤིན་ཏུ་བསྡུས་པ་རྣལ་འབྱོར་རང་དོན་རྟེན་འབྲེལ་ངན་པ་རྣམས་ཟློག་པའི་གདམས་པ་ཟབ་མོ་ཞེས་བྱ་བ་བཞུགས་སོ༔
ན་མོ་མཉྫའི་གྷོ་ཥ་ཡེ༔ གནམ་ཆོས་ཧ་ས་གདྷུའི་ལྷན་ཐབས་བྲི༔ ཆོས་བདག་སྲུང་མས་བཀའ་ཡི་གནང་བ་སྩོལ༔ རྒྱ་ནག་ལུགས་ཀྱི་འཇམ་དཔལ་གཤིན་རྗེའི་རྒྱུད༔ ལེའུ་བཅུ་པའི་སྐབས་སུ་གསུངས་པ་དང་༔ ས་བདག་གཏོ་རྒྱུད་ནག་པོ་ལས་གསུངས་པ༔ ཀོང་ཙེ་འཕྲུལ་རྒྱལ་ཝང་ཙེ་འཕྲུལ་རྒྱལ་དང་༔ རྒྱ་ནག་རྒྱལ་པོ་རྒྱུ་ནི་ཧ་རྣམས་ཀྱིས༔ འགྲིགས་ཆགས་བསྡེབས་པ་རྒྱ་བཟས་བོད་ཏུ་བསྒྱུར༔ དེ་རྗེས་ལན་གྲངས་མང་དུ་འགྱུར་བའི་ཕྱིར༔ དར་ཆ་ཆེ་དྲག་ད་ནི་ཧ་ཅང་འཆལ༔ དབང་ལུང་རྒྱུན་ཆད་ཕྱག་ལེན་འཆུག་པར་གྱུར༔ དེ་ལོ་ཕན་ཕྱིར་མི་འགྱུར་རྡོ་རྗེ་ལ༔ འཇམ་དཔལ་དམར་སེར་ཉིད་ཀྱིས་འདི་གསུང་སྟེ༔ སྔར་གྱི་དབང་ལུང་བརྒྱུད་པ་གསོ་ཕྱིར་ལགས༔ རྒྱས་པར་སྤྲོ་ན་ཡིག་རྙིང་རྒྱས་པ་ལྟར༔ ཡབ་ལུགས་
ཡུམ་ལུགས་སྲས་ལུགས་གསུམ་དང་ནི༔ མདོས་ཐབས་རྩང་ཐབས་རྣམ་གྲངས་གང་ལྕོགས་དང་༔ བཅའ་ཐབས་བཅོ་བརྒྱད་གང་དགོས་ཕྱག་ལེན་དང་༔ ལེགས་པར་བཅས་ན་འདོན་ཆའི་པོད་གཞུང་ཀློག༔ འདི་ཡི་དབང་ལུང་ཐོབ་ནས་འདོན་གྱིས་ཆོག། བཀའ་ཆད་ལུང་སྡུམ་ཉེས་པ་མི་འབྱུང་ངོ་༔ རང་དོན་ཤིན་ཏུ་སྤྲོས་མེད་ཉམས་ལེན་ནི༔ ལྕོག་ཟླུམ་མམ་ནི་ལྷ་བཤོས་བཤམས་པ་ནི༔ དཀར་པོ་མགོ་གསུམ་སྲུང་བའི་དོན་འདུས་ཤི་ང་༔ དམར་གཏོར་གཅིག་བཤམས་ནག་པོ་མགོ་གསུམ་གྱི༔ ཟློག་པའི་བཅས་ནི་དེ་ལ་འདུས་པའོ༔ ངར་མི་ཆངས་བུ་ཏིང་ལོ་ལ་སོགས་བཤམས༔ དེ་ལ་གླུད་ཡས་ཐམས་ཅད་འདུས་པའོ༔ དཀར་གཏོར་བཤམས་པས་ཀླུ་དང་ས་བདག་མཆོད༔ སྔོན་འགྲོ་སྣ་སེལ་ཐམས་ཅད་དེ་ལ་འདུས༔ ལིངྒ་གཅིག་
བཤམས་དེ་ཉིད་བསྒྲལ་ལ་འབུལ༔ དམར་པོ་མགོ་གསུམ་བསད་པའི་དོན་འདུས་སོ༔ དེ་ནས་གྱེར་བསྒོམ་བསྙེན་པ་ཅི་མང་བྱ༔ ན་མོ༔ དཀོན་མཆོག་གསུམ་དང་རྩ་བ་གསུམ༔ སྐྱབས་གནས་རྣམས་ལ་སྐྱབས་སུ་མཆི༔ འགྲོ་ཀུན་སངས་རྒྱས་ལ་འགོད་ཕྱིར༔ བྱང་ཆུབ་མཆོག་ཏུ་སེམས་བསྐྱེད་དོ༔ ལན་གསུམ༔ ཀ་དག་ཀློང་ནས་སྤྲུལ་པ་ཡི༔ གནམ་ས་གང་བའི་མཆོད་པའི་སྤྲིན༔ སྨན་གཏོར་རཀྟ་ལྷ་མོར་བཅས༔ ཟད་མེད་གྱུར་ཅིག་པཱུ་ཛ་ཧོཿ སྭ་བྷ་ཝས་སྦྱངས༔ སྟོང་པའི་ངང་ལས་པད་ཟླ་ཉི་མའི་སྟེང་༔ སངས་རྒྱས་ཀུན་གྱི་སྐུ་གསུང་ཐུགས་བསྡུས་པ༔ རང་ཉིད་རིགས་གསུམ་མགོན་པོ་གཅིག་དྲིལ་བ༔ དབུས་ཞལ་སྐུ་ལུས་རྩ་ཕྱག་རྩ་ཞལ་རྣམས༔ སྙིང་རྗེ་མཐར་ཕྱིན་སྤྱན་རས་གཟིགས་མགོན་ནི༔ སྐུ་མདོག་དཀར་པོ་ཕྲེང་བ་པདྨ་འཛིན༔ གཡས་ཞལ་ཕྱག་དང་ཞབས་ནི་བར་པ་རྣམས༔ ཤེས་རབ་མཐར་ཕྱིན་འཇམ་དཔལ་གཞོན་ནུ་ནི༔ གུར་གུམ་མདོག་ཅན་རལ་གྲི་པོ་ཏི་འཛིན༔ གཡོན་ཞལ་ཕྱག་དང་ཞབས་ནི་ཐ་མ་གཉིས༔ མཐུ་སྟོབས་མཐར་ཕྱིན་གསང་བའི་བདག་པོ་སྟེ༔ ཆར་སྤྲིན་མདོག་ཅན་རྡོ་རྗེ་སྡིགས་མཛུབ་ཞགས༔ ཞབས་དྲུག་སེམས་དཔའི་
སྐྱིལ་ཀྲུང་བཞུགས་པ་ལ༔ དར་དང་རིན་པོ་ཆེ་ཡི་རྒྱན་གྱིས་བརྒྱན༔ གནས་གསུམ་འབྲུ་གསུམ་འོད་ཀྱིས་སྤྱན་དྲངས་བསྟིམ༔ ཧཱུྃ༔ གནས་མཆོག་པོ་ཊ་ལ་ཚོ་དང་ལྕང་ལོ་ཅན༔ རྒྱ་ནག་རི་བོ་རྩེ་ལྔའི་ཤེལ་ཁང་ནས༔ འཕགས་མཆོག་རིགས་གསུམ་མགོན་པོ་གཤེགས་སུ་གསོལ༔ ཤེལ་གུར་པདྨ་ཉི་ཟླའི་གདན་ལ་བཞུགས༔ རིགས་ལྔ་སྤྱན་དྲངས་དབང་བསྐུར་རིགས་བདག་མཚན༔ ཛཿཧཱུྃ་བཾ་ཧོཿ ཛྷཱ་ན་ཨ་བྷི་ཥིཉྩ་ཧཱུྃ༔ བསྙེན་པ་ནི་འདིའོ༔ ཨ་བྷིཧཱུྃ༔ ཞེས་བཟླའོ༔ རང་གི་སྐུ་ལས་འོད་ཟེར་དཀར་པོ་འཕྲོས༔ ཤེལ་གྱི་གུར་ཁང་ཡངས་ཤིང་རྒྱ་ཆེ་བར༔ དེ་ནང་བདག་ཅག་ཡོན་མཆོད་བསྲུང་བྱ་ཚུད༔ བདག་གི་སྤྱི་གཙུག་ཁྱུང་འབྲུག་སེང་གེས་བརྒྱན༔ སྣང་སྲིད་ལྷ་འདྲེ་ཐམས་ཅད་ཟིལ་གྱིས་གནོན༔ སླར་ཡང་རིགས་གསུམ་སྐུ་ཡི་འོད་ཟེར་ལས༔ ཕྱི་རོལ་རྡོ་རྗེ་སྔོན་པོའི་ས་གཞིར་གུར༔ དེ་རྒྱབ་གསེར་གྱི་འཁོར་ལོ་རྩིབས་སྟོང་འཁོར༔ དེ་རྒྱབ་པདྨ་དམར་པོའི་ཡུ་བ་ཅན༔ མཚོན་ཆ་སྣ་ཚོགས་རྩེ་མོ་ཕྱིར་བསྟན་གུར༔ དེ་རྒྱབ་ཡེ་ཤེས་མེ་རི་བར་མེད་འབར༔ རིགས་གསུམ་སྤྲུལ་པ་ཁྱུང་འབྲུག་སེང་གསུམ་ལས༔ འོད་འཕྲོས་བསྲུང་བྱའི་ལུས་
ངག་ཡིད་ལ་ཐིམ༔ ཁྲོ་བཛྲ་གྷ་རུ་ཊ་ཧཱུྃ་ཕཊ་རཀྵ་རཀྵ་སྭཱ་ཧཱ༔ དུ་ན་ཧཱུྃ་ཧཱུྃ་རཀྵ་རཀྵ་སྭཱ་ཧཱ༔ ཡ་མ་རཱ་ཛ་ཧཱུྃ་ཕཊ་རཀྵ་རཀྵ་སྭཱ་ཧཱ༔ ཅི་ནུས་བཟླ༔ ཨོཾ་ཨཱཧཱུྃ༔ ལན་གསུམ། ཨཱ་ཧཱིཧཱུྃ༔ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ ཨནྡྷཾ་སོགས་ཀྱིས་མཆོད། ཧཱུྃ༔ དུས་གསུམ་རྒྱལ་བ་ཀུན་གྱི་སྐུ་གསུང་ཐུགས༔ ཁམས་གསུམ་འགྲོ་བ་ཀུན་གྱི་སྐྱབས་གཅིག་པུ༔ ལུས་ངག་ཡིད་གསུམ་བསྲུང་བ་ལྷ་ཡི་མཆོག༔ རིགས་གསུམ་མགོན་པོ་གཅིག་དྲིལ་སྐུ་ལ་བསྟོད༔ སྟོང་གསུམ་འཇིག་རྟེན་ཟིལ་གནོན་སྤྲུལ་པའི་གཟུགས༔ རླབས་ཆེན་ཁྱུང་དང་རྩལ་ཆེན་སེང་གེ་དང་༔ ངར་ཆེན་འབྲུག་སྟེ་དཀར་པོ་མགོ་གསུམ་ཞེས༔ སྲུང་སྐྱོབ་སྤྲུལ་པའི་ལྷ་ལ་མཆོད་ཅིང་བསྟོད༔ བདག་དང་བསྲུང་བྱ་རྣམས་ལ་བསྲུང་དུ་གསོལ༔ དེ་ནས་མདུན་བསྐྱེད་ནི༔ མདུན་དུ་ཧ་ས་གྷཌྷ་ནག༔ དབུས་ནས་གཡས་བསྐོར་རིམ་བཞིན་དུ༔ གླང་སྟག་ཕག་གི་མགོ་བོ་ཅན༔ ཕྱག་དྲུག་དང་པོ་གཉིས་ཀྱིས་ནི༔ གྲི་གུག་ཐོད་ཁྲག་བར་མ་གཉིས༔ རལ་གྲི་ལྕགས་ཀྱུ་ཐ་མ་གཉིས༔ ཞགས་པ་མདའ་གཞུ་འཛིན་པ་སྟེ༔ ཁྲོ་ཆས་རྫོགས་ཤིང་གཤོག་པ་ཅན༔ སྐུ་སྨད་སྦྲུལ་གྱི་མཇུག་མར་འཁྱིལ༔ མདུན་དུ་མི་
དམར་མདའ་གཞུ་འགེང་༔ ཕག་སྦྲུལ་བྱ་ཡི་མགོ་བོ་ཅན༔ དེ་མདུན་ཤང་ཤང་བྲ་ཝའི་མགོ༔ རང་འདྲ་བརྒྱ་དང་བཅུ་གསུམ་བསྐོར༔ གཡས་སུ་བདུད་དང་གཡོན་དུ་བཙན༔ རྒྱབ་ཏུ་མ་མོ་རྔ་མོང་ཞོན༔ དེ་རྒྱབ་མི་ཁ་བ་རུ་མ༔ འབྱུང་བ་ལོ་ཟླ་སྤར་སྨེའི་བདག༔ ཁྲོ་བོ་ཕ་བུ་བཅོ་བརྒྱད་དང་༔ སྲུང་བཞི་གཏོ་མཁན་རིགས་བཞི་དང་༔ ཐན་སྐྱ་ཉི་ཤུ་རྩ་གཅིག་སོགས༔ བགེགས་རིགས་གདོན་རིགས་ཀུན་གྱིས་བསྐོར༔ ཐུགས་ཀའི་འོད་ཀྱིས་རང་རྒྱུད་པ༔ སྤྱན་དྲངས་གཉིས་སུ་མེད་པར་གྱུར༔ ཧཱུྃ༔ འཇམ་དཔལ་སྤྲུལ་པའི་མཐུ་བོ་ཆེ༔ ས་བདག་གཟའ་ཀླུ་འཆོས་པའི་བུ༔ ཟློག་བྱེད་ནག་པོ་མགོ་བོ་གསུམ༔ སྣང་སྲིད་ལྷ་འདྲེ་འཁོར་བཅས་རྣམས༔ མཆོད་པའི་གནས་འདིར་གཤེགས་སུ་གསོལ༔ སྔོན་མོ་ནས་ཀྱི་ཕོ་ཉར་བཏང་༔ ་གསེར་སྐྱེམས་སྔོན་མོའི་ཆས་ཇ་འདྲེན༔ གནོད་བྱེད་དགྲ་བགེགས་གདོན་ལ་བཞུགས༔ སྔོན་ཚེ་འཕགས་པ་འཇམ་དཔལ་གྱི༔ བཀའ་དང་དམ་ལ་བཏགས་པའི་ཚེ༔ དུས་ངན་སྙིགས་མ་ལྔ་ཡི་དུས༔ སྲིད་པའི་བྱོལ་བཟློག་ཁྱོད་ཀྱིས་གྱིས༔ སྐག་ཆེན་ཐམས་ཅད་ཟློག་པར་
གྱིས༔ ནད་པ་ཡོད་ན་བསླང་བར་གྱིས༔ སྲིའུ་ཚང་ནས་བསྐྱེད་པར་གྱིས༔ རྒན་པ་རྣམས་ཀྱི་ཚེ་བསྲིང་ལ༔ གཞོན་པའི་དཔལ་ནི་བསྐྱེད་པར་གྱིས༔ གནོད་པར་བྱེད་པ་ཐམས་ཅད་སོད༔ མི་ཁ་སྣ་ཚོགས་ཟས་སུ་ཟོ༔ གཏོར་མ་མཐེབ་སྐྱ་ཁྱོད་ལ་སྦྱིན༔ འཇམ་དཔལ་དམ་ཚིག་དེ་ལྟར་ཕོག༔ དེ་རིང་དགོས་པའི་དུས་བྱུང་ན༔ སྔོན་གྱི་དམ་ཚིག་དྲན་པར་གྱིས༔ འཕགས་པ་འཇམ་དཔལ་བཀའ་མ་བཅག༔ ཡོན་བདག་དྲིན་ལེན་ཆུད་མ་གསན༔ གཏོ་ཡས་གནས་སུ་ཐེངས་བར་མཛོད༔ ཨོཾ་ཕེ་ཤ་ཀེ་རུ་ཧཱུྃ༔ བཛྲ་ས་མ་ཡ་ཛཿ ཛཿཧཱུྃ་བཾ་ཧོཿ ཏིཥྛ་ལྷན༔ ས་མ་ཡ་ཧོཿ ཨནྡྷཾ་སོགས། ཁོ་ཡི་སྙིང་ཁར་ཁཾ་ནག་པོ༔ རྩ་སྔགས་གཡས་སུ་འཁོར་བ་ལ༔ བདག་གིས་སྲོག་སྔགས་དེ་བཟླས་པས༔ སྔོན་གྱི་ཁས་བླངས་དམ་ཚིག་དྲན༔ ཅི་གསུངས་བཀའ་བསྒྲུབ་ཁས་བླངས་གྱུར༔ ཨོཾ་ཕེ་ཤ་ཀེ་ཏུ་དྷྭཾ༔ ཨོཾ་ཧ་ས་གརྦྷ༔ ཕཊ༔ ཨོཾ་ནག་པོ་ཕེ་ཤ་རྦད༔ ཨོཾ་ཀ་ལ་མུ་ཁ་རེ་རི་བྷྱོཿ སྔགས་ཚན་བཞི་པོ་གང་རུང་བཟླ༔ དེ་ནས་ལིངྒ་ཡོད་ན་བསྒྲལ༔ མེད་ན་དམར་གཏོར་ཉིད་ལ་བཀུག་ན་མོ༔ བསླུ་མེད་དཀོན་མཆོག་གསུམ་དང་རྩ་བ་གསུམ༔ འཕགས་པ་རིགས་གསུམ་མགོན་
པོའི་བདེན་པ་དང་༔ ནག་པོ་མགོ་གསུམ་མཐུ་སྟོབས་ཆེན་པོ་ཡིས༔ གནོད་བྱེད་དགྲ་བགེགས་ཐམས་ཅད་འདིར་ཁུག་ཅིག༔ གསོད་བྱེད་མི་དམར་མགོ་བོ་གསུམ་པ་ཡིས༔ བཙན་མདའ་དམར་པོ་སྙིང་ལ་རྒྱོབ་ལ་སོད༔ ཤན་པའི་ཚོགས་ཀྱིས་ཤ་རུས་དུམ་བུར་གཏུབས༔ ཨོཾ་ཙན་ཡཾ་ཁ་ལ་རཀྟ་དུ་སིང་དགྲ་ལ་ཆོད་འདྲེ་ལ་ཆོད༔ ལན་གསུམ་མམ་བདུན་བརྗོད། བྷྱ༔ ལས་རིན་ཆེན་སྣོད་དང་སླ་ང་རུ༔ ངོ་བོ་དགྲ་བགེགས་གནོད་བྱེད་ཤ་ཁྲག་ལ༔ རྣམ་པ་འདོད་པའི་ཡོན་ཏན་རྣམ་པ་ལྔ༔ ལ་ལ་དཀར་གསུམ་ལ་ལ་ཤ་ཁྲག་མཚོ༔ ངར་མི་བན་སྐྱེ་བུད་མེད་ལྟ་ན་སྡུག༔ སོ་སོའི་ཅི་འདོད་ལོངས་སྤྱོད་ཕུན་ཚོགས་གྱུར༔ བདེ་གཤེགས་རིན་ཆེན་མང་དང་གཟུགས་མཛེས་དང་༔ འབྱམས་ཀློས་འཇིགས་ཀུན་བྲལ་ལ་ཕྱག་འཚལ་ལོ༔ དགྲ་བགེགས་ཤ་རི་ཁྲག་མཚོའི་གཏོར་མ་འདི༔ ཧ་ས་གརྦྷ༔ མི་དམར་མགོ་གསུམ་དང་༔ བཙན་བདུད་མ་མོ་ལྷ་སྲིན་དྲེགས་པའི་ཚོགས༔ ཀུན་ལ་འབུལ་ལོ་དགྱེས་པར་ཞལ་དུ་བསྟབ༔ དཀར་གསུམ་མངར་གསུམ་བདུད་རྩིའི་རྒྱ་མཚོ་འདི༔ འབྱུང་བ་སྤར་སྨེ་ལོ་ཟླ་ཞག་དུས་བདག༔ ས་བདག་ཁྲོ་བོ་ཕ་
བརྒྱད་བུ་བརྒྱད་དང་༔ ཀླུ་དང་ས་བདག་གཞི་བདག་རྣམས་ལ་འབུལ༔ མཉེས་ཚིམ་དགའ་མགུ་ཡི་རང་ལྡན་གྱུར་ཅིག༔ ངར་མི་ཆངས་བུ་ཏིང་ལོ་དྲི་གླུད་འདི༔ འཁྲུག་འདྲེ་བཅོ་བརྒྱད་མི་ཁ་བ་རུ་མ༔ ཤང་ཤང་བྲ་མཆུ་གྲི་བོ་བསེ་རག་དང་༔ ཟ་འདྲེ་ཤི་གཤེད་ལྟས་ངན་རྣམས་ལ་སྦྱིན༔ ལན་ཆགས་བྱང་ཞིང་བུ་ལོན་སོད་གྱུར་ཅིག༔ ན་མསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ༔ ཨོཾ་སམྦྷ་ར་སམྦྷ་ར་ཧཱུྃ༔ གསུམ་མམ་བདུན་བརྗོད། ཧཱུྃ༔ གནམ་ལྷ་ཞེ་སྡང་ཁོན་པ་རྒན་པོ་དང་༔ ས་བདག་འདོད་ཆགས་ཁོན་མ་འཚོགས་པའི་བུ༔ མི་ནག་བྱ་གཤོག་རེ་འབྱམས་མཇུག་མ་ཅན༔ མགོ་དབུས་གླང་མགོ་གཟའ་ཆེན་སྤེན་པའི་བུ༔ མགོ་གཡས་སྟག་མགོ་གཟའ་ཆེན་ཁྱབ་འཇུག་བུ༔ མགོ་གཡོན་ཕག་མགོ་གཟའ་ཆེན་ལྷག་པའི་བུ༔ ཕྱག་དྲུག་དང་པོས་གྲི་ཐོད་གནོད་བྱེད་ཟ༔ བར་པས་ལྕགས་ཀྱུས་འཛིན་ཅིང་རལ་གྲིས་གཏུབ༔ མཐའ་མས་ཞགས་པས་བཅིང་ཞིང་མདའ་གཞུ་འབིགས༔ བ་སྤུ་མཚོན་ཆ་སེན་མོ་ལྕགས་ཀྱུ་འགུགས༔ ཁ་གདངས་མཆེ་གཙིགས་ང་རོ་འབྲུག་སྟོང་ལྡིར༔ ཞེ་སྡང་མེ་འབར་མྱུར་མགྱོགས་གློག་ལྟར་འཁྱུགས༔ མཐུ་ཆེན་སྟོབས་ལྡན་སྲིད་པའི་
བྱོལ་ཟློག་ཁྱོད༔ དམ་རྫས་དམར་གྱི་གཏོར་མ་འདི་བཞེས་ལ༔ ལྟས་ངན་མི་ཁ་བྲ་མཆུ་ཟས་སུ་ཟོ༔ ཆག་ཆེན་ཉམ་ང་སྐག་ཆེན་ཟློག་པར་བྱེད༔ གལ་ཏེ་འཆི་བར་ངེས་པའི་མི་ཡོད་ཀྱང་༔ ལོ་གསུམ་བར་དུ་ཁྱོད་ཀྱིས་བཤོལ་ཐོབ་ཅིག༔ ཧཱུྃ༔ མི་ནག་མགོ་གསུམ་སྐུ་སྨད་སྦྲུལ་མཇུག་ལས༔ རང་འདྲའི་སྤྲུལ་པས་སྟོང་གསུམ་འཇིག་རྟེན་གང་༔ ཐན་བདག་ཐན་དང་བཅས་པ་ཧབ་ཐོབ་ཟོ༔ ལྷག་དང་ཆད་པའི་ལྟས་ངན་དགྲ་ལ་སྒྱུར༔ ཁ་དགུ་ཟིལ་པ་ཉམ་པའི་ལྟས་ངན་ཟློག༔ ལག་དགུ་ཟོར་བ་ཐོགས་པའི་ལྟས་ངན་ཟློག༔ མོན་དང་རྒྱུ་ལུག་ཐམས་ཅད་བསྒྱུར་ཞིང་ཟློག༔ རྟ་ནོར་ར་ལུག་མི་འདྲ་སྤེལ་འདྲ་དང་༔ ཁྱི་འདྲ་གྲོད་པ་འདྲ་དང་འབྲང་ལུམ་འདྲ༔ ལོང་ཁ་འདྲ་བ་གཏོ་ཡིས་བསྒྱུར་དཀའ་ཞིང་༔ བསྒྱུར་ན་གཏོ་མཁན་རང་ལ་གནོད་པའི་ཐན༔ དེ་ཡང་ནག་པོ་མགོ་གསུམ་ཁྱོད་ཀྱིས་ཟློག༔ ཐན་བདག་ཐན་དང་བཅས་པ་ཁྱོད་ཀྱིས་ཟོ༔ གཟུགས་ནི་ངོ་ཤེས་ཙམ་དང་ངོ་མ་ཤེས༔ རྒྱུ་མ་ཡར་ལུག་མར་ལུག་བཅོས་དཀའི་ཐན༔ བན་བོན་གཏོ་མཁན་རང་ལ་གནོད་པའི་ཐན༔ དེ་ཡང་མི་ནག་མགོ་གསུམ་ཞལ་དུ་བསྟབ༔ ཁ་དགུ་
རྐང་ལག་བརྒྱད་དང་བཅོ་བརྒྱད་པ༔ རེ་འབྱམས་ཐན་དེ་སྡེ་དཔོན་བརླག་པའི་ཐན༔ དར་རྒྱས་ཅན་ལ་ངན་པའི་བྱད་ཁའི་ཐན༔ དེ་ཡང་མི་ནག་མགོ་གསུམ་ཁྱོད་ཀྱིས་ཟོ༔ ཨོག་མར་མིག་དང་ལྟག་པར་ཁ་དོད་པ༔ ལྐུགས་པ་ཁ་མེད་མིག་མེད་བདུད་ཀྱི་ཐན༔ མི་ནག་མགོ་བོ་གསུམ་པའི་ཞལ་དུ་བསྟབ༔ ཁ་དང་མིག་ལ་སོ་སྐྱེས་འཆི་བདུད་ཐན༔ བཅོས་དཀའི་ཐན་དེ་མགོ་གསུམ་ཁྱོད་ཀྱིས་ལྐུགས་པ་ལག་སྡུམ་མིག་མེད་ལོང་བ་དང་༔ རྣ་མེད་འོན་དང་རྐང་མེད་ཞ་བོ་དང་༔ བདུད་པོ་མཐོང་བ་མིག་མེད་ཐན་ཡིན་ཏེ༔ མི་ནག་མགོ་བོ་གསུམ་པའི་ཞལ་དུ་བཞེས༔ གཟུགས་བརྙན་དོད་དང་གཟུགས་བརྙན་མ་དོད་དང་༔ གྲོད་པ་སོ་ཅན་ཐན་ཡིན་ཁྱོད་ཀྱིས་ཟོ༔ ལག་པ་བྲང་གུག་ཐན་ཏེ་བྲང་བརྡུང་ཐན༔ ཡ་མཆུ་རིང་དང་རྐང་པའི་སུ་གུ་འཁྱོག༔ སྤྲང་པོ་དབྱུག་གཟུང་ཐན་དེ་ཁྱོད་ཀྱིས་ཟོ༔ གློ་སྙིང་ཕྱིར་བུད་སྙིང་འདྲ་འཆི་བའི་ཐན༔ མཆེ་བ་སྐྱེས་པ་བཙན་ཤ་རུ་བརྡར་ཏེ༔ ཕུ་བོ་ལ་ངན་ཐན་དེ་ཁྱོད་ཀྱིས་བྲོ༔ ལག་ཚིགས་གཡས་མེད་ཕ་སྤུན་དགྲ་ལ་ཕྱོགས༔ ལག་ཚིགས་གཡོན་མེད་མ་མཚུན་དགྲ་ལ་ཕྱོགས༔ ཤི་ཚད་འོང་བའི་ཐན་དེ་དགྲ་ལ་
སྒྱུར༔ སྦལ་སྦྲུལ་སྤུ་སྐྱེས་བྱ་རིགས་སྤུ་མེད་པ༔ ཀླུ་ཡི་ཐན་དེ་སྡང་བའི་དགྲ་ལ་སྒྱུར༔ རྭ་སྐྱེས་ལག་པ་རྒྱབ་སྐྱེས་བདུད་ཀྱི་ཐན༔ ངོ་ཤཱ་སྤྱི་བོ་དཔྲལ་བར་ཁ་དོད་དང་༔ ཨོག་མར་མིག་དོད་མོན་ཁར་འབྱར་བ་དང་༔ ཟིལ་དུ་ར་སྐྱེས་བཙན་གྱི་ཐན་ཡིན་ཏེ༔ མི་ནག་མགོ་བོ་གསུམ་པ་ཁྱོད་ཀྱིས་ཟོ༔ ལྷག་པ་ཐམས་ཅད་ཡས་གདོན་རྒྱལ་པོའི་ཐན༔ མ་ཚང་བ་རྣམས་མས་གདོན་རྒྱལ་མོའི་ཐན༔ མིག་གཅིག་པ་དང་བེའུ་ལ་བྱ་ལག་འབྱུང་༔ རྐང་པ་སྤྲེའུ་འདྲ་དང་བུམ་ལག་དང་༔ སྦར་མོ་སྐྱེས་དང་བྱ་ཡི་མཆུ་འདྲ་དང་༔ མ་མཆུས་ཡ་མཆུ་བཀབ་པ་གྲི་བཙན་ཐན༔ གཏོ་དང་བོན་གྱིས་མི་ཐུབ་ཐན་དེ་ཡང་མི་ནག་མགོ་གསུམ་ཁྱོད་ཀྱིས་བཟློག་ཅིང་སྒྱུར༔ ཁྱི་ལ་གཟུགས་མེད་མིད་པ་ཆད་པ་དང་༔ མིག་མེད་རྐུབ་རུབ་བྱ་མཆུ་དོད་པ་རྣམས༔ མས་གདོན་སྒོ་སྲུང་ཐན་ཡིན་གཏོ་འདིས་སྒྱུར༔ སྐེ་འཁྱོག་ཕག་དང་བོང་བུ་རྭ་ཅོ་སྐྱེས༔ ལག་པ་རྒལ་གཞུང་བྲང་སྒོར་ཁ་དོད་པ༔ དམུ་ཡི་ཐན་དེ་མགོ་གསུམ་ཁྱོད་ཀྱིས་ཟློག༔ བྱ་ནག་སྡེར་འཛིངས་ཤ་བ་རུ་འཛིངས་དང་༔ སྦྲུལ་ནག་ལྟོ་སྦྱོར་ཁང་སྐམ་ཆུ་ཟག་དང་༔ སོག་པའི་དཀྱིལ་བུག་
བྱི་ལོང་ཁྱིམ་དུ་འོང་༔ སྦྲ་ཐན་སྐྱ་ཁོལ་ཐག་པ་ཆོན་ཐག་རྒྱུག༔ ཞིང་གི་དཀྱིལ་བུག་སྦྲ་ལ་མེ་ཤོར་དང་༔ འོ་མ་ཆགས་དང་རུལ་དང་ཁྱི་རྔ་བྱུང་༔ སྡེ་བརྒྱད་ཐན་དེ་མགོ་གསུམ་ཁྱོད་ཀྱིས་ཟོ༔ རྣ་བ་ལྷག་ན་གཏམ་སྙན་ཐོས་པའི་ཐན༔ མཐེ་བོང་ལྷག་ན་ཆེ་རྒྱུད་འཕེལ་བ་དང་༔ མཛུབ་ཆུང་ལྷག་ན་ཆུང་རྒྱུད་འཕེལ་བ་སྟེ༔ དགེ་ལེགས་ཐན་དེ་མི་ཟློག་གཡང་དུ་ལེན༔ སྤྱི་བོ་མིག་ཕོམ་བྲང་མགོ་དཔུང་མགོ་ལྷག༔ སྣ་དང་མ་ཁར་ལྕེ་དང་ལག་པ་དང་༔ སོར་མོ་ལྔ་ལྷག་ནམ་ཕུག་ངན་པའི་ཐན༔ ངན་པའི་ཐན་དགུ་སྡང་བའི་དགྲ་ལ་སྒྱུར༔ བྱ་མ་བྱིལ་སོགས་བྱ་ཐན་ཁྱིམ་དུ་ཕྱིན༔ རི་བོང་ལ་སོགས་རི་དྭགས་ཁྱིམ་དུ་ཕྱིན༔ སྲེག་པ་ཕུག་རོན་ཁྲས་དེད་ཕྱིན་པ་དང་༔ ཁུ་བྱུག་ལ་སོགས་བྱ་ཆེན་སྟེང་དུ་བབས༔ ཝ་སྤྱང་གཟིག་སོགས་གཅན་གཟན་ཁྱིམ་དུ་ཕྱིན༔ ཤ་མོང་ཁྱིམ་སྐྱེས་བྱ་ཐན་བྱི་ཐན་དང་༔ སྲིན་བྱས་འབུ་རོ་ཁུར་སོགས་འབུ་ཡི་ཐན༔ སྦལ་སྦྲུལ་ཁྱིམ་ཕྱིན་ལ་སོགས་ཆུ་གནས་ཐན༔ ཞྭ་ཤ་བརྣངས་དང་མིག་འགུལ་ལུས་ཀྱི་ཐན༔ ཁྱི་སྤྱང་ངུ་དང་རྟ་ཕོ་སྲོད་ལ་འཚེར༔ འུག་པ་རྒོད་དང་ཝ་བརྒྱལ་མེ་སྙིང་དམར༔ འོ་མ་ཁྲག་རེད་ཡོས་
བཏགས་རམ་ཕྱེར་གྱུར༔ རི་རྡོ་ཞིང་འདྲིལ་ནས་བཏབ་ཡུག་པོ་སྐྱེས༔ བྱ་རོག་དཀར་པོ་སྐར་མ་ཕོད་ཆེན་སོགས༔ མི་རུང་ལྟས་ངན་བརྒྱད་ཅུ་རྩ་གཅིག་རྣམས༔ ཐན་དང་ཐན་བདག་མགོ་གསུམ་ཁྱོད་ཀྱིས་ཟོ༔ ལྟས་ངན་མཚན་ངན་སྡང་བའི་དགྲ་ལ་སྒྱུར༔ ཧཱུྃ༔ འཕགས་པ་རིགས་གསུམ་མགོན་པོའི་བདེན་པ་དང་༔ ས་བདག་ཧ་ས་གརྦྷའི་མཐུ་སྟོབས་ཀྱིས༔ ལྟས་ངན་རྨེ་སྡང་བའི་དགྲ་ལ་སྒྱུར༔ ཐན་བདག་ཐན་དང་བཅས་པ་ཐམས་ཅད་ནི༔ མི་ནག་མགོ་གསུམ་འཁོར་དང་བཅས་པས་ཟོ༔ ཐན་ལྟས་བཟློག་པའི་ཕྲིན་ལས་ད་མཛོད་ཅིག༔ འཕགས་པ་འཇམ་དཔལ་སྤྱན་སྔར་ཁས་བླངས་པའི༔ དམ་ལ་མ་འདའ་བཅོལ་བའི་ཕྲིན་ལས་མཛོད༔ ཨོཾ་ཧ་ས་གརྦྷ༔ བྷྱོ་མི་ཁ་ཧུར་ཐུམ་རྦད་ཡ་བྷྱོ་བྷྱོ་ཟློག་ཟློག༔ ཅེས་ཅི་མང་བརྗོད༔ ཧཱུྃ༔ ས་བདག་ཧ་ས་གརྦྷའི་ཕྱག་གཡས་ན༔ སྤར་ཁ་བརྒྱད་ཀྱི་ཕྱག་རྒྱ་བསྣམས་མཛད་པ༔ ལི་ཁོན་དྭ་ཁེན་ཁམ་གིན་ཟིན་དང་ཟོན༔ སྤར་ཁ་བརྒྱད་ཀྱི་སྐག་རིགས་ཐམས་ཅད་ཟློག༔ ལོ་དང་སྤར་ཁའི་སྦྱོར་བའི་སྐག་རྣམས་ཟློག༔ སྤར་ཁ་བརྒྱད་པོའི་དབང་རིས་ཟླ་བ་ཡི༔ སྐག་རྣམས་ཐམས་ཅད་མི་
ནག་ཁྱོད་ཀྱིས་ཟློག༔ སྤར་ཁ་བརྒྱད་པོ་ཞག་དང་དུས་ཚོད་ལ༔ འཁོར་བའི་སྐག་རིགས་ཐམས་ཅད་བསྒྱུར་དུ་གསོལ༔ སྤར་ཁ་དགྲ་ཐོག་དུར་མིག་རང་ཐོག་དང་༔ ན་ས་འཆི་བའི་སྐག་རྣམས་ཐམས་ཅད་ཟློག༔ ནམ་ཟླ་དུས་བརྒྱད་སྤར་ཁའི་སྐག་བརྒྱད་ཟློག༔ སྤར་ཁ་བརྒྱད་ཀྱིས་གནོད་པའི་འདྲེ་བརྒྱད་ཟློག༔ མི་རུང་ནོར་བརྒྱད་དུར་ཟས་བརྒྱད་པོ་ཟློག༔ བསྒྲེན་པའི་མི་བརྒྱད་ན་ངོ་ཐམས་ཅད་ཟློག༔ ཨོཾ་ཧ་ས་གརྦྷ༔ ཏི་ལི་ཧ་ན་ཨ་ནི་ས་ཟློག༔ སྤར་ཁ་རྩུབ་ན་འདི་ཅི་མང་བཟླ་བར་བྱའོ༔ ཧཱུྃ༔ ཧ་ས་གནྟའི་རྩ་ཕྱག་ལོ་བདག་འཛིན༔ བསྐོར་ཆེན་དྲུག་ཅུ་ལོ་སྐག་དགྲ་ལ་སྒྱུར༔ མི་གྲངས་ལོ་གྲངས་འཁྲེན་པའི་འཁྲེན་སྐག་ཟློག༔ ལོ་སྐོར་བཅུ་གཉིས་ལོ་ཡི་སྐག་རྣམས་ཟློག༔ རང་སྐག་ཕྱི་སྐྱེལ་ཟུར་གསུམ་སྐག་རྣམས་ཟློག༔ བཞི་གཤེད་དྲུག་འགྲམས་བདུན་ཟུར་སྐག་རྣམས་ཟློག༔ གནམ་རྒྱང་ས་རྒྱང་ངན་པར་གྱུར་པ་ཟློག༔ འཇུ་ཐག་ཆད་དང་བརྟན་ཕུར་བུད་པ་ཟློག༔ ལོག་མིན་དར་རྒུད་གནམ་ལོ་ལ་སོགས་པ༔ རྒྱལ་པོ་ལོ་ཡི་སྐག་རྣམས་ཐམས་ཅད་ཟློག༔ ལོ་སྐོར་བཅུ་གཉིས་ཟླ་བ་འཁོར་བ་ཡི༔ བློན་པོ་ཟླ་བའི་སྐག་རྣམས་དགྲ་ལ་ཟློག༔
ལོ་སྐོར་བཅུ་གཉིས་ཞག་ལ་འཁོར་བ་ཡི༔ དམག་མིའི་ཞག་སྐག་སུམ་བརྒྱ་དྲུག་ཅུ་ཟློག༔ ལོ་སྐོར་བཅུ་གཉིས་དུས་ཚོད་ལ་འཁོར་བའི༔ དུས་ཚོད་སྐག་རིགས་སྟོང་དང་དྲུག་བརྒྱ་ཟློག༔ ཨོཾ་ཧ་ས་གརྦྷ༔ མྲྀ་ཏ་ཡེ་མྲྀ་ཏ་ཡེ་བློ་ཟློག༔ ལོ་ཟླ་ཞག་སྐག་ཆེ་ན་འདི་མང་དུ་བྱ༔ ཧཱུྃ༔ ཧ་ས་གརྒྱུའི་ཕྱག་གཡས་དང་པོ་ན༔ ཕག་དང་རྟ་ནག་རྟ་སྔོན་ཆུ་སྲིན་དང་༔ ཤ་བ་སེང་གེ་རྟ་དམར་གླང་ཆེན་དཀར༔ དྲེལ་དམར་ལ་སོགས་སྨེ་བ་ཆིབས་པ་འཛིན༔ གཅིག་དཀར་གཉིས་ནག་གསུམ་མཐིང་བཞི་ལྗང་དང་༔ ལྔ་སེར་དྲུག་དཀར་བདུན་དམར་བརྒྱད་དཀར་དང་༔ དགུ་དམར་ལ་སོགས་སྨེ་བའི་སྐག་རྣམས་ཟློག༔ རང་ཐོག་གཉིས་ནག་དབུས་ཚུད་དགྲ་ལ་ཟློག༔ སྨེ་བ་ཞག་དང་དུས་ཚོད་ལ་འཁོར་བའི༔ སྨེ་བའི་སྐག་ཆེན་ཐམས་ཅད་དགྲ་ལ་ཟློག༔ སྨེ་བའི་འཆི་ངོ་དུར་ངོ་དགྲ་ལ་ཟློག༔ ཨོཾ་ཧ་ས་གརྦྷ༔ སྨེ་ཤ་ཡེ་སྨེ་ཤ་ཡེ་བློ་ཟློག༔ སྨེ་བའི་སྐག་རྩུབ་ན་འདི་ཉིད་མང་དུ་བཅུག༔ ཧཱུྃ༔ ཧ་ས་གརྦྷ༔ ཕྱག་མཚན་གྲི་ཐོད་ལས༔ རང་འདྲའི་སྤྲུལ་པ་མང་པོ་རླུང་ལྟར་འཚུབ༔ ཡོད་སློང་ཡེས་རྔའི་མི་ཁ་དགྲ་ལ་ཟློག༔ མ་ཉེས་ཁ་ཡོག་མི་ཁ་ཐམས་ཅད་ཟློག༔ བརྒྱ་ཡི་མི་
ཁ་སྟོང་གི་བྲ་མཆུ་ཟློག༔ མཚན་ངན་བུད་མེད་ཁྱིམ་མཚེས་མི་ཁ་ཟློག༔ ལྐོག་ནས་འབུ་བཞིན་གཡེངས་བའི་མི་ཁ་ཟློག༔ གཏམ་ངན་བྱུར་སྣ་ངན་པའི་མི་ཁ་ཟློག༔ ངན་འདོད་བཏགས་ཀུ་ལྷན་སྦྱོར་མི་ཁ་ཟློག༔ གཞི་མེད་སྐུར་འདེབས་གཤེ་སྐུར་མི་ཁ་ཟློག༔ མི་ཁ་ཆེ་ཞིང་རྒྱ་ཁ་གཡེང་བ་ཟློག༔ ལོ་ཟླ་ཞག་ལ་མི་ཁ་དར་བ་ཟློག༔ མི་ཁ་མེ་ལྟར་འབར་བ་ཐམས་ཅད་ཟློག༔ མི་ཁ་ཆུ་ལྟར་འབྲུབ་པ་ཐམས་ཅད་ཟློག༔ མི་ཁ་རླུང་ལྟར་འཚུབ་པ་ཐམས་ཅད་ཟློག༔ མི་ཁ་བལ་ལྟར་གཡེངས་བ་ཐམས་ཅད་ཟློག༔ ཡུལ་མི་ཁྱིམ་མཚེས་མི་ཁ་ཟུག་པ་ཟློག༔ རླུང་ལྟར་དགྲ་ལ་མི་ཁ་སྡང་བ་ཟློག༔ བཟང་བྱས་ངན་དུ་མཐོང་བའི་མི་ཁ་ཟློག༔ མི་ཡི་ཁྱུ་ནས་བུད་པའི་མི་ཁ་ཟློག༔ མི་ཁ་བྲ་མཆུ་མི་ཁ་བ་རུ་ཟློག༔ མི་ཁ་ཐམས་ཅད་མགོ་གསུམ་ཁྱོད་ཀྱིས་ཟོ༔ ཟོ་ཞིག་འཐུང་ཞིག་ལྷག་མ་མེད་པར་མཛོད༔ ཨོཾ་ཧ་ས་གརྦྷ༔ ཧཱུྃ་བྷྱོཿ རི་ལི་ལི་མི་ཁ་བྷྱོ་ཟློག༔ མི་ཁ་ཆེ་ན་འདི་ཉིད་མང་དུ་བརྗོད༔ ཧཱུྃ༔ གཏོར་ཟོར་ཤ་ཁྲག་གཏོར་མ་འདིས༔ ད་ལྟ་རྣལ་འབྱོར་བདག་ཅག་ལ༔ སྡེ་བརྒྱད་ཆད་པ་བྱུང་བ་ཟློག༔ བྱད་ཟོར་ཕུར་ཁ་ཐམས་ཅད་ཟློག༔ བནྡེའི་སྔགས་
ཟོར་འདུས་པ་ཟློག༔ མུ་སྟེགས་བོན་པོའི་ཕོ་དམར་ཟློག༔ ལྷ་འདྲེའི་ཟ་ཁ་ཟུག་པ་ཟློག༔ རྒྱལ་པོ་ལོ་ཡི་བདུན་ཟུར་ཟློག༔ བློན་པོ་ཟླ་བའི་དབང་བཙན་ཟློག །དམག་མི་ཞིག་གི་དཔུང་དགྲ་ཟློག༔ མཚོན་ཆ་དུས་ཀྱི་རྣོ་ངར་ཟློག༔ སྤར་ཁའི་སྐྱ་མདའ་ཟུག་པ་ཟློག༔ སྨེ་བ་དུར་དུ་ཚུད་པ་ཟློག༔ ས་བདག་ཀོ་ལོང་གདུག་རྩུབ་ཟློག༔ འབྱུང་བའི་དགྲ་གཤེད་འཐབ་པ་ཟློག༔ ལོ་དང་ཞག་དུས་བབས་པ་ཟློག༔ གཟའ་སྐར་དུས་ཚོད་ངན་པ་ཟློག༔ ཁྲམ་དང་བྱེད་དུ་བཅུག་པ་ཟློག༔ ཧོམ་དང་པར་བུ་བསྐོར་བ་ཟློག༔ དགྲ་ཆེན་བདུད་དུ་ལང་བ་ཟློག༔ ལྟས་ངན་གློ་བུར་ཡེ་འདྲོག་ཟློག༔ དུས་མིན་འཆི་བ་རྣམ་བརྒྱད་ཟློག༔ མི་ཁ་བྲ་མཆུ་ཐམས་ཅད་ཟློག༔ ཆག་ཆེན་ཉམ་ང་ཐམས་ཅད་ཟློག༔ སྔོན་བསྒུགས་ཕྱི་ནས་དེད་པ་ཟློག༔ དགྲ་སྣ་ཕུང་སྣ་གྱོད་སྣ་ཟློག༔ ནད་སྣ་ཡམས་སྣ་རིམས་སྣ་ཟློག༔ དགྲ་སྲི་རྨིས་ངན་ཐམས་ཅད་ཟློག༔ ཆེ་སྲི་ཆུང་སྲི་རྒན་སྲི་ཟློག༔ གཞོན་སྲི་དར་སྲི་གོད་སྲི་ཟློག༔ དགྲ་སྲི་མཚོན་སྲི་ནད་སྲི་ཟློག༔ མདོར་ན་སྲིད་པའི་ཆག་སྒོ་དང་༔ བདག་ལ་གནོད་པའི་དགྲ་བགེགས་རྣམས༔ སྡང་བྱེད་དགྲ་བོའི་
སྟེང་དུ་ཟློག༔ གནོད་བྱེད་བགེགས་ཀྱི་སྟེང་དུ་ཟློག༔ བར་ཆད་བདུད་ཀྱི་སྟེང་དུ་ཟློག༔ ཟ་འདྲེ་ཕུང་འདྲེའི་སྟེང་དུ་ཟློག༔ དམ་ཉམས་བྱེད་མའི་སྟེང་དུ་བྷྱོཿ ཨོཾ་ཧ་ས་གརྦྷ༔ ཕཊ༔ ནག་པོ་ཕེ་ཤ་བྷྱོཿ མ་ཧཱ་དྷེ་ཝ་དགྲ་བོ་ཀྲྀ་རྦད༔ བྱོ་མི་ཁ་སྒྱུར༔ མི་ཁ་ཧུར་ཐུམ༔ མཱ་ར་ཡ་ཆད༔ མི་ཁ་ཐུམ་ཐུམ༔ ཤིག་ཤིག༔ རྦད་རྦད༔ དྲིལ་དྲིལ༔ བྷྱོཿབྷྱོཿ ཟློག་ཟློག༔ བྷྱོ་མི་ཁ་ཧུར་ཐུམ་ཆད༔ དྲིལ་ཐུམ་ཐུམ༔ ཤིག་ཤིག༔ རྦད་རྦད༔ དྲིལ་དྲིལ༔ བློ་བྷྱོཿ ཟློག་ཟློག༔ ཨོཾ་ཧ་ས་ཙི་ཀེ་ས་ར་ཏ༔ ར་ས་ལ་ཡ་དགྲ་ལ་བྷྱོ་བྷྱོཿ ནཱ་ག་ཙ་དུ་བྷི་ཏུ་བ༔ མ་ཧཱ་དགྲ་ལ་རྒྱུག་རྒྱུག༔ དེ་ནས་ཐེབས་ལྡོག་དང་བསྟུན་ལ༔ རང་དང་སྦྱིན་བདག་གི་ལོ་ལྷའི་ཕྱོགས་མིན་པར་ཁྱེར་བཅུག་ལ༔ ཧཱུྃ༔ ཧ་ས་གཅུ་འཁོར་དང་བཅས༔ དམར་གྱི་གཏོར་མ་འདི་བཞེས་ལ༔ སྣང་ཞིང་སྲིད་པའི་ལྷ་འདྲེ་དང་༔ འདྲེ་སྲིན་བགེགས་རིགས་ཀུན་ཁྲིད་ལཿ༔ སྡང་བ་དགྲ་ཡི་ཡུལ་དུ་རྒྱུག༔ གནས་དང་ཕོ་བྲང་དེ་རུ་ཐོབ༔ ཟ་ཁ་འཐུང་ཁ་དེ་རུ་སྤོས༔ འབྱུང་བ་སྤར་སྨེ་ལོ་ཟླའི་བདག༔ ས་བདག་གཞི་བདག་ཐམས་ཅད་ཀུན༔ དཀར་གསུམ་གཏོར་མ་འདི་བཞེས་ལ༔ གཏོ་གླུད་འདི་
ཡི་ལམ་ཕྱེས་ལ༔ མདོས་ལམ་ཟོར་ལམ་དགྲ་ལ་སྟོན༔ འདྲེ་ངན་ལན་ཆགས་བདག་པོ་དང་༔ ཟ་འདྲེ་ཡུལ་འདྲེ་བསེ་རག་རྣམས༔ གླུད་གཏོར་འདི་ཡིས་ཚིམ་གྱིས་ལ༔ སོ་སོ་རང་རང་གནས་སུ་སོང་༔ གལ་ཏེ་མི་འགྲོ་འདུག་གྱུར་ན༔ རིགས་གསུམ་མགོན་པོ་ཐུགས་ཁྲོས་ནས༔ ཁྱུང་འབྲུག་སེང་ཆེན་སྤྲུལ་པ་འགྱེད༔ རྡུལ་དུ་བརླག་པར་གདོན་མི་ཟ༔ དེ་བས་མ་འདུག་མྱུར་དུ་དེངས༔ སརྦ་བྷུ་ཏ་གཙྪ་གཙྩ༔ ཅེས་ཕྱིར་ཁྱེར་ཚེ་རོལ་མོ་དང་བཅས༔ ཨོཾ་ཡ་མཱནྟ་ཀ་ཡ་མ་རཱ་ཙ་མ་ཧཱ་དྷེ་ཝ་ས་མ་ཡ་ཧཱུྃ་བྱོལ༔ ནག་པོ་ཕེ་ཤ་ཧཱུྃ་བྱོལ༔ བྱོལ་མི་ཁ་ཆིལ་ཆིལ༔ མི་ཁ་ཟློག་ཟློག༔ མི་ཁ་མཱ་ར་ཡ་ཧུར་ཐུམ་རྦད་རྦད༔ མི་ཁ་དྲིལ་དྲིལ༔ མི་ཁ་ཐུམ་ཐུམ༔ མི་ཁ་ཆིལ་ཆིལ༔ མི་ཁ་ཤིག་མི་ཁ་དྲིལ་དྲིལ༔ མི་ཁ་རྦད་རྦད༔ མི་ཁ་བྱོལ་བྱོལ༔ མི་ཁ་ཟློག་ཟློག༔ བརྒྱ་ཡི་མི་ཁ་སྟོང་གི་བྲ་མཆུ༔ མོ་རྨིས་ལྟས་ངན་དགྲ་གྱོད་འཁོན་གསུམ་བན་བྱད་བོན་བྱད་ཐམས་ཅད་དགྲ་ལ་ཟློག་ཅིག༔ ཅེས་པ་བརྗོད་ཅིང་ཕུལ༔ ཚུར་སླེབས་ནས་གཏོར་སྣོད་སྦུབ་ལ་རྟ་བྲོ་བརྡུང་༔ ༀ་ལཾ་ཧཱུྃ་ལམ་སྟེ་བྷ་ཡ་ནན༔ དམ་སྲི་སྒབ་འདྲེ་ཐམས་ཅད་གཏོར་གཞོང་རི་རབ་
འབར་བའི་འོག་ཏུ་སྟམ་བྷ་ཡ་ནན༔ ཕྱི་རོལ་སྲུང་འཁོར་ཁྱུང་འབྲུག་སེང་གེ་རྣམས༔ རང་ཉིད་རིགས་གསུམ་གཅིག་དྲིལ་སྐུ་ལ་ཐིམ༔ དེ་ཡང་མཐའ་ནས་དབུས་ཡལ་སྟོང་པ་ཉིད༔ དགེ་བས་རིགས་གསུམ་མགོན་པོ་འགྲུབ་གྱུར་ནས༔ བཀྲ་ཤིས་བདེ་ལེགས་བསམ་པ་ལྷུན་གྲུབ་ཤོག༔ ཅེས་པ་ཁྱིམ་དུ་བྱ་མ་བྱིལ་ཕྱིན་པ་དང་༔ དྲེལ་ཕྲུག་ལ་ལྷག་ཆད་དང་ཁྱིམ་དུ་ཤ་མོང་ཚན་ཆེར་སྐྱེ་བ་མར་མེ་ནག་འབོགས་གྱོན་པ་སོགས༔ འདི་ལྟས་ངན་འགའ་ཞིག་བྱུང་བ་ལ་བརྟེན་ནས་རཱ་ག་ཨ་སྱས་སྦྱར་བ་ལ༔ ཉེས་འགལ་ཆོས་བདག་བཀའ་སྲུང་ཚོགས་ལ་བཤགས་ཤིང་༔ དགེ་བས་འགྲོ་བ་མང་པོ་ལ་ཕན་ཐོགས་རྒྱ་ཆེན་པོར་གྱུར་ཅིག༔ སརྦ་མངྒ་ལཾ༔ དགེའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།