རྒྱ་ནག་གཏོར་གཞུང་ཆེན་པོ་ལས་དགུ་མིག་ནས་འདོན་ཐབས་ཟབ་མོ།
འདིར་རྒྱ་ནག་གཏོར་གཞུང་ཆེན་པོ་ལས་དགུ་མིག་ནས་འདོན་ཐབས་ཟབ་མོ་བཞུགས་སོ།
ཀོང་ཙེ་འཕྲུལ་གྱི་རྒྱལ་པོ་ལ་ཕྱག་འཚལ་ལོ། །གཏོ་གཞུང་དགུ་མིག་ནས་འདོན་པའི་ཡས་བསགས་པ་ལ། ཕུང་ཤུལ་རྙིང་པའི་ས་དང་། ལམ་རྒྱ་གྲམ་གྱི་ས་དང་། གཙང་འགྲམ་བྱེ་མ་བཅས་བསྲེས་ལ། སྣམ་ཕྱིང་སོགས་ཀྱི་གདན་ལ། ལ་དགུ་བྱེས་ལ་གཡས་སུ་ལྷ་བཤོས་དགུ་དང་མཐེབ་སྐྱུ་དགུ། །གཡོན་དུ་ངར་གླུད་དགུ་བཤམས་འགལ་པ་དགུ་འཇོལ་དགུའི་སྟེང་མདའ་དར་ནག་པོ་དགུ། ཁྲམ་ཤིང་དགུ་ཡང་བཤམས། གཡས་སུ་ནམ་མཁའ་མདའ་བཀྲ་འཕང་བཀྲ་དགུ། གཡོན་དུ་རྒྱང་བུ་འཕང་རྡོ་ནག་པོ་དགུ་བཤམས་ལྷ་གཞུང་གང་རུང་ལས་བྱང་སོགས་ཡན་སོང་ནས། རང་ཉིད་ཡི་དམ་ཏིང་འཛིན་དང་ལྡན་པས་འདི་སྐད་དོ། །ཀྱེ་ང་ནི་ཀོང་ཙེ་འཕྲུལ་རྒྱལ་ཡིན། །ང་ནི་སྲིད་པའི་གཏོ་མཁན་
ཡིན། །འཇིག་རྟེན་ས་ཡི་ཞིང་ཁམས་ནས། །བདག་གི་ཞིང་ལས་བཙན་པ་མེད། །འཕགས་པའི་བཀའ་ལ་མི་ཉན་གཅིག་ཀྱང་མེད། །རི་རབ་ངོས་ལ་མི་བརྟེན་གང་ཡང་མེད། །རྒྱ་མཚོའི་ཆུ་ལ་མི་འཐུང་གང་ཡང་མེད། །ཟབ་མོའི་སེམས་ལ་མི་གནས་གང་ཡང་མེད་། བདེན་པའི་བཀའ་ལ་མི་ཉན་གང་ཡང་མེད། །ཀྱཻ། སྣང་སྲིད་ལྷ་འདྲེ་གཉེན་པོ་རྣམས། །ཚུར་གཤེགས་ང་ཡི་བཀའ་ལ་ཉོན། །ཡུལ་ནི་རྒྱ་ནག་ཕ་ཀི་ན། །རི་བོ་རྩེ་ལྔའི་ཤར་ཕྱོགས་ནས། །རྒྱ་རྗེ་ལིང་ཀ་ཐང་རྩེ་བྱ་བ་དེ། །བུ་གསུམ་བུ་མོ་གཅིག་དང་བཞི་རུ་སྲིད། །མི་
ནོར་ཟས་གསུམ་ཐམས་ཅད་འཛོམས། །སྐུ་མཁར་དེ་ནི་དཔངས་སུ་མཐོ། །བཤོལ་ཞིང་དེ་ཡང་རྒྱ་རུ་ཆེ། །བྲན་གཡོག་འཁོར་དང་བཅས་པ་འཛོམས། །སྐྱེས་པའི་འབྲས་དྲུག་ཕུན་སུམ་ཚོགས། །དར་ཟབ་སྣ་ཚོགས་དཔུངས་ཀྱིས་འདེབས། །རྒྱལ་པོ་དགུང་ལོ་སྟག་གི་ལོ། །གནམ་ལོ་ཡོས་བུ་ཤར་བའི་ཚེ། །ལོ་ནི་ཉི་ཤུ་རྩ་བདུན་ལོན། །དགུ་མིག་གཤེད་དང་འདོམས་ནས་སུ། །བཙུན་མོའི་པང་དུ་བུ་མ་ཆགས། །ར་བའི་ནང་དུ་ནོར་མ་ཆགས། །མཐོ་བའི་སྐུ་མཁར་དེ་ཡང་འགྱེལ། །དམའ་བའི་ས་ཞིང་ཡུལ་ཡང་ཤོར། །ཅི་བྱས་ཅི་རུ་མ་བཏུབ་པས། །རྒྱལ་པོ་ཡི་མུག་ག་ཆད་ནས། །འོ་དོད་ཆེ་ཆུང་གནམ་དུ་འབོད། །སྐུ་ལུས་ས་ལ་བརྡབས་ནས་འགྱེལ། །ཕན་ཐབས་གཅིག་ཀྱང་མེད་པ་ལ། །རྒྱལ་པོ་ཁོང་གི་རྨི་ལམ་དུ། །རྒྱ་རྗེ་རྒྱལ་པོ་ཆེན་པོ་ཁྱོད། །མ་ཉལ་ད་ལྟ་ཡར་ལོངས་ཤིག །ཅི་བྱས་ཅི་ཡང་མི་ཉན་པར། །ར་བར་ནོར་ཡང་མ་ཆགས་ཤིང་། །མཐོ་བའི་མཁར་ཡང་འགྱེལ་བ་དང་། །དམའ་བའི་ས་ཞིང་ཤོར་བ་དང་། །རྒྱལ་པོ་དགུ་མིག་ཚུད་རྟགས་ཡིན། །ངན་པ་བཟང་པོར་འགྱུར་བ་དང་། །ན་བ་གསོ་བར་བྱེད་པ་དང་། །
འཆི་བ་སོས་པར་བྱེད་པ་དང་། །དགུ་མིག་དུར་ནས་འདོན་འདོད་ན། །ཉི་མ་ཤར་ཕྱོགས་ཕ་ཀི་ན། །རིན་ཆེན་གསེར་གྱི་ཁྲི་སྟེང་དུ། །ཀོང་ཙེ་འཕྲུལ་གྱི་རྒྱལ་པོ་བཞུགས། །ཀོང་ཙེ་འཕྲུལ་གྱི་རྒྱལ་པོ་དེ། །སྐྱེ་འགྲོ་སེམས་ཅན་ཐམས་ཅད་ལ། །ཚད་མེད་བཞི་ཡི་ཐུགས་རྗེ་ལྡན། །བང་ཆེན་ཐོངས་ལ་སྤྱན་དྲོངས་ཤིག །ཞལ་སྐྱེམས་དྲོངས་ལ་བཀའ་བཞིན་སྒྲུབས། །མཉེས་པའི་ཕྱག་དང་ཡོན་ཕུལ་ཅིག །དེ་ལྟར་བྱས་ནས་ཕན་པར་འགྱུར། །ཞེས་པའི་རྨི་ལམ་ལུང་བསྟན་བྱུང་། །གནམ་སའི་རྒྱལ་པོ་ཐུགས་དགྱེས་པས། །རྒྱལ་བློན་གཉིས་ནི་བང་ཆེན་བཏང་། །ཀོང་ཙེ་འཕྲུལ་རྒྱལ་སྤྱན་དྲངས་ནས། །འབྱུང་བའི་སྐག་རྩིས་བྱས་པའི་ཚེ། །ཀོང་ཙེ་རྒྱལ་པོའི་ཞལ་ན་རེ། །རྒྱལ་པོ་ཆེན་པོ་ཚུར་ཉོན་དང་། །རྒྱལ་པོ་ཅི་བྱས་མི་ཉན་པ། །དགུ་མིག་གཤེད་དང་འདོན་པའི་རྟགས། །གནམ་སའི་ཁ་ཡོད་བྱུང་བས་ལན། །དེ་ནས་རྒྱལ་པོས་འདི་སྐད་ཞུས། ཀོང་ཙེ་འཕྲུལ་གྱི་རྒྱལ་པོ་ལགས། །འདི་ལ་དགོས་པ་ཅི་ཞིག་འཚལ། །ཕན་པ་ཐམས་ཅད་བདག་གིས་ཞུ། །ཕྱག་ཏུ་ཡོན་དང་ཞལ་དུ་སྐྱེམས། །དྲངས་ལ་ནོར་རྫས་ཕུལ་ནས་
ཀྱང། །ཞལ་ཟས་སྣ་ཚོགས་བཤམ་པ་ལ། །ཀོང་ཙེ་འཕྲུལ་རྒྱལ་ཞལ་ན་རེ། །ཕན་པའི་ཐབས་ཤིག་ང་ཡིས་བྱེད། །བཅས་པའི་ནོར་རྫས་བདག་ལ་འབུལ། །ཕུང་ཤུལ་ས་དང་རྒྱ་གྲམ་ལམ། །ས་ལ་དགུ་མིག་དུར་ས་རྐོས། །དེ་ཡི་ཕྱོགས་བཞི་མཚམས་བརྒྱད་དུ། །དཀོན་མཆོག་གསུམ་པོ་མཆོད་པའི་ཕྱིར། །མཆོད་པ་ཅི་འབྱོར་བཤམ་པར་བྱ། །དམ་སྲི་ཆེན་པོ་བསྒྱུར་བའི་ཕྱིར། །མགལ་བ་ཁ་ནག་དགུ་ཡང་བཤམས། །ལྷ་འདྲེའི་ཁྲམ་ཁ་བཟློག་པའི་ཕྱིར། །ངར་གླུད་རྒྱུན་ལྡན་དགུ་ཡང་བཤམས། །གཞན་གྱི་རྩོད་གཏོང་བཟློག་པའི་ཕྱིར། །མདུང་དར་ཆེན་པོ་དགུ་ཡང་བཤམས། །འགོ་བའི་ལྷ་རྣམས་དགའ་བའི་ཕྱིར། །མཐེབ་སྐྱ་ཆངས་བུ་གཏོར་མ་བཤམས། །ཡོན་བདག་དགུ་མིག་འདོན་པའི་ཕྱིར། །ལ་དགུ་ལུང་དགུ་འདོན་པར་བྱས། །དགུ་གཅིག་དང་པོ་སྲིད་པའི་ལ། །བདུད་པོ་སྲོག་ལ་གནོད་པའི་ལ། །དེ་ཡི་ནང་ནས་འདོན་འཚལ་པས། །ལ་གཅིག་བརྒལ་ནས་ཡར་ལ་བྱོན། །དགུ་གཅིག་རྣམ་སྨིན་ལ་ནས་ཐར་རོ། །དགུ་གཉིས་འདི་ནི་བཙན་གྱི་ལ། །སྐྱེས་པ་ཕོ་ཡི་སྲོག་ལ་གནོད། །ཟ་མ་མོ་ཡི་སྲི་བདུད་ཡིན། །
དེ་ཡི་ནང་ནས་འདོན་འཚལ་པས། །ལ་གཉིས་བརྒལ་ནས་ཡར་ལ་བྱོན། །དགུ་གཉིས་བཅོ་བརྒྱད་སྟག་དར་མ། །མདའ་ཁར་འཆི་བའི་དགུ་མིག་ནས་ཐར་རོ། །དགུ་གསུམ་ཉི་ཤུ་རྩ་བདུན་ནི། །དབང་ཐང་རྐུ་མས་ཁྱེར་བ་ཡིན། །དགུ་མིག་འདི་ལས་ཚུར་ཐར་རོ། །དགུ་བཞི་དེ་ནི་དམུ་ཡི་ལ། །རྒྱལ་པོའི་དབང་ཐང་དག་ལ་གནོད། །རྒྱལ་པོ་དེ་ལ་ཁ་གྲུ་རོ། །དེ་ཡི་ནང་ནས་འདོན་འཚལ་པས། །ལ་བཞི་བརྒལ་ནས་ཡར་ལ་བྱོན། །དགུ་བཞི་སུམ་ཅུ་སོ་དྲུག་པ། །རྨེ་ཞུགས་གྲི་ཡི་དགུ་མིག་ནས་ཐར་རོ། །དགུ་ལྔ་དེ་ནི་ཐེའུ་རང་ལ། །ཐེའུ་རང་སྤུན་དགུ་སྲི་ལ་གནོད། །ར་བ་ནོར་ལ་རྐུ་བར་བྱེད། །དེ་ཡི་ནང་ནས་འདོན་འཚལ་པས། །ལ་ལྔ་བརྒལ་ནས་ཡར་ལ་བྱོན། །དགུ་ལྔ་བཞི་བཅུ་ཞེ་ལྔ་པ། །སེང་གེ་དཀར་མོ་ཆུ་དོང་དུ། །ལྷུང་བའི་དགུ་མིག་ནང་ནས་ཐར་རོ། །དགུ་དྲུག་དེ་ནི་འགོང་པོ་ལ། །འགོང་པོ་སྤུན་དགུ་རྗེ་ལ་གནོད། །རྒྱལ་པོའི་དབང་དུ་བུ་ཡང་བསད། །དེ་ཡི་ནང་ནས་འདོན་འཚལ་པས། །ལ་དྲུག་བརྒལ་ནས་ཡར་ལ་བྱོན། །དགུ་དྲུག་ལྔ་བཅུ་ང་བཞི་ལ། །ལྕགས་སྤྱང་སྔོན་
པོ་འགུལ་བ་ལས། །ཟིན་པས་དགུ་མིག་ནས་ཐར་རོ། །བདུན་པ་དེ་ནི་སྲིན་མོ་ལ། །སྲིན་མོ་སྤུན་དགུ་བྱ་བ་དེ། །བུ་དང་ཚ་བོ་དག་ལ་གནོད། །བུད་མེད་སྤྱིར་ནི་བུ་ལ་གནོད། །དེ་ཡི་ནང་ནས་འདོན་འཚལ་པས། །ལ་བདུན་བརྒལ་ནས་ཡར་ལ་བྱོན། །དགུ་བདུན་དྲུག་ཅུ་རེ་གསུམ་ལ། །སྡེ་དཔོན་དུག་ལ་འདུས་པའི་དགུ་མིག་ནས་ཐར་རོ། །དགུ་བརྒྱད་འདི་ནས་སྲིད་པའི་ལ། །འཇིག་རྟེན་ལྷ་སྲིན་ཆགས་པའི་གདོན། །སྲོག་ལུས་དབང་ཐང་རླུང་རྟ་དང་། །བླ་ཡི་རིགས་ལ་གནོད་པས་གདོན། །དེ་ཡི་ནང་ནས་འདོན་འཚལ་ལོ། །ལོ་བརྒྱད་བརྒལ་ནས་ཡར་ལ་བྱོན། །དགུ་བརྒྱད་བདུན་ཅུ་དོན་གཉིས་ན། །ཤེལ་བྱ་ཐང་དཀར་གཤོག་པ་ཆག་པའི་དགུ་མིག་ནས་ཐར་རོ། དགུ་པ་དེ་ནི་གཤེད་འདོམས་ལ། །དགུ་མིག་དེ་ཡི་ནང་ཤེད་ནས། །།མི་ཡི་སྲོག་ལ་རྒོལ་བར་བྱེད། །དེ་ཡི་ནང་ནས་འདོན་འཚལ་ལོ། །ལ་དགུ་བརྒལ་ནས་ཡར་ལ་བྱོན། །དགུ་དགུ་བརྒྱད་ཅུ་གྱ་གཅིག་པ། །དགུང་ལ་དར་དཀར་རལ་བའི་དགུ་མིག་ནས་ཐར་རོ། །དགུ་མིག་ནས་ཐར་རོ། །ན་མིག་ནས་ཐར་རོ། །ཤི་མིག་ནས་ཐར་རོ། །
དུར་མིག་ནས་ཐར་རོ། །འབྱུང་བའི་དུར་དུ་ཚུད་པའི་དགུ་མིག་ནས་ཐར་རོ། །ལོ་ཟླ་ཞག་དུས་ཀྱི་དགུ་མིག་ནས་ཐར་རོ། །མི་བྲོས་པ་ལྷ་ཡི་དྲུང་དུ་ཐར་རོ། །ཤ་བ་བྲོས་པ་སྤང་དཀར་ལ་ཐར་རོ། །བྱ་བྲོས་པ་ཤིང་གི་གསིབ་ཏུ་ཐར་རོ། །ཉ་བྲོས་པ་ཆུ་ནང་དུ་ཐར་རོ། །བྱིའུ་ཆུང་བྲོས་པ་ཁྲ་ཡི་ལག་ནས་ཐར་རོ། །ར་ལུག་བྲོས་པ་གཅན་གཟན་ཁ་ནས་ཐར་རོ། །ཡམས་དང་ནད་ཀྱི་ཁ་ནས་ཐར་རོ། །ལྷ་སྲིན་སྡེ་བརྒྱད་ཀྱི་ལག་ནས་ཐར་རོ། །ན་མིག་དགུ་མིག་ཤི་མིག་ནས་ཐར་རོ། །ཚེ་ཐར་རོ། །སྲོག་ཐར་རོ། ཅེས་ཡོན་བདག་ལ་དགུ་ལུང་དགུ་སྟེང་དུ་འདོན་ནས་བཀྲ་ཤིས་བརྗོད། འདི་བྲིས་དགེ་བས་བསོད་ནམས་ཀྱིས། །ནམ་མཁས་ཁྱབ་པའི་སེམས་ཅན་རྣམས། །བགེགས་ཚོགས་མི་ཕྱོགས་རྣམ་པ་ཀུན། །མ་ལུས་བྱང་ཞིང་བདེ་ཐོབ་ཤོག །རཱ་ག་ཨ་སྱས་སོ། །༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།