ལྟས་ངན་ལམ་བསྒྱུར་གྱི་མན་ངག་བཅའ་ཏི་ལམ་བསྒྱུར།
ལྟས་ངན་ལམ་བསྒྱུར་གྱི་མན་ངག་བཅའ་ཏི་ལམ་བསྒྱུར་བཞུགས་སོ།
ན་མོ་བཛྲ་པཱ་ཎི་ཡེ། ལྟས་ངན་ཕྲན་བུ་ལམ་བསྒྱུར་བྱ་བའི་ཐབས། །རེ་འབྱམས་སྡེ་དགོན་དཔོན་ལ་ལྟ་བའི་ཐན། །མི་རྟ་ཁྱི་ལ་བྱུང་བའི་ཐན་ཆེན་དང། །རང་གཞུང་སྐབས་ལ་གང་བབ་ས་རུ་མནན། །དེ་མིན་ལྷག་ཆད་མ་ཚང་རིགས་ཀུན་དང་། །ཐན་ཆུང་ཕལ་ཆེར་ལམ་བསྒྱུར་བྱས་ན་ལེགས། །རེ་བའི་ཁུག་མར་ལྟས་ངན་གང་བྱུང་བླུག །དེ་དང་མཉམ་དུ་སྐྱེར་པའི་བྱང་བུ་ལ། །སྒྱུར་སྒྱུར་ལ་ཐན་ལ་ལ་སྒྱུར། །ལུང་ཐན་ལུང་དུ་སྒྱུར། །སུ་དང་འཕྲད་པ་དེ་རུ་སྒྱུར༔ ཅེས་བྲི། བཟའ་མི་ཁྱིམ་གཞིའི་ཕྱུགས་ལ་གླུད་དྲུད་པ། །ཆངས་བུ་མང་བྱས་ཡས་རྫས་སྦྲང་མར་བཅས། །དེ་རྣམས་ཀུན་ཀྱང་ཟན་དང་མཉམ་དུ་བཅུག །ཕྱི་ན་ཁུག་མ་སྤུས་བཟང་ཁ་སྒྲོག་བཅིངས།
རྒྱ་གྲམ་ལམ་ལ་ཕྱིན་ནས་ཤུད་བཏབ་སྒྱུར། །ཕྱི་ལྟས་མི་བྱ་རང་ཁྱིམ་མགྱོགས་པར་ལོག །གོང་ནོན་མདོས་ཟློག་གང་རུང་བཅའ་སྲོལ་གདའ། །དེ་ཡང་ལམ་བསྒྱུར་བྱ་ཁར་ཐོན་ན་ལེགས། །ལྟས་ངན་ཐན་དང་ཐན་བདག་རང་གཟུགས་བསྟིམས། །འདི་ལ་སྒྲུང་གྱེར་མང་དུ་མི་དགོས་ཀྱང་། །སྔར་གྱི་སྔགས་རྒན་འགའ་ཞིག་ཞལ་རྒྱུན་ལྟར། །རང་ཉིད་ཕྱག་རྡོར་བསྐྱེད་པའི་ཐུགས་ཀ་ནས། །འོད་ཟེར་དམར་པོ་ལྕགས་ཀྱུའི་དབྱིབས་ཅན་འཕྲོས། །ལྟས་ངན་གཏོང་བའི་བདག་པོ་སྐད་ཅིག་བཀུག །ཁོ་རང་ཐན་དེ་རང་གནས་ཁྱེར་བར་བསམ། ཧཱུྃ༔ ང་ནི་གསང་བདག་རྡོ་རྗེ་འཛིན། །གདུག་པ་འདུལ་མཛད་ཁྲོ་བོ་སྟེ། །ང་ལ་མི་ཉན་གང་ཡང་མེད། །ཉོན་ཅིག་སྣང་སྲིད་ལྷ་འདྲེའི་
ཚོགས། །ཁྱད་པར་ཡུལ་ཕྱོགས་འདིར་གནས་པའི། །ཡུལ་ལྷ་དགེ་བསྙེན་གནས་བདག་དང་། །གཉུག་མར་གནས་པ་མ་ལུས་ཀུན། །རྒྱུ་སྦྱོར་ཡོན་བདག་འདི་ཉིད་ལ། །ཐན་དང་ལྟས་ངན་སྣ་འདྲེན་པའི། །འདྲེ་སྲིན་གདུག་ཅན་མ་རུངས་ཚོགས། །ང་ཡི་བཀའ་ལ་མ་འདའ་བར། །སྲིད་པའི་སྨང་གྱེར་འདི་ལ་ཉོན། །སྔོན་གྱི་བསྐལ་པ་དང་པོ་ལ། །མུ་སྟེགས་ཀ་ལ་ནག་པོ་ཡིས། །ནང་པ་སངས་རྒྱས་རྩོད་པ་བྱུང་། །ཟ་ཧོར་ཡུལ་དུ་ཐན་སྣ་དྲང་། །བློན་པོ་ཝང་ཐེ་འཕྲུལ་རྒྱལ་གྱིས། །ཕྱག་ན་རྡོ་རྗེའི་ཏིང་འཛིན་བསྒོམ། །སྲིད་པའི་མདོས་རྫས་སྣ་ཚོགས་བཤམས། །ལ་ཐན་ལ་རུ་བསྒྱུར་བར་མཛད། །ལུང་ཐན་ལུང་དགུའི་མདོ་རུ་སྒྱུར། །བར་ཐན་འཕྲེད་དུ་བསྒྱུར་བར་མཛད། །སྔོན་གྱི་དཔེ་ལུང་དེ་བཞིན་དུ། །དེང་འདིར་རྣལ་འབྱོར་བདག་ཅག་གིས། །ཡོན་གྱི་བདག་པོ་འདི་ཉིད་ལ། །གནོད་པའི་ལྟས་ངན་ཆེ་དགུ་འདི། །ལ་དགུའི་རྒྱབ་ཏུ་ཕར་བསྒྱུར་རོ། །ལུང་དགུའི་མདོ་རུ་མར་བྲུབ་བོ། །དམུ་བདུད་བཙན་དང་ཐེའུ་རང་དང་། །གཟའ་ཀླུ་རྒྱལ་འགོང་འདྲེ་སྲིན་གྱིས། །བཏང་དང་མངག་པ་གང་ཡིན་པ། །རང་རང་གནས་སུ་ཁྱེར་བར་
གྱིས། །གླུད་ཡས་སྣ་དགུ་ཚང་བ་འདི། །ལྟས་ངན་བཀར་བའི་ཡས་ཡིན་ནོ། །ཡ་བདུད་རྒྱལ་པོའི་ཐན་སྣ་དེ། །བྲག་སྐར་རྒོད་ཚང་ནང་དུ་སོང་། །མ་ཡམས་འདྲེ་མོའི་ལྟས་ངན་དེ། །ལུང་དགུ་འདུས་པའི་མདོ་རུ་སོང་། །བར་ཐན་བདུད་ཀྱི་ལྟས་ངན་དེ། །སུ་དང་འཕྲད་པ་དེ་རུ་སྒྱུར། །ཨར་ཇག་འགྲིམ་པའི་ཕྱི་ལ་སོང་། །རྒྱ་གྲམ་ལམ་འདི་ཁྱོད་ཀྱི་གནས། །ཡས་གླུད་སྣ་ཚོགས་ཁྱོད་ཀྱི་ཟས། །སུ་དང་འཕྲད་པ་ཁྱོད་ཀྱི་གྲོགས། །ཕྱིན་ཆད་གནོད་པ་མ་བྱེད་ཅིག །བསྒྱུར་རོ་བསྒྱུར་རོ་སྒྱུར་ཡག་གོ །དེ་འོག་བསྐལ་པ་བར་མ་ལ། །སྟག་གཟིག་གྲམ་པ་འཁྲུལ་ལྗང་དུ། །དམ་སྲི་སྤུན་དགུའི་ཐན་སྣ་ཁྲིད། །སྟག་གཟིག་མི་རབས་ཆད་ལ་ཐུག །རྒྱ་གར་མཁས་པ་པཎྜི་ཏས། །ཧེ་རུ་ཀ་ཡི་ཏིང་འཛིན་བསྒོམ། །སྲིད་པའི་མདོས་རྫས་སྣ་ཚོགས་བཤམས། །ལ་ཐན་ལ་རུ་བསྒྱུར་བར་མཛད། །ལུང་ཐན་ལུང་དོགུའི་མདོ་རུ་སྒྱུར། །བར་ཐན་འཕྲེད་དུ་བསྒྱུར་བར་མཛད། །སྔོན་གྱི་དཔེ་ལུང་དེ་བཞིན་དུ། །དེང་འདིར་རྣལ་འབྱོར་བདག་ཅག་གིས། །ཡོན་གྱི་བདག་པོ་འདི་ཉིད་ལ། །གནོད་པའི་ལྟས་ངན་ཆེ་དགུ་འདི། །ལ་དགུའི་
རྒྱབ་ཏུ་ཕར་སྒྱུར་རོ། །ལུང་དགུའི་མདོ་རུ་མར་བྲུབ་བོ། །ཀླུ་བདུད་བཙན་དང་ཐེའུ་རང་དང་། །གཟའ་ཀླུ་རྒྱལ་འགོང་འདྲེ་སྲིན་གྱིས། །བཏང་དང་མངག་པ་གང་ཡིན་པ། །རང་རང་གནས་སུ་ཁྱེར་བར་གྱིས། །གླུད་ཡས་སྣ་དགུ་ཚང་བ་འདི། །ལྟས་ངན་བཀར་བའི་ཡས་ཡིན་ནོ། །ཡ་བདུད་རྒྱལ་པོའི་ཐན་སྣ་དེ། །བྲག་སྐར་རྒོད་ཚང་ནང་དུ་སོང། །མ་ཡམས་འདྲེ་མོའི་ལྟས་ངན་དེ། །ལུང་དགུ་འདུས་པའི་མདོ་རུ་སོང་། །བར་ཐན་བདུད་ཀྱི་ལྟས་ངན་དེ། །སུ་དང་འཕྲད་པ་དེ་རུ་བསྒྱུར། །ཨར་ཇག་འགྲིམ་པའི་ཕྱི་ལ་སོང་། །རྒྱ་གྲམ་ལམ་འདི་ཁྱེད་ཀྱི་གནས། །ཡས་གླུད་སྣ་ཚོགས་ཁྱོད་ཀྱི་ཟས། །སུ་དང་འཕྲད་པ་ཁྱོད་ཀྱི་གྲོགས། །ཕྱིན་ཆད་གནོད་པ་མ་བྱེད་ཅིག །བསྒྱུར་རོ་བསྒྱུར་རོ་སྒྱུར་ཡག་གོ །དེ་འོག་བསྐལ་པའི་བར་མ་ལ། །བཙད་པོ་ཁྲི་སྲོང་ལྡེའུ་བཙན་ལ། །གོད་འདྲེ་སྤུན་དགུས་ཐན་སྣ་ཁྲིད། །རྟ་ནོར་ལུག་གསུམ་གོད་ཀས་བསད། །སློབ་དཔོན་པད་མ་འབྱུང་གནས་ཀྱིས། །སྲིབ་ཀྱི་ས་ནག་སྐྱོག་ཆེན་དུ། །སྲིད་པའི་མདོས་རྫ་ས་སྣ་ཚོགས་བཤམས། །ལ་ཐན་ལ་རུ་བསྒྱུར་བར་མཛད། །ལུང་ཐན་ལུང་དགུའི་མདོ་
རུ་སྒྱུར། །བར་ཐན་འཕྲེད་དུ་བསྒྱུར་བར་མཛད། །སྔོན་གྱི་དཔེ་ལུང་དེ་བཞིན་དུ། །དེང་འདིར་རྣལ་འབྱོར་བདག་ཅག་གིས། །ཡོན་གྱི་བདག་པོ་འདི་ཉིད་ལ། །གནོད་པའི་ལྟས་ངན་ཆེ་དགུ་འདི། །ལ་དགུའི་རྒྱབ་ཏུ་ཕར་བསྒྱུར་རོ། །ལུང་དགུའི་མདོ་རུ་མར་བྲུབ་བོ། །རླུ་བདུད་བཙན་དང་ཐེའུ་རང་དང་། །གཟའ་ཀླུ་རྒྱལ་འགོང་འདྲེ་སྲིན་གྱིས། །བཏང་དང་མངག་པ་གང་ཡིན་པ། །རང་རང་གནས་སུ་ཁྱེར་བར་གྱིས། །གླུད་ཡས་སྣ་དགུ་ཚང་བ་འདི། །ལྟས་ངན་བཀར་བའི་ཡས་ཡིན་ནོ། །ཡ་བདུད་རྒྱལ་པོའི་ཐན་སྣ་དེ། །བྲག་སྐར་རྒོད་ཚང་ནང་དུ་སོང་། །མ་ཡམས་འདྲེ་མོའི་ལྟས་ངན་དེ། །ལུང་དགུ་འདུས་པའི་མདོ་རུ་སོང་། །བར་ཐན་བདུད་ཀྱི་ལྟས་ངན་དེ། །སུ་དང་འཕྲད་པ་དེ་རུ་སྒྱུར། །ཨར་ཇག་འགྲིམ་པའི་ཕྱི་ལ་སོང་། །རྒྱ་གྲམ་ལམ་འདི་ཁྱེད་ཀྱི་གནས། །ཡས་གླུད་སྣ་ཚོགས་ཁྱོད་ཀྱི་ཟས། །སུ་དང་འཕྲད་པ་ཁྱོད་ཀྱི་གྲོགས། །ཕྱིན་ཆད་གནོད་པ་མ་བྱེད་ཅིག །བསྒྱུར་རོ་བསྒྱུར་རོ་སྒྱུར་ཡག་གོ །དེ་འོག་བསྐལ་པའི་ཐ་མ་ལ། །འདན་མ་ཨ་བྱ་རྡོ་རྗེ་ལ། །ཆུ་སྲི་ནག་པོའི་ཟ་འདྲེ་ཟུག །ཐན་དང་ལྟས་ངན་སྣ་
ཚོགས་བྱུང་། །སྔགས་འཆང་དྲག་པོ་གཞོན་ནུ་ཡིས། །ཁྲོ་བོ་བཞི་ཡི་ཏིང་འཛིན་བསྒོམ། །སྲིད་པའི་མདོས་རྫས་སྣ་ཚོགས་བཤམས། །ལ་ཐན་ལ་རུ་བསྒྱུར་བར་མཛད། །ལུང་ཐན་ལུང་དགུའི་མདོ་རུ་སྒྱུར། །བར་ཐན་འཕྲེད་དུ་བསྒྱུར་བར་མཛད། །སྔོན་གྱི་དཔེ་ལུང་དེ་བཞིན་དུ། །དེང་འདིར་རྣལ་འབྱོར་བདག་ཅག་གིས། །ཡོན་གྱི་བདག་པོ་འདི་ཉིད་ལ། །གནོད་པའི་ལྟས་ངན་ཆེ་དགུ་འདི། །ལ་དགུའི་རྒྱབ་ཏུ་ཕར་བསྒྱུར་རོ། །ལུང་དགུའི་མདོ་རུ་མར་བྲུབ་བོ། །རྨུ་བདུད་བཙན་དང་ཐེའུ་རང་དང་། །གཟའ་ཀླུ་རྒྱལ་འགོང་འདྲེ་སྲིན་གྱིས། །བཏང་དང་མངག་པ་གང་ཡིན་པ། །རང་རང་གནས་སུ་ཁྱེར་བར་གྱིས། །གླུད་ཡས་སྣ་དགུ་ཚང་བ་འདི། །ལྟས་ངན་བཀར་བའི་ཡས་ཡིན་ནོ། །ཡ་བདུད་རྒྱལ་པོའི་ཐོན་སྣ་དེ། །བྲག་སྐར་རྒོད་ཚང་ནང་དུ་སོང་། །མ་ཡམས་འདྲེ་མོའི་ལྟས་ངན་དེ། །ལུང་དགུ་འདུས་པའི་མདོ་རུ་སོང་། །བར་ཐན་བདུད་ཀྱི་ལྟས་ངན་དེ། །སུ་དང་འཕྲད་པ་དེ་རུ་བསྒྱུར། །ཨར་ཇག་འགྲིམ་པའི་ཕྱི་ལ་སོང་། །རྒྱ་གྲམ་ལམ་འདི་ཁྱེད་ཀྱི་གནས། །ཡས་གླུད་སྣ་ཚོགས་ཁྱོད་ཀྱི་ཟས། །སུ་དང་འཕྲད་པ་ཁྱོད་ཀྱི་གྲོགས། །
ཕྱིན་ཆད་གནོད་པ་མ་བྱེད་ཅིག །བསྒྱུར་རོ་བསྒྱུར་རོ་སྒྱུར་ཡག་གོ །ཧཱུྃ། རི་གསུམ་འདུས་པའི་མདོས་མདོ་རུ། །ལམ་གསུམ་རྒྱ་གྲམ་འཚུབ་མ་རིས། །སྣང་སྲིད་ལྷ་འདྲེའི་ཕོ་བྲང་ཡིན། །ལྟས་ངན་བཀུག་པའི་བྲུབ་ཁུང་ཡིན། །རང་དབང་མེད་པར་འདིར་ཁུག་ལ། །ཤོར་བ་མེད་པར་ཁྱོད་ལ་གཏད། །བཅོལ་ལོ་གཏད་དོ་མ་ཤོར་ཅིག །བཛྲ་དུནྟི་ཧཱུྃ་མཱ་ར་ཡ་ཧཱུྃ་རྦད། བཛྲ་ཀཱི་ལ་ཡ་རྦད། མ་ཧཱ་ཀཱི་ལ་ཡ་རྦད། ཏྲིག་ཕུར་ནན་རྦད། སརྦ་ཏྲིག་ཧུར་ཐུ་ཛ་ནན་སོད། ཨོཾ་ལོ་ཀྲི་པ་ལ་སོགས། བརླག་ལྟས་ངན་གཏོང་བའི་གཏོང་མཁན་ལྟས་ངན་ཁོ་རང་ལ་སྡིག །རང་གཤེད་རང་ལ་ཕོབ། རང་བྱེད་རང་ལ་ཟློག་ཡ་ཟློག །མ་ཟློག །བྷྱོ་བྷྱོ། ཟློག་ཟློག །ཨུ་ཙ་ཏ་ཡ་ཕཊ༔ ཅེས་བརྗོད་ལ་ཕྱི་མིག་མི་ལྟ་བར་ཁུག་མ་ཤུད་སྟབས་སུ་བསྒྱུར། ཅེས་པ་འདི་ནི་རྟེའུ་ལ་ལྷག་ཆད་མང་དུ་བྱུང་སྐབས། སྔར་གྱི་བཅའ་ཏི་ལམ་བསྒྱུར་ཡིག་རྙིང་ལ་གཞི་བྱས་ཏེ། སྔགས་འཆང་རཱ་ག་ཨ་སྱས་སྦྱར། །ཐན་ལྟས་ངན་པའི་ཕྱི་ལམ་ཆོད་པར་གྱུར་ཅིག། ། ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།