བྱིས་པ་ཐར་འདོན་གསལ་བར་བཀོད་པ་དགའ་སྟོན་འཕྲུལ་གྱི་འདོད་འཇོ།
བྱིས་པ་ཐར་འདོན་གསལ་བར་བཀོད་པ་དགའ་སྟོན་འཕྲུལ་གྱི་འདོད་འཇོ་བཞུགས་སོ།
བླ་མ་ཡི་དམ་མཁའ་འགྲོའི་ཚོགས་ལ་འདུད། མིའུ་རིན་ཆེན་སྐག་ལས་ཐར་བ་ཡི། །ཡར་གཞི་རྩ་གསུམ་རྟེན་གཏོར་མཆོད་པ་བཤམས། །ཐར་གཞི་སྣམ་བུ་དཀར་པོ་འདོམ་གང་སྟེང་། །ནས་ཀྱི་ཐར་སྐས་རིམ་པ་བཅུ་གསུམ་བྲིས། །འོག་ཏུ་གདན་དཀར་པདྨ་འདབ་བརྒྱད་བྲིས། །མདའ་དར་རིན་ཆེན་སྣ་ལྔས་བརྒྱན་པ་བཤམས། །གཡས་སུ་ལྷ་ཤིང་སྐས་རྩར་ཐར་བྱེལ་བཞག །ངར་མི་བཅུ་གསུམ་ལྷ་ཡི་བཤོས་བུ་གཅིག །གཡོན་དུ་གླང་མའི་སྐས་དཀྱིལ་ཁྲ་གཅིག་བཞག །ལོ་བདུད་བཀར་བའི་ཆངས་བུ་བཅུ་གསུམ་བཞག །རྩ་བར་བྱིས་པའི་སྐུ་གླུད་ཡས་རྫས་བསགས། །བྱིས་པའི་ཡན་ལག་སྐུད་པས་བཅིངས་ལ་བཞག །དེ་ནས་བྱིས་པ་མ་བུ་ཁྲུས་ཀྱིས་བཀྲུས། །རྒྱན་དང་ཆས་གོས་ལེགས་པས་མདུན་འདུག་
ཚེ། །བསང་གི་ཆོ་ག་བསང་མཆོད་གཞུང་བསྲངས་ནས། །དྲི་ཞིམ་སྤོས་ཀྱིས་བསང་ལ་འདི་སྐད་དོ། །ཨོཾ་བཛྲ་ཨ་མྲྀ་ཏས་བསང་། ཨོཾ་སྭ་བྷ་ཝས་སྦྱང་། སྟོང་པའི་ངང་ལས་བྱིས་པ་འདི། །བུ་ཡིན་ན། པདྨ་འབྱུང་གནས་སྐུ་རུ་བསྒོམ། །གནས་ལྔ་རྒྱལ་བ་རིགས་ལྔ་གསལ། །ཨོཾ་ཧཱུྃ་ཏྲཾ་ཧཱིསཿ བུ་མོ་ཡིན་ན། ཡེ་ཤེས་མཚོ་རྒྱལ་སྐུ་རུ་བསྒོམ། །གནས་ལྔར་མཁའ་འགྲོ་སྡེ་ལྔར་གསལ། །ཁཾ་དང་ཧ་རི་ནི་སས་མཚན། །ས་བོན་འོད་ཀྱིས་སྤྱན་དྲངས་ནས། །བསྒྲུབ་བྱའི་ལུས་ལ་བརྟན་པར་བཞུགས། །བར་ཆད་རྐྱེན་ལས་ཐར་བར་མཛོད། །ཅེས་བརྗོད། བཛྲ་གུ་རུ་སིཾ་ཧ་རི་ནི་ས་ཧཱུྃ།
བསྙེན་པ་བྱ། དེ་ནས་གསེར་སྐྱེམས་མཆོད་ལ། ཀྱཻ། དེ་རིང་ཉི་རྒྱས་ཟླ་བ་ཡར་གྱི་ངོ། །གནམ་ལ་གཟའ་སྐར་ས་ལ་དུས་ཚོད་བཟང་། །བར་ལ་ཚེས་གྲངས་དུས་སྲིད་སྐལ་པ་བཟང་། །རྒྱུ་སྦྱོར་ཡོན་བདག་བཙན་ཕྱུག་འཕན་དར་རྒྱས། །ལྷ་གཞི་བཀྲག་མདངས་མཆོད་རྫས་དྭངས་རེ་སྤྲོ། །དེ་ལྟར་ཕུན་སུམ་ཚོགས་པའི་གནས་འདི་རུ། །བླ་མ་ཡི་དམ་མཁའ་འགྲོ་ཆོས་སྐྱོང་དང་། །དགྲ་ལྷ་ཝེར་མ་འགོ་བའི་ལྷ་ལྔ་དང་། །རྟེན་སྒྲུབ་མཆོད་པའི་ལྷ་སྲུང་ཐམས་ཅད་ཀུན། །ནད་པ་གདོན་ལས་ཐར་བའི་སྐྱབས་སུ་གཤེགས། །སྲིའུ་ཚང་ནས་སྐྱེད་པའི་མགོན་དུ་གཤེགས། །གསེར་སྐྱེམས་འདི་བཞེས་ཁ་འཛིན་རྒྱབ་རྟེན་མཛོད། །སྔོན་ཚེ་བསྟན་པ་སྲུང་བའི་ཐ་ཚིག་ཅན། །དྲེགས་པ་སྡེ་བརྒྱད་མགུར་ལྷ་བརྟན་མ་དང་། །གཏན་ཆགས་ཟོ་དོར་ཡུལ་ལྷ་མགོན་བྱེད་ཀུན། །གསེར་སྐྱེམས་འདི་བཞེས་དགེ་བའི་སྡོང་གྲོགས་མཛོད། །ཀྱཻ། སྔོན་ཚེ་བསྐལ་བཟང་སྲིད་པ་དང་པོ་ལ། །མིའུ་ཐར་འདོན་བྱེད་པ་འདི་ལྟར་སྲིད། །ལྷ་བུ་དོན་ལྡན་ལྷ་མོ་དཔལ་བྱིན་གཉིས། །འཁོར་ལོས་སྒྱུར་བའི་རྒྱལ་རྒྱུད་སྤེལ་བ་ལ། །འཇིག་རྟེན་མྱེས་པོ་ཚངས་པས་མཚན་གསོལ་ལྟར། །དེང་
གི་མིའུ་རིན་ཆེན་ཐར་འདོན་འཚལ། །སྔོན་ཆེ་ཧ་ལུ་མུན་དྷ་བྲག་སྲིན་གཉིས། །མིའུ་གདུང་དྲུག་མི་རབས་བྱུང་བའི་ཚེ། །སྤྱན་རས་གཟིགས་ཀྱིས་ལུང་བསྟན་ཐར་པ་ལྟར། །དེང་གི་མིའུ་རིན་ཆེན་ཐར་འདོན་འཚལ། །ས་སྐྱེས་དྷེ་ཝ་ཡུམ་སྲས་རྒྱལ་མོ་གཉིས། །སྲས་པོ་སྨོན་མི་དབུ་ནག་སྐུ་འཁྲུངས་ཚེ། །རྟེན་འབྲེལ་ཐར་པའི་སྐས་ལ་དྲངས་པ་ལྟར། །དེང་གི་མིའུ་རིན་ཆེན་ཐར་འདོན་འཚལ། །ཡབ་ལྷ་བརྡལ་དྲུག་དེ་མོ་གངས་དཀར་ལ། །སྲས་ནི་རྒྱལ་བུ་མཐིང་གེ་བལྟམས་པའི་ཚེ། །ལེ་གུ་ལྷ་ཡི་མར་མེས་ཐར་བྱས་ལྟར། །དེང་གི་མིའུ་རིན་ཆེན་ཐར་འདོན་འཚལ། །རྒྱལ་པོ་ཟས་གཙང་སྒྱུ་མ་ལྷ་མཛེས་གཉིས། །རྒྱལ་སྲས་དྲི་མེད་གྲགས་པ་སྐུ་འཁྲུངས་པ། །ལྷ་ལ་ཡོན་ཕུལ་ཐར་གཞི་བཏིང་བ་ལྟར། །དེང་གི་མིའུ་རིན་ཆེན་ཐར་འདོན་འཚལ། །ཀྱཻ། སྔགས་འཆང་བདག་དང་རྒྱུ་སྦྱོར་སྦྱིན་བདག་གི །སྔོན་གྱི་རྒྱལ་བུ་ཐར་འདོན་དེ་བཞིན་དུ། །བྱིས་པ་ཚེ་རིང་མི་གྲལ་ཚུད་པའི་ཚེ། །ཐར་སྣམ་ནས་ཀྱི་ཐར་སྐས་བཅུ་གསུམ་བྲིས། །གཡས་ཀྱི་ལྷ་སྐས་ཐར་བྱིས་བགྲོད་པའི་ལམ། །གཡོན་གྱི་འདྲེ་སྐས་ཆུང་བདུད་བཀར་བའི་ལམ། །
གསལ་བའི་སྒྲོན་མེ་ལྷ་ཞལ་མཐོང་བའི་སྒྲོན། །རིན་ཆེན་མདའ་དར་དགྲ་ལྷ་ཝེར་མའི་རྟེན། །སྐུ་གླུད་ངར་མི་ཚེ་སྲོག་བསླུ་བའི་ཡོན། །རྟེན་འབྲེལ་རྫས་བསགས་ལེའུ་ལྷ་དར་ནས། །བྱིས་པ་སྲིའུ་ཚང་ནས་འདོན་འཚལ་ལོ། །བར་ཆད་རྐྱེན་ངན་སྐག་ལས་ཐར་མཛོད་ཅིག །དེ་ནས་ཡན་ལག་སྐུད་པ་བཀྲོལ་ལ། ཀྱཻ། རིགས་བཟང་ལྷ་ཡི་སྲས་བུ་འདི། །མཐོ་རིས་མི་གྲལ་བགྲོད་པ་ལ། །དེ་སྔ་ཕན་ཆད་སྒྲོག་གིས་བཅིངས། །ད་ནི་བཅིངས་པའི་སྒྲོག་བཀྲོལ་ལོ། །དེ་ནས་དཀར་སྣམ་སྟེང་ནས་བྱིས་པ་ཡར་གཞི་མར་མེ་བསྣམས་ནས་ལྷ་སྐས་ཐེམ་ག་རིམ་བཞིན་བགྲོད་ལ་བཞག །མར་མེ་རི་ལ་ཡར་མཆོད། དེའི་ཁལ་དུ་བྱིས་པ་ཡར་འགྲོ། ཁྲ་གཟུགས་འདྲེ་སྐས་ལ་མར་ཕུད། ཚིག་དོན་རེ་སྤྲད་ལ་འདི་སྐད་དོ། །ཨོཾ་སྭ་བྷ་ཝ་སོགས། སྟོང་པའི་ངང་ལས་ཐར་སྣམ་རིན་པོ་ཆེའི་གཞལ་ཡས་ཁང་གི་དབུས་སུ་ཐར་སྐས་རིམ་པ་བཅུ་གསུམ་རྩེ་མོ་ལྷའི་ཡུལ་དུ་སླེབས་པ། རྩ་བར་འདྲེ་སྲིན་ཆུང་བདུད་མནན་པ། །མཐོ་རིས་སྐྱེད་པ་རིན་པོ་ཆེའི་སྐས་སུ་གྱུར། ཡེ་དྷརྨས་བྱིན་གྱིས་བརླབ། ཀྱཻ། གསལ་བའི་སྒྲོན་མེ་སྲུང་སྐྱོབ་ལྷ་ལ་འབུལ། །ཟླ་བ་ངོ་གཅིག་ལོན་པའི་ཁྱེའུ་འདི། །ཆུང་བདུད་སྤུན་དགུའི་ཁ་ནས་ཡར་ཐར་རོ། །
གཅིག་པ་རང་སྐག་ཆུང་བདུད་ཐུར་དུ་བསྒྱུར། །གསལ་བའི་སྒྲོན་མེ་སྲུང་སྐྱོབ་ལྷ་ལ་འབུལ། །ཟླ་བ་ངོ་གཉིས་ལོན་པའི་ཁྱེའུ་འདི། །སྲི་རྐུན་བཅུ་གསུམ་ཁ་ནས་ཡར་ཐར་རོ། །གཉིས་པ་འཆི་བའི་བདུད་སྐག་ཐུར་དུ་བསྒྱུར། །གསལ་བའི་སྒྲོན་མེ་སྲུང་སྐྱོབ་ལྷ་ལ་འབུལ། །ཟླ་བ་ངོ་གསུམ་ལོན་པའི་ཁྱེའུ་འདི། །མ་ཡམས་རྒྱལ་མོའི་ཁ་ནས་ཡར་ཐར་རོ། །གསུམ་པ་དྲུག་ཟུར་སྐག་རྣམས་ཐུར་དུ་བསྒྱུར། །གསལ་བའི་སྒྲོན་མེ་སྲུང་སྐྱོབ་ལྷ་ལ་འབུལ། །ཟླ་བ་ངོ་བཞི་ལོན་པའི་ཁྱེའུ་འདི། །བར་ཆད་བཞི་ཡི་ཁ་ནས་ཡར་ཐར་རོ། །བཞི་པ་བཞི་གཤེད་སྐག་རྣམས་ཐུར་དུ་བསྒྱུར། །གསལ་བའི་སྒྲོན་མེ་སྲུང་སྐྱོབ་ལྷ་ལ་འབུལ། །ཟླ་བ་ངོ་ལྔ་ལོན་པའི་ཁྱེའུ་འདི། །བདུད་བཙན་དམུ་སྲིན་ཁ་ནས་ཡར་ཐར་རོ། །ལྔ་པ་བྱེ་བྲལ་སྐག་རྣམས་ཐུར་དུ་བསྒྱུར། །གསལ་བའི་སྒྲོན་མེ་སྲུང་སྐྱོབ་ལྷ་ལ་འབུལ། །ཟླ་བ་ངོ་དྲུག་ལོན་པའི་ཁྱེའུ་འདི། །ལྷ་ཀླུ་གནོད་སྦྱིན་ཁ་ནས་ཡར་ཐར་རོ། །དྲུག་པ་དྲུག་འགྲིམ་སྐག་རྣམས་ཐུར་དུ་བསྒྱུར། །གསལ་བའི་སྒྲོན་མེ་སྲུང་སྐྱོབ་ལྷ་ལ་འབུལ། །ཟླ་བ་ངོ་བདུན་ལོན་པའི་ཁྱེའུ་འདི། །རྒྱལ་བསེན་ཐེའུ་རང་ཁ་ནས་
ཡར་ཐར་རོ། །བདུན་པ་བདུན་ཟུར་སྐག་རྣམས་ཐུར་དུ་བསྒྱུར། །གསལ་བའི་སྒྲོན་མེ་སྲུང་སྐྱོབ་ལྷ་ལ་འབུལ། །ཟླ་བ་ངོ་བརྒྱད་ལོན་པའི་ཁྱེའུ་འདི། །སྤར་ཁ་བརྒྱད་ཀྱི་སྐག་ནས་ཡར་ཐར་རོ། །བརྒྱད་པ་དུར་སྒོའི་སྐག་རྣམས་ཐུར་དུ་བསྒྱུར། །གསལ་བའི་སྒྲོན་མེ་སྲུང་སྐྱོབ་ལྷ་ལ་འབུལ། །ཟླ་བ་ངོ་དགུ་ལོན་པའི་ཁྱེའུ་འདི། །སྨེ་བ་དགུ་ཡི་སྐག་ནས་ཡར་ཐར་རོ། །དགུ་པ་དགུ་མིག་སྐག་རྣམས་ཐུར་དུ་བསྒྱུར། །གསལ་བའི་སྒྲོན་མེ་སྲུང་སྐྱོབ་ལྷ་ལ་འབུལ། །ཟླ་བ་ངོ་བཅུ་ལོན་པའི་ཁྱེའུ་འདི། །གཙུག་ལག་གདོན་བཅུའི་ཁ་ནས་ཡར་ཐར་རོ། །བཅུ་པ་གཤིན་རྗེའི་སྐག་རྣམས་ཐུར་དུ་བསྒྱུར། །གསལ་བའི་སྒྲོན་མེ་སྲུང་སྐྱོབ་ལྷ་ལ་འབུལ། །ཟླ་བ་བཅུ་གཅིག་ལོན་པའི་ཁྱེའུ་འདི། །གདོན་ཆེན་བཅོ་ལྔའི་ཁ་ནས་ཡར་ཐར་རོ། །བཅུ་གཅིག་ལོ་ཡི་སྐག་རྣམས་ཐུར་དུ་བསྒྱུར། །གསལ་བའི་སྒྲོན་མེ་སྲུང་སྐྱོབ་ལྷ་ལ་འབུལ། །ཟླ་བ་བཅུ་གཉིས་ལོན་པའི་ཁྱེའུ་འདི། །ལོ་བདུད་བཅུ་གཉིས་ཁ་ནས་ཡར་ཐར་རོ། །བཅུ་གཉིས་ལོ་ཡི་སྐག་རྣམས་ཐུར་དུ་བསྒྱུར། །གསལ་བའི་སྒྲོན་མེ་སྲུང་སྐྱོབ་ལྷ་ལ་འབུལ། །ཟླ་བ་བཅུ་གསུམ་ལོན་པའི་ཁྱེའུ་འདི། །ལོ་ཟླ་
ཞག་དུས་སྐག་ནས་ཡར་ཐར་རོ། །ལོ་རྒྱལ་ཟླ་བློན་ཞག་དམག་དུས་མཚོན་སྐག །ཐམས་ཅད་ཆུང་བདུད་དམ་སྲིའི་སྟེང་དུ་སྒྱུར། །ཀྱཻ། བསླུ་མེད་དཀོན་མཆོག་རྒྱུ་འབྲས་བདེན་སྟོབས་དང་། །སྔགས་འཆང་རྟེན་འབྲེལ་རྫས་སྔགས་ཡོན་ཏན་གྱིས། །མིའུ་རིན་ཆེན་བར་ཆད་རྐྱེན་ལས་ཐར། །ནད་རིགས་བཞི་བརྒྱ་རྩ་བཞིའི་སྐག་ལས་ཐར། །གདོན་རིགས་སྟོང་ཕྲག་བརྒྱད་ཅུའི་སྐག་ལས་ཐར། །རྐྱེན་ངན་སུམ་བརྒྱ་དྲུག་ཅུའི་སྐག་ལས་ཐར། །ཡེ་འདྲོག་གློ་བུར་ཉི་ཁྲིའི་སྐག་ལས་ཐར། །གཟུགས་ཅན་གཟུགས་མེད་བྱེད་དང་གདོན་ལས་ཐར། །སྲི་དགུ་གཤེད་འཁྱམས་ཕུང་སྲིའི་སྐག་ལས་ཐར། །དུས་མིན་འཆི་བའི་ཚེ་ལན་བདུད་ལས་ཐར། །རྣོ་མཚོན་སྦྱར་དུག་གཅན་གཟན་པའི་སྐག །མི་ཁ་བྲ་མཆུའི་སྒྲོག་ཏུ་ཚུད་པ་དང་། །རྨིས་ལྟས་མཚན་ངན་དུས་འཁྲུགས་སྐག་ལས་ཐར། །གསལ་བའི་མར་མེ་ལྷ་ཡི་ཞལ་ཟས་རྣམས། །ཚེ་སྲོག་སྐྱོབ་པའི་ལྷ་སྲུང་རྣམས་ལ་འབུལ། །ཚེ་བསྲིང་དཔལ་སྐྱེད་དོན་དུ་བཞེས་སུ་གསོལ། །མིའུ་རིན་ཆེན་ཚེ་མཐར་ཕྱིན་པར་མཛོད། །ཐར་བྱིས་སྟོབས་ཆེན་ལྷ་ཡི་ཡུལ་དུ་གཤེགས། །ལྷ་མི་
གཉིས་ཀྱི་རྒྱལ་ཁ་གྱེན་དུ་བསྟོད། །ཆུང་བདུད་བྱིས་ཟན་བདུད་ཁྲ་ཐུར་དུ་བཀར། །འདྲེ་སྲིན་གཉིས་ཀྱི་ཟ་ཁ་ཐུར་དུ་བསྒྱུར། །རྒྱུ་སྦྱོར་སྦྱིན་བདག་སྐལ་ལྡན་ལྷ་བུ་འདི། །ཚེ་རིང་མི་ཡི་ལྷ་གྲལ་ཕྱིན་པ་ཡིན། །ལོ་བརྒྱའི་བར་དུ་བརྟན་པར་བཞུགས་སུ་གསོལ། །ཅེས་བརྗོད་མཐར་གཞི་གོང་གི་གདན་དཀར་ཐོག་ཏུ་བསྡད། ཐར་བྱིས་སྐས་ལྷམ་ལྷའི་ཕྱོགས་སུ་བཞག །འདྲེ་སྐས་བཅག་ལ་ཁྲོ་གཟུགས་བཅས་གླུད་ནང་དུ་འཕང་། དེ་ནས་སྔགས་པས་མིང་བཏགས། ཕ་མ་གཉིས་ཀྱིས་རྟེན་འབྲེལ་གྱི་སྨོན་ལམ་བཟང་པོ་བཏབ། རིན་ཆེན་སྣ་ལྔ་མགུལ་དུ་བཏགས། མདའ་དར་གཡབ་ཅིང་ཚེ་འགུགས་དང་། གཡང་འགུགས་གྱེར། འབྲུ་སྣ་ཚོགས་མཆོད་ཅིང་འདི་སྐད་དོ། །ཧཱུྃ། དཀོན་མཆོག་རྩ་གསུམ་ཕ་མཚུན་དགྲ་ལྷ་དང་། །འགོ་བའི་ལྷ་ལྔ་སྐྱོབ་བྱེད་རྟེན་པའི་ལྷ། །འདིར་གཤེགས་སྐལ་ལྡན་ལུས་ལ་བརྟན་པར་བཞུགས། །སྐད་ཅིག་མི་འབྲལ་ལུས་དང་གྲིབ་བཞིན་འགྲོགས། །ཁ་འཛིན་མགོན་སྐྱབས་མ་གཡེལ་སྲུང་སྐྱོབ་མཛོད། །ཚེ་བསོད་མངའ་ཐང་དཔལ་འབྱོར་ཕྱུ་དང་གཡང་། །ཟ་ཐང་ལོངས་སྤྱོད་ཕུན་ཚོགས་རྐང་འགྲོ་རྣམས། །ཟླ་བ་ཡར་ངོ་བཞིན་དུ་གོང་འཕེལ་ཤོག །ལོ་བརྒྱ་ཐུབ་ཅིང་སྟོན་བརྒྱ་མཐོང་བ་དང་། །ཚེ་རིང་ནད་མེད་བདེ་
སྐྱིད་ཕུན་སུམ་ཚོགས། །ཐེག་པ་མཆོག་ལ་ངེས་པར་སྤྱོད་གྱུར་པའི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ། །ཞེས་ཚེ་གཟུངས་བརྗོད། སྦྱིན་པའི་སྟོབས་ཀྱིས་སོགས། དགའ་སྟོན་ཚོགས་འཁོར་ལ་སོགས་བྱའོ། །དེ་ནས་གླུད་ཡས་རྣམས་བྲན་ལ། ཨོཾ་བཛྲ་ཨ་མྲྀ་ཏ་སོགས། ཨོཾ་སྭ་བྷ་ཝ་སོགས། སྟོང་པའི་ངང་ལས་མདུན་གྱི་གཞིརཾ། །ཆུང་སྲི་ནག་མོ་ཁྲོ་མོའི་གཟུགས། །འཕྲོག་མ་མ་བུ་ལྔ་བརྒྱ་དང་། །བྱིས་པའི་གདོན་ཆེན་བཅོ་ལྔ་དང་། །ཆུང་སྲིའི་གདོན་ཚོགས་ཀུན་གྱིས་བསྐོར། །དཀོན་མཆོག་གསུམ་གྱི་བདེན་པའི་མཐུས། །བྱིས་པའི་གནོད་བྱེད་གདོན་བགེགས་ཀུན། །སྐད་ཅིག་ཉིད་ལ་འདིར་ཁུག་ཅིག །ཛཿཧཱུྃ་བཾ་ཧོཿ བདེ་གཤེགས་རིན་ཆེན་མང་དང་གཟུགས་མཛེས་དང་། །འབྱམས་ཀླས་འཇིགས་ཀུན་བྲལ་ལ་ཕྱག་འཚལ་ལོ། །བྱིས་པ་མི་བུ་འདི་ལ་གནོད་བྱེད་པའི། །ཆུང་སྲི་བུ་རྐུན་འཕྲོག་མ་མ་བུ་དང་། །འཇམ་པ་པོ་དང་སྐེམ་བྱེད་རི་དྭགས་རྒྱལ། །བརྗེད་བྱེད་མ་མོ་ཛ་མི་ཁུ་ཚུར་ཅན། །འདོད་ཅན་ནམ་གྲུ་སྲུལ་པོ་མ་དགའ་བྱེད། །བྱ་དང་གཉའ་ལག་བཞིན་རྒྱན་མིག་འཕྱང་པ། །དེ་ལྟར་
གདོན་ཆེན་བཅོ་ལྔ་དེ་དག་གིས། །དབང་པོ་སྤྱོད་ཡུལ་ཁམས་རྣམས་ཚིམ་བྱེད་པ། །གླུད་དང་ཡས་སྟགས་རྣམ་པ་སྣ་ཚོགས་འདི། །བྱིས་པའི་ཚེ་གླུད་སྲོག་རྐྱེན་བུ་ལོན་འཇལ། །སོ་སོར་ཅི་འདོད་ཟག་མེད་བདེ་སྐྱིད་གྱུར། །ཁ་འབར་མའི་སྔགས་དང་། ཨོཾ་ཨ་རེ་མ་ཏི་ཏུ་ཏེ་ཧཱུྃ་ཕཊ། ལན་བདུན་གྱིས་བསྔོའོ། །མཉེས་ཚིམ་དགའ་མགུ་ཡི་རང་གནོད་སེམས་སྤོངས། །བདེ་གཤེགས་རྒྱལ་བའི་བཀའ་འདས་དམ་མ་བཀྲལ། །བྱིས་པའི་བར་ཆད་ཚེ་ལན་བདུད་མ་བྱེད། །འདོད་ཡོན་གླུད་དང་གཏོར་མ་འདི་ཁྱེར་ལ། །རང་རང་སོ་སོའི་གནས་སུ་ཕྱིར་དེངས་ཤིག །གལ་ཏེ་མི་འགྲོ་འདུག་ན་རྡུལ་དུ་བརླག །དེ་བས་རང་སྲོག་གནས་བཟུང་རང་གནས་དེངས། །ཕྱིན་ཆད་འཁོར་འདིར་གནོད་པ་མ་བྱེད་ཅིག །ཨོཾ་སུམྦྷ་ནི་སོགས། ལོ་བདུད་ཕྱོགས་སུ་བསྐྱལ། ཧཱུྃ། རང་ཉིད་ལྷ་ཡི་ཐུགས་ལས་འོད་ཟེར་འཕྲོས། །ཁྲོ་བོ་ཁྲོ་མོ་ཁྲོ་ཆུང་ཕྱག་མཚན་དང་། །ཡིག་འབྲུ་འཇའ་ཚོན་མེ་དཔུང་གུར་ཁང་འཁྲིགས། །སྟེང་འོག་ཕྱོགས་མཚམས་བར་ཆད་ཐམས་ཅད་སྲུང་། །ཨོཾ་བཛྲ་རཏྣ་པདྨ་ཀརྨ་ཙཀྲ་ཛྭ་ལ་རཀྵ་ཧཱུྃ་ཧཱུྃ། དེ་ནས་ཚེ་མདུད་མགུལ་དུ་བཏགས་ལ། ཧཱུྃ༔ རིག་འཛིན་ཚེ་དཔག་མེད་པའི་ཐུགས་
རྗེ་དང་། །རྒྱལ་བ་སྲས་བཅས་དྲང་སྲོང་རིག་པ་འཛིན། །བླ་མ་ཡི་དམ་མཁའ་འགྲོ་ཆོས་སྐྱོང་དང་། །བདེན་ཚིག་གྲུབ་པ་རྣམས་ཀྱི་བདེན་སྟོབས་ཀྱིས། །བསྲུང་བྱ་འདི་ལ་བདག་གིས་བསྲུངས་ཟིན་གྱིས། །འདི་ལ་སུས་ཀྱང་གནོད་པ་མ་བྱེད་ཅིག །ཡི་དམ་སྔགས་ཤམ་དུ། བཛྲ་རཀྵ་རཀྵ་ཧཱུྃ། བགེགས་རིགས་སྟོང་ཕྲག་བརྒྱད་ཅུ་ཞི་སོགས། །བཀྲ་ཤིས་བསྔོ་སྨོན་བྱ། ཕྱི་རྗེས་མི་མངོན་པར་བྱ། དེ་ལྟར་མིའུ་རིན་ཆེན་ཐར་འདོན་ཐབས་སྔོན་ཚེ་མཛད་མཁན་མང་ཡང་གསལ་ཆ་མེད་པས་ཐར་ཆུང་། བྱིས་ཁྲ་སྤར་འབྱེད་དང་། ལུ་གུ་སྒྲོག་བཀྲོལ། ངར་མི་པང་སྤྲུག་སོགས་ཀུན་གྱིས་དོན་བསྡུས་གོ་བདེ་ཟབ་པ་འདི། རཱ་ག་ཨ་སྱས་འགྲོ་ལ་ཕན་པར་དགེ་བས་སེམས་ཅན་དོན་དུ་བྲིས། ཉེས་འགལ་མཆིས་ན་རྩ་གསུམ་ལྷ་ལ་བཤགས།། ༈ རྟེན་འབྲེལ་གྱི་སྲིའུ་གསོ་ཐབས་བཞུགས་སོ། །སྲིའུ་ཐབས་རྟེན་འབྲེལ་ལ་འབྱུང་བ་རྟེན་འབྲེལ་རྫས་སྔགས་ཁ་ཟས་སོགས་དང་པོར་འབྱུང་བ་རྟེན་འབྲེལ་སྲིའུ་གསོ་བ་ནི། བྱིས་པ་བཙས་ནས་ལག་ཏུ་མ་བླང་པར། ལྟེ་བ་བཅད་པའི་ཁྲག་དང་། ནུ་ཞོ་དང་ཙནྡན་དཀར་པོ་བསྲེས་པའི་ཕྱེ་མ་གསུམ། ལྟེ་བ་སྡོམ་དང་། ཡན་ལག་མཐིལ་བཞིར་བྱུག །དེའི་ཡོན་ཏན་ཁྲག་གིས་སྲོག་བརྟན་ཞིང་། ནུ་ཞོས་མདངས་རྒྱས། ཙནྡན་སྟོབས་བསྐྱེད། དེ་ནི་འབྱུང་བ་ཡིད་བཞིན་ནོར་བུ་ཡིན། རྒྱ་རྒྱ་རྒྱ། གཉིས་པ་རྟེན་འབྲེལ་
སྲིའུ་གསོ་བ་ནི། བྱིས་པ་བཙས་ནས་རྐན་མར་མ་གཏད་པར་དཔྲལ་བའི་མཐིལ་དུ་གི་ཝཾ་གིས་ཨོཾ་ཞིག་བྲིས། ལྕེ་རྩ་བར་གུར་གུམ་གྱིས་ཨཱཞིག་བྲིས། སྙིང་ཁའི་ཐད་དུ་ཐིག་ལེའི་ཧཱུྃ་ཞིག་བྲིས། དེའི་ཡོན་ཏན་ནི་ཨོཾ་གྱིས་ལུས་ནད་དཀོན། ཨཱཡིས་ལྕེ་བདེ་སྣ་འགུགས་འགས་པ་སེལ། ཧཱུྃ་གི་ཡིད་བཞིན་ནད་དང་གདོན་ལས་ཐར། །དེ་ནི་རྟེན་འབྲེལ་ཡིད་བཞིན་ནོར་བུ་ཡིན། ༈ གསུམ་པ་ཁ་ཟས་ཀྱི་སྲིའུ་གསོ་བ་ནི། སྐྱེས་ནས་ཁ་རུ་ཅི་ཡང་མི་གཏོང་བར། །སྤྱང་ཀིའི་རིལ་མ་ཀ་ར་ས་ལེ་སྦྱར། མར་གྱི་རིལ་བུ་བྱས་ནས་བུ་ལ་བྱིན། སྤྱང་ཀིའི་རིལ་མས་གདོན་དང་བགེགས་ཐུབ་ཅིང་། གསེར་གྱི་བཀྲ་ཤིས། ཀ་རས་བློ་རྣོའོ། །དེ་ནི་སྨན་བཟང་ཡིད་བཞིན་ནོར་བུ་ཡིན། རྒྱ་རྒྱ་རྒྱ། ༈ བཞི་པ་རྫས་ཀྱི་སྲིའུ་གསོ་བ་ནི། རྨ་བྱའི་སྒྲོ་མདངས་རྟེན་འབྲེལ་སྙིང་པོ་འདོན། རིན་ཆེན་སྣ་ལྔ་སྨན་སྣ་ལུས་ལ་བྱུག །རྟེན་འབྲེལ་སྙིང་པོས་སྲི་གདོན་ཐུབ། རིན་ཆེན་སྣ་ལྔས་འདྲེ་སྲིན་ཐུབ། སྨན་སྣ་ཚོགས་ཀྱིས་ས་བདག་ཐུབ། དེ་ནི་རྫས་ཀྱི་ཡིད་བཞིན་ནོར་བུ་ཡིན།། ༈ ལས་སྔགས་ཀྱི་སྲིའུ་གསོ་བ་ནི། རྟེན་འབྲེལ་སྙིང་པོ་བཟླས་པ་སྤྱི་བོར་བཏབ། ཚེ་ཡི་སྙིང་པོ་བཟླས་པ་ཁོང་དུ་བཏང་། ཡི་དམ་སྙིང་པོ་བཟླས་པ་ལུས་ལ་གཏོང་། རྟེན་འབྲེལ་སྙིང་པོས་བཀྲ་ཤིས། ཚེའི་སྙིང་པོས་ཚེ་རིང་། ཡི་དམ་ཕོ་བྲང་ལུས་ལ་ཐིམ། འདི་ནི་སྔགས་ཀྱི་ཡིད་བཞིན་ནོར་བུ་ཡིན། ས་མ་ཡ། རྒྱ་རྒྱ་རྒྱ། བུ་དང་བུ་རོགས་བྱུང་དཀའ་ན། རྒྱུ་རུ་ལུག་ཐུག་འབྲས་བུ། མིན་ན་ནག་པོ་སྦྲུལ་ཤ་སྦྱར་ལ་
བཏང་ན་མྱུར་དུ་ཐོན། ཨོཾ་ཏྲེ་ཙེ་ཤ་ཀུན་འཚང་བ་ལ་སྲུངས་ཤིག །སྲིའུ་གསོ་བའི་གདམས་པའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།