སྤར་ཁའི་གདན་བགོས།
སྤར་ཁའི་གདན་བགོས་བཞུགས་སོ། །གསོན་གཤིན་གདན་བགོས་བྱ་བ་ནི། ཕྱིང་བུ་དཀར་ནག་གཉིས་ཀྱི་སྟེང་དུ། ངར་མི་དཀར་ནག་གཉིས། འབྲང་རྒྱས་དཀར་ནག་གཉིས། རྡེལ་བུ་དཀར་ནག་གཉིས། ཆངས་བུ་ཏིང་ལོ། མཐེབ་སྐྱུཤ་དུམ། གླུད་གོས་བཞག་ལི་འདི་སྐད་དོ།། ཀྱཻ། ཀོང་ཙེ་བྱང་ཆུབ་སེམས་ལ་ཕྱག་འཚལ་ལོ། །སྔོན་རྒྱལ་བུ་དྲུག་ཅུ་གདན་ལ་བཞུགས། དུས་དང་བསྐལ་པ་དེ་ཙམ་ན། རྒྱ་རྗེ་རྒྱལ་པོའི་བླ་གནས་དུར་དུ་སོང་། བླ་འཕར་གནམ་དུ་འཕར། ཚེ་ཟད་ཟ་གྲངས་ཚང་། དེར་གཏོ་མཁན་རྒྱལ་པོ་སྤྱན་དྲངས། སྣང་སྲིད་མེ་ལོང་ལ་བལྟས། གབ་རྩེ་གསང་བས་བསྐོར། རྒྱ་རྗེ་རྒྱལ་པོ་དེ་མངའ་ཐང་ཆུང་ནས། རྒྱ་བོད་མཚམས་སུ་རྒྱ་རིགས་མང་པོ་དབང་ཐང་བཅད། སྤར་ཁ་བརྒྱད་ལོ་སྐོར་བཅུ་གཉིས་བཅད་དེར་རྒྱལ་པོ་ཐང་ཆད་ཉམ་ཐག་གོ །དེར་རྒྱལ་པོ་ལ་གདན་བགོས་བྱས། བླ་གནས་དུར་དུ་སོང་ནས་བཏོན། ཚེ་ཟད་པ་བཤོལ། བདག་རྒྱལ་པོ་ལ་ཕན་ཏེ་བསོད། སྔོན་ཤིང་ཚེ་རྒྱལ་པོ་ལ་མི་ནག་པོ་གཅིག་གིས། གཤིན་ཆུའི་འགྲམ་ནས་བོས་ནས། གཤིན་རྗེའི་ཟམ་སྣ་ན། གཤིན་རྗེ་རྒྱལ་པོའི་ཞག་གསུམ་ལྟས་ཚང་བྱུང་། དེར་
ཀོང་ཙེ་རྒྱལ་པོ་སྤྱན་དྲང་ནས། གབ་རྩེ་ཁྲ་བོ་གཏིང་། རྒྱལ་པོ་གཤིན་གྱི་ཐག་པས་བཏགས། གསོན་གཤིན་ལག་པས་འབྲེལ། རྒྱལ་པོ་གདན་ཐོག་ཏུ་བཞག །རྒྱལ་པོའི་་བཀའ་ཟློག་བྱས། རྒྱལ་པོ་གླུད་བཏང་ངོ། །གཤིན་ཆུའི་འགྲམ་གཤིན་རྗེའི་སྤྱན་སྔར། ཤིང་ཚེ་རྒྱལ་པོ་ཚུར་བཏང་ནས། གཤིན་རྗེའི་རྒྱལ་པོ་ལྷག་སྟེ་བཞད། གཤིན་གྱི་ཐན་ཕུར་བ་ལ། བདག་གིས་རྒྱལ་པོས་གླུད་དུ་བཏང་། རྒྱལ་པོ་གཤིན་ཡུལ་ནག་པོ་དགུ་ཡུལ་ན། རྒྱལ་པོའི་སྐྱིན་ཡིན་སྐད། དུར་མོ་དར་གཤིན་བཀག་སེལ་བྱ། གཤིན་ཚབས་སུ་ཕར་བསྒྱུར་རོ། །སྔོན་ཤིང་ཚེ་རྒྱལ་པོའི་སྐུ་གླུད་འཚལ། དེ་རིང་ཡོན་གྱི་བདག་པོས་ཀྱང་། མོན་པའི་མགོ་ལ་ཐོད་བཅིངས། མགུལ་དུ་སྐྱེམས་དྲངས། འོག་ཏུ་གདན་བཏིང་། བདེན་པ་བདར། ཀླུ་ཀླད་སྐྱིན་བཏང་། གཤིན་ཆུའི་འགྲམ། གཤིན་ཟམ་སྣ་ནས། གཤིན་རྗེའི་སྤྱན་སྔར། ཡོན་གྱི་བདག་པོའི་སྐུ་གླུད་བཏང་བ་ཡིན། །བཀའ་བདེན་པ་བཤད། སྤར་ཁ་གང་ཡིན་བརྗོད། སྤར་ཁ་བརྒྱད་གདན་བགོས་བྱ། གླུད་འཛལ་གདན་ས་བགོས། དེ་རིང་ཡོན་གྱི་བདག་པོས་གདན་ཐུག་པ་ཡོད་ན་གདན་བགོས་བྱའོ། །ཀྱཻ། ཡས་ལེན་ཆེན་པོ་
འདི་བཞེས་ལ། །ཡས་འདི་བཞེས་ལ་གདན་འདི་སྤྲོས། །གླུད་འདི་ཁྱེར་ལ་གདན་འདི་སྤྲོས། །མི་དང་གླུད་འདི་ད་རྗེས་ལ། །ཉོ་ཚོང་འདི་ནི་ད་གྱིས་ཤིག །གླུད་འདི་ཁྱོད་ཀྱིས་ཕར་ཁྱེར་ལ། །མིའུ་བདག་ལ་ཚུར་ཐོངས་ཤིག །ངས་གདན་གཅིག་འདི་ནི་སོ་སོར་ཕྱེ། །གསོན་དང་གཤིན་གཉིས་གདན་གཅིག་ག་ལ་སྲིད། །གདན་གཅིག་ཡོད་ན་གཤིན་ཟེར་ག་ལ་ཡོད། །གལ་ཏེ་གདན་ས་གཅིག་པ་ན། །སྤར་ཁའི་གདན་ས་སོ་སོར་ཕྱེས། །ལོ་ཡི་གདན་ས་སོ་སོར་ཕྱེས། །ལོག་མིན་གདན་ས་སོ་སོར་ཕྱེས། །སྤར་ཁའི་གདན་ས་སོ་སོར་ཕྱེས། །སྨེ་བའི་གདན་ས་སོ་སོར་ཕྱེས། །སྲུང་རྟའི་གདན་ས་སོ་སོར་ཕྱེས། །ཕྱེས་ཤིག་འཕགས་པའི་བཀའ་མ་བཅག །སྔགས་འཆང་བདག་གི་དམ་མ་བཀྲལ། །བཅོལ་བའི་ཕྲིན་ལས་འགྲུབ་པར་མཛོད། །སྤར་ཁ་གང་ཡིན་བརྗོད། ཀྱཻ། སྤར་ཁ་བརྒྱད་ཀྱི་གདན་བགོས་བྱེད། །ཀོང་ཙེ་རྒྱལ་པོས་དཔང་པོ་མཛོད། །ངར་མི་དེ་ནི་དཀར་ནག་གཉིས། །རྡེལ་བུ་དེ་ནི་དཀར་ནག་གཉིས། །ཕྱིང་བུ་དེ་ནི་དཀར་ནག་གཉིས། །དཀར་ནག་དབྱེ་བ་འདི་རྣམས་ཀྱིས། །ཡོན་གྱི་བདག་པོ་
འདི་དག་གིས། །ཚེ་ཡི་སྐྱིན་དང་སྲོག་གླུད་མཛོད། །འབུལ་བ་ང་ཡིས་མི་ནོར་རོ། །བཞེས་པ་ཁྱེད་ཀྱིས་མ་ནོར་ཅིག །ད་ལྷ་མི་དཀར་པོ་གྱེན་དུ་བཏང་། །དུར་མི་ནག་པོ་དུར་བཀར་འཚལ། །ཤི་གསོན་ལག་པ་མ་འཛིན་ཅིག །ཤི་མིག་གསོན་ལ་མ་ལྟ་ཞིག །གསོན་པོ་གཤིན་ཕྱིར་མ་འབྲང་ཞིག །ཤི་གསོན་གདན་ནི་སོ་སོར་བགོ །རྟ་རྐྱང་གཉིས་བྲེས་མི་གཅིག །གླང་ལུག་གཉིས་ཁྱུ་མི་གཅིག །ལྷ་མི་གཉིས་ཡུལ་མི་གཅིག །གསོན་གཤིན་གཉིས་གདན་མི་གཅིག །དཀར་ནག་གཉིས་ཀྱི་གདན་བགོས་བྱེད། །ཤི་ཁ་ཆོད་ལ་རལ་ཁ་བྲུབ། །ཤི་རྩུབ་ངན་པ་མ་འཕར་ཅིག །སྤར་ཁ་མི་མཐུན་གདན་ས་བགོ །མི་ལ་ཤི་ཆད་མ་གཏོང་ཞིག །ཕྱུགས་ལ་གོད་ཁ་མ་གཏོང་ཞིག །བདུད་ཀྱི་ཉི་མ་བཟློག་ཏུ་གསོལ། །ཤི་རྩུབ་ངན་པ་མ་འཕར་ཞིག །འདྲེ་འདུད་གསོན་ལ་མ་འབབ་ཅིག །སྤར་ཁའི་གདན་བགོས་བྱེད། །ཕྱེ་ཕྱེ་དེ་ནི་ས་ལ་ལ། ཅེས་གདན་ས་སོ་སོར་ཕྱེས་ལ། ངར་མི་དཀར་པོ་གྱེན་དུ་ཕུལ། ངར་མི་ནག་པོ་ཐུར་དུ་བསྐྱར། གཤིན་པོའི་ཐོག་ཏུ་བཞག །